लातूर मं लताबाई के कचरा कस जिनगी

लताबाई ला हफ्ता मं एको दिन घलो छुट्टी नइ मिलय. वो ह हरेक दिन काम मं जाथे. गर वो ह बीमार पर जाथे अऊ छुट्टी लेथे, त जेन ठेका कंपनी बर वो ह काम करथे, वो ह ओकर ले एक दिन के 500 रूपिया डांड (जुरमाना) लेथे.

अऊ लताबाई लातूर शहर के इनाम जितेइय्या कचरा उठेइय्या एक झिन महतारी आय.

वो ह पारी ला बताइस, “मंय लातूर शहर के अकेल्ला महिला ड्राइवर अवं. साल 2011मं, मोला लातूर फेस्टिवल मं हमर विधायक अमित देशमुख ले लातूर भूषण अवॉर्ड मिले रहिस, काबर के मंय अपन बर तय रिहायशी इलाका मन ला साफ रखे रहेंय.”

“नगर निगम के अफसर मन मोर जोन (इलाका) के जाँच करिन, अऊ वो मन ला कोनो सूखा धन गीला कचरा नइ मिलिस. मंय बनेच अकन लोगन मन, मंत्री अऊ नामी लोगन मन के आगू इनाम पाके गदगद रहेंय. मोला लगिस के मोर लड़ई ला अब नांव मिलही- मंय वो बखत रत्ती भर सोचे नइ रहेंय के ये ह सिरिफ एक दिन के होही,” वो ह बतावत जाथे.

महाराष्ट्र के लातूर शहर के 40 बछर के लताबाई रसाल कहिथे, “मंय साल 2002 ले लातूर मं कचरा संकेलत हवंव. इहीच बछर ओकर घरवाला गुजर गे रहिस. ओकर बिहाव सात बछर पहिली होय रहिस तब वो ह सिरिफ 15 बछर के रहिस. अपन अऊ अपन पांच लइका मन के गुजारा बर वो ह कचरा संकेले सुरु करिस.

“दू पइसा कमाय बर मंय अब तक ले जूझत हवंव. मंय बिहनिया साढ़े छै बजे अपन काम सुरु करथों. सबले पहिली, लातूर मं औसा रोड के तीर सुपरवाइज़र के सेंटर जाथों जिहां कचरा उठेइय्या गाड़ी मन खड़े होथें. ओकर बाद सुपरवाइज़र हमर फोटो खींचथे, संगे संग हमर गाड़ी के हाजरी घलो. ओकर बाद गाड़ी ले, मंय कचरा उठाय बर मोला देय गेय रिहायशी इलाका मन मं जाथों,” लताबाई कहिथे. वो ह सुपरवाइज़र के सेंटर तक हबरे बर रोज अपन घर ले डेढ़ कोस दूरह जाथे.

लताबाई के गाड़ी के जोरे के ताकत 200 किलो हवय.1,000 घर ले कचरा संकेले बर वोला गाड़ी ला तीन बेर खाली करे ला परथे. लातूर मं एक हजार घर ले निकरेइय्या कचरा करीबन 600 किलो हवय.

कचरा संकेले बर शहर ला तीन ठन रिहायशी जोन मं बांटे गे हवय. हरेक जोन मं हरेक दिन करीबन 7 टन कचरा आथे जेन ला शहर के सिग्नल कैंप एरिया के तीर एक ठन बड़े गाड़ी मं डाले जाथे. उहाँ ले कचरा लातूर के बहिर इलाका नांगांव ले जाय जाथे.

लातूर नगर निगम ह हरेक घर मं एक ठन बारकोड लगाय हवय, अऊ कचरा संकलेइय्या मन ला हरेक बेर स्कैन करे ला परथे जेकर ले निगम ला कचरा निकरे के कन्फर्मेशन मिल जाय. लताबाई कहिथे, “टेक्नोलॉजी हमर जिनगी ला अऊ खराब करत हवय. हमन ला अपन तनखा तभे मिलथे जब हमन एक दिन मं 1,000 बारकोड स्कैन करथन. कभू-कभू हमर मोबाइल फोन के ‘डेटा’ खराब होथे, त बारकोड स्कैन करे मं बनेच बखत लग जाथे.”

