मिनती जीतल, अन्हार हारल

मिनती मारडी नैसर्गिक सुंदरता से भरल जगह में रहेली. उनका घर लगे एक ओरी अजय नदी कलकल बहेला. त दोसरा ओरी कमल के फूल के पोखरा पार करम त तनिके दूर पर रेलगाड़ी के पटरी लउकी.

दुनिया में अइली त उऩका संगे रीढ़ आ गोड़ के टीबियो चल आइल. पस्चिम बंगाल के बीरभूम के माहुला गांव में रहे वाली मिनती पांच बरिस के भइली त दूर से सब कुछ देखस, बाकिर चले-फिरे से लाचार कहूं आ-जा ना सकस.

मिनती के दादी जबा मारडी इयाद करे लगली, “ओकर रीढ़ पूरा तरीका से टेढ़ हो गइल रहे. एतना कष्ट रहे कि हमनी के देख के लागत रहे अब ई ना बचिहन.”

पस्चिम बंगाल के लगभग आधा आबादी संताल लोग के बा. ऊ लोग जादे करके गांव-देहात के इलाका में रहेला आ वैद्य-हकीम पर निर्भर करेला. एह राज्य (ग्रामीण स्वास्थ्य आंकड़ा) में पीएचसी (प्राथमिक स्वास्थ्य केंद्र) जइसन स्वास्थ्य केंद्र के हालत खराब बा, आउर एह में डॉक्टर लोग के भारी कमी बा.

छोट मिनती के सांस लेवे में जब कठिनाई होखे लागल, त परिवार के लोग उनका मोहल्ला के वैद्य लगे ले गइल. हालांकि ऊ लोग निस्चित ना रहे कि वैद्य डिग्रीधारी बाड़न कि ना. बीरभूम जिला के एकदम पिछड़ल इलाका, सिउरी-1 ब्लॉक में ई जानलो भारी मुस्किल के बात रहे. जबा बतावेली, “हमनी के तनिको आइडिया ना रहे सही डॉक्टर कहंवा भेंटाई.”

टीबी हजारन साल पुरान रोग बा- मिस्र आ पेरू के ममी सब में ई 9,000 ईसा पूर्व मिलल रहे. भारत के पुरान आयुर्वेदिक ग्रंथ सब में एकरा ‘यक्ष्मा’ पुकारल गइल बा, जेकर जिकिर 1,000-600 ईसा पूर्व के ग्रंथ सब में मिलेला.

माइकोबैक्टीरियम ट्यूबरक्यूलोसिस नाम के जीवाणु के संक्रमण से होखे वाला रीढ़ के टीबी (स्पाइनल ट्यूबरक्यूलोसिस), फेफड़ा के बाहिर देह के दोसर अंग में होखे वाला सबले आम टीबी बा. बच्चा के जदि ई हो जाए, त काले समझीं. काहेकि ओह लोग के हड्डी बहुते कोमल होखेला आउर एकरा चलते हड्डी स्थायी रूप से बिगड़े के डर होखेला. सन् 2014 में छपल ‘ट्यूबरक्यूलोसिस स्पॉन्डिलाइटिस इन चिल्ड्रेन’ नाम के रिपोर्ट में ई सब जानकारी देवल गइल बा. ई हड्डी के गला देवेला आ ओह लोग के बढ़े पर ग्रहण लगा देवेला.

मिनती के टीबी बा, ई बात उनका सन् 2010 में जनमला के तुरंते बाद पता चल गइल. मिनती के बाऊजी गोपाल मारडी एह रोग के बारे में इयाद करत कहेलन, “हमनी देखनी उनकर पीठ टेढ़ हो रहल बा, आ गोड़ो में ताकत नइखे. हमनी त बहुते घबरा गइनी. समझ ना आवत रहे का करीं.” मिनती के जनम देवते उनकर माई मर गइली. ओह घरिया गोपाल मारडी उनकर परवरिश अकेलहीं कइलन.

लइकी भइल मिनती खातिर अपराध बन गइल. केहू उनका ठीक होखे के खातिर जरूरी प्रयास ना कइलक. जबा कहेली, “समाज में आमतौर पर लइकी के बोझ मानल जाला. मिनती के इलाज में जादे दिलचस्पी ना लेवल गइल. ऊपर से ओकर बेसंभार कष्ट देख के जादे करके लोग के लागत ना रहे ऊ बचिहन.”

भूमिहीन किसान होखे चलते, मिनती के इलाज गोपाल मारडी के बूता से बाहिर रहे. दोसरा के जमीन पर मौसमी खेती उनकर कमाई के एकमात्र जरिया रहे. उहो उपज में से जमींदार बटइया ले जात रहे. ऊ पारी के बतइलन, “अबही हम आलू बोके अइनी ह. तीन महीना बाद जब फसल तइयार हो जाई, त मोटा-मोटी 20,000 रुपइया मिली. बाकिर एह में से हमरा बिया आ दवाई के खरचा निकाले के पड़ी, आउर जदि आलू के कुछ हिस्सा नुकसान भइल त ओकरो भुगतान करे पड़ी. ”

गोपाल के कहनाम बा कि ऊ साल भर में 50 से 60 हजार रुपइया कमा लेवेलन. ऊ पूछेलन, “एतना कम कमाई में हम ओकर देखभाल आउर इलाज के खरचा कइसे उठा सकत रहीं?”

