கேரள பசுமைப்படை

திருச்சூரில் இருந்து வரவூர் வெகு தூரம் என்று சொல்லப்பட்டாலும், ஆட்டோவில் ஏறிவிட்டால் அப்படி தெரியவில்லை. பரந்து விரிந்த ரப்பர் தோட்டங்கள், நம் மனதில் நின்றுவிடுகின்றன. திறந்த வெளியின் சாலையோரம் ஒரு குடிசைக்கு முன் எங்கள் ஆட்டோ நின்றது. பசுமைப்படை முன்முயற்சி என்ற புதிய திட்டத்திற்கான ஆய்வகங்களாக மாறியுள்ள வடக்கஞ்சேரி வட்டாரத்தில் உள்ள ஒன்பது கிராம ஊராட்சிகளில் வரவூரும் ஒன்று.

10 ஏக்கர் விவசாய நிலத்தில், மனிதர்களை அதிகம் காண முடியவில்லை. மாறாக, இரண்டு டிராக்டர்களின் ஒலி ஈர நிலத்தில் ரீங்காரமிடுகின்றன. குனிந்து நிற்கும் நெற்கதிர்களுக்கு நடுவே பசுமை படை பணியாளர்கள் 7 பேர் வேலை செய்து கொண்டிருந்தனர். அடர் பச்சை சீருடை அணிந்திருந்தனர். அவர்களில் சிலர் அகன்ற தொப்பிகளுடன் இருந்தனர். நாங்கள் வயல் வரப்பில் இறங்கியதும், பச்சை சட்டை அணிந்த விவசாயி ஒருவர் கையில் பீடியுடன் என் நண்பரை நோக்கி வந்தார். இது கே.பி.மைதீன். உள்ளூர் பத்திரிகை ஒன்றில் பத்திரிக்கையாளராக இருக்கும் என் நண்பரால் தனக்கு உதவ முடியும் என்று அவர் நினைக்கிறார்.

அவர்களின் பண்ணைக்கு அருகில் சுரங்கம், குவாரி பணிகள் நடந்து வருகிறது. அங்கு, தான் வேலை செய்யும் செய்தித்தாள் இருப்பதாக என் நண்பர் கூறுகிறார். வரவூரில் இந்த நிலத்தில் வேலை செய்யும் 10 விவசாயிகளில் மொய்தீனும் ஒருவர். அவர் கவலையுடன் இருப்பது கண்கூடாகத் தெரிகிறது. ஆனால் கேரள தொழிலாளர் வங்கியின் பசுமை படை பணியாளர்கள் சீருடையில் அவரது பண்ணையில் மும்முரமாக வேலை செய்து இரண்டு முக்கியமான பிரச்னைகளுக்கு ஓரளவு தீர்வு கண்டுள்ளனர். நெல் சாகுபடியில் உற்பத்தி குறைவு, விவசாய தொழிலாளர்களுக்கான பற்றாக்குறை.

கேரளாவின் சமூக குறியீடுகள் சிறப்பாக இருந்தாலும், விவசாயம் அவ்வளவு சிறப்பாக இல்லை. 1975 முதல் 2007ஆம் ஆண்டு வரையிலான காலகட்டத்தில் கேரளாவின் பிரதான உணவான நெல் சாகுபடி 8.84 லட்சம் ஹெக்டேரிலிருந்து 3.52 லட்சம் ஹெக்டேராக குறைந்துள்ளது. வடக்கஞ்சேரி வட்டத்தில் கிட்டத்தட்ட கால் பங்கு நிலத்தில் நெல் பயிரிட முடியும் என்றாலும், விவசாயம் மந்த நிலையில் உள்ளது. இதே நிலை தொடர்ந்தால் 2011வாக்கில் உற்பத்தித் திறன் 2 லட்சம் ஹெக்டேருக்கு கீழ் சரியும் என்று எதிர்பார்க்கப்பட்டது.

கேரளா அச்சம் கொள்வதிலும் காரணம் உள்ளது. இடுபொருட்கள் விலை உயர்வால், விவசாயிகள் விவசாய தொழிலாளர்களையும், நிலங்களையும் இழந்தனர். பசுமை படையை அணுக என்ன காரணம் என்று கேட்டபோது, "இந்த வேலைக்கு வேறு ஆட்களை கிடைக்கவில்லை," என்று ஏ.டி.மொய்தீன் தோள்களைக் குலுக்கினார். மக்கள் தொகை பெருகியது. ஆனால் நிலங்கள் தரிசாகின. விவசாயம் நடைபெறவில்லை. அபாய நிலையை எட்டியதும் 2007ஆம் ஆண்டு மாநில அரசு 'உணவுப் பாதுகாப்பு செயல் திட்டத்தை' அறிமுகப்படுத்துவதில் தீவிரம் காட்டியது. லட்சியங்களை நிறைவேற்ற, வடக்காஞ்சேரி வட்டத்தில் மட்டுமே நூறு சதவீத நெல் சாகுபடியை பசுமைப்படை மேற்கொண்டது.

