लातूर के लताबाई: कचरा में हेराईल जीवन

लताबाई के हफ्ता में एक्को दिन के छुट्टी नईखे. उ हर दिन काम करेली. बेमार पड़ेली आ छुट्टी लेली, त कंपनी अनुबंध के हिसाब से ओ दिन के 500 रूपया के पेनाल्टी वसूल करे ले.

लताबाई लातूर शहर के पुरस्कार प्राप्त कचरा बीनवइया हई.

“हम लातूर शहर के एकमात्र महिला ड्राईवर हईं. बांटल गईल क्षेत्रन में साफ़ सफाई रखे खातिर हमके 2011 में विधायक अमित देशमुख से लातूर महोत्सव में लातूर भूषण पुरस्कार मिलल रहे,” उ पारी के बतावेली.

“नगर निगम के अधिकारी लोग हमरी क्षेत्र के जांच कईलें आ उनके ओइजा कवनो सूखा चाहे गीला कचरा ना मिलल. हमके एगो बड़ सभा में मंत्रियन आ प्रसिद्ध लोगन के बीच पुरस्कार मिलला पर बहुत खुशी भईल. हमरा बुझाईल कि अब हमरी मेहनत के पहचान मिल जाई. बाकिर तब हमरा ना बुझाईल कि ई कुल खाली एकही दिन खातिर रहे,” उ आगे कहेली.

महाराष्ट्र के लातूर शहर के 40 बरिस के लताबाई रसाल कहेली, “हम 2002 से लातूर में कचरा बीन रहल बानी.” इहे उ साल रहे जब उनकर पति गुजर गइलन. ओकरी सात साल पहिले खाली 15 बरिस के उमिर में उ बियाह कर चुकल रहली. जीविका के साधन के खोज में ऊ अपनी आ अपनी पांच गो बच्चन के पालन पोषण खातिर कचरा बीने के काम शुरू कईली.

“कमाई खातिर संघर्ष आजो जारी बा. हम सबेरे साढ़े छह बजे से काम शुरू करेनी. सबसे पहिले, लातूर के औसा रोड के लगे सुपरवाइजर के सेंटर जानी जहां कचरा जुटावे वाला वाहन खड़ा रहेला. फिर हाजिरी (उपस्थिति) खातिर सुपरवाइजर हमनी के फोटो वाहन के संघे खींचेला. फिर वाहन संघे हम ओ आवासीय क्षेत्रन ले जानी जवन हमके कचरा बीने खातिर आवंटित कईल गईल बा,” लताबाई कहेली. उ हर दिन अपनी घर से सुपरवाइजर के सेंटर तक पहुंचे खातिर पांच किलोमीटर के यात्रा करेली.

लताबाई के कचरा उठावे वाला गाड़ी 200 किलो ले कचरा उठा सकत हवे. उनके 1000 घरन से कचरा इकट्ठा करे खातिर अपनी गाड़ी के तीन बेर खाली करे के पड़ेला. लातूर के हजार घरन से कोई 600 किलो कचरा जमा हो जाला.

कचरा इकट्ठा करे खातिर शहर के तीन गो आवासीय क्षेत्रन में विभाजित कईल गईल बा. प्रत्येक क्षेत्र में प्रतिदिन लगभग 7 टन (7,000 किलोग्राम) कचरा निकलेला, जेके शहर के सिग्नल कैंप क्षेत्र के लगे एगो बड़ वाहन में फेंक दिहल जाला. ओइजा से कचरा लातूर के बाहरी इलाका नंदगांव तक ले जाईल जाला.

लातूर शहर के नगर निगम हर घर पर एगो बारकोड लगवले बा आ कचरा बीने वालन के हर बेर एके स्कैन करे के पड़ेला ताकि निगम के कचरा उठावे के पुष्टि मिल सके. लताबाई कहेली, “तकनीक हमनी के जीवन के अउरी खराब कर रहल बा. दिहाड़ी तब्बे मिलेला जब हमनी के एक दिन में 1000 बारकोड स्कैन करेनी जा. कब्बो कब्बो हमनी के मोबाइल फोन के ‘डेटा’ गड़बड़ रहेला एसे बारकोड स्कैन करे में लम्बा समय लाग जाला.”

