پہلے گردہ گیا، پھر سائبر فراڈ میں پھنسا کسان

فروری ۲۰۲۵ کا کوئی دن تھا۔ روشن سداشیو کولے کے ایک دوست نے فون کر کے ان سے دریافت کیا کہ کیا وہ بطور کمپیوٹر آپریٹر کام کرنے کے لیے لاؤس آنا چاہیں گے۔ نوے ہزار سے ایک لاکھ روپے ماہانہ کی اچھی تنخواہ تھی اور سفر اور رہائش کے تمام اخراجات کمپنی برداشت کرنے والی تھی۔

اس دوست کا تعلق جموں و کشمیر سے تھا۔ اس نے بھی گزشتہ سال کمبوڈیا میں اپنا ایک گردہ فروخت کیا تھا اور اسی گروہ کا حصہ تھا جس گروہ میں روشن بھی شامل تھے۔ اس نے ابھی ابھی لاؤس میں ملازمت اختیار کی تھی۔

روشن نے گریجویشن کے بعد کمپیوٹر پروگرامنگ کا ایک کورس کیا تھا۔ کسی دفتر میں کام کرنے کا خیال انہیں پُرکشش لگا۔ وہ کہتے ہیں، ’’میرے دوست نے مجھے بتایا کہ یہ کام جسمانی طور پر زیادہ محنت طلب نہیں ہوگا، اس لیے میں نے بھی اس پر غور کرنا شروع کر دیا۔‘‘

قرض کی ادائیگی کے لیے اپنا گردہ فروخت کرنے کے بعد بھی، سرجری سے صحت یاب ہونے کے دوران، روشن کو برہم پوری کے چھ ملزم ساہوکار مسلسل ہراساں کر رہے تھے۔

ان کا اپنا گھر چار مختلف مالیاتی اداروں کے پاس رہن رکھا جا چکا تھا۔ ان کے والد نے اپنی پوری زندگی کی جمع پونجی سے جو زمین خریدی تھی، اسے چھ ساہوکاروں میں سے ایک نے اپنے قبضے میں لے لیا تھا۔ گھر کے دیگر اثاثے بھی فروخت کیے جا چکے تھے، اور ان سب کے باوجود قرض کی رقم ۱۰ لاکھ روپے سے زیادہ ہو چکی تھی۔

ان کے والد کی پنشن، ان کی بیوی کی آنگن واڑی سے ملنے والی تنخواہ، اور ان کے بھائی کی یومیہ اجرت یا کھیتوں میں مزدوری سے ہونے والی آمدنی بھی ناکافی تھی۔ روشن نے کچھ عرصے تک بینکنگ نامہ نگار کے طور پر کام کیا تھا، لیکن عالمی وبا کے دوران جب یہ ملازمت چلی گئی تو وہ دوبارہ کوئی کام تلاش نہیں کرسکے تھے۔

انہوں نے نوکری کی اس پیشکش کو قبول کر لیا۔

ان کے دوست (جن کا نام ظاہر نہیں کیا گیا ہے) نے روشن کی بات ایک دلال سے کرائی، جو فِدی کے نام سے جانا جاتا تھا۔ دراصل وہ جموں و کشمیر کا رہنے والا تھا، لیکن اب لاؤس میں مقیم تھا۔ ’’میرے دوست نے مجھے بتایا تھا کہ فِدی میرے سفر کا انتظام اور دیگر ضروری کارروائیاں مکمل کرا دے گا،‘‘ روشن نے پاری کو بتایا۔

چندرپور میں ان کا ایک اور نوجوان دوست تھا، وِشال۔ وہ بھی اپنا گردہ فروخت کر چکے تھے اور انہیں بھی فوری طور پر کسی ملازمت کی تلاش تھی۔ ’’ایک سے بھلے دو،‘‘ روشن برجستہ کہتے ہیں۔

چنانچہ جون ۲۰۲۵ میں وہ دونوں لاؤس جانے والے ہوائی جہاز میں سوار ہو گئے۔ یہ جہاز کولکاتا سے بنکاک اور پھر وہاں سے لاؤس کے دارالحکومت ویَنتیانے پہنچا، جہاں سے اندرونِ ملک ایک اور پرواز کے ذریعے وہ بوکیو صوبے تک گئے۔ اس بار ان کے گھر والوں کو معلوم تھا کہ وہ واقعی ملازمت کے سلسلے میں جا رہے ہیں۔

