‘आस’ धरे घर लहूटत आदिवासी किसान

नामदेव भांगरे ह 25 जनवरी के दिन दुविधा अऊ गुस्सा के संग विरोध रैली सुरु करे रहिस. तीन दिन बाद, वो ह आस धरे घर लहूटिस- ओकर संग नासिक अऊ अहिल्यानगर (पहिली अहमदनगर) के हजारों आदिवासी किसान मन घलो रहिन.

अहिल्यानगर जिला के खड़कीबुद्रुक गाँव मं महादेव कोली आदिवासी समाज के भांगरे के परिवार कतको पुस्त ले अकोले तालुका मं छै एकड़ जंगल के जमीन मं खेती करत हवय. फेर, महाराष्ट्र के हजारों आदिवासी मन के जइसने, वो ह घलो वो जमीन के मालिक कभू बने नइ सकिस जेन मं वो ह खेती करत रहिस.

वो ह कहिथे, मोर बबा के बखत ले हमन धान अऊ रागी के खेती करत हवन. फेर हमन कभू अचिंता मसूस नइ करेन. हमन ला कभू घलो बेदखल करे जा सकथे.”

साल 2006 मं भारत सरकार ह वो मन के चिंता, असुरच्छा ला कम करे बर एतिहासिक वं अधिकार अधिनियम (एफआरए) पास करिस. कतको बछर के लड़ई के बाद, ये अधिनियम कानून बन गीस. ये अधिनियम अनुसूचित जनजाति अऊ दीगर पारंपरिक वनवासी मन ला वन भूमि अऊ संसाधन के हक देथे, जऊन मन कतको पुस्त ले अइसने इलाका मन मं रहत हवंय. ग्राम सभा दावा करथे, जेकर पुष्टि सब-डिविजनल अऊ जिला समिति मन करथें, अऊ जब तक वो मन के हक तय नइ हो जावय, तब तक ये बासिंदा मन ला बेदखली ले रोकथे.

वइसे, जमीनी स्तर मं कानून ला लागू करे ला लेके संदेहा बने हवय.

भांगरे ह एफआरए पास होय के तुरते बाद वो छै एकड़ जमीन सेती दावा करिस, जेन मं वो ह खेती करत रहिस. वो ह कहिथे, “मोर फ़ाइल ला ग्राम सभा ह योग्य मानिस, जेकर बाद वोला तहसील भेजे गीस. सुनवाई होइस अऊ ओकर काम चलत रहय. आख़िरकार चार बछर बाद मोर दावा ख़ारिज कर देय गीस.”

अऊ येकरे सेती चिंता लगे रहय. हालेच मं, वन अफसर मन भांगरे के गाँव के तीर के एक ठन गाँव मं गीन अऊ एक ठन अइसने परिवार ला बेदखल कर दीन जेन ला वो मन जानत रहिन अऊ जेन ह कतको पीढ़ी ले वो जमीन मं खेती करत रहिस. वो ह कहिथे, “ये मोर संग कभू घलो हो सकथे.”

महाराष्ट्र मं आदिवासी किसान मन- ऑल इंडिया किसान सभा के अगुवई मं – बीते दस बछर ले अपन हक के सेती दर्जनों विरोध रैली निकारे हवंय. ये मं सबले मशहूर रैली 2018 मं मुंबई तक के लंबा रैली रहिस, जब वो मं हजारों लोगन मन नासिक ले देस के कारोबारी रजधानी मुंबई के आजाद मैदान तक 60 कोस रेंगत गे रहिन.

वो बखत घलो राज के मुख्यमंत्री देवेंद्र फडणवीसेच ह रहिस, जेन ह किसान मन के प्रतिनिधि संग बइठ के गोठ बात करिस अऊ वो ह वन अधिकार कानून ला बढ़िया ढंग ले लागू करे, जियादा रोजगार देय अऊ वो मन के फसल के बढ़िया दाम देय के वादा करिस.

आठ बछर बाद, उही हजारों किसान मन के एक ठन टोली ह ये बछर 25 जनवरी के दिन वइसनेच रैली निकारिन अऊ उहिच मांग मन ला लेके रंगत मुंबई जाय के फइसला करिन.

