’یہاں کھیتوں میں دھان نہیں، سینیٹری پیڈ ملیں گے!‘

’’یہاں دھان نہیں ہے، صرف سینیٹری پیڈ ہیں۔ اگر آپ انڈمان میں کہیں پر بھی زمین کھودیں، تو آپ کو صرف سینیٹری پیڈ ملیں گے،‘‘ سیما مذاق کرتے ہوئے کہتی ہیں۔ ان کی باتیں سن کر وہاں کھڑی چار دیگر عورتیں ہنسنے لگتی ہیں۔

وندور گاؤں کے تقریباً تمام گھروں میں زمین کا ایک کونا ایسا ہے، جہاں گھر کی عورتیں سینیٹری پیڈ زمین میں گاڑتی ہیں۔ اس جگہ کو ڈھونڈنا ان کے لیے مشکل نہیں ہے، وہاں کسی نشان کی کوئی ضرورت نہیں ہے۔ منڈل فیملی کی لڑکیاں مجھے وہ جگہ دکھانے میں شرم اور جھجک محسوس کر رہی تھیں۔

سیما مزید بتاتی ہیں، ’’ہم ایک مہینہ تک پیڈ اکٹھا کرتے ہیں اور پھر مٹی میں گڑھا کھود کر انہیں دبا دیتے ہیں۔ ہر کوئی اپنے گھر کے آس پاس ہی پیڈ گاڑتا ہے۔ ابھی کیچڑ بہت ہے، اس لیے ہم انہیں ایک کونے میں جمع کرتے ہیں اور بعد میں زمین میں گاڑ دیتے ہیں۔ کبھی ایک ہی گڑھے میں، کبھی نیا گڑھا کھودتے ہیں۔‘‘

جنوبی انڈمان ضلع کے مغربی حصہ میں ایک پختہ مکان کے سامنے پانچ عورتیں حیض سے متعلق کچرے اور اس کے نمٹارہ کے بارے میں بات کر رہی ہیں۔ منڈل فیملی کی سربراہ ۷۲ سالہ ارملا ہماری گفتگو میں مداخلت کرتے ہوئے کہتی ہیں، ’’کوئی ان باتوں پر چرچہ کیوں کرنا چاہے گا؟ ہم نے کبھی ان چیزوں پر بات نہیں کی۔‘‘ ان کی فیملی یہاں آباد ان بنگالیوں میں سے ہے، جو الگ الگ برادریوں سے آ کر نسلوں سے مرکز کے زیر انتظام اس علاقہ میں رہتے ہیں۔

وہ کہتی ہیں، ’’ہمیں حیض کے بارے میں کبھی کسی نے بتایا ہی نہیں۔ وہ اسے بنگال میں ’ماسِک‘ کہتے تھے۔ جب یہ ہوا، تبھی ہمیں پتہ چلا۔ مجھے میری بڑی بہن نے بتایا۔ ہم اس دوران اسکول نہیں جاتے تھے۔ گھر سے نکل کر کسی مندر میں نہیں جاتے تھے۔ اور اپنے گھر میں کچن میں نہیں جاتے تھے۔ یہی اصول تھے۔ میں نے کبھی کوئی اصول نہیں توڑا، اس لیے نہیں جانتی کہ توڑنے پر کیا ہوتا ہے۔‘‘

منڈل فیملی کے مکان کے باہر بیٹھی عورتوں میں سبھی تین نسلیں شامل ہیں۔ ارملا، ان کی بہو سیما منڈل (۴۱)، سیما کی بیٹیاں، بانی (۱۷) اور شکھا (۲۱)۔ ساتھ ہی، ان میں ان کی رشتہ دار شیوانی منڈل (۳۳) بھی ہیں۔ یہ سبھی اپنی اپنی طرح سے ایک طویل عرصہ سے چلی آ رہی سماجی روایت کے ساتھ زندگی بسر کر رہی ہیں، جس پر اب بھی سوال اٹھانا ممکن نہیں ہے۔

