மராத்வாடாவின் ஆபத்தான குறுவை சாகுபடி

அம்பதாஸ் காகடே தெரிந்தே ஆபத்தில் இறங்கியுள்ளார். சம்பா பருவத்தில் இரண்டாவது சுற்று நடவு செய்துள்ளார். விவசாயத்திற்கு செய்யப்பட்ட செலவில் சிறிதேனும் கையில் நிற்கும் என்பது அவரது இறுதி நம்பிக்கை

மழைக்காலம் ஓரளவு சிறப்பாக இருந்த காரணத்தால் ஜூன் மத்தியில், பர்பானி மாவட்டம் சைலு வட்டம் மோரிகான் கிராமத்தைச் சேர்ந்த 83 வயது விவசாயி பருத்தி, சோயாபீன், துவரை, பாசிப்பயறு போன்றவற்றை பயிரிட்டார். ஆனால் ஆகஸ்ட் நடுவாக்கில் கூட மராத்வாடாவில் மழை பெய்யவில்லை. பிராந்தியத்தில் பர்பானி உள்ளிட்ட பெரும்பாலான பகுதிகளில் பயிர்கள் காய்ந்தன அல்லது வளர்ச்சியின்றி காணப்பட்டன. காகடேவின் சோயா, துவரை, பாசிப்பயறு போன்றவைக் கூட சுருங்கிவிட்டன.

“என்னிடம் 10 ஏக்கர் நிலம் உள்ளது,” என்கிறார் காகடே. “ஒரு ஏக்கரில் பருத்தியை பிடுங்கிவிட்டு, முட்டைகோஸ் [ஜூலை இறுதியில்] பயிரிட்டேன்.” அது மூன்று மாத கால பயிர் என்பதால் தண்ணீர் அதிகம் தேவைப்படாது. மழை அப்போது பெய்யாவிட்டால் நான் பிற பயிர்களுக்கு பதிலாக தக்காளி செடிகள் நடுவேன் [தண்ணீர் குறைவாகவே தேவைப்படும் செடி].

ஜூன் மாதம் நடவு செய்த பருத்தி பயிர்களை பிடுங்கிவிட்டு முட்டைகோஸ் பயிரிட்டதில் காகடேவிற்கு ஒரு ஏக்கருக்கு ரூ.15,000 இழப்பு ஏற்பட்டுவிட்டது. வறட்சி நிலை நீடித்தால் அவருக்கு முட்டைகோஸ் பயிரிலும் கூடுதலாக ரூ.15000 இழப்பு ஏற்படும்.“ இந்த பருவத்தில் இலாபம் கிடைக்காது என்று எனக்குத் தெரியும்,” என்கிறார்.

காகடே வங்கியில் ரூ. 3 லட்சமும், வட்டிக்கு ரூ. 5 லட்சமும் கடன் பெற்றுள்ளார். “நான் இரண்டு பயிர்களுக்கும் [ஒரு ஏக்கரில்] செய்த செலவை மீட்கலாம் என்று நம்புகிறேன். நாம் எல்லோரும் இயற்கையின் கருணையை நம்பி வாழுகிறோம். கடந்த 10 ஆண்டுகளாக பருவநிலையை கணிக்க முடியவில்லை. அக்டோபர் மாத சம்பா பருவத்திற்கு யாரிடமும் பிச்சை எடுக்கும் நிலை ஏற்படாது என நான் நம்புகிறேன்.”

காகடே தனது 10 ஏக்கர் நிலங்களிலும் பருத்தி பயிருக்கு மாற்று பயிர் நட முடியாது என்பதால் மிச்ச பருத்தி பயிர்களை தக்க வைத்துள்ளார். மராத்வாடாவில் ஆகஸ்ட் மாத இரண்டாம் பாதியில் பருவ மழை பெய்யும் போது பயிர்களை காப்பாற்றிவிடலாம் என்று அவர் நம்புகிறார். மழை தொடர்ந்தால், நவம்பரில் பருத்தி பயிர்களை அறுவடை செய்யலாம், ஓரளவு இலாபம் கிடைக்கும். முதல் சுற்றில் பயிரிட்டு காய்ந்து போன உணவுப் பயிர்களை மீட்க முடியாது.

தனது நிலத்தின் ஒரு பகுதியில் மட்டும் இரண்டாவது சுற்று நடவு செய்வதன் மூலம், காகடே தனது சவால்களை ஈடு செய்கிறார். ஜூன் மத்தியில் மராத்வாடா விவசாயிகள் பயிரிட்ட முதல் சுற்று சம்பா பயிர்களுக்கு தொடர்ச்சியான மழை தேவை. ஒருவேளை மழை பொய்த்தாலோ, குறைந்தாலோ, போதிய விளைச்சல் கிடைக்காது என்று விவசாயிகளுக்குத் தெரியும். இருந்தும் ஆகஸ்ட் மாதம் முதல் வாரம் இரண்டாம் நடவுக்கு கடன் வாங்கி துணிவுடன் விவசாயிகள் களம் காண்கின்றனர். தங்கள் முதலீடையாவது காப்பாற்றலாம் என்று அவர்கள் நம்புகின்றனர். இரண்டாவது சுற்றில் மழை பெய்துவிட்டால் தப்பிக்கலாம். இல்லாவிடில் இரட்டை அடி தான்.

