'खेत में धान ना, पैड के भरमार बा!'

“एहिजा धान ना, खेत में खाली पैड मिली. जहंवा खोनम उहंवा पैडे-पैड पाएम!” स्मिता मजाक में कहली. उनकर बात सुन के चारो मेहरारू लोग हंसे लागल.

वंदूर गांव के मोटा-मोटी हर घर में एगो अइसन कोना बा, जेकरा बारे में बिना बतइले लोग जानेला कि ई खास जगह बा. इहंवा ओह घर के लइकी आ मेहरारू लोग आपन महीना (माहवारी) के खराब कपड़ा, आ पैड गाड़ के रखेला. मंडल परिवार के लइकी लोग तनी लजपोकर होखेली. ऊ लोग के हमनी के ऊ जगह देखावे में बहुते संकोच होत रहे.

सीमा बतावल जारी रखली, “हमनी एक महीना ले पैड इकट्ठा करिला. एकरा बाद माटी में एगो गड़हा खोन के दबा दीहिला. इहंवा सभे लोग आपन कचरा अपना घर लगे कहूं गाड़ देवेला. हमनी के घर लगे एगो जगहा त बा, बाकिर अबही उहंवा बहुते कीचड़ हो गइल बा, एहि से हमनी कचरा घर के एगो कोना में इकट्ठा करतानी. फेरु ओकरा गाड़ देवल जाई. कबो-कबो हमनी कचरा के एके जगहा दबाइला, त कबो नया जगह खोनिला.”

दक्खिन अंडमान जिला के पस्चिमी हिस्सा में एगो पक्का मकान के बाहिर पांच ठो मेहरारू लोग बइठ के माहवारी आउर खराब पैड आ कपड़ा के ठिकाना लगावे के तरीका के बारे में बतियावत बा. मंडल परिवार के मुखिया, बहत्तर बरिस के बूढ़ माई उर्मिला बीच में टोकली, “एह बारे में केहू काहे चरचा करी? हमनी त ई सब चीज के बारे में कबहू बात ना कइनी.” उनकर परिवार बंगाली बसावट वाला बा. कइएक पुश्त से अलग-अलग समुदाय के लोग एह केंद्र प्रशासित प्रदेस में आके बसल बा.

ऊ कहली, “हमनी के माहवारी के बारे में केहू ना बतइलक. बांगला में एकरा मासिक कहल जाला. जब सुरु होला, त पता चलिए जाला. हमरा त बड़की दीदी बतइली. ई भइला पर हमनी स्कूल, चाहे मंदिर ना जात रहीं. घर में हमनी के चौका में घुसे के मना रहे. एह तरह के त नियम-कायदा रहे. हम हर नियम के पालन कइनी. एहि से नइखे पता कि नियम तुड़ला पर का होई.”

मंडल आवास के बाहिर बइठल चारो मेहरारू लोग तीन पीढ़ी से बा. सत्तर बरिस के उर्मिला, उनकर पतोह सीमा मंडल (41), सीमा के लइकी लोग बानी (17) आउर शिखा (21). आउर ओह लोग के रिस्तेदार शिवानी मंडल (33) लोग भी बा. ऊ लोग रोक-टोक से जुड़ल समाज के पुरान रीत-रिवाज सब के आपन-आपन तरीका से निभा रहल बा, जेकरा पर अंगुरी उठावल आजो संभव नइखे.

बानी कहे लगली, “पीरियड के बारे में त हमनी के स्कूल से पता चलल. हमनी के सेनेटरी पैड के बारे में बतावल गइल रहे कि कइसे ई कपड़ा से नीमन होखेला, काहेकि एकरा से बेमारी (इंफेक्शन) ना होखे.” बानी पोर्ट ब्लेयर (जेकर नाम अब श्रीविजयापुरम बा) के पैरामेडिकिल छात्रा बाड़ी. ऊ वंदूर के वइसन 75 प्रतिशत मेहरारू लोग में से बाड़ी जे अब कपड़ा के जगह नियम से सेनेटरी पैड काम में लावेली.

राष्ट्रीय परिवार स्वास्थ्य सर्वेक्षण के पंचमा दौर (एनएफएचएस 2019-21) के रपट के हिसाब से, देस भर में अब मोटा-मोटी 64 प्रतिशत किसोरी लोग सेनेटरी नैपकिन काम में ला रहल बा. मतलब, हिसाब लगावल जाव त पछिला पांच बरिस में सेनेटरी नैपकिन के इस्तेमाल में कोई 22 प्रतिशत के इजाफा भइल बा. उहंई, 49 प्रतिशत मेहरारू लोग अबो महीना घरिया कपड़े काम में लावेला.