लातूर के कचरा बीने वाला लोग हमेशा से अनुबंध के तहत काम करत आईल बा. पिछला दू बरिस से अनुबंध मुंबई के अशोक इंटरप्राइज संघे बा. सन 2024 से पहिले अनुबंध लातूर के स्थानीय कार्यकर्ता संजय काम्बले के संघे रहे.

लताबाई कहेली, “आखिरी बेर हमनी के पगार (मासिक वेतन) 26 दिसम्बर 2025 के मिलल रहे. ओकरा बाद से आज तक (6 फरवरी, 2026) ले पगार नईखे मिलल. अगर हमनी के कहीं जा कि एकरी खिलाफ विरोध कईल जाई त ठेकेदार लोग हमनी के धमकी देत कहेला कि एसे आप लोगन के नोकरी चल जाई. हमनी के आपन नोकरी जाए से डेरायेनी जा एसे हमनी के अधिकारियन से सवाल ना पूछेनी जा.”

घरेलू जीवन में भी लताबाई के संघर्ष चल रहल बा. अपनी घुटना के ओर इशारा करत के उ कहेली, “बरसात के मौसम में हमनी के घर में पानी के इहे स्तर रहेला, हमार बच्चा कुल हर मानसून में तेज बोखार से बेमार हो जायें सन. हमरी कच्चा घर में, जब भी बरखा होखे त बहुत कष्ट बढ़ जाए.” लताबाई इ पत्रकार के बतावेली कि हर नगर निगम चुनाव से पहिले स्थानीय पार्षद घरन के मरम्मत करवावे के वादा करेला बाकिर चुनाव के बाद उ गायब हो जाला.

“हम विधवा हईं तब्बो संजय गांधी निराधार योजना, लड़की बहिन योजना या कवनो अन्य सरकारी योजना में नामांकित नईखी. योजना कुल के त बाते छोड़ीं, हमके राशन भी ना मिलेला जबकि हमरी लगे एगो केसरी राशन कार्ड बाटे,” लताबाई के कहनाम बा.

हालांकि उ महिला लोगन खातिर बनल सरकारी योजनन के पात्र बाड़ी. बाकिर प्रक्रिया में अइसन दलाल बाड़ें सन जवन काम करे खातिर कम से कम हजार रूपया मांगेलें सन. “हम अलग-अलग योजनन में कई अइसन लोगन के पैसा देले बानी तब्बो उ लोग अउरी मांगत रहेला, आ एकरी खातिर हमके अपने से तहसील जाए के पड़ेला जेकरी खातिर हमके एक दिन के काम छोड़े के पड़ेला जेसे पेनाल्टी लाग जाला,” उ बतावेली.

राशन कार्ड के बात कईल जाओ त दलाल ऑनलाइन राशन कार्ड दर्ज करे खातिर कम से कम 500 रूपया अतिरिक्त मांगेलें सन. मासिक राशन प्राप्त करे खातिर अब ऑनलाइन पंजीकरण अनिवार्य हो गईल बा.

हर दिन कचरा संभारत के लताबाई जईसन कामगार लोगन के नियमित रूप से सुरक्षा उपकरणन के उपयोग करे के पड़ेला. बाकिर उनकर कहनाम बा, “जवन दस्ताना नगर निगम देला, उ अधिकतम 15 दिन ले चलेला आ उ लोग साल में खाली 2 गो या 3 गो देवेला. हमनी के ओसे साल भर कईसे काम चलाईं जा?”

आपन माटी से भरल दस्ताना देखावत के उ कहेली, “हम ई दस्ताना कचरा से उठवले बानी. अब हम एकर उपयोग करेनी. लगातार कई बरिस ले बिना दस्ताना के गीला आ सूखा कचरा अलग कईला से हमरी अंगूठा के छाप धूमिल हो गईल बा. कवनो अधिकारिक काम खातिर हमके आपन अंगूठा के छाप देवे के पड़े त छाप चिन्हाला ना.”