بانی بتاتی ہیں، ’’ہم نے حیض کے بارے میں اسکول میں پڑھا ہے۔ ہمیں سینیٹری نیپکن کے بارے میں بتایا گیا کہ کیسے یہ کپڑے کے مقابلے بہتر ہے، کیوں کہ اس سے انفیکشن نہیں ہوتا۔‘‘ پورٹ بلیئر (جس کا نام اب شری وجیہ پورم ہے) کی ایک پیرامیڈیکل اسٹوڈنٹ بانی، وندور کی ان ۷۵ فیصد خواتین میں سے ایک ہیں جو اب باقاعدگی سے سینیٹری نیپکن کا استعمال کرنے لگی ہیں۔

نیشنل فیملی ہیلتھ سروے کے پانچویں دور (این ایف ایچ ایس ۲۰۱۹-۲۱) کی رپورٹ کے مطابق، ملک بھر میں اب تقریباً ۶۴ فیصد لڑکیاں سینیٹری نیپکن کا استعمال کر رہی ہیں۔ یعنی، پچھلے پانچ سالوں میں سینیٹری نیپکن کے استعمال میں تقریباً ۲۲ فیصد کا اضافہ ہوا ہے۔ وہیں، ۴۹ فیصد خواتین اب بھی کپڑے کا استعمال کرتی ہیں۔

بانی کی ماں سیما کہتی ہیں، ’’ہم ہمیشہ سوتی کپڑے کا استعمال کرتے تھے۔ اب ہمارے پاس پیڈ ہیں، لیکن ۶ پیڈ والے ایک سینیٹری پیک کی قیمت ۳۵-۴۰ روپے ہے۔ میں اس کا استعمال صرف تبھی کرتی ہوں، جب کہیں باہر جانا ہوتا ہے یا سفر کرنا پڑتا ہے، ورنہ کپڑا ہی استعمال کرتی ہوں۔ اسے صابن سے دھو کر سُکھاتی ہوں۔‘‘

ارملا کہتی ہیں، ’’ہم کبھی بھی استعمال کیے ہوئے کپڑے کو کہیں پھینکتے نہیں تھے، کیوں کہ ہمیں ڈر تھا کہ سانپ آ جائے گا۔ خون کی بدبو انہیں متوجہ کرتی ہے۔‘‘

سنگیتا کہتی ہیں، ’’میں کپڑے کا پیڈ استعمال کرنے کی صلاح نہیں دیتی، کیوں کہ عورتیں انہیں ٹھیک سے نہیں دھوتیں۔‘‘ سنگیتا جزیرہ پر کئی لڑکیوں کو حیض سے متعلق صفائی کے بارے میں بیدار کرنے کی کوشش کر رہی ہیں۔ وہ کہتی ہیں، ’’سب سے بڑی بات یہ ہے کہ عورتیں انہیں ٹھیک سے سُکھاتی نہیں ہیں۔ وہ اپنے انڈر ویئر بھی کھلے میں نہیں سُکھاتیں، تو کپڑے کے پیڈ کا کیا کریں گی؟‘‘

گاؤں کی ایک آشا کارکن سُکھلتا پاہن کا ماننا ہے کہ حیض سے جڑے شرم اور جھجک کی وجہ سے عورتیں کچرا نمٹانے کے صاف طریقے نہیں اپناتیں۔ وہ کہتی ہیں، ’’یہاں وندور میں عورتیں استعمال کیے ہوئے کپڑے کو چھپاتی ہیں، جس سے وہ ٹھیک سے سوکھ نہیں پاتے، جو بہت خراب ہے۔ میں نے گاؤں میں کئی عورتوں سے ملاقات کی ہے، جو پیڈ کو صاف کر کے انہیں کاغذ میں لپیٹ کر زمین میں گاڑ دیتی ہیں، کیوں کہ انہیں کوئی اور متبادل نہیں دکھائی دیتا۔‘‘

