جنگل سے منگلی بائی کا رشتہ

’’اگر ہماری براداری کا کوئی شخص بانس سے پرّا [خشک کرنے کے لیے استعمال ہونے والی مسطح تھالی]، یا سوپا [اناج پھٹکنے کا سوپ] بناتا ہے، تو اسے دوسرے گروپ کو اناج اور رقم کی صورت میں معاوضہ ادا کرنا ہوتا ہے۔‘‘ منگلی بائی اپنے ذریعہ معاش کے ضابطہ کی وضاحت کرتی ہیں، جس کی پابندی بیگا آدیواسی برادری کی ذیلی شاخیں جیسے، بِنجھوار، ناہر، نَروتیا، بھاروتیا، رائے مینا اور کاٹھ مینا کرتی ہیں۔ مدھیہ پردیش میں بیگا برادری خصوصی طور پر کمزور قبائلی گروہوں (پی وی ٹی جی) میں شامل ہے۔ ’’ہر ذیلی شاخ کے لوگ بانس سے الگ الگ چیزیں بناتے ہیں۔‘‘

وہ خود ایک بنجھوار بیگا آدیواسی ہیں، اور بالاگھاٹ ضلع کے ناٹا گاؤں کی بستی پانڈا ٹولہ میں رہتی ہیں۔ اس بستی میں ۱۰ سے ۱۲ آدیواسی کنبے آباد ہیں۔ آج جمعہ کی صبح ہے اور منگلی بائی اپنی برادری کے دیگر افراد کے ساتھ بانس لانے کے لیے مالدھر گاؤں کے قریب واقع جنگلاتی علاقہ کی جانب گامزن ہیں۔ اپنے گروپ میں مجھے شامل کرنے کے لیے انہیں تھوڑا انتظار کرنا پڑا، لہٰذا وہ اپنے معمول کے وقت یعنی ۴ بجے صبح سے ذرا دیر بعد نکلی ہیں، لیکن پھر بھی ابھی طلوع آفتاب نہیں ہوا ہے۔

راستے میں وہ اپنے کھانے کے ڈبوں کو ندی کی خشک سطح کے نیچے چھپا دیتی ہیں اور صرف ایک پانی کی بوتل اور ایک کلہاڑی لے کر آگے چلتی ہیں۔ ’’یہ وزن کم کرنے کا ایک طریقہ ہے، جسے ہم اپنا رہے ہیں،‘‘ منگلی بائی کہتی ہیں۔ دوپہر کے بعد وہ پانڈا ٹولہ کی طرف اسی راستے سے ۸ سے ۱۰کلومیٹر پیدل چل کر واپس آئیں گی۔ ان کے سر پر تین چار بانس ہوں گے جن کا وزن تقریباً ۲۵ کلو ہوگا۔

یہ جمعہ کے دن کا ان کا معمول ہے۔ ہفتے کے باقی دنوں میں وہ بانس کی پتلی پٹیوں کو چھیلتی، کاٹتی، تیار کرتی اور بانس کی ٹوکریاں بُنتی ہیں۔ وہ کہتی ہیں کہ ان کا کام پیدائشی طور پر طے ہوتا ہے۔ ’’ہم صرف ٹوکریاں بناتے ہیں۔ میں اپنے لوگوں کو صرف ٹوکریاں بناتے دیکھ کر بڑی ہوئی ہوں۔ لہٰذا میں نے یہی کام سیکھا ہے۔ میں بس یہی جانتی ہوں۔‘‘

لیکن یہ پوری طرح سے صحیح نہیں ہے۔ جنگل کے کنارے رہنے والی منگلی بائی جنگل اور اس کے طور طریقوں، اس کے رنگ ڈھنگ، ساخت، پھل، سبزی، پھول، درخت، اور جڑی بوٹیوں کے بارے میں بہت کچھ جانتی ہیں۔ انہیں وہ راستے اور مقامات معلوم ہیں جہاں انہیں تلاش کیا جا سکتا ہے، یعنی وہ جنگل کے جغرافیہ اور اس کی تاریخ سے واقف ہیں۔ انہیں سب کچھ معلوم ہے۔ جیسا کہ لوگ کہتے ہیں، ’’گونڈ سے اچھا زمین کے بارے میں کوئی نہیں جان سکتا، بیگا سے اچھا جنگل کے بارے میں کوئی نہیں جان سکتا، اور ڈِھیمر سے اچھا پانی کے بارے میں کوئی نہیں جان سکتا۔‘‘

