बांस भर नो हे, साँस जइसने आय

“गर हमर समाज मं कोनो बांस के पर्रा धन सूपा बनाही, त वोला दूसर समाज ला डांड मं धान अऊ पइसा भरे ला परही.” मंगली बाई बैगा आदिवासी समाज के उप- समाज, जइसने बिंझवार, नहार, नरोटिया, भरोटिया, राय मैना अऊ काठ मैना मन के माने जवेइय्या रीत-नीत ला बतावत हवय. मध्य प्रदेश मं बैगा खास तौर ले कमजोर आदिवासी समाज (पीवीटीजी) मन ले हवंय. “हरेक समाज बांस ले अलग-अलग जिनिस बनाथे.”

वो ह खुदेच बिंझवार बैगा आदिवासी आय, जेन ह बालाघाट जिला के नाटा गाँव मं 10-12 ठन आदिवासी परिवार के बस्ती पंडा टोला मं रहिथे. सुकरवार के बिहनिया के बखत हवय अऊ मंगली बाई अपन समाज के आने लोगन मन के संग बांस लेगे बर मालधर गाँव के तीर जंगल वाले इलाका मं जावत हवय. ओकर मन के रोज के 4 बजे ले थोकन देरी आय, फेर सुरुज ऊबे के पहिलीच, वो मन मोर आय ला अगोरत रहिन.

रद्दा मं वो मन अपन खाय के डब्बा ला नदिया के बालू मं तोप के लुका देथें अऊ सिरिफ एक पानी के बोतल अऊ टंगिया धरके निकर परथें. मंगली बाई कहिथे,“ ये ह थोकन हरू होय के एक ठन तरीका आय.” मंझनिया के बाद वो मन पंडा टोला डहर ढाई-तीन कोस रेंगत जाहीं. वो मन अपन मुड़ मं तीन ले चार ठन बांस बोहीं, जेकर वजन करीबन 25 किलो होही.

ये ओकर हर सुकवार के काम आय. हफ्ता के बाक़ी दिन वो ह बांस के पातर पट्टी छिले. काटे, तियार करे अऊ बांस के टुकना बनाथे. वो ह कहिथे के ओकर काम जनम ले तय होथे. “हमन सिरिफ टुकना बनाथन. मंय अपन लोगन मन ला सिरिफ इहीच बनावत देख के बड़े होय हवं. त मंय बस अतककेच सीखे हवं. बस मंय अतकेच जानथों.”

फेर ये ह पूरा सच बात नो हे. जंगल के तीर रहेइय्या मंगली बाई जंगल अऊ ओकर तरीका. ओकर रंग, बनावट, फर, हरियाली, फूल, रुख, जड़ी-बूटी के बारे मं बनेच कुछु जानथे. वो ह रद्दा अऊ वोला खोजे के जगा मन ला, जंगल के गियान अऊ इतिहास ला जानथे. वो ह सब्बो कुछु जानथे. जइसने के वो ह कहिथे, गोंड से अच्छा जमीन के बारे में कोई नहीं जान सकता, बैगा से अच्छा जंगल के बारे में कोई नहीं जानता, और धीमर से अच्छा पानी के बारे में कोई नहीं जान सकता (भूंइय्या के बारे मं गोंड ले बढ़िया कोनो नइ जानय, जंगल के रद्दा बैगा ले बढ़िया कोनो बताय नइ सकय,पानी के बारे मं धीमर (ढीमर/ केंवट) ले बढ़िया कोनो नइ जानय).

जंगल जाय बखत मंगली बाई घर ले जाय बर तेंदू के फूल अऊ चरोटा (कैसिया टोरा) के पाना टोरथे. “हमन ला ये सब्बो जंगलेच ले मिलथे. भोड़ोपिरी [बिनवा फूटू धन टर्मिटोमाइसेस], बांसपिरी [बांस फूटू धन कैंथरेलस], पुटू [फूटू ], भाजी.” बैगा, जंगल के बासिंदा आंय जेन मन गुजर-बसर सेती जंगल उपर आसरित हवंय. देस मं वो मन के कुल आबादी के करीबन 75 फीसदी मध्य प्रदेश मं रहिथे - साल 2011 के जनगणना के मुताबिक, 4,14,526. फेर ये समाज कभू घलो जंगल ला सिरिफ साधन भर नइ समझय. वो मन जानथें के येकर ले काय, कब, कतक लेना हवय. वो मन ये घलो जानथें के येला कइसने लहुटाय ला हवय.

“अब तो जंगल भी भगरइस हे, पहले तो इहाँ ही रहाय [ जंगल भागत जावत हवय,पहिली इहींचे रहत रहिस]” मंगली बाई के जुबान मं अऊ ओकर काम मं दिखेइय्या गियान कोनो किताब मं लिखाय नइ ये. वो अपन तीर-तखार के बदलत संसार ला बतावत हवय जइसने के वो ह बीते 20 बछर मं देखे हवय. वोला अपन उमर बने करके पता नइ ये, फेर वो ह अपन ला 40 बछर के मानथे.

