کریلے میں مٹھاس بھرنے کی کوشش

چھایا اُبالے اپنی ماں کو یاد کرتی ہیں جو چکّی چلاتے ہوئے لوک گیت گایا کرتی تھیں، جن میں خاندانی رشتوں کی خوشیوں اور مشکلوں کا ذکر شامل ہوتا تھا

’’میری ماں بہت سارے گیت گایا کرتی تھی، لیکن میرے لیے ان سبھی کو یاد رکھ پانا مشکل ہے،‘‘ چھایا اُبالے نے پاری سے کہا، جب ہم ان سے ملنے مہاراشٹر کے پونے ضلع میں واقع شیرور تعلقہ گئے تھے۔ ہم ان تمام گلوکاراؤں سے، جنہوں نے گرائنڈ مل سانگز پروجیکٹ (جی ایس پی) میں گیت گا کر اپنا تعاون دیا تھا، دوبارہ رابطہ کی کوشش کے دوران اکتوبر ۲۰۱۷ میں سوِندانے گاؤں میں رہنے والے پوار خاندان کے گھر پہنچے تھے۔ یہ ایک مکمل خاندان تھا، جس میں بیٹا، بیٹی، بہو، اور بچے ساتھ رہتے تھے۔

بدقسمتی سے ہم گلوکارہ گیتا پوار سے مل نہیں پائے۔ ان کا چار سال پہلے ہی انتقال ہو چکا تھا۔ البتہ ہماری ملاقات ان کی بیٹی چھایا ابالے سے ہوئی، جنہوں نے اپنی ماں کے نغموں کے بارے میں ہمیں بتایا۔ چھایا (۴۳) نے ہمیں اپنی ماں کا چاندی کا جوڈاوے (انگوٹھے کا چھلّہ) دکھایا، جس کو انہوں نے اپنی ماں کی فریم میں لگی تصویر کے سامنے بہت ہی پیار سے رکھا ہوا تھا۔

اپنی ماں سے سنی ہوئی او وی کو یاد کرنے کی کوشش میں چھایا نے چکّی چلاتے وقت گائے جانے والے چار گیت گائے، جسے انہوں نے دو چھوٹے لوک گیتوں کے درمیان گنگنا کر سنایا۔ ان میں سے پہلا گیت اداسی اور دوسرا خوشیوں سے بھرا تھا۔ انہوں نے شروعات دو لائن کی ایک کہانی سے کی‌، جو بھدر کے مقبول راجہ اشو پتی کی بیٹی ساوتری کے اوصاف بیان کرنے والی ایک اساطیری داستان سے ماخوذ تھی۔ یہ او وی آگے گائے جانے والے گیتوں کی تان کو درست کرنے والا گلا (دُھن) تھا۔ یہ ایک عام روایت ہے۔

پہلے لوک گیت میں وہ مہابھارت میں اپنے سو چچا زاد کورو بھائیوں سے برسر پیکار پانچ پانڈو بھائیوں کا موازنہ ایک تنہا عورت کے طور پر خود سے کرتی ہیں، جسے اپنے بہت بڑے گھرانے کی ذمہ داری اکیلے اٹھانی پڑتی ہے۔ وہ پنڈھر پور کے مندر میں موجود وٹّھل-رکمنی کے تئیں اپنی عقیدت کا اظہار کرتی ہیں اور انہیں اپنے والدین کی طرح قابل احترام سمجھتی ہیں۔ اپنے ماں باپ کو یاد کرتے ہوئے چھایا کا گلا بھر آتا ہے، اور وہ اپنے رخساروں پر گرتے ہوئے آنسوؤں کو روک نہیں پاتی ہیں۔ ایسا لگتا ہے، گویا اچانک بادل پھٹ گیا ہو اور موسلادھار بارش ان کے گھر کی چھت پر برس پڑی ہو۔

گیت کے اگلے بند میں وہ بھائی سے اپنا دکھ بیان کرتی ہیں کہ کیسے ان کی زندگی شوہر کے چار بڑے بھائیوں اور ان کی بیویوں کی ضرورتوں کو پورا کرنے میں گزر رہی ہے۔

لوک گیت کے بعد چار او وی میں چھایا اس محبت اور تحفے کے بارے میں بتاتی ہیں، جو ایک بچہ کو اس کے ماموں اور ممانی سے ملے ہیں۔ بچہ کو اس کے ماموں سے ایک لال کرتا اور ایک ٹوپی سوغات میں ملی ہے۔ جب بچہ بھوک سے رونے لگتا ہے تب گلوکارہ اسے دہی بھات کھلانے کا مشورہ دیتی ہے۔

اپنے آنسو پونچھتے ہوئے اور افسردگی سے باہر نکلتے ہوئے چھایا ایک لوک گیت گاتی ہیں، جو ظرافت سے بھری ہوئی ہے۔ ایک بہو کے لیے کریلے کی مانند کڑواہٹ سے بھری ساس کو راضی کرنا اور اس کے اندر مٹھاس پیدا کرنا کتنا مشکل کام ہے۔

لوک گیت:

او وی (گرائنڈ مل سانگز)

لوک گیت:

پرفارمر/ گلوکارہ: چھایا اُبالے

گاؤں: سوِندانے

تعلقہ: شیرور

ضلع: پونے

تاریخ: یہ گیت اکتوبر ۲۰۱۷ میں ریکارڈ کیے گئے تھے اور یہ تصویریں بھی اسی وقت کھینچی گئی تھیں۔

پوسٹر: سینچتا پربت

اصل ’گرائنڈ مل سانگز پروجیکٹ‘ کے بارے میں پڑھیں، جسے ہیما رائیرکر اور گی پائیٹواں نے شروع کیا تھا۔