جنگل کے راستے میں منگلی بائی تیندو کے پھول اور چروٹا (کیسیا ٹورا) کے پتے جمع کر کے گھر لے جاتی ہیں۔ ’’بُھوڑو پیہاری [دیمک مشروم یا ٹرمیٹو مائسز]، بانس پیہاری [مقامی بانس مشروم یا کینتھیریلس]، پُٹّو [جنگلی مشروم کی ایک قسم]، بھاجی [ساگ سبزی] جیسی چیزیں ہمیں صرف جنگل سے ملتی ہیں۔‘‘ بیگا لوگ جنگل میں رہتے ہیں اور اپنی بقا اور معاش کے لیے جنگل پر انحصار کرتے ہیں۔ ملک میں بیگا برادری کی کل آبادی کا تقریباً ۷۵ فیصد حصہ مدھیہ پردیش میں آباد ہے، جو ۲۰۱۱ کی مردم شماری کے مطابق ۴ لاکھ ۱۴ ہزار ۵۲۶ ہے۔ لیکن یہ برادری کبھی بھی جنگل کو وسائل کی طرح نہیں دیکھتی۔ انہیں معلوم ہے کہ یہاں سے کیا لینا ہے، کب لینا ہے، اور کس مقدار میں لینا ہے۔ انہیں یہ بھی معلوم ہے کہ اسے واپس کیسے کرنا ہے۔

’’اب تو جنگل بھی بھاگ رہیسے، پہلے تو ایہاں ہی رہائے [اب جنگل بھاگ رہا ہے، پہلے وہ یہیں ہوا کرتا تھا]۔‘‘ وہ علم جو منگلی بائی کی زبان پر ہے اور ان کے اعمال میں جھلکتا ہے وہ کسی کتاب میں محفوظ نہیں ہے۔ وہ اپنے آس پاس کی بدلتی ہوئی دنیا کے بارے میں بات کر رہی ہیں،جیسا کہ انہوں نے گزشتہ دو دہائیوں میں دیکھا ہے۔ حالانکہ وہ اپنی عمر کے بارے میں یقین سے کچھ نہیں کہہ سکتیں، لیکن ان کا اندازہ ہے کہ وہ ۴۰ کی عمر میں ہیں۔

جب منگلی بائی کی شادی ہوئی تھی تو جنگل کے اندر تین سے چار کلومیٹر کے فاصلہ پر بانس دستیاب تھا اور وہ انہیں لینے کے لیے ہفتہ میں تین بار جایا کرتی تھیں۔ لیکن اب انہیں اس کام کے لیے تقریباً نو کلومیٹر کا فاصلہ طے کرنا پڑتا ہے، اور وہ ہفتہ میں صرف ایک بار جاتی ہیں،اور ایک وقت میں تین یا چار بانس لے کر آتی ہیں۔

’’تمام درخت کاٹ دیے گئے ہیں۔ اب آپ جہاں بھی دیکھیں گے، صرف ساگوان [ٹِکٹونا گرینڈِس] ہی نظر آئیں گے۔ اب آپ کو نئے درخت کہاں نظر آتے ہیں؟ آپ کے چاروں طرف ایک ہی قسم کے درخت ہیں، وہ انہیں کاٹتے اور لگاتے رہتے ہیں۔ ہم اپنے زمانے میں جنگل سے کیا نہیں حاصل کرتے تھے! خواہ ککورا [کانٹے دار لوکی] ہو، بھاجی [ساگ سبزیاں]، یا تیندو (پرسیمَّن)…اب بڑی مشکل سے ہی کچھ مل پاتا ہے،‘‘ وہ کہتی ہیں۔

گرمیوں میں بعض اوقات ایسے بھی ہوتے ہیں جب وہ مہوا [مدھوکا لونگی فولیا] اور تیندو کے پتے اکٹھا کرنے کی کوشش کرتے ہیں۔ ’’اس سال میں نے بمشکل ۵۰۰ پُوڑے [ایک پوڑا میں ۱۰۰ پتے ہوتے ہیں] اکٹھا کیے۔‘‘ بارش کے دوران، جب بانس کی ٹوکری بنانے کا کام سست پڑ جاتا ہے تو منگلی بائی دوسرے لوگوں کے کھیتوں میں کام کر کے تھوڑی کمائی کرتی ہیں۔ ان کی ۶۲ سالہ ساس، ماہو بائی کو بڑھاپے کی پنشن کے طور پر ۶۰۰ روپے ملتے ہیں۔