जब बाई के बिहाव होय रहिस, त जंगल एक डेढ़ कोस रेंगके जाय ले बांस मिल जावत रहिस, अऊ वो मन लेगे बर हफ्ता मं तीन-चार पईंत जावत रहिन. फेर अब, वो मन ला बांस लेगे बर करीबन 3 कोस दूरिहा जाय ला परथे, अऊ हफ्ता मं सिरिफ एकेच पईंत जाथें. एक बेर मं तीन धन चार कलम (बांस के बल्ली) लाथें.

“जम्मो रुख काट दे गे हवंय. अब, जिहां घलो देखो, सिरिफ सागवान {सागोन / टेक्टोना ग्रैंडिस] मिलही. अब नवा रुख कहां देखे बर नइ मिलथे? चरों मुड़ा इहुच रुख हवंय. वोला काटथें अऊ फिर ले लगाथें. हमन अपन जमाना मं जंगल ले काय काय नइ लावत रहेन! काकोरा (खेखसी), भाजी, तेंदू. अब त मुस्किल ले मिलथे,” वो ह कहिथे.

घाम के महीना मं कभू-कभू वो मन मऊहा अऊ तेंदू पत्ता टोरथें. “ये बछर मंय मुस्किल ले 500 पूड़ा (बीड़ा) टोरेंय [एक पूड़ा मं 100 ठन पत्ता].” बरसात के बखत, जब बांस के टुकना बनाय के काम कम हो जाथे, त मंगली बाई बनिहारी करके दू पइसा कमा लेथे. ओकर 62 बछर के सास, माहो बाई ला 600 रूपिया के वृद्धा पेंसन मिलथे.

मंगली बाई के ससुर ह ओकर बिहाव के पहिली गुजर गे रहिस, अऊ ओकर घरवाला मदन ला गुजरे करीबन दू बछर होगे हवय, जनवरी 2024 मं, जब वो ह 45 बछर के रहिस. वो ह कमाय-खाय बर बहिर जावत रहिस जिहां घलो घर/सड़क बनाय के काम मिलय, उहाँ जावत रहिस. मंगली बाई कहिथे, “वो ह वो बखत हरियाणा गे रहिस. हमन ला नइ पता के काय होइस. वो ह बिदेस मं गुजर गे. इहाँ तक के ठेकादार घलो कुछु नइ बताइस. जब हमन उहाँ जाय रहेन, त हमन ला पता चलिस के जाड़ के सेती ओकर परान चले गे.”

“मंय अपन बेटा के मुंह घलो देखे नइ सकंय,” माहो बाई खिसियावत कहिथे. “ वो अस्पताल मं लाश देय बर 3,500 रूपिया मांगत रहिन, उपर ले गाड़ी के भाड़ा के पइसा. कहां ले लाय रइतेन? हमन लाश नइ लाय सकेन. हमन अस्पतालेच मं लाश के किरिया करम कर देन,” मंगली बाई बताथे.

ओकर बेटा सुकेश उइके ह जब ओकर ददा ह गुजर गे 8 वीं क्लास के बाद स्कूल जाय छोड़ दीस. वो ह कहिथे, “मैं कभी स्कूल नहीं गई हूँ. उन ला काहे बोलूं.नहीं पढ़े, त मत पढ़ो, काम करो, कैन करो और? [ मंय कभू स्कूल नइ गेंय, वोला काय बोलों, नइ पढ़े, त झन पढ़,बूता कर, अऊ काय करबे].”आज ओकर 18 बछर के बेटा, अपन ददा जइसने बूता करे बर बहिर जाथे अऊ हर तीन महीन मं 7 ले 8 हजार रूपिया घर पठोथे. वो ह जऊन कमाथे, ओकर अधिकतर हिस्सा खाय अऊ भाड़ा मं चले जाथे.

मंगली बाई अऊ ओकर सास गाँव मं रहिथें अऊ बांस के टुकना बनाके हरेक हफ्ता करीबन 600 रूपिया कमा लेथें. वो मन करा करीबन डेढ़ एकड़ के खेत हवय, जिहां वो मं बछर भर मं एक बेर धान कमाथें. मुकेश खेती के बखत घर आ जाथे, खेत मं बूता करथे अऊ लुवई के बखत तक ले चले जाथे.