बानी के माई, सीमा बतइली, “हमनी महीना खातिर हरमेसा सूती कपड़ा काम में लाइला. अब त पैड आ गइल बा. बाकिर 6 गो पैड के दाम 35-40 रुपइया पड़त बा. एहि से पैड हम तबे काम में लाइला, जब कहूं बाहिर जाए के होखे, चाहे यात्रा करे के पड़े. ना त कपड़े काम में लाइला. ओकरा साबुन से धोके सुखा देविला.”

उर्मिला बतावत बाड़ी, “हमनी इस्तेमाल कइल कपड़ो एने-ओने ना फेंकी, कहल जाला अइसन करे से सांप आ सकेला. ऊ लोग खून के महक से खींचल आवेला.”

संगीता कहेली, “कपड़ा वाला पैड इस्तेमाल करे के हम सलाह ना दीहीं, काहेकि मेहरारू लोग ओकरा ठीक से साफ ना कर पावे.” संगीता आ उनकर जइसन आउर लोग टापू पर जवान लइकी लोग के माहवारी से जुड़ल साफ-सफाई के बारे में चेतावे के कोसिस करेला. “सबले बड़ परेसानी के बात ई बा कि लइकी लोग कपड़ा के ठीक से ना सुखावे. ऊ लोग त आपन ब्रा, पैंटी भी खुला में सूखे खातिर ना डालेला, त कपड़ा का ही डाली?”

गांव के आशा दीदी (एएसएचए कार्यकर्ता) सुखला पाहन मानेली कि माहवारी से जुड़ल लाज आ संकोच चलते मेहरारू लोग इस्तेमाल कइल गइल कपड़ा आ पैड के ठिकाना लगावे के साफ तरीका ना अपनावे. ऊ कहेली, “इहंवा वंदूर में मेहरारू लोग काम में लावल कपड़ा के लुका दीही. एहि से ऊ ठीक से सूख ना पावे, जे बाद में बहुते खराबी करेला. हम गांव के अइसन कइएक मेहरारू लोग से भेंट कइनी, जे काम में लावल पैड के कागज में लपेट के जरा देवेला. काहेकि ओह लोग के आउर कवनो तरीका समझ में ना आवे.”

अंडमान के जवान लइकी लोग के बीच माहवारी से जुड़ल साफ-सफाई के प्रति जागरूकता बढ़े के मतलब बा कि ओह लोग में डिस्पोजेबल सैनिटरी पैड के इस्तेमाल बढ़ल बा. प्रशासन में सामुदायिक भागीदारी बढ़ावे के दिसा में काम करे वाला एनजीओ दक्खिन फाउंडेसन के अनुमान बा कि वंदूर के मोटा-मोटी 75 प्रतिशत मेहरारू लोग अब सैनिटरी पैड काम में लावत बा. आ टापू पर औसत रूप से हर महीना 3,750 सैनिटरी पैड काम में लावल जा रहल बा.

संगीता बौल कहेली, “डॉलीगंज जइसन इलाका में त पैड जमा कइल जाला, बाकिर वंदूर में अइसन ना होखे.” संगीता बौल (नाम बदलल बा) 2011 से ही वंदूर में बतौर सहायक नर्स आउर दाई के काम कररहल बाड़ी. उनकर कहनाम बा कि दोसर इलाका सब में त सैनिटरी कचरा जमा कइल जाला, बाकिर इहंवा एकर सुविधा नइखे. ऊ आगू कहेली, “कबो-कबो लोग ई कचरा पानी लगे फेंक देवेला. एकरा से पर्यावरण के नुकसान पहुंचेला. लोग पैड के या त जरा देवेला, चाहे फेंक देवेला. दुनो तरीका से माटी आ हवा खराब होखेला. कुछ मेहरारू लोग त घरे में एकरा जरा देवेला. हम त ओह लोग से इहे कहिला कि सब पैड के खाली एक जगह जमा कइल जाव आ ओकरा धोके गड्ढा में दबा देवल जाव.”