منگلی بائی کے سسر کی موت ان کی شادی سے پہلے ہی واقع ہو گئی تھی، اور ان کے شوہر مدن اوئیکے دو سال قبل جنوری ۲۰۲۴ میں، ۴۵ سال کی عمر میں انتقال کر گئے۔ وہ ایک مہاجر مزدور تھے اور جہاں بھی تعمیراتی کام ہوتا تھا وہاں جا کر کام کرتے تھے۔ ’’وہ اس وقت ہریانہ گئے ہوئے تھے،‘‘ منگلی بائی کہتی ہیں۔ ’’ہمیں نہیں معلوم کہ کیا ہوا تھا، وہ پردیس میں مرے تھے، ٹھیکیدار نے بھی ہمیں کچھ نہیں بتایا۔ جب ہم وہاں پہنچے تو ہمیں معلوم ہوا کہ ٹھنڈ کی وجہ سے ان کی موت ہوئی تھی۔‘‘

’’میں اپنے بیٹے کا چہرہ بھی نہیں دیکھ سکی تھی،‘‘ ماہو بائی شکایتی لہجہ میں کہتی ہیں۔ ’’لاش حوالے کرنے لیے ہسپتال میں ۳۵۰۰ روپے مانگ رہے تھے، اور اس کے اوپر ایک گاڑی کے کرایے کے پیسے ہم کہاں سے لاتے؟ ہم لاش کو واپس نہیں لا سکے۔ ہم نے لاش کو وہیں ہسپتال میں ہی جلا دیا،‘‘ منگلی بائی بتاتی ہیں۔

ان کے بیٹے سُکیش اوئیکے نے اپنے والد کی موت کے بعد ۸ویں جماعت میں ہی اسکول جانا چھوڑ دیا تھا۔ ’’میں اسکول کبھی نی گیہؤ، ان لا کاہیں بولو، نہیں پڑھ ریو، تو مت پڑھو، کام کرو، کہانکاروں اور [میں کبھی اسکول نہیں گئی۔ اسے کیا بولتی۔ اگر تم پڑھنا نہیں چاہتے تو مت پڑھو۔ کام کرو۔ اور کیا کرو گے]؟‘‘ آج ان کا ۱۸سالہ بیٹا اپنے والد کی طرح کام کے لیے ہجرت کرتا ہے اور ہر تین ماہ بعد ۷ سے ۸ ہزار روپے گھر بھیجتا ہے۔ جو کچھ وہ کماتا ہے اس کا زیادہ تر حصہ کھانے میں اور کرایہ ادا کرنے میں نکل جاتا ہے۔

منگلی بائی اور ان کی ساس گاؤں میں رہتی ہیں اور بانس کی ٹوکریاں بن کر ہفتہ میں تقریباً ۶۰۰ روپے کی آمدنی حاصل کرتی ہیں۔ ان کے پاس ڈیڑھ ایکڑ زمین کا ایک چھوٹا سا قطعہ ہے، جہاں یہ کنبہ سال میں ایک بار دھان کی کاشت کرتا ہے۔ سکیش کھیتی کے وقت گھر آتا ہے، کھیتوں میں کام کرتا ہے اور کٹائی کے وقت تک واپس چلا جاتا ہے۔

’’اب وہ آئے گا،‘‘ منگلی بائی کہتی ہیں، ’’پھر ہم دوبارہ کھیتی کے کام میں لگ جائیں گے۔ ہم سیزن میں صرف ایک بار کماتے ہیں۔ ہمیں تقریباً ۲۰-۳۰ کوئنٹل دھان ملتا ہے، لیکن ہم اسے بیچتے نہیں ہیں۔ بیچیں گے تو کاسے کھابو پھر [اگر فروخت کردیں گے تو کھائیں گے کیا]؟ ہم بانس لاتے ہیں، اور کھیتی کے بعد بانس کی ٹوکریاں بناتے ہیں؛ ہم صرف بانس کا کام کرتے ہیں۔‘‘

لیکن بانس کا حصول مشکل ہوتا جا رہا ہے۔ ہندوستان میں بانس کی پیداوار کا سب سے زیادہ رقبہ مدھیہ پردیش میں ہے۔ اور نمو سے متعلق صنعتوں اور نیشنل بانس مشن کے تحت شجرکاری کو اس پی وی ٹی جی کمیونٹی کی روز افزوں جدوجہد کے شانہ بشانہ رکھ کر دیکھنا ہوگا، جن کی روزی روٹی اس پر منحصر ہے۔

