مہاراشٹر: آدیواسی کسانوں کی پُر امید گھر واپسی

نام دیو بھانگرے ۲۵ جنوری کو ایک بے یقینی اور تلخی کے ساتھ احتجاجی مارچ میں شامل ہوئے۔ تین دن بعد وہ امید کے ساتھ گھر واپس لوٹ گئے۔ اس سفر میں ان کے ساتھ دسیوں ہزار دوسرے آدیواسی کسان شامل تھے، جن کا تعلق بنیادی طور پر ناسک اور اہلیہ نگر (سابقہ ​​احمد نگر) جیسے ضلعوں سے تھا۔

اہلیہ نگر ضلع کے کَھڈکی بُدرُک گاؤں کے مہادیو کولی قبائلی برادری سے تعلق رکھنے والے بھانگرے کا خاندان کئی نسلوں سے اکولے تعلقہ میں جنگل کی چھ ایکڑ زمین پر کھیتی کرتا آ رہا ہے۔ لیکن، مہاراشٹر کے ہزاروں آدیواسیوں کی طرح ان کے پاس بھی اس قطعہ زمین کا مالکانہ حق نہیں ہے۔

’’میرے دادا کے زمانہ سے ہم چاول اور راگی کی کھیتی کر تے آ رہے ہیں،‘‘ وہ بتاتے ہیں۔ ’’لیکن ہمیں کبھی تحفظ کا احساس نہیں ہوا۔ ہمیں کسی بھی وقت بے دخل کیا جا سکتا ہے۔‘‘

سال ۲۰۰۶ میں حکومت ہند نے اس شدید عدم تحفظ کے تدارک کے لیے تاریخی جنگلات سے متعلق حقوق کا ایکٹ (ایف آر اے) پاس کیا۔ برسوں کی جدوجہد کے بعد یہ ایکٹ قانون بن گیا۔ یہ قانون درج فہرست قبائل اور جنگل کے دیگر روایتی مکینوں کو جنگل کی زمین اور وسائل کے حقوق فراہم کرتا ہے، جو نسل در نسل ایسے علاقوں میں رہتے آئے ہیں۔ اس قانون کے تحت گرام سبھا دعویٰ پیش کرتی ہے، سب ڈویژنل اور ضلعی کمیٹیوں کے ذریعے اس کی تصدیق ہوتی ہے، اور جب تک کہ ان کے حقوق کا تصفیہ نہیں ہو جاتا، یہاں کے باشندوں کو بے دخل نہیں کیا جا سکتا ہے۔

تاہم، زمینی سطح پر اس قانون کا نفاذ مشتبہ رہا ہے۔

بھانگرے نے ایف آر اے نافذ ہونے کے فوراً بعد اپنی چھ ایکڑ زمین کا دعویٰ پیش کیا تھا۔ ’’میری فائل کو گرام سبھا نے درست قرار دیا، جس کے بعد اسے تحصیل میں منتقل کر دیا گیا،‘‘ وہ بتاتے ہیں۔ ’’سماعتیں ہوئیں، اور یہ عمل چلتا رہا، بالآخر چار سال بعد یا اس کے آس پاس دعویٰ مسترد کر دیا گیا۔‘‘

اس طر ح عدم تحفظ برقرار رہا۔ ابھی حال ہی میں جنگلات کے اہلکار بھانگرے کے پڑوس کے ایک گاؤں میں آئے اور ایک ایسے کنبے کو ان کی زمین سے بے دخل کر دیا، جس پر وہ کئی نسلوں سے کھیتی کر رہے تھے۔ ’’میرے ساتھ بھی یہ کسی بھی وقت ہو سکتا ہے،‘‘ وہ کہتے ہیں۔

مہاراشٹر میں آدیواسی کسانوں نے – جس کی قیادت آل انڈیا کسان سبھا کر رہی ہے – اپنے حقوق کا دعویٰ کرنے کے لیے گزشتہ دہائی کے دوران درجنوں احتجاجی ریلیاں نکالی ہیں۔ ان کی سب سے مشہور ریلی مارچ ۲۰۱۸ میں ممبئی تک کا لمبا مارچ تھا، جس میں دسیوں ہزار آدیواسی شامل ہوئے تھے اور ناسک سے ۱۸۰ کلومیٹر پیدل چل کر ہندوستان کے مالیاتی دارالحکومت ممبئی کے آزاد میدان تک پہنچے تھے۔

اس وقت بھی ریاست کے وزیر اعلیٰ دیویندر فڈنویس تھے، جو کسانوں کے نمائندوں کے ساتھ میز پر بیٹھے تھے اور انہوں نے جنگلات سے متعلق حقوق کے قانون کے بہتر نفاذ، روزگار کے مزید مواقع، اور ان کی فصلوں کی بہتر قیمتوں کا وعدہ کیا تھا۔

