इल्म जी वाट ते ख़्वाबनि जो गुलज़ारु

“पंहिंजो चितु हिकु करे पढ़ाई कंदा कयो। तव्हां पंहिंजी बिरादरी जे ॿियनि ॿारनि लाइ मिसालु बणिजी सघो था।”

“मां शायदि नाईं क्लास में हूंदुसि जॾहिं जितेंद्र शर्मा सर सॼी क्लास जे साम्हूं मूंखे इहे लफ़्ज़ चया। मुंहिंजी दिलि एतिरी त भरिजी आई जो हिकु लफ़्ज़ु बि कुछे न सघियुसि। पहिरियों दफ़ो कंहिं हिकु मुसहर छोकिरे ते एतिरो भरोसो कयो हो। घर मोटंदे महिलु संदसि इहे क़ौल मुंहिंजे दिमाग़ में गूंजंदा रहिया। ‘तूं हिकु मिसालु थी सघीं थो….’ मूं कॾहिं बि पाण बाबति अहिड़ो न सोचियो हो।”

इहो ॾींहुं हो जॾहिं मूं पहिरियों भेरो सम्झियो त शायदि मुंहिंजी तइलीम जो लाॻापो फ़क़ति मूंसां नाहे। इन सां मुंहिंजे आसपासि जे बि॒यनि माण्हुनि खे बि पंहिंजी पढ़ाई जारी रखण जो हौसिलो मिली सघे थो। मूं अञा वधीक महिनतु करण शुरू कई। जॾहिं बि हालात मुंहिंजे ख़िलाफ़ हूंदा हुआ, त पंहिंजे इरादे खे पको रखण जे लाइ शर्मा सर जा क़ौल यादि कंदो होसि। उस्ताद जे चयल में केतिरी तासीर हूंदी आहे! मूंखे अहिसासु थियो त शर्मा सर न रुॻो हिसाबु पाढ़ण जो ॼाणू हो, पर हू पंहिंजनि शागिर्दनि जी ॻुझी क़ाबिलियत जो पारखू पिणु हो।

हिक उस्तादु फ़क़ति अखर पढ़णु न थो सेखारे, हू तव्हां खे पंहिंजनि ख़्वाबनि खे पढ़ण सेखारे थो।

मां आशीष नंदु आहियां। मां 24 सालनि जो आहियां। उत्तर प्रदेश जे मिर्ज़ापुर ज़िले में मझवा ॻोठ जो रहिवासी आहियां। असीं मुसहर आहियूं। माण्हू मुंहिंजी बिरादरीअ बाबति घणियूं ई ॻाल्हियूं ॿुधनि था पर को विरलो ई हूंदो जेको असांखे सम्झी सघे। मुसहर लफ़्ज़ु ॿुधंदे ई माण्हुनि जे तसवुर में ग़रीबी, पोरिहिए ऐं अणाठि जो मंज़रु अचे थो। मां तस्लीमु करियां थो त इन में कुझु क़दुरु सचाई बि आहे। नसुलनि खां असांजो समाजु सभ खां वधीक ॾुतड़ियल बिरादरियुनि मां हिकु रहियो आहे। उत्तर प्रदेश में असीं अनुसूचित जाति जी फ़हिरिस्त में शामिल आहियूं। असांजे अबनि ॾाॾनि वटि न का पंहिंजी ज़मीन हुई, नको पको रोज़गारु हो। आमदनीअ जो को बि को भरोसो न हो। असीं दलित आहियूं। तइलीम पिराइण असां लाइ को सवलो कमु नाहे। ॻोठ जे कुझु ग़रीबु ॿांभणनि जे उॿितड़ तइलीमु असांजी ज़िंदगीअ जो हिस्सो न रही आहे।

अॼु बि, मां असां जे ॻोठ में अहिड़नि परीवारनि खे सुञाणां थो जिनि खे सुबुह थींदे ई हिक वेल जी मानीअ जो बि ओनो सताईंदो आहे। जॾहिं ज़िंदगीअ में ॾींहं जा 24 कलाक जीअण जी जदोजहद में ई गुज़री वञनि, त तइलीमु त पराओ ख़्वाबु ई लॻंदो। होशु संभालण लॻुसि त पाड़े जे तमामु घटि ॿारनि खे स्कूल वेंदे ॾिठुमि। जेके स्कूल में वेंदा बि हुआ, उहे पोइ विच में ई पढ़ाई छॾे ॾींदा हुआ– कुझु खे पैसनि जी सोढ़ हुजे, त कुझु मज़ूरीअ जे लाइ ऐं बि॒या वरी नंढी उमिरि में ई परिणजी वेंदा हुआ।