انڈمان کی نوجوان لڑکیوں میں حیض سے متعلق صفائی کے تئیں بڑھتی بیداری کا مطلب ہے کہ ان میں ڈسپوزیبل سینیٹری پیڈ کا استعمال بڑھا ہے۔ انتظامیہ میں عوامی حصہ داری کو بڑھانے کی سمت میں کام کرنے والی ایک غیر سرکاری تنظیم، دکشن فاؤنڈیشن کے تخمینہ کے مطابق، وندور کی تقریباً ۷۵ فیصد خواتین اب سینیٹری پیڈ کا استعمال کرتی ہیں۔ اور جزیرہ پر اوسطاً ہر مہینے ۳۷۵۰ سینیٹری پیڈ کا استعمال ہوتا ہے۔

سنگیتا باؤل کہتی ہیں، ’’ڈالی گنج جیسے علاقوں میں وہ پیڈ اکٹھا کرتے ہیں، لیکن وندور میں ایسا نہیں ہوتا۔‘‘ سنگیتا باؤل (بدلا ہوا نام) ۲۰۱۱ سے ہی وندور میں بطور معاون نرس اور دایہ کے طور پر کام کر رہی ہیں اور ان کا کہنا ہے کہ دیگر علاقوں میں سینیٹری کچرا اٹھایا جاتا ہے، مگر یہاں اس کی سہولت نہیں ہے۔ وہ مزید کہتی ہیں، ’’لوگ کبھی کبھی یہ کچرا پانی کے پاس پھینک دیتے ہیں، جس سے ماحولیات کو نقصان ہوتا ہے۔ لوگ یا تو پیڈ پھینک دیتے ہیں یا جلا دیتے ہیں، جس سے مٹی اور ہوا دونوں آلودہ ہوتے ہیں۔ کچھ عورتیں گھر پر ہی جلا دیتی ہیں۔ میں ان سے کہتی ہوں کہ وہ سارے پیڈ صرف ایک جگہ اکٹھا کریں اور انہیں دھو کر گڑھے میں دبا دیں۔‘‘

جزیرہ پر یہ حالت انوکھی نہیں ہے، لیکن یہاں زمین محدود ہے۔ ہندوستان کی مرکزی زمین کی بات کریں، تو یہاں بھی تقریباً ۳۶ فیصد عورتوں اور لڑکیوں (یعنی کل ۶ء۳۳ کروڑ خواتین) کو خود اپنی سطح پر سینیٹری کچرے کو نمٹانا پڑتا ہے۔ اس کی وجہ سے روزانہ تقریباً ۳۷۷ ٹن کچرا نکلتا ہے اور اس کے خطرناک اثرات ہوتے ہیں۔

دکشن فاؤنڈیشن کی سینئر پروگرام آفیسر اور یہیں وندور کی رہائشی مادھوری منڈل خواتین کو کچرے کے نمٹارہ کے ماحولیاتی طریقے سے پائیدار متبادل سے متعارف کرانے کے لیے عوام میں بات چیت شروع کرنے کی کوشش کر رہی ہیں۔ وہ کہتی ہیں، ’’وندور میں اب بھی بہت سارا کچرا سمندری ساحل پر پہنچ جاتا ہے اور بارش میں سمندر میں بہہ جاتا ہے۔‘‘

ٹھوس کچرے کے انتظام سے متعلق قانون (ایس ڈبلیو ایم)، ۲۰۱۶ کے مطابق، استعمال کیے گئے سینیٹری نیپکن، ڈائپر، کنڈوم، ٹیمپان، انکانٹیننس شیٹ اور دیگر اسی قسم کے کچرے کو سینیٹری کچرا مانا گیا ہے اور انہیں سوکھے کچرے کے ساتھ ٹھیک سے نمٹانا چاہیے۔ لینسیٹ کی ایک رپورٹ کے مطابق، ’’سینیٹری کچرے کے مناسب نمٹارہ کا انتظام نہ ہونے سے ان چیزوں کو پاس کے کھیتوں، بند پڑے کنووں میں پھینکا جاتا ہے، بیت الخلاء میں بہا دیا جاتا ہے، زمین میں گاڑ دیا جاتا ہے، یا گھروں کے آنگن میں جلایا جاتا ہے۔‘‘

