کچرا ڈھونے والوں کا کوئی پرسان حال نہیں

لتا بائی کو ہفتہ کو ایک دن کی بھی چھٹی نہیں ملتی۔ وہ روزانہ کام کرتی ہیں۔ اگر وہ بیمار پڑ جائیں اور چھٹی لیں، تو جس ٹھیکہ کمپنی کے لیے وہ کام کرتی ہیں، وہ ان سے ۵۰۰ روپے یومیہ کا جرمانہ وصول کرتی ہے۔

اور لتا بائی، لاتور شہر کی انعام یافتہ کچرا بیننے والی صفائی مزدور ہیں۔

’’میں لاتور شہر کی واحد خاتون ڈرائیور ہوں۔ سال ۲۰۱۱ میں لاتور فیسٹیول میں ہمارے ایم ایل اے امت دیش مُکھ کے ذریعہ مجھے اپنے متعینہ رہائشی علاقہ کو صاف رکھنے کے لیے ’لاتور بھوشن پُرسکار‘ سے نوازا گیا تھا،‘‘ انہوں نے پاری سے بات کرتے ہوئے کہا۔

میونسپل کارپوریشن کے اہلکاروں نے میرے علاقہ کا جائزہ لیا تھا اور انہیں سوکھا یا گیلا کچرا کہیں نہیں ملا۔ اتنے بڑے مجمع، وزیروں اور مشہور شخصیات کی موجودگی میں انعام پا کر مجھے بیحد خوشی حاصل ہوئی تھی۔ مجھے لگا تھا کہ اب میری جدوجہد کو پہچان ملے گی – لیکن تب مجھے کہاں معلوم تھا کہ یہ اعزاز صرف ایک دن کا ہے،‘‘ وہ مزید کہتی ہیں۔

مہاراشٹر کے لاتور شہر کی ۴۰ سالہ لتا بائی رسال کہتی ہیں، ’’میں ۲۰۰۲ سے لاتور میں کچرا چن رہی ہوں۔‘‘ اسی سال ان کے شوہر کا انتقال ہو گیا تھا۔ وہ محض ۱۵ سال کی عمر میں شادی کے بندھن میں بندھی تھیں، اور شادی کے سات سال بعد ہی ان کے شوہر گزر گئے۔ معاش کی تلاش میں انہوں نے خود کی اور اپنے پانچ بچوں کی پرورش کرنے کے لیے کچرا بیننے کا کام شروع کر دیا۔

’’مزدوری کے لیے میری جدوجہد آج بھی جاری ہے۔ میں صبح ساڑھے چھ بجے کام شروع کرتی ہوں۔ سب سے پہلے اَوسا روڈ کے پاس واقع سُپر وائزر سنٹر جاتی ہوں، جہاں کچرا اکٹھا کرنے کے لیے گاڑیاں کھڑی رہتی ہیں۔ وہاں سُپر وائزر ہماری گاڑی کے ساتھ فوٹو کھینچتے ہیں، جو ہماری ’ہجیری‘ [حاضری] کے لیے ہوتی ہے۔ پھر میں اپنی گاڑی کے ساتھ متعینہ رہائشی علاقوں میں کچرا جمع کرنے کے لیے جاتی ہوں،‘‘ لتا بائی بتاتی ہیں۔ وہ روزانہ اپنے گھر سے پانچ کلومیٹر دور، سُپر وائزر سنٹر تک جاتی ہیں۔

لتا بائی کی گاڑی زیادہ سے زیادہ ۲۰۰ کلوگرام وزن ڈھو سکتی ہے۔ ایک ہزار گھروں سے کچرا اکٹھا کرنے کے لیے انہیں گاڑی کو تین بار خالی کرنا پڑتا ہے۔ لاتور کے ایک ہزار گھروں سے تقریباً ۶۰۰ کلوگرام کچرا اکٹھا ہوتا ہے۔

کچرا جمع کرنے کے لیے اس شہر کو تین رہائشی علاقوں میں تقسیم کیا گیا ہے۔ ہر علاقہ سے روزانہ تقریباً ۷ ٹن (۷۰۰۰ کلوگرام) کچرا نکلتا ہے، جسے شہر کے سگنل کیمپ علاقہ کے پاس ایک بڑی گاڑی میں ڈالا جاتا ہے۔ وہاں سے یہ کچرا لاتور کے باہری علاقہ، ناند گاؤں لے جایا جاتا ہے۔

لاتور میونسپل کارپوریشن نے ہر گھر پر ایک بارکوڈ لگایا ہے، اور کچرا اکٹھا کرنے والوں کو ہر بار اسے اسیکن کرنا پڑتا ہے، تاکہ کارپوریشن کو کچرا جمع ہونے کی تصدیق حاصل ہو سکے۔ لتا بائی کہتی ہیں، ’’تکنیک نے ہماری زندگی اور مشکل کر دی ہے۔ ہمیں تبھی تنخواہ ملتی ہے، جب ہم ایک دن میں ۱۰۰۰ بارکوڈ اسکین کریں۔ کبھی کبھی موبائل کا ’ڈیٹا‘ ٹھیک سے نہیں چلتا تو بارکوڈ اسکین کرنے میں کافی وقت لگ جاتا ہے۔‘‘

