मया अऊ सुरता के चिन्हारी कोन्याक गोदना

अरन अपन गाँव के आखिरी माइलोगन आय जेन ह कभू गोदना गोदे के काम करत रहिस.

पारंपरिक तरीका ले बने कोन्याक कुरिया के बहिर बइठे, जेन ह एक ठन घास-फूस के छानी वाले आय, वो अस्सी बछर के माईलोगन ह गाना गावत हवय जउन ला वो ह बचपना मं सीखे रहिस, ये गाना ला गोदना गोदे बखत गाय जाथे.

ये गाना रेन-आम मान्यू के आय, जेन मं एक झिन राजकुमारी गोदना गुदवावत हवय, अऊ चिलम मरंग (मरद लोगन मन के पारंपरिक गुड़ी-बइठका के जगा) के नांव आय.

कोन्याक लोगन (नागालैंड मं अनुसूचित जनजाति के रूपु मं सूचीबद्ध) मन बर, जिनगी के अलग-अलग बखत अऊ मऊका मं गोदना गुदवाय वो मन के संस्कृति के चिन्हारी रहिस, जब तक के 1960 अऊ 1970 के दसक मं धीरे-धीरे नंदा नइ गीस. ये रिवाज करीबन अऊ दस बछर तक ले चलिस – अऊ 1970 के दसक मं येकर ऊपर पूरा रोक लागगे. ईसाई धरम आय अऊ कोन्याक स्टूडेंट्स यूनियन के असर ले ये ह खतम होय धरिस अऊ आखिर मं नंदागे.

अलोह नोवांग कहिथे, फेर वो बखत जब सब्बो जवान नोनी मन अपन पढ़ई के रूप मं गोदना गोदे सिखंय, ओकर दाई मन गाना गावत रहंय. वो ह ये बखत शिअंघाचिंन्यू के अंघ (गाँव के मुखिया) आंय – ये उहिच गाँव आय, जिहां अरेन, जउन ह ये बखत अस्सी बछर के हवय, 1967-68 मं अपन आखिर गोदना गोदे रहिस.

50 बछर बाद, अप्रैल के घाम वाले बिहनिया पारी मोन जिला के उपर के इलाका के शिअंघाचिंन्यू गाँव के बासिंदा अरेन अऊ आने गोदना गोदेइय्या मन ले मिलिस. ये गाँव भारत अऊ म्यांमार के सरहद तीर मं बसे हवय.

करीबन 5,000 बासिंदा आओलियांग मनाय के तियारी मं लगे रहिन – ये ह कोन्याक लोगन मन के छै दिन के तिहार आय. ये हरेक बछर बसंत (फागुन अऊ चइत) मं मनाय जाथे, जब समाज के लोगन मन नवा झूम खेत मं बोये के बाद देंवता मन ला मनाय बर जुरथें अऊ बढ़िया उपज बर पूजा करथें. नागालैंड मं, ये समाज ये बखत घलो झूम खेती ( एक जगा ले दूसर जगा वाले खेती) करथें.

तीर-तखार के गाँव के लोगन मन अंघ के घर के तीर के मैदान मं जुरे रहिन. कतको लोगन मन पारंपरिक कोन्याक कपड़ा पहिरे रहिन, खास करके वो मन जेन मन प्रस्तुती देवेइय्या रहिन. तिहार सुरु होय के हांका परे नइ रहिस ; बसंत के ताजा हवा मं धीरे-धीरे संगीत के धुन गूँजत रहिस.

नागालैंड के अधिकतर कोन्याक गाँव जइसने, शिअंघाचिंन्यू घलो एक ठन डोंगरी उपर बसे हवय. सदियों पहिली ये जगा ला येकर बर चुने गे रहिस के बैरी ला इहाँ ले दूरिहा ले देखे जा सकय. मरंग – जेन ह कभू सिरिफ मरद लोगन मन के बइठका के जगा होवत रहिस- गाँव मं जगा जगा दिखथे, जेकर भिथि मं जानवर के मुड़ /खोपड़ी सजे रहिथे, ये ह खेदा /शिकार के सुरता आंय. अब माईलोगन मन घलो मरंग मं जा सकथें, जेन ह लकरी अऊ बांस ले बने एक ठन कुरिया आय, फेर मरंग के संस्कृति – वो जगा जिहां लइका मन सियान मन के गुन सीखत रहिन – अब नंदा गे हवय. अब ये ह फुरसतहा के जगा बनगे हवय, जिहां लोगन मन गोठ-बात करे बर आथें.