بوکیو پہنچنے پر فِدی نے ان کے پاسپورٹ اپنے قبضے میں لے لیے۔ روشن نے اعتراض کیا تو اس نے نظر انداز کرتے ہوئے کہا کہ کمپنی کے ضوابط میں شامل ہے۔ اس نے انہیں اپنے کمرے میں آرام سے ٹھہرایا اور کھانے پینے کی چیزیں بھی فراہم کیں۔

اگلی صبح فِدی انہیں ٹیکسی کے ذریعے ایک ویران اور پر پیچ سڑک کے راستے ان کے کام کرنے کی جگہ تک لے گیا۔ وہاں تک پہنچنے میں انہیں ۴۰ منٹ لگے۔ ’’میں نے ان پہاڑیوں کے درمیان سے بلند ہوتی ہوئی کئی عمارتیں دیکھیں؛ یہی وہ سائبر اسکیمنگ کمپاؤنڈز (فراڈ کے اڈے) تھے،‘‘ روشن یاد کرتے ہیں۔ وہاں سرخ، سبز اور نیلے رنگ کی عمارتیں تھیں۔

انہیں لے کر فِدی عمارتوں کے ایک احاطہ میں پہنچا، جہاں دو یا تین بلند و بالا ٹاور کھڑے تھے۔ روشَن کا کہنا ہے کہ جب انہوں نے موٹی اور اونچی دیواروں سے گھرے اس احاطہ کے اندر موجود وسیع و عریض دفتر کو دیکھا تو وہ حیرت زدہ رہ گئے۔ سینکڑوں نوجوان مرد اور خواتین اپنے اپنے ہاتھوں میں ۱۰ سے ۱۵ موبائل فون لیے کمپیوٹر اسکرینوں کے سامنے روبوٹ کی طرح بیٹھے خاموشی سے اپنا اپنا کام کر رہے تھے۔

’’ایک دم بھیانک، بھیان واتت ہوتے مالا (یہ بہت خوفناک تھا، میں بہت ڈر گیا تھا،‘‘ وہ کہتے ہیں۔

اس وقت تک لاؤس سے متعلق روشن کی جانکاری بہت کم تھی۔ یہ ملک، جس کی آبادی ۷۶ لاکھ ہے، میانمار، چین، تھائی لینڈ، کمبوڈیا اور ویتنام کے درمیان گھرا ہوا ہے۔ دریائے میکونگ یہاں سے ہو کر گزرتا ہے اور یہ اپنے پہاڑی علاقوں، پہاڑی قبائلی بستیوں اور بدھ وہاروں (آشرموں) کے لیے جانا جاتا ہے۔ اب روشن نے اپنے فون پر تلاش کرنا شروع کر دیا۔

ان کا کہنا ہے کہ کام کا مقام شمال مغربی لاؤس کے ایک دور افتادہ علاقے میں واقع تھا۔ یہاں بدنامِ زمانہ ’’گولڈن ٹرائینگل‘‘ – میانمار، لاؤس اور تھائی لینڈ کی سرحدوں کا لاقانونیت والا خطہ – میں جنگل کے ایک حصہ کو کاٹ کر کیسینو سٹی (جوئے کا شہر) بنائی گئی ہے۔

بوکیو صوبے میں واقع گولڈن ٹرائینگل اسپیشل اکنامک ژون (جی ٹی ایس ای زیڈ) کے بارے میں متعدد بین الاقوامی میڈیا رپورٹیں موجود ہیں، جن سے معلوم ہوتا ہے کہ یہ علاقہ مبینہ طور پر جوئے کے ایک مرکز سے ترقی کر کے صنعتی پیمانے پر چلنے والا سائبر دھوکہ دہی اور انسانی اسمگلنگ کا ایک عالمی مرکز بن چکا ہے۔