தொழிலாளர் வங்கி களத்தில் இறங்கும் முன்பு அந்த நிலம் கிட்டத்தட்ட ஒரு தசாப்தத்திற்கு தரிசாகக் கிடந்தது. பசுமைப் படை பணியாளர் லதா இதை சற்று எரிச்சலோடும், அதே சமயம் சற்று பெருமிதத்துடனும் என்னிடம் பகிர்ந்து கொள்கிறார். பசுமையாக்கும் முயற்சியில் பங்கேற்று பலன் பெறுவதோடு அவருக்கு அதிகாரமும் அளிப்பதால் பெருமை கொள்கிறார். இதை அவரது கட்டுப்பாட்டில் இருக்கும் நடவு இயந்திரத்தின் ரீங்காரம் உறுதிப்படுத்துகிறது. அவரிடம் பேசியபோது, லதாவின் கவனம், நிறுத்தி வைக்கப்பட்டிருந்த இயந்திரத்தின் மீதும் இருப்பதை காண்கிறேன். தலையை மூடி தாடையின் கீழ் கட்டப்பட்ட வெள்ளை துணி அவரது அகன்ற நெற்றியையும், அதில் இருந்த குங்குமத்தையும், கன்னத்தின் எலும்புகளையும், கருவளையம் விழுந்த கண்களையும் வெளிச்சம் போட்டுக் காட்டுகிறது. லதா உயரமாக இருந்தாலும், பேசும் போதுகூட அவர் வரப்பு மேட்டில் ஏறாமல், ஈரமான வயலில் கணுக்கால் வரையிலான ஆழத்தில் நின்றிருந்தார். அவருக்கு கிட்டத்தட்ட பத்தாண்டுகள் அனுபவம் இருந்தாலும், பச்சை சீருடைக்கும், டிராக்டருக்கும் ஐந்து ஆண்டுகள் மட்டுமே ஆகின்றன.

குடும்பஸ்ரீ மூலம் முதன்முதலில் பசுமை படை குறித்து அறிந்த அவர் ஐந்து ஆண்டுகளுக்கு முன்பு சேர்ந்தார். லதா அப்போது வாழைத் தொழிலாளியாக இருந்தார். புதியவராக பசுமைப் படையில், பதினைந்து நாட்கள் பயிற்சி பெற்றார். வரவூரில், நடவு இயந்திரம் வயலில் நெல் நாற்றுகளை நடுகிறது. ஹேர்பின் வளைவுகளில் நடவு இயந்திரம் திரும்பும் போது லதா ஓடிச் சென்று மீண்டும் நடவு இயந்திரம் பயிர்களை நடவு செய்ய உதவுகிறார். பிற இயந்திரங்களையும் அவர் இயக்குகிறார். அவை அனைத்தும் இரண்டு வார தீவிர பயிற்சியின் விளைவாகும். யார் வேண்டுமானாலும் நிச்சயமாக படையில் சேர்ந்து போதிய பயிற்சி பெற்றதும் வேலை செய்யலாம். பசுமைப்படை தொழிலாளர்கள் மற்றும் விவசாயிகள் இருவரின் ஆர்வத்தையும் ஆராய்ந்து, இயந்திரமயமாக்கப்பட்டவிவசாயத்தில் தொழிலாளர்களின் குழுவை நியமித்து பயிற்சி அளிக்கிறது. பின்னர் அவர்களை களத்திற்கு அனுப்புகிறது. விவசாயிகளின் பங்களிப்பு என்ன? ஏ.டி. மொய்தீன் தொழிலாளர் வங்கியை அணுகி தங்கள் பண்ணை பற்றிய விவரங்களுடன் ரூ .3000 சமர்ப்பிக்க தயாராகினார். முழு பருவத்திற்கும் தேவையான தொழிலாளர்களின் எண்ணிக்கையை பசுமைப் படை கணக்கிட்டது. வடக்கஞ்சேரி வட்டார ஊராட்சி, ராஷ்டிரிய கிரிஷி விக்யான் யோஜனா (RKVY) மற்றும் கிராம ஊராட்சிகளுடன் இணைந்து இயந்திரங்களை வழங்க உதவியது.