जिला के आने कोन्याक गाँव के जइसने, इहाँ घलो गाँव के मुखिया पुरखौती ले चले आवत होथे, अऊ हालेच मं बने गाँव के बने परिषद घलो जेकर सदस्य चुने जाथे. कोन्याक लोगन मन के सबले बड़े पेशा खेती आय अऊ माई फसल धान आय, अंघ जमीन के देखरेख करेइय्या होथे, जेन ह सामूहिक रूप ले सब्बो के होथे. लोगन मन ये जमीन मं खेती करथें अऊ येकर ले गुजर-बसर करथें.

लोगन मन आओलियांग तिहार बर येती-वोती किंजरत हवंय, अऊ कुछु लोगन मन सुस्तावत हवंय.

अरेन अपन गाना सिरोथे अऊ गोदना के काम के तरीका ला बताय लगथे. सबले पहिली भट्ठी मं कोयला सुलगाय जाथे, ओकर उपर एक ठन खाली बरतन राखे जाथे. कुहरा उपर निकरथे अऊ बरतन भीतरी करिखा/ कौंहाके परत जम जाथे जेन ला खुरचके निकार लेय जाथे अऊ चमड़ी मं गोदना गोदे के काम मं बउरे जाथे. ओकर बाद गुदना गोदेइय्या यिंग रुख के कांटा ले गोदथे.

कम उमर के नोनी अऊ ये हुनर मं नवा होय के सेती, अरेन येला अजमाय बर भारी घबरावत रहिस; 86 बछर के अरेन सुरता करत कहिथे, “मोर अन्या (दाई/ महतारी) ह मोला सिखाय रहिस.”

अरेन बतावत जाथे,“यिंग रुख मं करिया सियाही होथे,” अऊ गोदना गोदे के बारीकी ला समझाथे. येला कांटा के संग राखे जावत रहिस- जेन ह गोदना गोदे के जरूरी जिनिस रहिस. ओकर बाद कांटा ला सियाही मं बुड़ोके गोदे सुरु करय. वो ह कहिथे, “लहू अऊ सियाही मिलके गाढ़ा रंग बना देवय.” जेन जगा मं गोदना गोदे जावत रहिस, वो जगा ला पोंछे बर ताते तात पानी मं भिगो के नरम कपड़ा बउरे जावत रहिस. गोदना गोदे मं अक्सर दिन भर लग जावय.

अरेन ह 7 कोरी (140 झिन) लोगन मन के गोदना गोदे हवय, येकर बर वो ह छै ठन गाँव मं जाय रहिस, जेन मं एक गाँव के मुखिया ओकर घरवाला रहिस. फेर वोला आज घलो अपन पहिली गोदना सुरता हवय. “एक झिन नोनी के गोड़ मं, अऊ एक जगीं टूरा के सीना मं,” वो ह हंस परथे, ये अब सिरिफ सूरता बनके रहिगे हवय.

माइलोगन अऊ मरद लोगन मन के गोदना अलग-अलग रहे हवय. माइलोगन मन अपन जिनगी के अलग अलग बखत ला लेके गोदना गुदवावत रहिन – जइसने जवानी आय बखत धन बिहाव होय के बाद. वो मन के गोदना परिवार के मरद लोगन मन के कोनो जिनिस हासिल करे के सुरता मं घलो होवत रहिस.