एआईकेएस के किसान नेता अशोक धवले कहिथे, “हमन वादा ले तंग हो चुके हवन. ये पईंत, हमन ला कुछु ठोस चाहे ला रहिस.”

ये विरोध रैली बीते हफ्ता होय एक ठन अऊ रैली के बाद होय रहिस, जब कम्युनिस्ट पार्टी ऑफ़ इंडिया (मार्क्सवादी) से जुड़े एआईकेएस ह 50,000 किसान मन ला लेके पालघर ज़िला के कलेक्ट्रेट तक गे रहिन. वइसे प्रशासन वो मन के कुछु स्थानीय मांगेच ला पूरा करे सकिस, फेर कलेक्टर करा आदिवासी किसान मन के बड़े समस्या मन ला लेके कुछु घलो करे के ताकत नइ रहिस. येकरे सेती मुंबई तक दूसर रैली निकारे गीस.

वइसे, जब किसान रैली दूसर दिन हबरिस, त विधायक गिरीश महाजन ह किसान नेता मन ले संपर्क करिस अऊ वो मन ले रैली ला अऊ नइ बढ़ाय के बिनती करिस. दूसर दिन, प्रतिनिधि मन के एक ठन टीम ह महाराष्ट्र कैबिनेट ले भेंट करिस, जेन मं मुख्यमंत्री देवेंद्र फडणवीस घलो रहिस, अऊ फोरके चर्चा करे गीस. 28 जनवरी के रैली ला खतम कर दे गीस. किसान मन पहिलीच ले करीबन 27 कोस के रद्दा नाप चुके रहिन अऊ खर्डी हबर गे रहिन जेन ह नासिक अऊ मुंबई के बीच करीबन आधा रद्दा मं हवय.

एआईकेएस ह एक ठन बयान मं कहे हवय के किसान नेता मन राज सरकार ले जेन सबले जरूरी बात ला लेके सहमति बनवाइन, वो मन ले एक वन अधिकार कानून के तहत ख़ारिज करेगे दावा मन ला फिर ले खोले रहिस. येकर छोड़, ये घलो घोसना करे गीस के जंगल के जमीन मं लगे फसल के जाँच करे जाही, अऊ सब्बो सरकारी योजना जंगल के जमीन वाले मन तक ले जाय जाही, जेकर बर वो मन ये बखत काबिल नइ यें.

धवले कहिथे,“मुख्यमंत्री ह माने गे मांग मन ला लागू करे के पूरा भरोसा अऊ अपन क्गुद के तरफ ले पूरा गारंटी दे हवय. वो ह ये घलो भरोसा दिलाइस के लागू करे मं कोनो कमी झन रहय, येकर बर मंत्री स्तर मं सरलग येकर खबर लेगे जाही.”

एआईकेएस ह कहे हवय, के ये काम बर, हरेक जिला मं सब-डिविज़नल ऑफिसर (एसडीओ) के अध्यक्षता मं अफसर मन के कमेटी बनाय जाही, जेन ह जंगल के हक के हरेक मामला के जाँच करही. ये जम्मो काम अवेइय्या तीन महीना के भीतर पूरा हो जाही.”

येकर मतलब आय के जेन आदिवासी किसान मन के दावा खारिज होगे रहिस, वो मन एक बेर अऊ सरकार डहर ले जमीन के मालिक बनाय के सपना देख सकथें.

अवेइय्या कुछेक दिन मं, किसान नेता मन आदिवासी किसान मन ला जमीन के हक बर अरजी करे मं मदद करहीं. भंगरे घलो येला अगोरत हवय. ओकर एक झिन अऊ बेटी दूनों किसोर उमर के हवंय. वो मन ला आस हवय के कम से कम वो मन ला थोकन अचिंता होके जीये के मऊका मिलही, जेन ह अब तक ले ओकर मन के किस्मत मं नइ रहिस.

वो ह कहिथे, “ये ह बनेच लंबा बखत ले होवेइय्या रहिस.”

अनुवाद: निर्मल कुमार साहू