زمین میں سینیٹری پیڈ گاڑنا تبھی کارگر ہو سکتا ہے، جب یہ کاغذ، کپڑے یا قدرتی طور پر تیار کردہ چیز سے بنا ہو یا گھر پر بنایا گیا ہو۔ زیادہ تر عورتیں جن سینیٹری پیڈ کا استعمال کرتی ہیں وہ کاروباری سطح پر تیار کیے گئے پیڈ ہیں، جو بایو ڈی گریڈیبل نہیں ہیں۔ یعنی ان کا نامیاتی نمٹارہ ممکن نہیں ہے۔ اس قسم کے کچرے کے نمٹارے کے لیے کم لاگت والے انسینریٹر کی ضرورت ہوتی ہے۔ ارملا کی پڑوسن رائے بالا منڈل (۵۷) کہتی ہیں، ’’ہمارے زمانے میں کپڑے کا استعمال کیا جاتا تھا۔ میں نے پیڈ کا استعمال کر کے بھی دیکھا ہے، لیکن اس سے بدبو آتی تھی اور میری جلد پر لال دھبے پڑ جاتے تھے۔ اب تو یہ فکر لاحق رہتی ہے کہ پیڈ کہاں پھینکیں۔ کبھی کبھی کتے کچرے میں پھینکے گئے پیڈ کو منہ میں لے کر گاؤں میں دوڑتے ہیں۔ پھر آپ کو ہاتھ سے کچرا اٹھانا پڑتا ہے۔‘‘

وندور کی صفائی ملازم ریتا باسو کہتی ہیں، ’’ہم لگاتار عورتوں سے کچرے کو الگ کرنے اور اس میں سینیٹری پیڈ نہ پھینکنے کے لیے کہتے رہتے ہیں۔ ہم اوروں سے بھی یہی کہنے کی کوشش کرتے ہیں، لیکن وہ سبھی ایک دوسرے کو قصوروار ٹھہراتی ہیں۔ ہمیں بھی بار بار کہنا اچھا نہیں لگتا۔ اس سے ہمارا کام مشکل ہو جاتا ہے۔‘‘

مرکزی آلودگی کنٹرول بورڈ (سی پی سی بی) کی گائڈلائنس کے مطابق، لوگوں کو استعمال کیے گئے سینیٹری پیڈ کو سیلف رَپینگ اسٹریپ کا استعمال کر کے اسے خاص طریقہ سے لپیٹنا چاہیے یا سینیٹری پیڈ بنانے والی کمپنیوں کے ذریعہ دیے گئے ایک خاص پاؤچ میں اسے ڈال کر دوسرے سوکھے کچرے کے ساتھ جمع کرنا چاہیے یا پھر کچرا جمع کرنے کے دوران مقامی ایجنسیوں کے ذریعہ اس کچرے کے لیے بنائی گئی الگ کچرا پیٹی میں اسے رکھنا چاہیے۔ لیکن وندور میں صفائی ملازم گھر گھر کچرا جمع کرنے کے دوران سینیٹری کچرا نہیں اٹھاتے۔

ماحولیات، جنگلات اور ماحولیاتی تبدیلی کی وزارت نے ۲۰۱۶ میں ٹھوس کچرے کے انتظام اور نامیاتی طبی کچرے کے انتظام کے لیے گائڈلائنس جاری کی تھیں، جس میں سینیٹری پیڈ کا نمٹارہ بھی شامل تھا۔ تین سال بعد، ۲۰۱۹ میں سووچھ بھارت مشن (دیہی) کے تحت دی گئی ۶۳ لاکھ روپے کی امدادی رقم سے یہاں پہلا ایس ڈبلیو ایم کلسٹر مرکز قائم کیا گیا۔ اس کے ساتھ ہی پنچایت نے گھر گھر کچرا اکٹھا کرنے کا پروگرام شروع کیا، جس میں گھر پر ہی کچرے کو الگ کرنے کی پالیسی بنائی گئی تھی۔