’’اگر آپ ہر سال جنگل کاٹتے رہیں گے تو آپ کو بانس کہاں سے ملیں گے؟‘‘ وہ سوال کرتی ہیں۔ ’’اب شاید ہی کوئی بانس ملے۔ ہر روز کوئی نہ کوئی سرکاری ٹھیکیدار جنگل کاٹتا ہے۔ یہاں تک کہ ہمارے گاؤں کے لوگ بھی کام کے لیے وہاں جاتے رہے ہیں۔ پہلے ہم زیادہ بانس لاتے تھے، لیکن اب پولیس والے ہمیں لانے نہیں دیتے، وہ ہم سے چھین لیتے ہیں،‘‘ وہ کہتی ہیں۔ منگلی بائی نے بانس کاٹنے کا اپنا کام پورا کر لیا ہے اور ان کے ٹکڑوں کو ایک رسی سے باندھنے کی کوشش کر رہی ہیں، جسے انہوں نے ایک اور سبز ٹکڑے کو چھیل کر بنایا ہے۔

بیگا آدیواسی پتوں سے لے کر درخت کی جڑوں تک، ہر چیز کا استعمال جانتے ہیں۔ وہ صدیوں سے جنگل کے ساتھ ہم آہنگی سے رہتے آئے ہیں۔ وہ اپنی زیادہ تر ضروریات زندگی کے لیے اسی پر انحصار کرتے ہیں اور شاید اسی لیے وہ جنگل کی پوجا بھی کرتے ہیں، اسے اپنا دیوتا مانتے ہیں۔

جب میں ہر شخص کو اپنا بوجھ باندھنے کے لیے نیچے جھکتے دیکھتی ہوں تو میں ان سے دریافت کرتی ہوں کہ کیا بیٹھ کر بانس باندھنا آسان نہیں ہوگا؟ ’’نہیں، ہم اسے اپنا دیوتا مانتے ہیں۔ ہم دیوتا کے سامنے کیسے بیٹھ سکتے ہیں؟ ہم اس مقام کی پوجا کرتے ہیں۔‘‘

لیکن کیا آپ بھی جنگل نہیں کاٹ رہے ہیں؟

’’ہم جانتے ہیں کون سا کولا [نرم] ہے اور اگنے والا ہے، کس کو لینا ہے، کس کو چھوڑنا ہے، حکومت کو تھوڑی پتا ہے، وہ تو سب کاٹ دیتی ہے۔‘‘ منگلی بائی کی آواز میں تھوڑی جھلاہٹ نمایاں ہے۔ مجھے احساس ہوتا ہے کہ فطرت کے تئیں یہ احترام اور عقیدت صرف الفاظ کا ہی معاملہ نہیں ہے، بلکہ ان کے اعمال کا بھی حصہ ہے۔

جب وہ واپس چلنے کے لیے تیار ہوتے ہیں، تو ٹولہ کے ۱۰-۱۲افراد کا گروپ، جس میں نوجوان اور بزرگ دونوں شامل ہیں، ایک دوسرے کی مدد کرتے ہیں۔ راستے میں گھر سے چار پانچ کلومیٹر دور پینے کا پانی ختم ہو جاتا ہے۔ لہذا، وہ سوکھے دریا کی تہہ کی جانب تھوڑا آگے چلتے ہیں۔ ارجن کا ایک لمبا درخت وہاں گرا ہوا ہے، جس سے ہلکا سایہ ہو گیا ہے۔ منگلی بائی اور دیگر لوگ تنے کے نچلے حصہ کے قریب ایک قدرے گیلے مقام کی نشاندہی کرتے ہیں اور ریت کو کھودنا شروع کر دیتے ہیں۔ اور وہاں انہیں پانی مل جاتا ہے!

منگلی بائی کہتی ہیں، ’’اگر کوئی پولیس افسر بانس اکٹھا کرنے کے دوران یہاں آتا ہے تو وہ انہیں ضبط کر لے گا۔ یہاں تک کہ وہ کلہاڑی بھی لے جائے گا۔ یہی وجہ ہے کہ ہم لڑکیوں اور عورتوں کے گرہوں میں بانس جمع کرنے جاتے ہیں۔ اس سے ہمیں پولیس افسران کا سامنا کرنے میں مدد ملتی ہے،‘‘ منگلی بائی کہتی ہیں۔

’’جب بانس دستیاب نہ ہو تو آپ کون سا کام کرتی ہیں؟‘‘

’’ہم کیا کریں گے، ہم کوئی کام نہیں کر سکتے۔ بانس رہے گا تو ٹوکنی [ٹوکری] بُنتے ہیں، نہیں تو چُپّئی [خاموش] رہتے ہیں،‘‘ وہ کہتی ہیں۔

یہ اسٹوری مرنالنی مکھرجی فاؤنڈیشن (ایم ایم ایف) کی فیلوشپ کے تعاون سے لکھی گئی ہے۔

یہ اسٹوری سب سے پہلے ہندی میں لکھی گئی ہے۔

ترجمہ نگار: شفیق عالم