मंगली बाई कहिथे, “जब वो ह आही, त हमन खेती-बारी करबो. एक सीजन मं सिरिफ एक बेर कमई होथे. हमन ला करीबन 20-30 क्विंटल धान मिल जाथे, फेर हमन वोला नइ बेचन. बेचेंगे तो कहाँ से खाबो फिर[ बेचबो त काय खाबो]? खेती होय के बाद हमन बांस लाथन अऊ टुकना बनाथन; हमन बांसेच ले काम चलाथन.”

फेर बांस मिले दुब्भर होवत जावत हे. भारत मं सबले जियादा बांस वाले इकाका मध्य प्रदेश मं हवय. अऊ राष्ट्रीय बांस मिशन के तहत विकास ले जुड़े उदिम अऊ प्लांटेशन ला ये बात ला चेत राखे करे जाय ला चाही के विशेष रूप से कमजोर जनजातीय समूह (पीवीटीजी) समाज अपन गुजारा बर बांस के भरोसे हवय.

वो ह सवाल करत कहिथे, “ गर तुमन हरेक बछर जंगल ला काटत रइहू त बांस कइसने मिलही? अब बांस मुस्किल ले बांचे हवय. हरेक दिन सरकारी ठेकादार जंगल काट देथें. हमर गाँव के लोगन मन घलो बूता करे बर उहाँ जावत रहिन. पहिली हमन जियादा बांस लावत रहेन, फेर अब पुलिस वाले हमन ला लाय नइ देवंय, वो मन ले जाथें,” वो ह कहिथे. मंगली बाई ह अपन बांस काट ले हवय अऊ हरियर रुख के छाल/छाली ले बनाय रस्सी ले बल्ली मन ला बांधत हवय.

बैगा लोगन मन रूख के पाना ले लेके जरी तक, हरेक जिनिस ला बउरे जानथें. वो मन सदियों ले जंगल के संग रहत आवत हवंय. वो मन अपन गुजर बसर सेती जंगल के उपर आसरित हवंय अऊ हो सकथे येकरे सेती वो मन जंगल के पूजा घलो करथें, वोला अपन देंवता मानथें.

जब मंय वो सब्बो झिन ला झुकके बाँधत देखथों, त मंय वो मन ले पूछथों के काय बइठ के बांधे मं सुभीता नइ होही. “नइ, हमन येला अपन देंवता मानथन. हमन देंवता के आगू कइसने बइठबो? हमन ये जगा के पूजा करथन.”

फेर काय तुमन घलो जंगल काटत नइ ओ?

“हम जानते हैं कौन सा कौला है और उगने वाला है, किसको लेना है, किसको छोड़ना है, सरकार को थोड़ी पता है, वो तो सब काट देती है [ हमन जानथन के कोन कौला आय अऊ जामेइय्या आय कोन ला लेना हे कोन ला छोड़ना हे, सरकार ला थोरे न पता हवय, वो तो सब्बो ला काट देथे],” मंगली बाई के बोली थोकन आतुर लागथे. मोला गम होथे के प्रकृति उपर ओकर ये मान अऊ समर्पन सिरिफ बात भर मं नइ फेर ओकर काम मं घलो हवय.

टोला के 10-12 झिन के टोली, जेन मं जवान अऊ सियान दूनों रहिन, एक दूसर के मदद करत लहुटे के तियारी करत रहिन. रद्दा मं, घर आभू घलो एक-डेढ़ कोस दूरिहा हवय,वो मन के पीये के पानी सिरागे. ते पायके, वो मं सूखाय नदिया के थोकन भीतरी चले गीन. उहाँ एक ठन लंबा कऊहा/ कहुआ रुख गिरे रहिस जेकर ले थोकन छाँव रहिस. मंगली बाई अऊ दीगर लोगन मन रुख तरी मं ओद्दा जगा देखिन अऊ रेती ला कोड़े सुरु करिन. उहाँ वो मन ला पानी मिलिस!

मंगली बाई कहिथे, गर कोनो पुलिस वाला बांस लेगे बखत इहाँ आ जाथे, त वोला जब्त कर लेथे. वो ह टांगी घलो छीन लेथे. येकरे सेती हमन नोनी अऊ माईलोगन मन सब्बो एक ठन टोली मं बांस लेगे बर जाथन. येकर ले हमन ला पुलिस वाला मन के सामना करे मं मदद मिलथे.”

जब बांस नइ रहय त तुमन काय बूता करथो?

“हमन काय करबो, हमन कोनो बूता नइ करे सकन, बांस रहेगा तो टोकनी बनाते हैं, नहीं तो चुप्पई रहते हैं [बांस रहिथे त टुकना बना लेथन, नइ त कलेचुप रहिथन],” वो ह कहिथे.

ये कहिनी मृणालिनी मुखर्जी फाउंडेशन (एमएमएफ)के फेलोशिप के मदद ले लिखे गे हवय.

ये कहिनी मूल रूप मं हिंदी मं लिखे गे रहिस.

अनुवाद: निर्मल कुमार साहू