टापू पर ई स्थिति सब जगह से अलग नइखे. बाकिर इहंवा के जमीन सीमित बा. जदि खाली भारत के मुख्य भूमि के बात कइल जाव, त इहंवो मोटा-मोटी 36 प्रतिशत मेहरारू आ लइकी लोग (यानी कुल 33.6 करोड़ मेहरारू) के अपना स्तर पर सैनिटरी कचरा के ठिकाना लगावे पड़ेला. एह चलते रोज मोटा-मोटी 377 टन कचरा निकलेला आउर एकर खराब असर पड़ेला.

दक्खिन फाउंडेसन के सीनियर कार्यक्रम अधिकारी आ वंदूर द्वीप के रहे वाला माधुरी मंडल कोसिस कर रहल बाड़ी कि गांव के मेहरारू लोग से महीना पर खुल के बात होखे. ऊ पैड के विकल्प के बारे में ओह लोग के बतावे के चाहत बाड़ी. उनका हिसाब से ई काम आसान नइखे. वंदूर में अबहियो बहुते कचरा सब समुंदर किनारे फेंकाला, जे बाद में बरखा में बह के समुंदरे में चल जाला.

ठोस अपशिष्ट प्रबंधन नियम (एसडब्ल्यूएम), 2016 के हिसाब से, काम में लावल गइल सेनेटरी नैपकिन, डाइपर, कंडोम, टैम्पून, इनकॉन्टिनेंस शीट आउर दोसर एहि तरहा के कचरा के सेनेटरी कचरा बा. एकरा सूखल कचरा संगे ठीक से ठिकाना लगावे के चाहीं. लैंसेट के एगो रिपोर्ट के मुताबिक, “सेनेटरी कचरा के सही तरीका से ठिकाना लगावे के ब्यवस्था ना होखे चलते, एकरा लगे के खेत सब में, चाहे बंद पड़ल ईनार में फेंक देवल जाला. चाहे शौच में बहा देवल जाला, जमीन खोन के दबा देवल जाला, चाहे घर के आंगन में जरा देवल जाला.”

घर में बनावल सेनेटरी नैपकिन, चाहे कागज, कपड़ा आ कुदरती चीज से बनल नैपकिन सब के जमीन में गाड़ल जा सकेला. बाकिर मेहरारू लोग जवन नैपकिन बजार से काम में लावे खातिर लावेली, ओकरा में प्लास्टिक चढ़ावल रहेला, ऊ सड़ेला ना. एह तरह के नैपकिन सब के ठिकाना लगावे खातिर सस्ता इन्सिनरेटर (भस्मक/जरावे वाला) चाहीं. उर्मिला के पड़ोसन राय बाला मंडल (57) कहेली, “हमनी के जमाना कपड़ा वाला रहे. हम त पैडो काम में लाके देख लेनी. हमरा दाना हो जाला. ओकरा में से बदबू आवेला. इहो चिंता लागल रहेला कि पैड कहंवा फेंकल जाव. कबो-कबो त कुकुर सब फेंकल पैड के मुंह में लेके गांव में घूमे लागेला. तब खुदे जाके कचरा उठावे पड़ेला.”

वंदूर के सफाई कर्मचारी रीता बासु कहेली, “हमनी मेहरारू लोग से बेर बेर कचरा छांट के रखे आ पैड एने-ओने ना फेंके के कहत रहिला. हमनी दोसर लोग से भी इहे बतावे के कोसिस करिले, बाकिर ऊ लोग एक-दोसरा पर दोस डाल देवेला. हमनी के बेर-बेर कहे में लाज लागेला. एकरा से हमनी के काम मुस्किल हो जाला.”

केंद्रीय प्रदूषण नियंत्रण बोर्ड (सीपीसीबी) के गाइडलाइन में कहल गइल बा कि लोग के सेनेटरी पैड जइसन कचरा के खुला ना फेंके के चाहीं. चाहे त पट्टी से बान्ह के, चाहे कंपनी वाला पाउच में बंद करके फेंके के चाहीं. एकरा सूखल कचरा संगे फेंके के चाहीं, चाहे अलग डिब्बा में रखे के चाहीं जे घरे घरे कचरा उठावे आवे वाला एजेंसी देवेला. बाकिर वंदूर के सफाईकर्मी लोग घरे-घरे जाके सेनेटरी कचरा नइखे उठावत.