இயந்திரமயமாக்கல் ஓரளவு நடந்தாலும், அனுபவம் வாய்ந்த விவசாய தொழிலாளர்களுக்கும் வாய்ப்பளிக்கப்படுகிறது. வயலின் ஒரு பகுதியில் நடவு இயந்திரம் நடவு செய்ய, சில மீட்டர் தூரத்தில் நான்கு பேர் கொண்ட குழுவைச் சேர்ந்த பத்மாவதி தழைக்கூளத்தில் முழங்கால் அளவு பள்ளத்தில் குனிந்தபடி நடந்து செல்கிறார். அவர் பசுமைப் படையில் நான்கு ஆண்டுகளாக பணியாற்றி வருகிறார். இந்த குழுவில் மூன்று மாதங்களுக்கு அவர் வேலை செய்வார். வயல் வரப்பில் விதைகளை தயாராக வைத்திருக்கிறார். அவர் தனது கைகளால் பரபரவென நாற்றுகளை கட்டுகிறார். இயந்திரம் நிரப்பாமல் விடுபடும் துளைகளைக் கண்டறிந்து, அதில் நாற்றுகளை நடுகிறார். இயந்திரத்தின் விடுபடுதல் ஒருபுறம் இருக்க, இயந்திரமயமாக்கல் மோசமான தாக்கத்திற்கு வழிவகுக்கும். தொழில்மயமாக்கலின் உதாரணங்கள், டோக்கியோவின் பங்குச் சந்தை வரலாறு, பணிநீக்கம் போன்ற பல துணை கதைகள் உள்ளன. அதிர்ஷ்டவசமாக, பசுமை படையின் வடிவமைப்பும், செயல்பாடுகளும் இயந்திரமயமாக்கலை முழுவதுமாக நடைமுறைப்படுத்தாமல் பழமைவாத முறையையும் காக்கிறது. இயந்திரங்கள் எப்போதும் இயந்திரங்கள் தான். ஆனால் விவசாயத் தொழிலாளர்களுக்கு இடம் இருக்கும் வரை அவற்றால் பாதிப்பில்லை.

ஏ.டி.மொய்தீனும், கே.பி.மொய்தீனும் வயலின் ஓரத்தில் ஃபிளாஸ்கில் டீ, டம்ளர், அப்பம் போன்றவற்றுடன் நிற்கிற்னர். இந்த பதினைந்து ஏக்கர் நிலத்தை குத்தகைக்கு எடுத்துள்ளனர். ஒரு ஏக்கர் நிலத்தில் நெல் சாகுபடி செய்ய 32 கிலோ விதை நெல் தேவைப்படுகிறது. விளைச்சலில், ஒரு ஏக்கரில் ஒவ்வொரு 10 சென்ட்டுக்கும் 22 கிலோ நில உரிமையாளர்களுக்கு செல்கிறது. அதாவது ஒரு ஏக்கருக்கு 220 கிலோ. இவர்களுக்கு மானிய விலையில் கிலோவுக்கு பதினைந்து பைசா வீதம் வேளாண் அலுவலகத்தில் விதைகள் கிடைக்கின்றன. பசுமைப் படையை நடத்தும் நிறுவனங்களின் குழுமத்தில் வேளாண் அலுவலகமும் இடம்பெற்றுள்ளது. RKVY, உள்ளூர் அரசு அமைப்புகள், வேளாண் தொழில்நுட்ப மேலாண்மை முகமை (அட்மா), வேளாண் துறை, குடும்பஸ்ரீ, திருச்சூர் மாவட்டம் வடக்கஞ்சேரி வட்டம் - இவை முக்கிய பங்குதாரர்களாக குறுக்கும், நெடுக்குமான ஒருங்கிணைப்புகளை மேற்கொள்கின்றன.