வயது 80களில் உள்ள காகடே, தனது விளைநிலத்தில் மெதுவாக நடக்கிறார். பருவநிலையை கணிக்க முடியாமல் தவிக்கிறார். “எங்கள் குடும்பத்தில் 16 பேர். எனது மூன்று மகன்களுக்கும் திருமணமாகிவிட்டது. அவர்கள் கூடுதல் வருவாய்க்கு விவசாய வேலைக்கு [அருகமை கிராமங்களில்] செல்கின்றனர். என் பேரக்குழந்தைகள் விவசாயத்திற்கு உதவிக் கொண்டு படிக்கின்றனர்.”

சுமார் மூன்று கிலோமீட்டர் தொலைவில் உள்ள குப்சா கிராமத்தில், 49 வயது சாஹிப்ராவ் தாசல்கார், காகடேவின் வழியில் நடக்கிறார். அவர் தனது 12 ஏக்கர் நிலத்தில் பருத்தி பயிரிட்டு இருந்தார். அவற்றில் ஒன்றரை ஏக்கர் நிலத்தில் பருத்தியை நீக்கிவிட்டு ஓரளவு இலாபம் கிடைக்கும் என்ற நம்பிக்கையில் முட்டைகோஸ் பயிரிட்டுள்ளார். பெருமளவு பருத்தி பயிர்களை நான் நீக்கவில்லை, மழை தாமதமாக பெய்தால் கூட ஏக்கருக்கு 2-3 குவிண்டால் [நல்ல மழைக்காலம் என்றால் 6-8 குவிண்டால்] கிடைக்கும். எனக்கு ஓரளவு பணம் கிடைக்கும் [குவிண்டாலுக்கு சுமார் ரூ.4000].”

மராத்வாடாவில் தொடர் வறட்சி நிலை நீடிப்பதால், உணவுப் பயிர்கள் கருகி வருகின்றன. இதனால் விவசாயிகள் பெரிய சிக்கலில் உள்ளனர். லத்தூர் மாவட்டம் ஜல்கோட் வட்டாரத்தில் உள்ள மலிஹப்பர்கா கிராமத்தைச் சேர்ந்த 35 வயது ஹரி கேந்திரேவின் சொந்த நிலம் காய்ந்து போனதால் விவசாய கூலி வேலை செய்து வருகிறார். “இரண்டாவது சுற்று நடவுக்கு அப்போது தான் என்னால் பணம் செலவு செய்ய முடியும்,” என்றார், நிலத்தை உழுதபடி. “எனது 10 ஏக்கர் நிலத்தில் பயிரிடப்பட்ட சோயாபீன், பாசிப் பயறு, உளுந்து அனைத்தும் நாசமாகின. 60,000 ரூபாய் நஷ்டம்.”

மழையின்றி ஜல்கோட் நீர்பாசனமும் வறண்டு போனது. “சூரியகாந்திக்கு [உணவுப் பயிர்] தண்ணீர் அதிகம் தேவையில்லை,” என்கிறார் கேந்திரே. “தினக்கூலி 200 ரூபாய் கிடைப்பதால் அக்டோபர் மாத குறுவை சாகுபடியை ஓரளவு சமாளித்துவிடுவேன் என்றார். “நான் 4 லட்சம் ரூபாய் வட்டிக்கு கடன் வாங்கியுள்ளேன்,” என்கிறார். “இன்னும் கடன் வாங்கினால் மூழ்கிவிடுவேன். எனது பயிர்களை கொண்டு பணத்தை ஈட்ட வேண்டும்.”

கடந்த ஆண்டுகளிலும் கூட மராத்வாடா விவசாயிகள் இதேப்போன்ற ஒரு சூழலை தான் எதிர்கொண்டனர். மழைக்காலம் தொடங்கிய பிறகும் பல வாரங்களாக ஒரு துளி மழையில்லை. பலரும் இரண்டாவது சுற்று நடவை மூலம் தங்களின் அதிர்ஷ்டத்தை சோதித்து பார்க்கின்றனர். அப்பிராந்தியத்தில் 2012-2015 வரை நான்கு ஆண்டுகளாக வறட்சி நிலவுகிறது. விவசாயிகளால் ஆண்டுதோறும் நடவு செய்ய பணம் திரட்ட முடியவில்லை. எனினும் விவசாயிகள் சிலர் 2017ஆம் ஆண்டு துணிச்சலுடன் பயிரிட்டுள்ளனர். பலர் குறுவை பருவ சாகுபடி பயன் தராது என்று ஏற்றுக் கொண்டுள்ளனர்.