وندور کے کچرا مینجمنٹ کلسٹر کے صفائی معاون کار آشیش برئی کہتے ہیں، ’’لوگ کچرے کو الگ کرنے میں بہتر ہوئے ہیں، لیکن کلسٹر یونٹ کے لیے یہ اب بھی بڑا چیلنج ہے، کیوں کہ وہ یہ کام ہمیشہ ٹھیک سے نہیں کرتے یا غلطی سے گیلا کچرا سوکھے میں ڈال دیتے ہیں، جس سے سارا کچرا خراب ہو جاتا ہے۔ ہم بہت چھوٹی سی ٹیم ہیں، جو گھر گھر کچرا جمع کرنے، الگ الگ کرنے اور سمندری ساحل کی صفائی کا کام دیکھتے ہیں۔‘‘ وندور گرام پنچایت کے پاس ۱۰ صفائی ملازم ہیں، جو ۳۵۰ گھروں اور ۷۶ کاروباری اداروں سے سوکھا کچرا اکٹھا کرتے ہیں۔

رائے منڈل (۵۷) کہتی ہیں، ’’حال ہی میں پنچایت نے کچرا اٹھانے پر ۵۰ روپے ماہانہ کی فیس لگا دی ہے۔ اگر وہ فیس لے رہے ہیں، تو انہیں پیڈ بھی اکٹھا کرنا چاہیے۔ یہاں کچرا اٹھانے کا کام ہفتہ میں صرف ایک بار ہی ہوتا ہے، وہ بھی کبھی کبھی نہیں ہوتا۔ اور وہ پیڈ نہیں اٹھاتے۔ اگر وہ اکٹھا بھی کرتے، تو ایک بڑی بوری میں ڈال دیتے ہیں اور وہ مہینوں سڑک کے کنارے پڑی رہتی ہے۔ اکثر سینیٹری پیڈ میں مکھیاں، کیڑے وغیرہ لگ جاتے ہیں۔‘‘

آشیش برئی کہتے ہیں، ’’ہم پیڈ یا ڈائپر نہیں اٹھا سکتے، کیوں کہ ہمارے پاس اسے ٹھکانے لگانے کا انتظام نہیں ہے، لیکن لوگ پھر بھی کچرے میں چھپا کر ڈالنے کی کوشش کرتے ہیں۔ یہ ہمارے ملازمین کے لیے صحیح نہیں ہے۔‘‘ ان کے مطابق، گرام پنچایت کو روزانہ ۱۲۰ سے زیادہ پیڈ سے نمٹنا پڑتا ہے۔ سال ۲۰۲۳ میں، وندور کے ایس ڈبلیو ایم کلسٹر نے سی پی سی بی گائڈلائنس کے مطابق سینیٹری کچرے کے نمٹارہ کے لیے ایک انسینریٹر خریدا۔

مشین کی صلاحیت ہر دن ۸۰-۱۰۰ پیڈ (ہر دور میں ۸-۱۰) تھی۔ لیکن صفائی ملازمین کا کہنا ہے کہ اس میں ہر دور میں صرف ۳-۴ پیڈ کا ہی نمٹارہ ہو پاتا تھا اور کچھ ہی دنوں میں یہ خراب ہو جاتی تھی۔ انسینریٹر کے خراب کی وجہ سے پنچایت لوگوں کے گھروں سے سینیٹری پیڈ اور ڈائپر نہیں اکٹھا کر رہی ہے۔

گرام پنچایت پردھان ادھیر داس کہتے ہیں، ’’کچرا مینجمنٹ ایک چیلنج ہے، کیوں کہ اس کے لیے ضروری تمام مشینوں کو مرمت کی ضرورت ہے اوریونٹ میں صرف ۱۰ لوگ کام کرتے ہیں، مزدوروں کی بھی کمی ہے۔ دیگر سرکاری محکموں کی طرف سے بھی تاخیر ہو رہی ہے، لیکن ہم اپنی طرف سے پوری کوشش کر رہے ہیں۔‘‘ فی الحال جنوبی انڈمان ضلع میں جمع زیادہ تر کچرا جہاز کے ذریعہ میدانی علاقوں میں (اکثر چنئی) بھیجا جاتا ہے۔ لیکن پیڈ کے معاملے میں، انسینریٹر مشین کی کمی کے سبب عورتیں اب بھی انہیں زمین میں گاڑنے کو مجبور ہیں۔

ترجمہ نگار: قمر صدیقی