जेतोणीकि, मां सम्झां थो त किंहिं बिरादरीअ जी सुञाणप ग़रीबी रेखा जे बुनियाद ते तइ नथी थिए, पर इन जे माण्हुनि में लिकियल क़ाबिलियत हूंदी आहे। असां जा बि ख़्वाब हुआ। फ़र्क़ु इहो आहे त उन्हनि ख़्वाबनि खे पूरो करण जे लाइ असांखे ॾाढा घटि मौक़ा मिलिया आहिनि।

अॼु जॾहिं पंहिंजी बिरादरीअ जे ॿारनि खे किताबु झलियो मुर्कंदे ॾिसां थो त मूंखे ॿालपण जा ॾींहं यादि अचनि था।

मुंहिंजो पीउ, पप्पू बनवासी, असां जे परीवार में अठनि भातियुनि जी ज़रूरतुनि जे लाइ अकेलो कमाइण वारो हो। हू ॾिहाड़ियूं करण वारो मज़ूरु हो। सुबुह सवेल ई घरां निकरी पवंदो हो ऐं देरि शाम ताईं घरु मोटंदो हो। – सॼो ॾींहुं हॾ गसाइण खां पोइ थको मांदो ईंदो हो। हू असांजे बहितरु आईंदह जे लाइ सख़्तु कशाला कढी रहियो हो। मुंहिंजी माउ, आभा देवी ॿनी पोखीअ जो कमु मिलण ते पीउ जी मदद कंदी हुई।

मुंहिंजे माउ-पीउ असां पंजनि भावरनि मां कंहिं खे बि स्कूलु वञण खां न रोकियो, भले ई उहे पाण कॾहिं बि स्कूल न विया हुआ। उन्हनि जो वेसाहु हो त असांजी ज़िंदगियुनि खे तब्दीलु करण जी ॾिस में तइलीमु पहिरियों क़दम हुई।

असां हमेशह ई खुटकनि में ई ज़िंदगी गुज़ारी आहे। अहिड़ा ॾींहं बि ॾिठासीं जॾहिं बुनियादी ज़रुरतुनि जे लाइ बि जदोजहद करणी पवंदी हुई। लेकिनि इन जो असरु कॾहिं बि मुंहिंजी स्कूलिंग ते न पियो। मूंखे पढ़ण में मज़ो ईंदो हो ऐं केतिरनि ई उस्तादनि मुंहिंजे उत्साह खे बि सुञातो हो। होरियां होरियां स्कूलु हिक अहिड़ी जाइ बणिजी वियो जिते मां पंहिंजे ॻोठि खां ॿाहिरि हिकु जुदा दुनिया जा ख़्वाब डि॒सण लॻी वियो हुयुसि।

मूं उन दुनिया में पहिरियों क़दमु तॾहिं रखियो, जॾहिं मां पहिरियों दफ़ो कॉलेजु वियुसि – महात्मा गांधी काशी विद्यापीठ, मुंहिंजे ॻोठ खां 30 किलोमीटरनि जे पंध ते हो। मां पढ़ाई जे लाइ ॿाहिरि वञण वारो पहिरियों माण्हू हुयुसि। लेकिनि हालात एतिरा सवला न हुआ। सदाईं पैसनि जी सोढ़ लॻी पेई हूंदी हुई। पोइ माणमि जी सेहत नाचाक रहण लॻी। घर जी संभाल करण जे लाइ उन महिलु केरु बि न हो। इनकरे परीवार वारनि 2020 में मूंखे परिणाए छॾियो। मां उन वक़्त बि कॉलेज जे पहिरिएं साल में हुयुसि। इन सभिनी जे विच में माली हालाति अञा बिॻड़िजी विया।

इन सभिनी जे विचु में,मूं पंहिंजी ग्रेजूएशन पूरी कई। इहा मुंहिंजे परीवार में हिक वॾी कामयाबी हुई। मां पहिरियों माण्हू हुयुसि जंहिं 2022 में हिन्दीअ में बीए सां ग्रेजूएशन कई। मुंहिंजे माउ पीउ खे मुंहिंजे आईंदह जे लाइ यक़ीन हो ऐं उहे ख़ुशि बि हुआ। मां उस्तादु बणिजण जो ख़्वाबु ॾिसी रहियो हुयुसि।