لاتور کے کچرا جمع کرنے والے ہمیشہ ٹھیکہ پر کام کرتے آئے ہیں۔ گزشتہ دو برسوں سے یہ ٹھیکہ ممبئی کی ’اشوک انٹرپرائز‘ کے پاس ہے۔ سال ۲۰۲۴ سے پہلے یہ ٹھیکہ لاتور کے مقامی سماجی کارکن سنجے کامبلے کے پاس تھا۔

لتا بائی کہتی ہیں، ’’آخری بار ہمیں ۲۶ دسمبر، ۲۰۲۵ کو تنخواہ ملی تھی۔ اس کے بعد آج (۶ فروری، ۲۰۲۶) تک ہمیں تنخواہ نہیں ملی ہے۔ اگر ہم احتجاج کی بات کرتے ہیں، تو ٹھیکیدار کے آدمی دھمکی دیتے ہیں کہ نوکری چلی جائے گی۔ نوکری جانے کے ڈر سے ہم حکام سے سوال نہیں کرتے۔‘‘

گھر پر بھی لتا بائی کی جدوجہد جاری ہے۔ اپنے گھٹنے کی طرف اشارہ کرتے ہوئے وہ کہتی ہیں، ’’بارش کے موسم میں ہمارے گھر کے اندر یہاں تک پانی بھر جاتا ہے۔ ہر مانسون میں میرے بچے تیز بخار سے بیمار پڑ جاتے تھے۔ ہمارے کچے گھر میں بارش کے وقت حالت کافی خستہ ہو جاتی ہے۔‘‘ لتا بائی بتاتی ہیں کہ ہر میونسپل الیکشن سے پہلے مقامی کارپوریٹر گھر ٹھیک کرانے کا وعدہ کرتے ہیں، لیکن انتخاب کے بعد غائب ہو جاتے ہیں۔

’’میں بیوہ ہوں، پھر بھی میرا نام سنجے گاندھی نرادھار یوجنا، لاڈکی بہین یوجنا یا کسی دیگر سرکاری اسکیم میں درج نہیں ہے۔ اسکیموں کی بات چھوڑیے، میرے پاس کیسری [زعفرانی] راشن کارڈ ہونے کے باوجود مجھے راشن نہیں ملتا،‘‘ لتا بائی کہتی ہیں۔

حالانکہ، وہ عورتوں کے لیے بنی سرکاری اسکیموں کی حقدار ہیں، لیکن پروسیس میں بچولیے شامل ہیں جو کام کروانے کے لیے کم از کم ایک ہزار روپے مانگتے ہیں۔ ’’میں نے الگ الگ اسکیموں کے لیے ایسے کئی لوگوں کو پیسے دیے ہیں، پھر بھی وہ اور پیسے مانگتے رہتے ہیں۔ اور اگر مجھے خود تحصیل دفتر جانا پڑے، تو ایک دن کا کام چھوڑنا پڑے گا، جس کے لیے مجھ پر جرمانہ لگے گا،‘‘ وہ کہتی ہیں۔

راشن کارڈ کے لیے بھی بچولیے اسے آن لائن رجسٹریشن کرانے کے نام پر کم از کم ۵۰۰ روپے اضافی مانگتے ہیں۔ اب ماہانہ راشن پانے کے لیے راشن کارڈ کا آن لائن رجسٹریشن لازمی کر دیا گیا ہے۔

ہر دن کچرے کا کام کرنے والے لتا بائی جیسے مزدوروں کو باقاعدگی سے حفاظتی سامانوں کی ضرورت ہوتی ہے۔ لیکن وہ بتاتی ہیں، ’’میونسپل کارپوریشن جو دستانے دیتا ہے، وہ زیادہ سے زیادہ ۱۵ دن ہی چلتے ہیں اور سال میں صرف ۲ یا ۳ جوڑی ملتے ہیں۔ ہم ان سے کیسے کام چلائیں؟‘‘

کیچڑ میں ڈوبے اپنے دستانے دکھاتے ہوئے وہ کہتی ہیں، ’’یہ دستانے میں نے کچرے کے ڈھیر سے اٹھائے ہیں۔ اب میں انھیں کا استعمال کرتی ہوں۔ برسوں تک بغیر دستانے کے گیلا اور سوکھا کچرا الگ کرتے کرتے میرے انگوٹھے کے نشان مٹ گئے ہیں۔ کسی بھی سرکاری کام میں جب مجھے انگوٹھا لگانا پڑتا ہے، تو میرا انگوٹھے کا نشان پہچان میں نہیں آتا۔‘‘