கடந்த சீசனில் மொய்தீனுக்கு ரூ.5000 லாபம் கிடைத்தது. இது அதிகபட்சமாகத் தெரிகிறது. ஆனால் அவர் கிடைப்பதை எடுத்துக்கொள்வார். அவருக்கு கூடுதலாக பாதி இயந்திரமயமாக்கப்பட்ட விவசாயம், பயிற்சி பெற்ற தொழிலாளர்கள், நல்ல உற்பத்தி ஆகியவையும் கிடைக்கிறது. "விவசாயத்தில் இயந்திரங்கள் வருவதற்கு முன்பு, ஒரு ஏக்கருக்கு பத்து தொழிலாளர்களை வேலைக்கு அமர்த்த வேண்டும். இப்போது அதே எண்ணிக்கையில் 17 ஏக்கருக்கு சாகுபடி செய்ய முடியும்", என்று லதா கூறினார். அவரும், பத்மாவதி போன்ற பிற பசுமைப்படை பணியாளர்களும் ஒருவித சமூகப் பாதுகாப்பை இதில் பெறுகின்றனர். பதிவு செய்யப்பட்ட, பணியில் சேர்க்கப்பட்ட தொழிலாளர்கள் மாதம் ரூ .8000-12,000 வரை சம்பாதிக்கிறார்கள், அவர்களுக்கான நிலையான ஒப்பந்தங்கள், நிதி ஆகியவை பெரிங்காடு சேவை கூட்டுறவு வங்கியால் நிர்வகிக்கப்படுகின்றன. தினக்கூலி வருமானமாக இருந்தாலும், அரசு இடைத்தரகராக செயல்படுவதால், வழக்கமான நிச்சயமற்ற தன்மை தடுக்கப்படுகிறது. NREGA-வின் 100 நாள் என்ற வரம்பைத் தாண்டி நீண்ட கால திட்டமாக, பசுமை படை செயல்படுகிறது. அதன் தொழிலாளர் வங்கி இன்னும் பெரிய திட்டங்களைக் கொண்டுள்ளது. "கடந்தாண்டு, பத்து மாத வேலைக்கு எங்களால் பணம் செலுத்த முடிந்தது. நாங்கள் 300 நாட்கள் வேலைவாய்ப்பை வழங்க விரும்புகிறோம்," என்று பசுமை படையின் ஒருங்கிணைப்பாளர் அனூப் கிஷோர் கூறுகிறார்.

இந்த திட்டத்திற்கு என சொந்தமாக தொலைநோக்கு பார்வையும் உள்ளது. அனைவரின் கூட்டு ஒருங்கிணைப்பும் சிறப்பாக இருந்தாலும், அவ்வப்போது சில பிணக்குகளும் வருகிறது. "எங்களுக்கு தரமற்ற விதைகள் கிடைத்தன. இதனால் பயிர்கள் செழிக்கவில்லை. எங்களுக்கு இழப்பீடு வேண்டும்," என்று மொய்தீன் மற்றும் மொய்தீன் கூறுகின்றனர். இந்த பருவத்தில் இரண்டு முறை சாகுபடி செய்ய வேண்டியிருந்த ஏழு பேரில் இவர்கள் இருவரும் இடம்பெற்றிருந்தனர். ஆனால் பதினைந்து நாட்கள் தாமதம் ஏற்பட்டது வேதனைக்குரியது. இந்த நெல் விவசாயிகள் நெல் விதைகளை விதைத்த பிறகு சுமார் இரண்டு வாரங்கள் காத்திருக்கும் முறையை கடைபிடிக்கிறார்கள். பச்சை நிறம் தென்பட்டால், துண்டு வெட்டப்பட்டு நடவு இயந்திரத்தில் கொடுக்கப்படும். நேரம் மற்றும் வேலைத் திறனும் ஒன்றுக்கூடினால் எல்லாம் சிறப்பாக நடைபெறும்; விதைகள் தரமில்லை என்றால் தொடக்கத்திலேயே தெரிந்துவிடும்.

ஒட்டுமொத்தமாக பசுமைப்படை வெற்றிக் கண்டுள்ளது. உற்பத்தியும், உற்பத்தித் திறனும் அதிகரித்துள்ளன. தொழிலாளர்கள் ஓரளவு வேலை பெற்றுள்ளனர். விவசாயிகள் தொழிலை விட்டு வெளியேறவில்லை. திட்டத்தின் வெற்றி இதை மீண்டும் தொடர்வதற்கான சாத்தியக்கூறுகள் குறித்த கேள்விகளை எழுப்புகின்றன. எல்லாவற்றிற்கும் மேலாக, கேரளா ஒன்றும் விதிவிலக்கு அல்ல. எதிர் கருத்துகளை தாண்டி ஒரு திட்டத்தை ஊக்குவிப்பதற்கான உந்துதல் மற்றும் கவனமாக தேவைப்படுகிறதா? இன்னும், பசுமை படையின் முன்முயற்சி அரசு தலையீட்டில் ஒரு முன்னுதாரணத்தை வழங்குகிறது. இது ஒரு நம்பிக்கையூட்டும் தொடக்கம்.

* திருச்சூர் மாவட்டம் வடக்கஞ்சேரி வட்டத்தில் தீவிர நெல் சாகுபடி, 12

பசுமைப் படை பற்றிய மேலதிக புகைப்படங்களுக்கும், புகைப்படக்காரரை அறியவும், பேசும் ஆல்பங்களுக்குச் செல்லவும்: http://www.ruralindiaonline.org/albums/the-green-army/

தமிழில்: சவிதா