माई कमाई, लरिका फरी-फुलाई

चंपा वट्टी के बचवा के बंदर लगभग उठा ले गइल रहे. उनका संगे ई घटना राजपुर के उनकर गांव लगे के जंगल में भइल रहे. उहंवा ऊ आपन बच्चा के पीठ पर बान्हले हाट में बेचे खातिर जंगल में नीचे गिरल महुआ आ साल के बिया बीनत रहस.

ऊ याद करत कहली, “हम तनी देर खातिर आपन लइका के भुइंया पर धर देले रहीं. तबे एगो बंदर आइल आ ओकरा के उठा ले जाए लागल.” ओह घरिया से उनका बच्चा लेके जंगल में काम करे जाए से डर लागेला.

बाकिर अब उनका आपन लइका के जंगल ले जाए के जरूरत नइखे. छत्तीसगढ़ के गांवन में चंपा जइसन माई लोग दिन में आपन छोट लइका के लगे के ‘लइका घर’ (बच्चा संभारे वाला घर) में छोड़ के कमाए जा सकेला. उहंवा छव महीना से तीन बरिस तक के बच्चा सब के दिन भर रखे के बंदोबस्त रहेला.

छत्तीसगढ़ के अलग-अलग कोना, खास करके सरगुजा, धमतरी, जसपुर आ रायगढ़ जिला में 351 ‘लइका घर’ बा. ई सब आदिवासी बहुल इलाका बा. एकरा में गोंड, ओरांव, कंवर, हलबा, बैगा जइसन आदिवासी समुदाय के लोग रहेला. फिलहाल इहंवा मोटा-मोटी 5,000 नन्हका सब के देखभाल मिल रहल बा.

“भोरे इहंवा आपन लइका के छोड़ के काम पर जाइला आउर लउटत घरिया सांझ में ले लिहिला. अब हम बिना कवनो चिंता-फिकिर काम कर सकत बानी आउर रोज के 100-150 रुपइया के कमाई भी हो जाला,” चंपा कहली. ऊ धमतरी जिला के नगरी ब्लॉक में आदिवासी बहुल गांव, राजपुर में रहेली.

आपन लरिका के अकेले पाले वाली 28 बरिस के चंपा गुजर-बसर खातिर कइएक काम करेली. पहिले त ऊ जंगल से जरावन के लकड़ी आ कुछ छोट-मोट चीज लावेली. फेरु धान आ तरकारी के खेत में मजूरियो करेली.

धोखा से बियाहल चंपा आपन हक आ आपन बेटा के ओकर बाप के नाम देलावे खातिर लड़ाई लड़त बाड़ी. गोंड जनजाति से आवे वाली चंपा सास-ससुर के गांव में रहेली, बाकिर उनका ब्याहता के दरजा नइखे मिलल. एहि से ऊ एगो कोना में टूटल खटाल में रहे के मजबूर बाड़ी.

चंपा के पहचान पत्र, वोटर आईडी आ बैंक पासबुक जइसन सरकारी कागज सब उनकर परिवार फेंक देलक. ऊ जब घर से भगली, त ऊ लोग बहुते गोस्सा भइल रहे. ओही घरिया से चंपा कवनो सरकारी योजना के फायदा ना ले पावत बाड़ी.

ऊ पारी के बतइली, “जिंदा रहे खातिर कबो हम भीख मांगिला, कबो उधार लेवे पड़ेला. बच्चा के पेट भरे खातिर मिहनत-मजूरी करत बानी.”

सरकारी आंगनवाड़ी में खाली उहे बच्चा के रखल जाला, जे तीन बरिस के हो चुकल बा. एकदम छोट बच्चा सब के माई लोग खातिर ई ‘लइका घर’ वरदान बन गइल बा.

दू कमरा वाला मकान में क्रेच बनल बा. एगो में रसोई आ दोसर लइका लोग खातिर बा. उहंवा बच्चा लोग के खेले खातिर खुलल जगहो बा. खेले खातिर ब्लॉक, पहेली, गेंद जइसन खिलौना त बड़ले बा, तिपहियो बा. फर्स्ट-एड बॉक्सो रखल मिली रउआ.

लइका घर में बचवा सभ के संभारे वाली मीना सिंह के कहनाम बा कि काम करे वाला लोग बिहाने उठ के आवेला, झाडू-पोछा करेला, पानी भरेला आ खाना बनावेला.