“एक झिन कोन्याक माइलोगन के जिनगी कतको बदलाव ले गुजरथे. अपन ददा के कबीला मं जन्मे, ओकर बिहाव आने कबीला मं होथे. ओकर बाद घलो, बिहाव के पहिली वो ह जेन गोदना गुदवाय रहिथे, वो ह जिनगी भर अऊ मरत तक ले ओकर संग रहिथे. ये वो चिन्हारी आय जेन ह कभू नइ बदलय, ये वो चिन्हा आय जेन हा वोला बताथे के वो ह कोन आय अऊ कहां ले आय हवय,” अमो कोन्याक कहिथे.

मोन के बासिंदा, वोला सुरता हवय के वो ह अपन बबा–डोकरी दाई के देह मं गोदना देखे रहिस. 32 बछर के ये शोध करेइय्या भारी उछाह ले बताथे, “बचपना मं मंय अक्सर गोदना गुदवाय ला लेके कतको कहिनी सुने रहेंय, के ये कइसने करे जावत रहिस. ये कतक पीरावय, अऊ येकर बाद घलो लोगन मन ला कतक गरब होवय. ये कहिनी लोककथा जइसने पीढ़ी दर पीढ़ी, गरब अऊ मान ले सुनाय जावत रहिस. मोर बर, ये गुदना सुरता के नक्सा जइसने रहिस, जेन ह न सिरिफ चमड़ी मं फेर हिरदे के भीतरी ले गुदाय रहिस.”

कोन्याक लोगन मन पारंपरिक रूप ले सिर कलम करेइय्या रहिन, अऊ लड़ई जीते के बाद जीत के सुरता मं मरद लोगन मन के चमड़ी मं गोदना गुदवाय जावत रहिस. अमो कहिथे के ये मं जियादा धियान देय सेती अक्सर गोदना उपर शोध अऊ कहिनी ले माइलोगन मन ला धियान नइ देय गे हवय, वो ह अपन डोकरी दाई/दादी के सुनाय गे गोदना के कहिनी मन ला सुरता करथे, “ वो ह अक्सर मोला बतावत रहय के ये काम ह कतक दरद-पीरा वाले रहिस, चमड़ी ले लहू बोहाय लगय अऊ सूज जावय. ओकर बाद घलो वो मन ला कतक गरब मसूस होवय अऊ सुग्घर लगय.”

ये गाँव ले थोकन दूरिहा मं न्गोनफे रहिथे, जेन ह ये बखत 70 बछर के हवय. वो ह घलो गोदना गोदे के हुनर ला अपन दीदी अऊ चचेरी बहिनी मन ले सीखे रहिस, जेन मं अपन दाई ले ये हुनर सीखे रहिन. वइसे, वो मन ला कभू येला करे के मऊका नइ मिलिस काबर के ये ह सिरिफ ‘रानी’ – मतलब सबले बड़े घरवाली के हक रहिस. नोन्फे 'रानी' के गोदना गुदवाय मं मदद करत रहिस – कांटा संकेल के राखे, गोदना गोदेइय्या मन बर रांधे अऊ जेन ह गोदना गुदवावत रहय वोला धरे रहय जेकर ले पीरा होय बखत वो ह जियादा झन हिले-डोले. बोले बखत नोन्फे दरद के भाव ला बतावत मुंह बनाय लगथे. ओकर बाद ह वो जमाना ला सुरता करके जोर ले हँसे लगथे.

जब पारी ओकर ले भेंट करे गीस, त वो ह बांस के एक ठन कुरिया मं बइठे रहिस, जऊन ह अंघ के अहाता मं बने कतको कुरिया मन ले के ठन रहिस. वो ह धीरे-धीरे गोठियाथे, ओकर आवाज तिहार के मैदान ले आवत कलर-कलर मं दब जाथे. जब हमन ओकर फोटो खींचे ला कहेन, त वो ह राजी खुसी उठगे अऊ रोज के पारंपरिक कपड़ा अऊ गहना पहिरे चले गीस.

ओकर खांध, गोड़ अऊ हाथ मं बने गोदना ओकर बिहाव के पहिली के आंय. वो ह कहिथे के गोदना जेवर/ गहना जइसने रहिस अऊ वो ह बतावत जाथे. “वो बखत हमन जेन कपड़ा पहिरत रहेन वो ह छोटे होवत रहिस, ते पायके गोदना हमर देह ला तोपे के एक ठन तरीका रहिस.” नोन्फे के पसंद के गोदना ओकर खांध वाले आय. वो ह मुचमुचावत कहिथे, “येला मोर एक झिन बहिनी ह बनाय रहिस, येकरे सेती मोला भारी भाथे.”