लातूर के कचरा संकलेइय्या मन ठेका के तहत काम करथें. बीते कुछू बछर ले ये ठेका मुंबई के अशोक एंटरप्राइज ह ले हवय. साल 2024 के पहिली ये ठेका लातूर के एक झिन समाजिक कार्यकर्ता संजय कांबले करा रहिस.

लताबाई कहिथे, “बीते बखत हमन ला 26 दिसंबर, 2025 मं तनखा मिले रहिस. आज [6 फरवरी 2026] तक हमन ला अपन तनखा मिले नइ ये. गर हमन येकर खिलाफ मुंह खोलथन, त ठेकदार के लोगन मन हमन ला धमकाथें के तुंहर नउकरी चले जाही. हमन ला अपन नउकरी जाय के डर हवय, ते पायके हमन अफसर मन ला सिकायत नइ करन.”

लताबाई ला घर बर घलो जूझे ला परत हवय. अपन माड़ी कोती आरो करत वो ह कहिथे, “बरसात मं हमर घर भीतरी अभू घलो अतक पानी भर जाथे. बरसा मं मोर लइका मन ला भारी जर धर लेवत रहिस. हमर कच्चा घर –जब बरसा होथे त ओकर हाल खराब हो जाथे.” लताबाई ये रिपोर्टर ला बताथे के नगर निगम के हरेक चुनाव के पहिली पार्षद मन घर मन ला सुधरवाय के वादा करथें फेर चुनाव के बाद वो मन नजर नइ आवंय.

लताबाई कहिथे, “मंय बेवा अवं, ओकर बाद घलो मोर नांव संजय गांधी निराधार योजना, लड़की बहिन योजना धन कोनो आने सरकानी योजना मं नइ ये. योजना के बात छोड़ देवव, मोरा करा केसरी राशन कार्ड होय के बाद घलो मोला रासन घलो नइ मिलय.”

वइसे वो ह माईलोगन मन बर बने सरकारी योजना मन के हकदार हवय, फेर ये काम के बीच मं दलाल हवंय, जेन मन काम करवाय के एबज मं कम से कम एक हजार रुपिया मांगथें. वो ह बताथे, “मंय अइसने कतको लोगन मन ला अलग अलग योजना बर पइसा देय हवंव, ओकर बाद घलो वो मन अऊ मांगत रहिथें अऊ तहसील आफिस जाय बर मोला एक दिन नागा करे ला परथे, जेकर बर मोला जुरमाना भरे ला परथे.”

रासन कार्ड ला ऑनलाइन रजिस्टर करे बर दलाल मन कम से कम 500 रूपिया मांगथें. महीना के रासन बर अब ऑनलाइन रजिस्ट्रेशन ज़रूरी होगे हवय.

रोज के कचरा उठाय बखत, लताबाई जइसने मजूर मन ला रोज के सुरच्छा समान काम मं लाय के जरूरत परथे. फेर वो ह बताथे, “नगर निगम जेन दस्ताना देथे, वो ह जियादा ले जियादा 15 दिन टिकथे अऊ वो मन बछर भर मं सिरिफ 2 धन 3 जोड़ीच देथें. हमन वोला कइसने चलाबो?”

माटी मं सनाय अपन दस्ताना दिखावत वो ह कहिथे, “मंय ये दस्ताना कचरा ले उठाय हवं. मंय येला काम मं लाथों. कतको बछर तक ले बगेर दस्ताना के कचरा गीला अऊ सूखा कचरा अलग करे सेती मोर अंगठा चिन्हे के लइक नइ रहि जाय.”

