भारत के गाँव-देहात मं असकत देह के संग गुजारत जिनगी

भारत के गाँव-देहात मं बनेच अकन लोगन मन विकलांगता धन देह के अलग-अलग रूप ले असकत होय के संग जिनगी गुजारत हवंय. संजोग ले जनम ले, अऊ येकर छोड़, विकलांगता समाजिक धन सरकार के चेत नइ धरे घलो आ सकथे- जइसने के, झारखंड मं यूरेनियम खदान मन के तीर मं रहे सेती, धन मराठवाड़ा मं सरलग पानी नइ गिरे सेती लोगन मन ला मजबूर होके फ्लोराइड वाले पानी पीये ला परथे. कतको बेर, विकलांगता बीमारी धन इलाज मं लापरवाही सेती होथे - लखनऊ मं कचरा बिनेइय्या पार्वती देवी के ऊँगरी मन कोढ़ रोग सेती खराब होगे हे, फेर मिजोरम के देबहाला चकमा चेचक (माता) सेती अंधवा होगे, अऊ पालघर के प्रतिभा हिलिम ला गैंग्रीन सेती अपन चरों हाथ-गोड़ गंवाय ला परिस. कुछेक लोगन मन मं दिमागी कमजोरी होथे - श्रीनगर मं छोटे मोहसिन ला सेरेब्रल पाल्सी (अइसने बीमारी, जनम ले धन दिमाग मं झटका लगे सेती हाथ-गोड़ काम नइ करय) हवय, फेर महाराष्ट्र के प्रतीक ला डाउन सिंड्रोम ( दाई-ददा डहर ले मिले बीमारी जेन मं दिमागी बिकास देरी ले होथे) के पता चलिस. अइसने कतको मामला मं, गरीबी, असमानता, भरपूर इलाज के सुविधा नइ मिले अऊ भेदभाव सेती चुनौती अऊ घलो बाढ़ कथे. असकत देह के संग जिनगी गुजारत लोगन मन के अलग-अलग राज ले पारी के कतको कहिनी हवंय