पर पोइ ओचितो ज़िमेवारियूं मुंहिंजे ख़्वाबनि आॾो अचण लॻियूं। मुंहिंजी ज़ालि पहिरियों दफ़ो पेट सां हुई। माउ जी तबीयत ख़राबु थी वेई। पीउ जी कमाई गुज़रान जे लाइ काफ़ी न हुई। वॾे पुट जी हैसियत सां, महिसूसु कयुमि त केतिरियुनि ई जवाबदारियुनि जो वज़न आहिस्ते आहिस्ते मुंहिंजे कुल्हनि ते अची रहियो हो। उन्हनि ॾींहनि में मुंहिंजी दिलि में ॼण त तूफ़ानु हो। राति जो पंहिंजी तइलीम जा ख़्वाब पालींदो होसि, लेकिनि सुबुह थींदे ई आसपासि जा हालाति डि॒सी ॿिया ई ख़्याल अचण लॻंदा हुआ। नेठि मूं ॾिहाड़ियुनि जे लाइ कमु शुरू कयो, जंहिं में मूंखे ॾींहं जा 500 रुपया मिलंदा हुआ।

हिक साल खां पोइ वधीक कमाइण जी उमेद सां मूं किराए ते ऑटो रिक्शा हुलाइण शुरू कयो, जंहिं ॾींहुं पहिरियों दफ़ो ऑटो वठी सड़क ते निकतुसि, त मुंहिंजो मनु बेचैन हो।मूंखे शर्मु अची रहियो हो। इएं न हो त मां ईमानदारीअ सां करण वारे कंहिं बि कम खे पंहिंजे शान जे ख़िलाफ़ सम्झंदो हुयुसि। बल्कि, हिकिड़ी ॻाल्हि मूंखे अंदरां खाईंदी हुई। मां पाण पंहिंजी मंज़िल ते पहुची न सघियुसि, पर माण्हुनि खे संदनि मंज़िल ताईं पहुचाए रहियो होसि। मूंखे अहिसासु थियो त मुंहिंजो ख़्वाबु अञा ताईं मुंहिंजे अंदरि जिंदह आहे।

जॾहिं बि मुंहिंजो ऑटो कंहिं स्कूल जे भरिसां लंघंदो हो, या कंहिं ॿार खे संदसि यूनिफ़ॉर्म में मुर्कंदे ॾिसंदो होसि, त मुंहिंजी दिलि जी धड़कण तेज़ु थी वेंदी हुई। ऐं जेकॾहिं को उस्तादु मुंहिंजे ऑटो में विहंदो, त मां हुन सां ॻाल्हाइण लॻंदो होसि ऐं मूंखे जितेंद्र शर्मा सर जी यादि अची वेंदी हुई। मूंखे संदसि ॻाल्हियूं यादि पवंदियूं ऐं मां पंहिंजी ज़िंदगीअ जे बारे में सोचण लॻंदो हुयुसि।

मुंहिंजी बुई मुहीम नाले जे एनजीओ में कमु कंदी हुई। हिक सालु बैदि 2024 में हुन मूंखे ॿुधायो त एनजीओ वारा लीडरशिप प्रोग्राम जे लाइ फ़ेलो ॻोल्हे रहिया आहिनि। उहे मुसहर बिरादरीअ (मुंहिंजे इलाइक़े में अखर ॼाण जी शरह तमामु घटि आहे, फ़क़ति टे सेकिड़ो आहे) मां किनि खे चाहींदा हुआ, जेके अगि॒ते अची ॻोठ जे ॿारनि लाइ ॿिनि सालनि ताईं मेंटर तौरु कमु कनि।

मूं मुहीम लीडर फे़लोशिप लाइ दरख़्वास्त ॾिनी, जेका टीच फ़ॉर इंडिया जे इनक्यूबेशन (TFIx) प्रोग्राम जे तहति शुरू थी। मूं कॾहिं बि न सोचियो हो त मूंखे चूंडियो वेंदो, पर इहो मौक़ो ज़िंदगी बदलाईंदड़ नज़रि आयो। जेको दरु सालनि खां बंदि पियो हो, उहो ओचियो खुली वियो। जीअं ई मां चूंडियो वियुसि, मां प्रोग्राम में शामिल थी वियुसि।

पाढ़ण जा नवां नवां तरीक़ा सिखियुसि। पहिरियाईं पहिरियाईं मूं मश्गू़लियुनि सां सेखारण (एक्टिविटी-बेस्ड लर्निंग) बाबति ॿुधो, जंहिं में कहाणियुनि ज़रिए पाढ़ियो वेंदो आहे ऐं हिसाबु ऐं भाषा जी सिखिया जे लाइ रांदियुनि जो सहारो वठिजे थो। मूं डिजिटल टूल्स जो इस्तेमाल करण शुरू कयो ॿारनि सां गॾु हिकु गॾियल सिख्या वारे माहोल में कमु करण शुरू कयो। जेतिरो वधीक सिखियुमि, ओतिरो ई महसूस कयुमि त तइलीम ॿारनि जे साम्हूं किताबु पढ़ण जो नालो नाहे। पर इन जो मतिलबु आहे त ॿारनि खे अहिसासु ॾियारिजे त उहे पंहिंजी ज़िंदगीअ में कामयाबियूं माणे सघनि था। हिकु उस्ताद हुअण जे नाते मूंखे ॿारनि में ॼाणण जो उत्साहु जॻाइणो आहे, उन्हनि खे सुवाल पुछण जी हिमत ॾियणी आहे ऐं ख़्वाबनि खे पूरो करण जी ॾिस में संदनि रहिनुमाई करणी आहे।

