کام کرنے والی خواتین کیلئے باعث رحمت ’لئیکا گھر‘

ایک بندر چمپا پٹّی کے بچہ کو چھین کر بھاگنے ہی والا تھا۔ وہ اپنے گاؤں راجپور کے پاس واقع جنگل گئی ہوئی تھیں، جب یہ واقعہ پیش آیا۔ اس نوجوان ماں نے اپنے بچہ کو پیٹھ پر باندھ رکھا تھا اور ہفتہ واری ہاٹ (بازار) میں بیچنے کے لیے جنگل سے مہوا اور ساگوان کے بیج چُن رہی تھیں۔

وہ بتاتی ہیں، ’’کام کرتے وقت میں نے اسے تھوڑی دیر کے لیے زمین پر چھوڑ دیا تھا اور دیکھا کہ ایک بندر میرے بچہ کو پکڑنے کی کوشش کر رہا ہے۔‘‘ اس کے بعد وہ لگاتار جنگل جاتے وقت اپنے بچہ کی حفاظت کے بارے میں فکرمند رہنے لگیں۔

مگر اب انہیں اپنے بچہ کو جنگل میں ساتھ نہیں لے جانا پڑتا۔ چمپا جیسی چھتیس گڑھ کے گاؤوں کے نوزائیدہ اور چھوٹے بچوں کی مائیں اپنے بچوں کو پاس کے کسی کریچ (خانہ اطفال) یا ’لئیکا گھر‘ میں چھوڑ سکتی ہیں اور دن میں روزی روٹی کما سکتی ہیں۔ ان میں سات مہینے سے تین سال تک کے بچوں کی دیکھ بھال کی جاتی ہے۔

ریاست بھر میں سرگوجا، دھمتری، جش پور اور رائے گڑھ ضلعوں میں ۳۵۱ کریچ (خانۂ اطفال) ہیں۔ ان ضلعوں میں آدیواسیوں کی بڑی آبادی رہتی ہے، جیسے گونڈ، اُراؤں، کنور، ہلبا، بیگا وغیرہ۔ یہاں فی الحال ۵۰۰۰ بچوں کی دیکھ بھال کی جا رہی ہے۔

دھمتری میں آدیواسیوں کی اکثریت والے نگری بلاک کے راجپور گاؤں کی چمپا شکریہ ادا کرنے کے انداز میں کہتی ہیں، ’’میں صبح اپنے بچہ کو یہاں چھوڑتی ہوں، کام پر جاتی ہوں اور شام کو اسے واپس لے آتی ہوں۔ میں بے فکر ہو کر کام کر سکتی ہوں اور روزانہ تقریباً ۱۰۰-۱۵۰ روپے کما لیتی ہوں۔‘‘

بچہ کی تنہا سرپرست، ۲۸ سال کی چمپا کو معاش حاصل کرنے کے لیے مختلف ذرائع میں کوشش کرنی پڑتی ہے۔ ان کا دن جنگل میں ایندھن کی لکڑی (جلاون) اور چھوٹی موٹی جنگلی پیداوار جمع کرنے میں گزرتا ہے۔ وہ دھان اور سبزی کے کھیتوں میں زرعی مزدور کے طور پر بھی کام کرتی ہیں۔

جھوٹا بہانہ بنا کر ان کی شادی کر دی گئی تھی۔ اس کے بعد سے چمپا کو اپنے اور اپنے بیٹے کے حقوق کے لیے جدوجہد کرنی پڑی، جس کو قانونی طور پر اپنے والد کا نام نہیں ملا ہے۔ گونڈ آدیواسی ہونے کے ناطے وہ اپنے شوہر کے گاؤں میں رہتی ہیں، لیکن انہیں بیوی کا درجہ نہیں ملا ہے، اس لیے وہ گئوشالہ کے ایک کونے میں رہتی ہیں۔

چمپا کے سرکاری دستاویز – ان کے شناختی کارڈ، ووٹر شناختی کارڈ اور بینک پاس بُک، ان کی فیملی نے تلف کر دیے۔ جب وہ بھاگ گئی تھیں، تو وہ ناراض ہو گئے۔ تب سے ان کے لیے سرکاری اسکیموں سے فیضیاب ہونا ناممکن ہو گیا ہے۔

انہوں نے پاری کو بتایا، ’’میں اپنے بچہ کے لیے بھیک مانگ کر، قرض لے کر اور محنت کر کے گزارہ کر رہی ہوں۔‘‘

سرکاری آنگن واڑی مراکز بچوں کو صرف تین سال کی عمر کے بعد ہی لیتے ہیں۔ اس لیے چھوٹے بچوں کی ماؤں کے لیے یہ خانۂ اطفال ایک بڑی کمی کو پورا کر رہے ہیں۔

بچوں کے یہ گھر دو کمروں والے ڈھانچہ میں ہوتے ہیں۔ ایک کمرہ باورچی خانہ کا کام کرتا ہے اور دوسرا بچوں کے لیے ہوتا ہے۔ بچوں کے کھیلنے کے لیے باہر ایک کھلی جگہ ہوتی ہے۔ بچوں کے لیے کھلونے ہوتے ہیں، جیسے بلاک اور پہیلیاں، گیندیں اور یہاں تک کہ ایک تین پہیہ گاڑی بھی۔ کریچ میں فرسٹ ایڈ باکس (ابتدائی علاج کے سامان والے ڈبے) بھی موجود ہیں۔

لئیکا گھر میں بچوں کی دیکھ بھال کرنے والوں میں سے ایک، مینا سنگھ کہتی ہیں کہ ملازمین صفائی کرنے، پانی لانے اور کھانا بنانے کے لیے صبح جلدی آ جاتے ہیں۔