महाराष्ट्र में लातूर के बढ़त अर्थव्यवस्था के मामला में अकोला, बारामती, सातारा, सांगली आ अन्य संघे टियर-3 शहरन में शामिल कईल गईल बा. जनसंख्या के मामला में ई लगभग 0.26 मिलियन के जनसंख्या संघे 19वें स्थान पर बा जबकि महाराष्ट्र के सबसे अधिक आबादी 11.9 मिलियन वाला शहर मुंबई हवे.

“हमके 2011 में निगम से जवन 75,000 रूपया के पुरस्कार मिलल ओसे हम एगो कचरा एकट्ठा करे वाला वाहन कीन लिहनी,” उ पारी के बतावेली.

ई एगो छोट मोटर चालित तीन पहिया वाला वाहन हवे जेकर बॉडी टील-ब्लू मेटल के हवे आ पीछे खुलल कार्गो एरिया बा. लताबाई सोचली कि उ आपन खुद के वाहन ले सकेली आ ओमे कचरा एकट्ठा कर सकेली. हालांकि नगर निगम से उनके पता चलल कि उनके ड्राइविंग आ कचरा उठावे, दुनो खातिर वेतन ना मिल सकेला. उनके एमे से खाली कवनो एक चीज खातिर ही भुगतान कईल जा सकेला. जब उ वाहन किनली त ए बात से अनजान रहली.

“त हमके अपनी गाड़ी खातिर एगो अलग ड्राईवर रखे के पड़ल,” लताबाई बतावेली. उ अपनी वाहन के ड्राईवर बनला के बजाय कचरा बीने के काम चुनली काहें कि वेतन के दर में अंतर रहे. कचरा बीने में महीना में लगभग 12,000 रूपया मिलेला आ ड्राईवर लोगन के एक महीना के वेतन 7,000 रूपया बा. लताबाई के ठेका कम्पनी से अपनी वाहन के ईंधन खर्च खातिर प्रति माह अतिरिक्त 1,000 रूपया आ मुआवजा राशि मिलेला. उ सबेरे 6.30 बजे से सांझी के 5.30 बजे ले हर दिन लगभग 11 घंटा काम करेली.

महाराष्ट्र न्यूनतम वेतन 2025 रिपोर्ट के अनुसार 1 जुलाई 2025 ले जोन-2 शहरन के झाड़ू लगावे आ कचरा साफ़ करे वालन के न्यूनतम वेतन 16,584 रूपया हवे. लताबाई के मासिक आमदनी, जेमे उनकी गाड़ी के उपयोग से मिले वाला अतिरिक्त रकम भी शामिल बा, मात्र 13,000 रुपिया बा जवन रिपोर्ट में उल्लिखित न्यूनतम वेतन से लगभग 22 प्रतिशत कम बा.

लताबाई जइसन लगभग 600 कर्मचारियन के मेहनत के दम पर लातूर 2024-25 में ठोस अपशिष्ट प्रबंधन खातिर एगो मुख्य पुरस्कार जीत लिहलस. लताबाई कहेली, “हां, निगम के पुरस्कार मिलल रहे. अइसन बहुत अफवाह उड़त रहे कि हमनी के पुरस्कार मिलला के बाद बहुत सारा पईसा मिलल बाकिर हमनी के एक्को पइसा ना मिलल.”

कचरा संग्रहण के काम खातिर दैनिक मजदूरी लगभग 400 रुपिया होखेला बाकिर एक्को दिन के छुट्टी लिहला पर जुरमाना 25 प्रतिशत अधिक यानि 500 रूपया लागेला. अइसन बुझाता कि निगम कचरा साफ करे वाला कचरा मजूर के छोट-मोट बचतो साफ कर देवे के चाहत बा.

अनुवाद: विमल चन्द्र पाण्डेय