روشَن اور وِشال آن لائن سائبر فراڈ کے تیزی سے پھیلتے کاروبار کے تازہ ترین شکار بن چکے تھے۔ یہ ایک ایسی صنعت ہے جس کے بارے میں خیال کیا جاتا ہے کہ اس نے تیسری دنیا کے مختلف ممالک سے تعلق رکھنے والے دسیوں ہزار ملازمین کو غلام بنا رکھا ہے۔ ان ملازمین کو آن لائن فروخت اور آئی ٹی کے شعبے میں اچھی تنخواہ والی ملازمتوں کا جھانسہ دے کر لایا جاتا ہے اور پھر ان سے بین الاقوامی سطح پر سائبر فراڈ کا کام انجام دینے پر مجبور کیا جاتا ہے۔

’’بنیادی طور پر ہمیں دنیا بھر کے لوگوں کو دھوکہ دینا ہوتا تھا،‘‘ روشَن کہتے ہیں۔ ’’پہلے ہی دن سے ہم فیس بک پر جعلی آئی ڈیز بناتے، دوسروں کا روپ دھارتے، لوگوں کو فون کرنے کے لیے اے آئی ٹولز استعمال کرتے، بڑے بڑے وعدے کر کے بڑے سرمایہ کاروں کو اپنے جال میں پھنساتے اور بینکنگ فراڈ کرتے تھے۔‘‘ وہ مزید کہتے ہیں، ’’وہ ملازمین سے کچھ بھی کروا لیتے ہیں۔‘‘

روشن نے وہاں افریقہ، ہندوستان، بنگلہ دیش اور کئی دیگر ممالک سے تعلق رکھنے والے بیس تیس سال کی عمر کے نوجوان مردوں اور خواتین کو دیکھا۔ وہ ہفتے میں چھ دن روزانہ ۱۲ سے ۱۴ گھنٹے کام کرتے تھے۔ انہیں وعدے کے مطابق تنخواہیں تو دی جاتی تھیں، لیکن گھر واپس جانے کی آزادی نہیں تھی۔

’’وِشال فوراً وہاں سے نکل جانا چاہتا تھا،‘‘ روشَن یاد کرتے ہیں۔ ’’وہ اور میں دونوں بہت خوف زدہ تھے۔‘‘

کسی نہ کسی طرح روشَن نے پہلے ہی ہفتے فِدی سے وِشال کی رہائی کے لیے بات چیت کر لی۔ انہوں نے یہ بہانہ تراشا کہ وِشال کو کمپیوٹر آپریشنز کی اتنی اچھی سمجھ نہیں ہے جتنی خود ان کی ہے۔

’’ہم میں سے ہر ایک کو بھرتی کرنے کے عوض فِدی کو کمپنی کی طرف سے ۱۰ ہزار یُوان (تقریباً ۳ء۱ لاکھ روپے) ملے تھے۔ وِشال کا پاسپورٹ واپس کرنے اور اسے گھر جانے کی اجازت دینے کے بدلے بھی اس نے ۱۰ ہزار یُوان کا مطالبہ کیا۔ بنیادی طور پر ہم غلام بنا لیے گئے تھے۔ ہمیں اپنی جانوں کا بھی خوف تھا۔ میں نے اسے اس بات پر راضی کر لیا کہ وہ وقت کے ساتھ میری تنخواہ سے ماہانہ قسطوں کی صورت میں یہ رقم کاٹ سکتا ہے اور وِشال کو فوری طور پر گھر جانے کی اجازت دے دے۔‘‘ روشَن کہتے ہیں، ’’خوش قسمتی سے وہ تیار ہوگیا اور وِشال گھر واپس چلا گیا۔‘‘

وِشال نے اس اسٹوری کے لیے پاری سے بات کرنے سے انکار کر دیا۔ وہ اس واقعہ کو ایک ڈراؤنے خواب کی طرح بھلا دینا چاہتا ہے۔

اس کے بعد روشَن نے کسی طرح واٹس ایپ پر برہمپوری کے کانگریس رہنما اور اس وقت مہاراشٹر کی قانون ساز اسمبلی میں حزبِ اختلاف کے لیڈر وجے وڑیٹی وار سے رابطہ کیا اور ان سے مدد کی گزارش کی۔ وڑیٹی وار نے وزیرِ اعلیٰ دیویندر فڑنویس کو آگاہ کیا، جنہوں نے مرکزی وزارتِ داخلہ سے رابطہ کیا۔ لاؤس میں ہندوستانی سفارت خانہ کو بھی اطلاع دی گئی۔ سفارت خانہ نے مقامی پولیس کی مدد سے روشَن کا سراغ لگایا اور وڑیٹی وار کو فون کرنے کے دو روز بعد انہیں اس سائبر فراڈ کے اڈے سے بازیاب کرا لیا۔