سرگوجا میں دوپہر میں بچوں کو لذیذ میٹھا حلوہ بھی ملتا ہے۔ اور پھر سادہ اور مقوی کھانا – دوپہر میں ستّو کے لڈو، ایک اُبلا انڈا اور کھچڑی – بھی انہیں دیا جاتا ہے۔ راجپور میں واقع کریچ کی دیکھ بھال کرنے والے تیج بگھیل کہتے ہیں کہ یہاں آنے والے زیادہ تر بچے سوء تغذیہ سے بری طرح متاثر ہوتے ہیں، مگر وقت کے ساتھ ان میں بہتری آتی ہے۔

جب للتا کا بیٹا رشی کیش، دسمبر ۲۰۲۳ میں پہلی بار ’لئیکا گھر‘ آیا تب اس کا وزن ساڑھے ۱۰ کلو تھا۔ ایک سال سے بھی کم وقت میں ڈھائی سال کے اس بچہ کا وزن تقریباً ۲ کلو بڑھ گیا، اس کی لمبائی بڑھی اور جسمانی طاقت میں بہتری آ رہی ہے۔

سال ۲۰۱۹-۲۰ کے قومی خاندانی صحت سروے–۵ کی رپورٹ بتاتی ہے کہ پچھلے سروے کے مقابلے بچوں کی غذائیت کی حالت میں بہت زیادہ تبدیلی رونما نہیں ہوئی ہے اور ’’چھتیس گڑھ میں سوء تغذیہ کی مسلسل اونچی سطح اب بھی ایک بڑا مسئلہ بنا ہوا ہے۔‘‘

تقریباً ۳۰ سال کی للتا اپنے شوہر اور ان کے والدین، بھائی بھابھی کے ساتھ رہتی ہیں۔ ان کے پاس چار ایکڑ زمین ہے، جس پر ان کے شوہر کام کرتے ہیں۔ کبھی کبھی للتا گھر کے کام نمٹا کر ان کے ساتھ بھی کام کرتی ہیں۔

گونڈ آدیواسی برادری کی للتا سنگھ کہتی ہیں، ’’لئیکا گھر [کریچ یا خانۂ اطفال] ہمارے لیے رحمت ثابت ہوا ہے۔ اب میرا بچہ اتوار کو بھی لئیکا گھر جانا چاہتا ہے!‘‘

یہ نوجوان ماں چھتیس گڑھ کے سرگوجا ضلع کے سلبا گاؤں کی رہنے والی ہے۔ سرگوجا اور دھمتری کے دونوں کریچ غیر سرکاری تنظیموں – چوپال اور موبائل کریچز – کی پہل ہیں۔

مگر اپنے بچوں کو دوسروں کے بھروسے چھوڑنا عورتوں کے لیے آسان فیصلہ نہیں تھا۔ ان گاؤوں میں ’لئیکا گھر‘ ایک نئی بات تھی اور عورتیں شروع میں اپنے بچوں کو وہاں چھوڑنے سے جھجکتی تھیں۔ سبیتا بائی نشاد بتاتی ہیں، ’’گاؤں میں آنگن واڑی تو تھی، مگر کوئی لئیکا گھر نہیں تھا۔ ہم سوچتے تھے، کیا وہ ہمارے چھوٹے بچوں کی دیکھ بھال کریں گی۔ لیکن پھر ہم نے دیدیوں [دیکھ بھال کرنے والی عورتوں] سے بات کی اور دیکھا کہ وہ کتنی دیکھ بھال کرتی ہیں۔‘‘ اس کے علاوہ، لئیکا گھر کے فائدوں کے بارے میں بیداری پیدا کرنے والی مہم نے اس کے لیے انہیں تیار کیا۔ کچھ کریچ میں روزانہ تقریباً ۱۰-۱۲ بچے آتے ہیں۔

تقریباً ۲۸ سال کی سبیتا اکیلی ماں ہیں، جو راجپور گاؤں میں اپنی بیٹی کے ساتھ رہتی ہیں۔ سبیتا، نشاد برادری (جسے ریاست میں دیگر پس ماندہ طبقہ کا درجہ حاصل ہے) سے تعلق رکھتی ہیں۔ وہ زرعی مزدور ہیں اور تقریباً ۱۵۰ روپے روزانہ کما لیتی ہیں۔

ان کی بیٹی کی جسمانی نشوونما پوری طرح نہیں ہو پائی ہے اور وہ خود نہیں چل پاتی۔ وبائی مرض کے دوران سبیتا اپنے شوہر سے الگ ہو گئیں، کیوں کہ وہ ان سے برا سلوک کرتا تھا، اور اپنی ماں کے پاس لوٹ آئیں۔ لئیکا گھر کھلنے سے ماں اور دادی دونوں اب کام کر سکتی ہیں، جب کہ درگا کو ضرورت کے مطابق دیکھ بھال مل رہی ہے۔

صبح کے تقریباً ۹ بجے ہیں اور بچے پہلے ہی سلبا گاؤں کے کریچ میں پہنچ چکے ہیں۔ کریچ کھلتے ہی مائیں اپنے بچوں کو ہنستے کھیلتے، اپنے دوستوں کے ساتھ خوش ہوتے اور دن کے لذیذ کھانے – کھچڑی، حلوہ، انڈے یا دال چاول کا بے صبری سے انتظار کرتے دیکھتی ہیں۔

اس اسٹوری کا پچھلا شمارہ عظیم پریم جی فاؤنڈیشن کی ویب سائٹ پر شائع ہو چکا ہے۔

ترجمہ نگار: قمر صدیقی