जदि रउआ सरगुजा के लइका बानी त बहुत भागशाली बानी. इहंवा दुपहरिया में खूब स्वादिष्ठ मीठ-मीठ हलुआ खाए के मिलेला. सत्तू के लड्डू, उसिनल अंडा आ खिचड़ी जइसन सादा मगर पौष्टिक खाना मिली. राजपुर के क्रेच में लरिकन के देखभाल करे वाला तेज बघेल कहेली कि इहंवा आवे वाला लइका लोग जादे करके कमजोर होखेला. बाकिर बाद में धीरे धीरे तंदुरुस्त हो जाला.

ललिता के बेटे रिसिकेस जब दिसंबर 2023 में लइका घर पहिल बेरा आइल, त ओकर वजन 10.5 किलो रहे. एक साल के भीतर ऊ ढाई साल के लइका दू किलो के हो गइल, लंबाई खिंच गइल आउर तंदुरुस्त देखाई देवे लागल.

राष्ट्रीय परिवार स्वास्थ्य सर्वेक्षण 2019-2020 के हिसाब से पछिलका सर्वे से अबले, बच्चा लोग के पोषण के लिहाज से कुछ नइखे बदलल. “छत्तीसगढ़ अबहियो गंभीर कुपोषण के गढ़ बनल बा.”

तीस बरिस के ललिता आपन घरवाला, सास-ससुर, देवर आ ननद संगे रहेली. परिवार के चार एकड़ के जमीन पर उनकर घरवाला खेती करेलन. ललिता घर के काम-काज पूरा भइला के बाद कबो-कबो खेती के काम में घरवाला के हाथ बंटा देवेली.

“लइका घर हमनी खातिर वरदान बा,” ललिता कहेली. ऊ गोंड आदिवासी समुदाय से आवेली. अब त हमार बच्चा एतवारो के लइका घर जाए के खोजेला!”

ललिता छत्तीसगढ़ के सरगुजा जिला के सलबा गांव में रहेली. सरगुजा आ धमतरी के दुनो क्रेच गैरसरकारी संगठन, चौपाल आ मोबाइल क्रेच के पहल बा.

बाकिर सुरु में आपन लइका के दोसरा के भरोसे छोड़ल मेहरारू लोग खातिर आसान ना रहे. ‘लइका घर’ नया-नया सुरु भइल रहे. लगे के गांव आ उहंवा के मेहरारू लोग इहंवा आपन बच्चा छोड़े के लेके संशय में रहे. “गांव में आंगनवाड़ियो बा. बाकिर एको लइका घर नइखे. हमनी सोचनी ई लोग हमनी के छोट बच्चा के ध्यान रखियो पाई कि ना,” सबिता बाई निशाद कहेली. “तब हमनी दीदी लोग (बच्चा के संभारे वाला) से बात कइनी आ देखनी कि ऊ लोग केतना प्यार से बच्चा सब के संभारत बा.” एकरा बाद एगो जागरूकता अभियानो चलावल गइल, जेकरा में लइका घर के फायदा गिनावल गइल. तब जाके ओह लोग के समझ में आइल. कुछ क्रेच में त रोज के 10 से 12 लरिका लोग आवेला.

अट्ठाइस बरिस के सबिता अकेल माई बाडी. ऊ आपन लइकी संगे राजपुर गांव रहेली. सबिता निशाद समुदाय (राज्य में दोसर पिछड़ा वर्ग के रूप में सूचीबद्ध) से बाड़ी. एगो खेतिहर मजूर के रूप में ऊ रोज के 150 रुपइया कमा लेवेली.

उनकर लइकी दुर्गा के शारीरिक बिकास देर से भइल. ऊ अपना से चल ना पावत रहस. कोविड घरिया सबिता गाली-गलौच करे वाला घरवाला से अलग हो गइली आ आपन माई संगे रहे लगली. अब ‘लइका घर’ खुले से, माई आ नानी दुनो लोग काम कर सकता आउर दुर्गो के पूरा पोषण आ देखभाल मिल रहल बा.

भोरे के कोई नौ बजल बा. लरिका लोग सलबा गांव के आपन क्रेच में पहुंच चुकल बा. फाटक जइसहीं खुलता माई लोग आपन संगी-साथी साथे खेलत-कूदत आपन लइका लोग के देख रहल बा. लइका सब खाए में खिचड़ी, हलुआ, अंडा आ दाल-भात के इंतजार में बा.

स्टोरी पहिले अजीम प्रेमजी फाउंडेशन के वेबसाइट पर आ चुकल बा.

अनुवाद: स्वर्ण कांता