महाराष्ट्र मं, बढ़त अर्थव्यवस्था के मामला मं लातूर, अकोला, बारामती, सतारा, सांगली अऊ आने शहर के संग टियर-3 शहर मं सामिल हवंय. आबादी के मामला मं, ये ह करिन 2 लाख 60 हजार के संग 19 वां जगा मं हवय, फेर महाराष्ट्र के सबले जियादा आबादी वाला शहर, मुंबई, 1 करोड़ 19 लाख आबादी वाला आय.

वो ह पारी ला बताइस, “साल 2011 मं नगर निगम ले मिले इनाम मं मोला 75,000 रूपिया मिले रहिस – जेकर ले मंय कचरा उठाय के गाड़ी बिसो लेंय.”

ये गाड़ी ह एक ठन छोटे, मोटर ले चलइया तीन चक्का वाला आय, जेकर बाडी ह नीला-तुलसी रंग के लोहा के हवय अऊ पाछू डहर कचरा भरे बर खुल्ला जगा हवय. लताबाई सोचिस के ओकर करा खुद के गाड़ी होही त वोला चलाके कचरा संकेल सकथे. फेर निगम ह कहिस कि वोला गाड़ी चलाय अऊ कचरा संकेले, दूनों काम के पइसा नइ मिल सकय. वोला सिरिफ एक काम के पइसा मिलही. जब वो ह गाड़ी बिसोइस, तब वोला ये बात के पता नइ रहिस.

लताबाई कहिथे, “ते पायके मोला अपन गाड़ी बर अलग ले ड्राइवर रखे बर परिस.” तनखा मं अंतर होय के सेती, वो ह अपन गाड़ी चलाय के जगा कचरा संकेले के काम ला चुनिस. कचरा उठाय ले वोला हरेक महीना करीबन 12,000 रूपिया मिलथे. ड्राइवर मन के तनखा 7,000 रूपिया महीना हवय. लताबाई ला ठेका कंपनी कोति ले अपन गाड़ी बर हर महीना अऊ 1,000 रूपिया अऊ तेल के खरचा मिलथे. वो ह हरेक दिन बिहनिया 6.30 बजे ले संझा 5.30 बजे तक ले करीबन 11 घंटा बूता करथे.

1 जुलाई, 2025 तक, महाराष्ट्र न्यूनतम मजदूरी 2025 के रिपोर्ट के मुताबिक, जोन-2 के शहर मन मं सफाई कर्मी अऊ कचरा उठेइय्या मन बर महीना के तनखा कम से कम 16,584 रूपिया तय करे गे हवय. लताबाई के महीना भर के तनखा के संगे-संग ओकर गाड़ी चलाय के उपराहा पइसा ला मिला के घलो सिरिफ 13,000 रूपिया होथे, जेकर मतलब आय के वोला रिपोर्ट मं बताए गेय न्यूनतम मजदूरी ले करीबन 22 फीसदी कम पइसा मिलत हवय.

लताबाई जइसने करीबन 600 वर्कर मन के सेती लातूर ह साल 2024-25 मं ठोस कचरा प्रबन्धन बर बड़े अवॉर्ड जीते रहिस. लताबाई कहिथे, “हव, नगर निगम ला अवॉर्ड मिलिस. अइसने अफवाह बगरगे के अवॉर्ड के बाद हम सब्बो ला बनेच अकन पइसा मिलही, फेर हमन ला एको पइसा घलो नइ मिलिस.”

कचरा उठेइय्या मन के रोजी करीबन 400 रूपिया बनथे. फेर एके दिन के छुट्टी मारे ले ओकर ऊपर 500 रूपिया के डांड (जुरमाना) लगथे, जेकर मतलब आय के डांड ह मजूरी ले घलो 25 फीसदी जादा हवय. अइसने लगथे के निगम ह कचरा वाले मन के थोर-बहुत जमा पूंजी ला साफ कर देय चाहत हवय, जेन ला वो मन कभू बीमार परे धन छुट्टी बखत बर बचा के रखे रहिथें.

अनुवाद: निर्मल कुमार साहू