مہاراشٹر میں بڑھتی معیشت کی بنیاد پر لاتور کو ٹیئر۔۳ شہروں میں شامل کیا گیا ہے، جہاں اکولہ، بارامتی، ستارا، سانگلی جیسے شہر بھی آتے ہیں۔ آبادی کی بنیاد پر یہ مہاراشٹر میں ۱۹ویں مقام پر ہے، جس کی آبادی تقریباً ۶ء۲ لاکھ ہے، جب کہ ریاست کی سب سے زیادہ آبادی والا شہر ممبئی ہے، جس کی آبادی تقریباً ۱۹ء۱ کروڑ ہے۔

’’سال ۲۰۱۱ میں کارپوریشن سے حاصل ہونے والے انعام سے مجھے ۷۵ ہزار روپے ملے تھے – جنہیں میں نے کچرا جمع کرنے والی گاڑی خریدنے میں خرچ کر دیا،‘‘ انہوں نے پاری کو بتایا۔

یہ ایک چھوٹی موٹر سے چلنے والی تین پہیہ گاڑی ہے، جس کی دھات کی باڈی ہلکے نیلے رنگ کی ہے اور پیچھے مال ڈھونے کا کھلا حصہ ہے۔ لتا بائی نے سوچا تھا کہ اب ان کے پاس اپنی گاڑی ہوگی اور وہ خود گاڑی چلا کر کچرا اکٹھا کریں گی۔ لیکن کارپوریشن نے کہا کہ انہیں ڈرائیونگ اور کچرا اکٹھا کرنے – دونوں کے لیے تنخواہ نہیں مل سکتی؛ انہیں صرف ایک کام کے ہی پیسے ملیں گے۔ گاڑی خریدتے وقت انہیں اس بات کا علم نہیں تھا۔

’’اس لیے مجھے اپنی گاڑی کے لیے الگ ڈرائیور رکھنا پڑا،‘‘ لتا بائی بتاتی ہیں۔ مزدوری کے فرق کی وجہ سے انہوں نے اپنی ہی گاڑی کا ڈرائیور بننے کے بجائے کچرا جمع کرنے والی صفائی ملازم بنے رہنا منتخب کیا۔ کچرا جمع کرنے سے انہیں تقریباً ۱۲ ہزار روپے ماہانہ ملتے ہیں، جب کہ ڈرائیور کی تنخواہ ۷ ہزار روپے ماہانہ ہے۔ اس کے علاوہ، ٹھیکہ کمپنی سے گاڑی کے استعمال کے لیے انہیں ہر مہینے ۱۰۰۰ روپے اور ایندھن کے خرچ کی شکل میں کچھ اضافی رقم ملتی ہے۔ وہ روزانہ تقریباً ۱۱ گھنٹے کام کرتی ہیں – صبح ۶:۳۰ بجے سے شام کے ۵:۳۰ بجے تک۔

پچھلے سال، یکم جولائی ۲۰۲۵ سے مہاراشٹر میں ژون۔۲ شہروں کے لیے جھاڑو لگانے والے اور کچرا اٹھانے والے مزدوروں (سُویپر اور اسکیوینجر) کی کم از کم ماہانہ تنخواہ ۱۶ ہزار ۵۸۴ روپے طے کی گئی ہے، جیسا کہ مہاراشٹر منیمم ویج ۲۰۲۵ رپورٹ میں درج ہے۔ لتا بائی کی ماہانہ آمدنی، گاڑی کے استعمال کے اضافی پیسے کے علاوہ، صرف ۱۳ ہزار روپے ہے – جو رپورٹ میں بتائی گئی کم از کم اجرت سے تقریباً ۲۲ فیصد کم ہے۔

لتا بائی جیسے تقریباً ۶۰۰ مزدوروں کی محنت کے دم پر لاتور نے ۲۰۲۴-۲۵ میں ٹھوس کچرا کے بندوبست کے لیے ایک اہم انعام جیتا۔ لتا بائی کہتی ہیں، ’’ہاں، کارپوریشن کو انعام ملا۔ افواہ پھیلائی گئی کہ ہم سب کو انعام کے بعد بہت پیسے ملے، لیکن ہمیں ایک پیسہ بھی نہیں ملا۔‘‘

کچرا اکٹھا کرنے کی یومیہ اجرت تقریباً ۴۰۰ روپے پڑتی ہے۔ لیکن ایک دن کی بھی چھٹی لینے پر ۵۰۰ روپے کا جرمانہ لگایا جاتا ہے – جو یومیہ مزدوری سے ۲۵ فیصد زیادہ ہے۔ ایسا لگتا ہے گویا کارپوریشن چاہتا ہے کہ اگر کچرا مزدور کبھی بیمار پڑیں اور چھٹی لیں، تو ان کی تھوڑی سی بچت بھی صاف ہو جائے۔

ترجمہ نگار: قمر صدیقی