मिनती के हाल में जब कवनो सुधार ना भइल आउर इलाका के वैध जी के भी कवनो बस ना चलल, त जइसन कि जबा मारडी बतावेली, “हमनी मिनती के डॉक्टर से देखावे कोलकाता ले गइनी.”

डॉक्टर मिनती के देखलन, तवन घरिया ऊ 10 किलो के रहस. उनकर वजन पांच साल के दोसर लइकन के बनिस्पत लगभग आधा रहे.

डॉ. सौम्यजीत बासु बतावत बाड़न, “हमनी उनकर हालत देखके परेसान हो गइनी. देह बहुते कमजोर रहे. समझ गइल रहीं कि उनका ठीक करे खातिर कइएक सर्जरी करे पड़ी. बाकिर ऊ उहो हालत में ना रहस.” डॉ. सौम्यजीत बासु नामी स्पाइन सर्जन हवन आ कोलकाता में स्पाइन रिसर्च फाउंडेशन (एसआरएफ) के सह-संस्थापक भी बाड़न.

सुरु-सुरु में मिनती के रीढ़ में आइल गड़बड़ी ठीक करे खातिर उनका ब्रेस पहिरावल गइल, जे खास करके अइसने स्थिति वाला मरीज लोग के पहिरावल जाला. गैरसरकारी संगठन स्पाइन रिसर्च फाउंडेशन (एमआरएफ) गरीब परिवार के लोग के रीढ़ के बेमारी के इलाज के खरचा उठावेला. जवन लोग के ई मदद ना मिल सके, ओह लोग के सरकारी अस्पताल में इलाज खातिर बहुते इंतजार करे पड़ेला. ई संस्था हर साल मोटा-मोटी 60 मरीज के सर्जरी करावेला. सोलह बरिस पहिले संस्था के सुरुआत में ई गिनती बहुते कम रहे.

दू महीना बाद, 28 जुलाई, 2015 के मिनती के दू में से पहिल सर्जरी कइल गइल. सर्जरी आठ घंटा ले चलल. एकरा बाद उनका पुनर्वास केंद्र भेज देवल गइल. एकर एक महीना बाद दोसरका सर्जरी भइल. आ जइसन कि डॉ. बासु बतावत बाड़न, “मिनती आपन गोड़ से चलके घर लउटली.”

बाकिर अबही सब कुछ ठीक ना भइल रहे. उनका ब्रेस पहिरे के जरूरत रहे. ब्रेस वइसन मरीज के पहिरावल जाला जेकर रीढ़ के टेढ़ होखे से रोके, चाहे ओकरा में कवनो सुधार के जरूरत पड़ेला. ब्रेस देह के कमजोर हो चुकल मांसपेशी सब के सहारा देवेला आ टेढ़ रीढ़ के सोझ कर सकेला.

एगो ब्रेस के दाम मोटा-मोटी 1.3 लाख रुपइया पड़ेला. डॉ. त्रिनंजन सारंगी, जे एनेस्थेसियोलॉजिस्ट आ स्पाइन रिसर्च फाउंडेशन (एसआरएफ) के सह-संस्थापक बानी, बतइलन, “हमनी लइकी के परिवार के माली हालत के बारे में जानत रहीं. एहि से उनकर सर्जरी आ पुनर्वास के पूरा 8 लाख के खरचा हमनी उठइनी.”

मिनती के अस्पताल से छुट्टी मिल गइल आ उनका कार से गांव उनकर घर भेज देवल गइल. उनकर घर माटी से बनल बा, जेकर देवाल सब पर सुन्नर सुन्नर कलाकारी कइल बा. संताली आदिवासी लोग पारंपरिक रूप से माटी के बनल अइसने घर में रहेला. ऊ लोग आपन घर के हाथ से चित्रकारी करके सजावेला. घर में पूजा खातिर एगो कोना बा. उहंवा ऊ लोग आपन पुरखा लोग के आत्मा के सम्मान से इयाद करेला. एकरा अलावे एह घर में एगो चौका, एगो अंगना आ एगो गौशाला भी बा.

मिनती 13 साल के हो गइल बाड़ी. पारी से भेंट भइल, त ऊ आपन बाऊजी आउर उनकर दोसर घरवाली पालमनी मारडी संगे रहस. मिनती आपन सौतेल महतारी के प्यार से देख के मुस्कइली आ कहली, “माइयो हमार बहुते ख्याल रखेली.”

पालमनी मारडी रिपोर्टर के बतइली, “हमार बेटी बहादुर बाड़ी. उनकर मजबूत आत्मबिस्वास चलते हमनी एतना बड़ आ लमहर लड़ाई करे के हिम्मत जुटा पइली. अब ऊ पूरा तरह से ठीक बाड़ी. घर के काम में हमार मददो करेली आ साइकिल चलाके स्कूल जाली.”

आपन लइकी के दुलार से देखत पालमनी कहली, “उम्मीद बा कि उनका हमेसा बड़ के आसीर्वाद मिली आ डॉक्टरो हमनी संगे रहिहन.”

अनुवाद: स्वर्ण कांता