सन् 2016 में सरकार पर्यावरण, जंगल आ मौसम के बदलाव खातिर ठोस कचरा आ बायो-मेडिकल कचरा के प्रबंधन खातिर गाइडलाइंस जारी कइले रहे, जेकरा में सेनेटरी पैड के निपटान कइल भी शामिल रहे. तीन बरिस बाद, सन् 2019 में स्वच्छ भारत मिशन (देहात) के तहत देवल गइल 63 लाख रुपइया के सहायता राशि से इहंवा पहिल एसडब्ल्यूएम कल्स्टर सुविधा सुरु कइल गइल. एहि संगे पंचायत घरे-घरे जाके कचरा उठावे के योजना लागू कइलक, जेमें घर में कचरा छांटे के नियम भी शामिल रहे.

वंदूर के कचरा प्रबंधन कल्स्टर के सफाई पर्यवेक्षक आसीष बरई के कहनाम बा, “लोग अब पहिले से तनी ठीक से कचरा छांट के रखे लागल बा. बाकिर हमनी खातिर ई अबहियो बहुते बड़ चुनौती बा. कबो-कबो लोग ध्यान ना देवे आ गलती से गील कचरा के सूखल में मिला देवेला. सब खराब हो जाला. घरे-घरे जाके कचरा उठावे वाला, छांटे आ समुंदर किनारा के साफ करे वाला टीम बहुते छोट बा.” वंदूर ग्राम पंचायत में दस ठो सफाईकर्मी बा जे लोग 350 घर आ 76 दोकान से सूखल कचरा उठावेला.

राय मंडल, 57 बरिस, कहेली, “पंचायत हाले में हमनी से कचरा उठावे खातिर महीना के 50 रुपइया मांगे लागल बा. बाकिर जदि पइसा लेत बा, त पैडो त उठावे के चाहीं नू. इहंवा कचरा त हफ्ता में एके बेरा उठावे आवेला लोग, केतना बेरा त उहो ना. आ ऊ लोग पैड त उठइबे ना करे. जदि उठावेला भी त एगो बड़ बोरा में भर के सड़क किनारे छोड़ देवेला. ऊ उहंवा महीनन ले पड़ल रहेल. ओकरा में अक्सरहा मक्खी, कीड़ा आ कीटाणु सब लाग जाला.”

आसीष बरई के कहनाम बा, “हमनी पैड चाहे डाइपर ना उठाईं, काहे कि हमनी लगे अबले भस्मक (जरावे वाला मसीन) नइखे. बाकिर लोग लुका के कचरा में डाल देवेला. हमनी कर्मचारी लोग खातिर ई सही नइखे.” उनकर अनुमान बा कि ग्राम पंचायत के रोज 120 से जादे पैड संभारे पड़ेला. सन् 2023 में वंदूर के एसडब्ल्यूएम कल्स्टर, सीपीसीबी गाइडलाइन के हिसाब से सेनेटरी कचरा के ठिकाना लगावे खातिर एगो भस्मक कीनलक.

भस्मक मसीन में एक दिन में 80 से 100 पैड (एक बेरा में 8-10) जरावे के क्षमता बा. बाकिर सफाईकर्मी लोग के कहनाम बा कि एकरा में एक बेरा में खाली 3 से 4 पैड के ही ठिकाना लगावल जा सकत रहे. आउर कुछे दिन में ई खराबो हो जात रहे. भस्मक खराब होखे चलते पंचायत के लोग घर से सेनेटरी पैड आ डाइपर नइखे उठा पावत.

ग्राम पंचायत प्रधान अधीर दास कहले, “कचरा के ठिकाना लगावल चुनौती के काम बा. काहेकि एकरा खातिर जरूरी सभे मसीन खराब बा, जेकरा मरम्मत करे के जरूरत बा. आ यूनिट में खाली दसे लोग काम करे वाला बा. मजूर लोग के कमी बा. दोसर सरकारी विभाग से भी देरी हो रहल बा. बाकिर हमनी अपना ओरी से भरसक प्रयास कर रहल बानी.” फिलहाल दक्खिन अंडमान जिला में इकट्ठा भइल जादेतर कचरा के जहाज से मुख्यभूमि (अधिकतर चेन्नई) भेजल जाला. बाकिर पैड के मामला में, भस्मक मसीन के ना रहला पर मेहरारू लोग अबहियो ओकरी जमीने में गाड़े के मजबूर बा.

अनुवाद: स्वर्ण कांता