’’لاؤس پولیس بہت سے اہلکاروں کے ساتھ آئی، میرا پاسپورٹ لے کر مجھے واپس کیا اور احمد آباد کے راستے مجھے وطن واپس بھیج دیا گیا،‘‘ وہ کہتے ہیں۔ روشن کے احمد آباد پہنچنے سے صرف دو دن قبل، ۱۲ جون کو ایئر انڈیا کی پرواز ۱۷۱ حادثے کا شکار ہو گئی تھی، جس میں ۲۶۰ مسافر ہلاک ہوئے تھے۔ انہوں نے لاؤس میں تقریباً ایک ہفتہ گزارا تھا۔

جموں و کشمیر سے تعلق رکھنے والا روشن کا دوست بھی ہندوستان واپس آ چکا ہے اور کیرالہ میں کام کر رہا ہے۔ پاری نے ان سے بات کرنے کی کوشش کی، لیکن انہوں نے بات کرنے سے انکار کر دیا۔ ان کے اوپر اپنی فیملی کی کفالت اور اپنے بچوں کی پرورش کی ذمہ داری ہے۔

منتھور واپس آنے کے بعد روشن نے وڑیٹی وار کو اپنی پانچ سالہ اذیت ناک داستان سنائی، جسے سن کر وہ حیران رہ گئے۔ لیکن اس کے کچھ ہی عرصے بعد وڑیٹی وار کی والدہ کا انتقال ہو گیا اور پولیس میں شکایت درج نہ ہو سکی۔ معاملہ ٹھنڈا پڑ گیا۔ پھر نومبر ۲۰۲۵ میں روہینی نے خودکشی کی کوشش کی، اور اس کے بعد ایک مقامی یوٹیوب چینل نے روشَن کی اذیت ناک داستان رپورٹ کر دی۔

آخرکار پولیس نے ایف آئی آر درج کر لی اور مقامی ساہوکاروں کے ساتھ ساتھ گردے کے غیر قانونی کاروبار میں ملوث ملزمان کو بھی گرفتار کر لیا۔ روشَن نے پولیس میں درج کرائی گئی اپنی شکایت میں لاؤس کے اسکیمنگ کمپاؤنڈ کا ذکر نہیں کیا تھا۔

مقدمہ درج ہونے کے بعد وڑیٹی وار نے ایک پریس کانفرنس سے خطاب کیا اور ملزمان کے خلاف سخت کارروائی اور روشن کے لیے امداد کا مطالبہ کیا۔

اب یہ ڈیری کسان اپنی زمین اور سونا واپس حاصل کرنے اور مالیاتی اداروں سے لیے گئے قرضوں کی معافی کے لیے قانونی لڑائی لڑ رہے ہیں۔ مہاراشٹر ساہوکاری (ضابطہ کاری) ایکٹ، ۲۰۱۴ میں ایسے اثاثوں کو ضبط کر کے ان کے اصل مالکان کو واپس کرنے کی گنجائش موجود ہے۔ تاہم، اس عمل میں وقت لگے گا۔

روشَن پر مختلف بینکوں اور غیر بینکاری مالیاتی اداروں کے ۵۰ لاکھ روپے سے زائد کے قرض واجب الادا ہیں، اس کے علاوہ رشتہ داروں اور دوستوں سے لیے گئے کچھ چھوٹے موٹے قرضے بھی ہیں۔

لیکن انہیں خوشی ہے کہ آخرکار ان کی بات سنی جا رہی ہے۔

’’ایک وقت ایسا بھی آیا تھا جب ہمارا پورا کنبہ اجتماعی خودکشی پر غور کرنے لگا تھا،‘‘ وہ پاری سے کہتے ہیں۔ ’’میں مختلف متبادل کے بارے میں غور کر رہا تھا، اس میں سائنائڈ کے حصول کا طریقہ بھی شامل تھا۔‘‘