शुरूअ में, मूं जिनि 30 शागिरदनि सां कमु कयो हो उहे तमामु लॼारा हुआ। उहे क्लास में मस ई ॻालहाईंदा हुआ, ऐं केतिरनि खे त पाण ते यक़ीन न हो त उहे पढ़ी ऐं लिखी सघिंदा। उन्हनि खे ॾिसी मूंखे अक्सरि पंहिंजे नंढपिण जी यादि अची वेंदी हुई। मूंखे ख़बर आहे त आत्मविश्वास जी खोट ग़रीबीअ खां वधीक डेॼारींदड़ आहे। इनकरे मूं फ़ैसिलो कयो त मां न रुॻो उन्हनि खे पाढ़िदुसि पर उन्हनि खे पाण ते भरोसो करण बि सेखारींदुसि।

आहिस्ते आहिस्ते, असां जे विच में नींहं जो नातो ॻंढिजी वियो। उहे मूंते भरोसो कंदे पंहिंजी ज़िंदगीअ जूं नंढियूं नंढियूं ॻाल्हियूं बि मूंसां ओरण लॻा। असांजी क्लास में समर नाले जो हिकु छोकरो हो, जेको अटिकल 6-7 सालनि जो हो। हू सदाईं बाक़ी शागिर्दनि जे पुठियां वेहंदो हो। जेकॾहिं खेसि कुझु पढ़ण या ॿुधाइण जे लाइ चवंदो हुयुमि, त हू फ़क़ति कंधु हेठि करे हेठि ॾिसंदो रहंदो हो। मूं हुन जे मामले में सबुरु धारियो, लेकिनि हुन मूं क़बूल न कई।

हिकु ॾींहुं मूं चयोमांसि त जेकॾहिं क्लास में ॿ सिटूं बि पढ़ी ॾेखारींदें त मूं लाइ इहा ॾाढी वॾी ॻाल्हि थींदी। हुन ॾींहुं कंधु हेठि न कयाईं। हू थोरो घबि॒राहट सां गॾु उथी खड़ो थियो, संदसि आवाज़ में लर्ज़िश हुई जॾहिं हुन पढ़ण शुरू कयो:

हरा हरा तोता, हरा हरा तोता
डाल पकड़कर सोता, काला जामुन खट्टा
खूब मजे से उड़ जाता

[साओ तोतो, साओ तोतो
टारी झलियो सुम्हे थो
कारा ॼमूं चुॻे थो
ख़ुशीअ सां उॾामे थो]

लेकिनि जॾहिं हुन पंहिंजी ॻाल्हि पूरी कई, त बाक़ी शागिर्दनि ताड़ियूं वॼायूं। समरु मथे ॾिसंदे मुर्क ॾिनी; मुंहिंजी अखियुनि में फ़ख़ुर ऐं सरहाईअ जी चमक हुई। पाढ़णु, रुॻो पेशो नाहे पर हिकु जवाबदारी आहे, ऐं भांयां थो त मूं इन जवाबदारीअ खे चङीअ रीति निबाहियो आहे। फ़ेलोशिप ईंदड़ु महीने, याने सेप्टेम्बर में ख़तमु थी वेंदी। पोइ मूंखे ख़बर नाहे त मुंहिंजी ज़िंदगीअ जो रुख़ु छा थींदो।

लेकिनि अॼु जॾहिं मां पंहिंजनि शागिर्दनि जे साम्हूं बीहंदो आहियां, त मूंखे मालूम आहे त उहे मूंखे अहिड़े उस्ताद जे तौर ते नथा ॾिसनि, पर पंहिंजे ई ॻोठ जे हिकु अहिड़े इंसान तौरु ॾिसनि था जेको उन्हनि जे कुटुंबनि जहिड़े ई कंहिं परीवार मां आयो आहे। शायदि शर्मा सर सही पिए चयो, शायदि मिसालु थियण जो मतिलबु इहो ई थींदो आहे।

इहा कहाणी मूल रूप सां हिंदीअ में दर्ज कई वेई

रिपोर्टर इन कहाणीअ में सहिकार जे लाइ वाराणसी में मुहीम-एक सार्थक प्रयास वेलफे़यर सोसाइटीअ जे फ़ाउंडर ऐं डायरेक्टर स्वाति सिंह ऐं टीच फ़ॉर इंडिया जी टीम जा थोरा थो मञे।