آٹھ سال بعد، ہزاروں کسانوں کے اسی دستے نے ۲۵ جنوری کو اسی طرز پر ایک اور ریلی نکالی اور اسی طرح کے مطالبات کے ساتھ ممبئی میں پیدل داخل ہونے کا فیصلہ کیا۔

’’ہم وعدوں سے تھک چکے ہیں،‘‘ اے آئی کے ایس سے تعلق رکھنے والے کسان لیڈر اشوک ڈھوَلے کہتے ہیں۔ ’’اس بار ہمیں کوئی ٹھوس جواب چاہیے تھا۔‘‘

یہ احتجاجی مارچ اس سے ایک ہفتہ قبل نکالی گئی ایک اور ریلی کے بعد شروع ہوا، جس میں کمیونسٹ پارٹی آف انڈیا (مارکس وادی) سے منسلک تنظیم، اے آئی کے ایس کے زیر اہتمام پالگھر ضلع کے کلکٹریٹ تک ۵۰ ہزار کسانوں نے شرکت کی۔ ضلع انتظامیہ صرف ان کے کچھ مقامی مطالبات ہی نمٹا سکتی تھی، کیوں کہ کلکٹر کے پاس آدیواسی کسانوں کے بڑے مسائل کے بارے میں کچھ کرنے کا اختیار نہیں تھا۔ نتیجتاً انہیں دوسرے ممبئی مارچ پر مجبور ہونا پڑا۔

تاہم، جیسے ہی کسانوں کا مارچ دوسرے دن میں داخل ہوا، گریش مہاجن (رکن قانون ساز اسمبلی) کسان لیڈروں کے پاس پہنچے اور ان سے مارچ ختم کرنے کی درخواست کی۔ اگلے دن کسانوں کے نمائندوں کی ایک ٹیم نے مہاراشٹر کی کابینہ سے ملاقات کی، جس میں وزیر اعلیٰ دیویندر فڈنویس بھی شامل تھے، اور ان سے تفصیلی بات چیت کی۔ اس کے بعد ۲۸ جنوری کو مارچ ختم کرنے کا اعلان کر دیا گیا۔ اس دوران کسان تقریباً ۸۰ کلومیٹر پیدل چل کر کھرڈی پہنچ چکے تھے، جو ناسک اور ممبئی کے درمیان واقع ہے۔

اے آئی کے ایس نے اپنے ایک بیان میں کہا کہ کسان لیڈروں نے جن سب سے اہم چیزوں پر ریاستی حکومت کی رضامندی حاصل کی ان میں سے ایک جنگل کے حقوق کے قانون کے تحت مسترد شدہ دعووں پر دوبارہ غور کرنا شامل تھا۔ اس کے علاوہ، یہ اعلان بھی کیا گیا کہ جنگلات کی زمینوں پر فصلوں کا معائنہ کیا جائے گا، اور تمام سرکاری اسکیموں کو جنگلاتی زمین کے جوت داروں تک پہنچایا جائے گا، جن کے وہ فی الحال اہل نہیں ہیں۔

’’وزیر اعلیٰ نے منظور شدہ مطالبات پر عمل آوری کی مکمل یقین دہانی اور ذاتی ضمانت دی ہے،‘‘ ڈھوَلے کہتے ہیں۔ ’’انہوں نے وزارتی سطح پر مسلسل فالو-اپ کی یقین دہانی کرائی، تاکہ اس بات کو یقینی بنایا جا سکے کہ عمل درآمد میں کوئی کوتاہی نہ ہو۔‘‘

اے آئی کے ایس نے کہا کہ اس مقصد کے لیے ہر ضلع میں سب ڈویژنل افسر (ایس ڈی او) کی صدارت میں افسران کی کمیٹیاں مقرر کی جائیں گی، جو جنگلات سے متعلق حقوق کے ہر معاملہ کی جانچ کریں گی۔ ’’یہ پوری مشق اگلے تین ماہ کے اندر مکمل ہو جائے گی۔‘‘

اس کا مطلب یہ ہے کہ ایسے آدیواسی کسان جن کے دعوے مسترد کر دیے گئے تھے، وہ ایک بار پھر زمین کا مالک بننے کا خواب دیکھ سکتے ہیں – باضابطہ طور پر۔

اگلے چند دنوں تک کسان لیڈر آدیواسی کسانوں کی زمین کے حقوق کا دعویٰ پیش کرنے میں ان کی مدد کریں گے۔ بھانگرے بھی اس کے منتظر ہیں۔ ان کے دو بچے ہیں، ایک بیٹا اور ایک بیٹی، اور دونوں اپنی نوعمری میں ہیں۔ انہیں امید ہے کہ وہ، کم از کم، کچھ سکون اور تحفظ کے ساتھ زندگی گزار سکیں گے، جو ابھی تک ان کی زندگی کا حصہ نہیں بن پائی ہے۔

’’ایسا ہونے میں ایک طویل وقت گزر چکا ہے،‘‘ وہ کہتے ہیں۔

ترجمہ نگار: شفیق عالم