ان کے معاملے نے رواں سال کے اوائل میں ریاستی اسمبلی کے بجٹ اجلاس کے دوران پورے ایوان کو ہلا کر رکھ دیا۔ وڑیٹی وار نے دسمبر ۲۰۲۵ میں ناگپور میں اسمبلی کے سرمائی اجلاس کے دوران پہلی مرتبہ یہ معاملہ اٹھایا تھا۔ مہاراشٹر حکومت نے حال ہی میں روشن کو ۵ لاکھ روپے کی مالی امداد جاری کی ہے، جبکہ کچھ رضاکار تنظیمیں بھی مالی مدد کے لیے آگے آئی ہیں۔

روشن اور ان کے بھائی امول خالی شیڈ کو گایوں سے بھر کر اپنی ڈیری کا کاروبار دوبارہ شروع کرنا چاہتے ہیں، اور اپنی زندگی کا چکر مکمل کرنا چاہتے ہیں۔ انہوں نے ضلع کلکٹر اور سیاسی رہنماؤں کو خط بھی لکھا ہے، جس میں سرکاری ملازمت کی درخواست کی گئی ہے۔

اپنے گھر سے بات کرتے ہوئے روشن کہتے ہیں کہ ان جیسے ہزاروں مرد اور خواتین ہیں جو ایک غیر یقینی اور نازک صورتِ حال میں پھنسے ہوئے ہیں۔

روشن کو اب اس حقیقت کے ساتھ زندگی گزارنی ہے کہ ان کا صرف ایک گردہ باقی ہے۔ وہ کہتے ہیں، ’’مجھے نہیں معلوم کہ عمر بڑھنے کے ساتھ اس کا مجھ پر کیا اثر پڑے گا۔‘‘ وہ اپنی زندگی کے گزشتہ پانچ برسوں کو مٹا دینا چاہتے ہیں۔

پاری نے سال ۲۰۲۶ کے اوائل میں پہلی بار روشن کی کہانی کی تحقیقات شروع کی تھی۔ اب سات ماہ بعد، وہ حکومت، اپنے خیر خواہوں اور سول سوسائٹی کی تنظیموں سے ملنے والی کچھ مالی مدد کے ساتھ آہستہ آہستہ اپنی زندگی دوبارہ سنوارنے کی کوشش کر رہے ہیں۔

اگست ۲۰۲۶ میں اس رپورٹر سے بات کرتے ہوئے روشن نے کہا کہ وہ اپنی ڈیری دوبارہ شروع کرنا چاہتے ہیں اور اپنے خالی شیڈ میں نئی گائیں اور بھینسیں لانے کا ارادہ رکھتے ہیں۔ ریاستی حکومت نے حال ہی میں انہیں پانچ ایکڑ زرعی زمین الاٹ کرنے کا وعدہ کیا ہے، اور روشَن کو امید ہے کہ اس وعدہ کے پورا ہونے کے بعد ان کی مالی حالت میں کچھ استحکام پیدا ہوگا۔ وہ اپنے والد کی کولہے کے جوڑ کی سرجری (جو کافی عرصے سے زیرِ التوا تھی) کے بعد ان کی تیمارداری بھی کر رہے ہیں۔

دریں اثنا، ان کے ذریعے مقامی پولیس اسٹیشن اور چندرپور پولیس ہیڈکوارٹرز کے باقاعدہ دورے اب بھی جاری ہیں۔ پولیس اب بھی گردے کے غیر قانونی کاروبار کے ان دو مفرور ملزمان کی تلاش میں ہے، جن میں تریچی کے اسٹار کِمس ہسپتال کے ڈاکٹر راج رتنم گوونداسوامی اور کولکاتا کا مبینہ دلال سبھاجیت پال شامل ہیں۔

روشن گردہ فروخت کرنے والے دوسرے افراد کے رابطے میں ہیں۔ اب وہ ان کے دوست بن چکے ہیں۔

اگر آپ کے ذہن میں خودکشی کے خیالات آ رہے ہیں یا کوئی دوسرا شخص شدید ذہنی دباؤ کا شکار ہے، تو براہِ کرم قومی ہیلپ لائن کِرن کے نمبر 18005990019 (24/7 ٹول فری) پر یا اپنے کسی بھی قریبی ہیلپ لائن نمبر پر فوری طور پر رابطہ کریں۔