பீட் மாவட்டத்தில் உள்ளமஜல்கான்கிராமத்தைச்சேர்ந்த 32 வயதாகும் கணேஷ் பலேகர், பலவிவசாயிகள்இந்தஆண்டுஇரண்டாவதுசுற்றுவிதைப்பிலிருந்துவிலகிநிற்கிறார்கள் என்றும் ஏனெனில் சம்பா பருவத்திற்குமுன்பே அவர்கள் கடன் வாங்கியிருந்தனர் என்றும்கூறுகிறார். "மேலும் கடன் வாங்கி, மற்றொருசுற்றுவிதைப்புக்கு துணிவது தற்கொலைக்கு சமம்," என்றுஅவர்கூறுகிறார். "எங்கள் தலையில் போதுமான கடன்கள்உள்ளன. குறுவை பருவத்திற்கு நேரடியாக தயார் செய்யும்நடைமுறையும்உள்ளது.

பலேகர் வட்டிக்கு ரூ.1 லட்சம் கடன் வாங்கியுள்ளார். சொந்தமாக நிலமற்ற அவரால் எந்த வங்கியிலிருந்தும் கடன் பெற முடியாது. அவர் 13 ஏக்கரில் கரும்பு, ஐந்து ஏக்கரில் சோயாபீன் என மொத்தம் 18 ஏக்கரில் விவசாயம் செய்கிறார். நில உரிமையாளரிடம் செய்துள்ள ஒப்பந்தப்படி செலவுகளில் 25 சதவிகிதத்தை கணேஷூம், மீதமுள்ள 75 சதவிகிதத்தை உரிமையாளரும் செலுத்துகிறார். இலாபமோ, நஷ்டமோ அதே பங்கு தான்.

“ஐந்து ஏக்கர் சோயாபீன் முற்றிலும் காய்ந்துவிட்டது,” என்றபடி தனது வறண்ட பயிர்களை சுட்டிக்காட்டுகிறார். ”சோயாபீன் சாகுபடிக்கு நான் செலவிட்ட 15,000 ரூபாயும் வீண் என்று எனக்குத் தெரியும். மழையின்றி கரும்பும் பாதித்துவிட்டது. கரும்பில் வெண் புள்ளிகளை பாருங்கள். விளைச்சல் மோசமாக இருக்கும்…“

பலேகரைப் போன்று ஜால்கோட் வட்டம் கொல்நூர் கிராமத்தைச் சேர்ந்த சுரேஷ் சோலே, மழை வந்தால் பிழைக்கக் கூடிய பயிர்களை நடவு செய்யவில்லை. அவரது 4.5 ஏக்கர் நிலத்தில் பயிரிடப்பட்ட சோயாபீன், துவரை, சோளம் போன்றவை மோசமான நிலையில் உள்ளன. “அதை பாருங்கள்,” என்கிறார். “இந்நேரம் [ஆகஸ்ட் முதல் வாரத்தில்] இடுப்பளவு வளர்ந்திருக்க வேண்டும். முழங்கால் அளவு கூட வளரவில்லை.” ஆகஸ்ட் இறுதியில் மழை வந்தால் கூட பயனில்லை. “பயிர்களுக்கு தொடர் மழை வேண்டும்,” என்கிறார். “விதைப்பதற்காக நான் 45000 ரூபாய்க்கு விதைகள், உரங்கள், பூச்சிக்கொல்லிகள், தொழிலாளர் கூலி கொடுத்துள்ளேன். அதில் 10 சதவிகிதம் கூட திரும்பிக் கிடைக்காது…”

எது எப்படியோ மற்ற விவசாயிகளைப் போன்று கடினமான முடிவை சோலேவும் எடுக்க வேண்டும்: இரண்டாவது முறையாக விதைத்து, பணமிழக்கும் ஆபத்தில் சிக்குவாரா? “எனக்கு நம்பிக்கையில்லை,” என்கிறார். “வறட்சி [இதுவரையிலும்] என்பது தெளிவாகிவிட்டது. மீண்டும் ஒரு ஆபத்தை எதிர்கொள்ள எனக்கு துணிவில்லை.”

இந்த உரையாடலுக்கு இரண்டு வாரங்களுக்குப் பிறகு ஆகஸ்ட் மத்தியில், மராத்வாடாவில் கனமழை பெய்தது. இரண்டாவது முறை நடவு செய்த விவசாயிகளுக்கு நிம்மதி அளித்திருக்கும். சோலே போன்றவர்கள் இந்தாண்டு இரண்டாவது முறை நடவு செய்திருக்கலாம் என்று நினைத்திருப்பார்கள். ஆண்டுதோறும் இப்படி கணிக்க முடியாத சூழலையே விவசாயிகள் எதிர்கொள்கின்றனர்.

தமிழில்: சவிதா