नागालैंड के मोन जिला के अपन मायका लियांहा मं नोनी लइका उमर मं वो ह अपन पहिली गोदना गुदवाय रहिस. वो ह बताथे, “भारी पीरावत रहिस, मंय रो परे रहंय.”

बिहाव के बाद,वो ह अपन पहिला गोदना अपन जंघा मं गुदवाइस, जेन ला रानी, अंघ के पहिली घरवाली, अरेन ह बनाय रहिस, जेन ह ओकर बहिनी रहिस. परंपरा के मुताबिक, कोन्याक मुखिया कतको बिहाव कर सकत रहिस वइसे बाकी समाज मं एकेच बिहाव के चलन रहिस.

सऊत होय के नाते, नोन्फे ला कभू गोदना गुदवाय के मऊका नइ मिलिस. शंघाई चिंगन्यू मं, वो ह रसोई अऊ खेत के काम करत रहिस अऊ घर के लइका मन ला संभालत रहिस.

नागालैंड मं, तामलू, कंचिंग, वाकचिंग अऊ वांचिंग जइसने गाँव के ईसाई मिशन ले सबले पहिली मेल होय रहिस. ईसाई धरम आय ले कोन्यक लोगन मन के जिनगी मं बड़े बदलाव आइस. शिअंघाचिंन्यू के एक झिन किसान, कैथेई कोन्याक, वो जमाना ला सुरता करथे जब कोन्याक समाज मं पारंपरिक इलाज के तरीका चलन मं रहिस. “हमर तीर मं डॉक्टर नइ रहिस अऊ न हमन अस्पताल जावत रहेन, वो ह कहिथे. “हमर समाज मं बैगा/ गुनिया रहिन.”

ईसाई मिशन ह पढ़े-लिखे नवा पीढ़ी के एक ठन नवा वर्ग तियार करिस, जउन मन सन 1946 मं कोन्याक स्टूडेंट्स यूनियन बनाइन अऊ समाजिक अऊ धार्मिक काम ला आगू ले जाय के फइसला करिन. यूनियन ह सिर काटे के रिवाज ले जुड़े सेती गोदना गुदवाय के खिलाफ कड़ा रुख अपनाइन, अऊ साल 1960 मं गोदना के खिलाफ प्रस्ताव पास करे गीस. फेजिन कोन्याक अपन किताब द कोन्याक्स: लास्ट ऑफ़ द टैटूड हेडहंटर्स मं येला लिखे हवय के गोदना ला जीववाद जइसने गैर-ईसाई चलन घलो माने गीस, जेन ह ये समाज के पारंपरिक पूजा पाठ के तरीका रहिस.

अमो के मुताबिक, ये बखत ओकर समाज के अधिकतर नवा पीढ़ी, पारंपरिक कोन्याक चिन्हा वाले जुन्ना तरीका ले गुदवाय ला छोड़के सोशल मीडिया अऊ दुनिया मं चलन धन अपन पसंद के मॉडर्न धन फैशन वाले डिज़ाइन के गोदना गुदवाथें.

कोन्याक गोदना अब सिरिफ समाज के देह मं देखे बर मिलते; ये चलन अरन अऊ नोन्फे जइसने लोगन मन के प्राण मं बसे हवय, जेन मन येला अपन बचपना मं सीखे रहिन, अऊ ओकर मन के गाना मं घलो, जेन मं राजकुमारी मन ला गुदवाय बखत होय पीरा के बाद सुस्ताय ला कहे जाथे.

रिपोर्टर ये कहिनी मं मदद सेती सर पेईहवांग वान्सा कोन्याक, पांन्येई डब्ल्यू कोन्याक अऊ लेमनेई कोन्याक के आभार जताय ला चाहत हवय.

अनुवाद: निर्मल कुमार साहू