کھوفی ٹوکریوں کی بُنائی کو بچانے کی جدوجہد

’’ہر انگامی کے لیے یہ جاننا ضروری ہے کہ کھوفی کیسے بُنی جاتی ہے،‘‘ ناگالینڈ کے کھونوما گاؤں میں رہنے والے ۳۹ سالہ ٹوکری بُنکر پیلیسیلی کیوتسو کہتے ہیں۔ زوسا (بانس) اور تھُن یے (بید) کی مدد سے بنائی جانے والی کھوفی دراصل روایتی انگامی ٹوکریاں ہیں، جن کا استعمال جلاون (ایندھن کی لکڑی)، چاول، اناج اور تقریبات سے متعلق سامانوں کو رکھنے کے لیے کیا جاتا ہے۔ ’’ہماری روایات میں اس نے ایک بڑا رول ادا کیا ہے۔ یہ ایسی چیز ہے جس کی قدر ہمیں ہمیشہ کرنی چاہیے،‘‘ وہ مزید کہتے ہیں۔

کسی زمانہ میں کھوفی اس برادری کی حیات و معاش کا ایک اٹوٹ حصہ ہوا کرتی تھی، لیکن آج کھونوما میں اس کی بُنائی کرنے والے ۱۵ سے بھی کم گھر بچے ہیں، جہاں اس کام کو زیادہ تر بزرگ لوگ کرتے ہیں؛ پیلیسیلی اس معاملہ میں ایک استثنا ہیں۔

پچاس سال کی عمر پار کر چکے کیپے کھوٹو تھوؤ بانس کی شہتیروں، لکڑی اور بید کو سوکھی پتیوں سے آپس میں بُن کر تیار کیے گئے ایک جزوی طور پر ڈھکے ہوئے ڈھانچہ کے اندر بیٹھے ہیں اور انتہائی چابک دستی سے تیرھو کی مدھم روشنی میں بانس کی قمچیوں کو چھیل رہے ہیں۔ تیرھو کا سایہ دوپہر میں اندر آنے والی تیز دھوپ کو روکنے کا کام کر رہا ہے۔

’’میں ایک ٹوکری بُننے والے گھر سے آتا ہوں۔ مجھے اور میرے تمام چچا زاد بھائیوں کو کھوفی ٹوکری بننے کا کام گھر میں ہی سکھایا گیا تھا،‘‘ بانس کی قمچیوں پر کام کرتے ہوئے کییپے کہتے ہیں۔

انگامی، ناگالینڈ کے ۱۷ تسلیم شدہ قبیلوں میں سے ایک ہے۔ کھونوما ایک تاریخی مقام ہے، جو ۱۸۰۰ میں برطانوی قبضہ کے خلاف ناگا لوگوں کی مزاحمت کی وجہ سے جانا جاتا ہے۔ یہ ریاست کی راجدھانی کوہیما سے ۲۰ کلومیٹر مغرب کی جانب واقع ہے اور کمیونٹی کی قیادت میں چلنے والے تحفظاتی اقدام کے لیے مشہور ہے، جن میں ارد گرد کے جنگلوں میں جانوروں کے شکار پر پابندی، اور مروجہ نامیاتی کھیتی کے طور طریقے شامل ہیں۔

پہاڑی علاقہ میں ۲۰ مربع کلومیٹر میں پھیلے اس گاؤں میں پتھر سے بنی ہوئی سڑکیں ہیں، چاروں طرف سیڑھی نما دھان کے کھیت نظر آتے ہیں اور روایتی گھروں کے باہر انتہائی سلیقہ سے ایک دوسرے کے اوپر سجا کر رکھی ہوئی ایندھن کی لکڑیاں دیکھنے کو مل جاتی ہیں۔

گاؤں میں ۴۰۰ سے زیادہ انگامی گھر ہیں، جن کی آبادی (مردم شماری ۲۰۱۱ کے مطابق) ۱۹۴۳ ہے۔ یہ لوگ زیادہ تر پتھر نما سیڑھیوں پر دھان کی کھیتی، منتقلی زراعت اور جنگل کی پیداوار حاصل کر کے گزر بسر کرتے ہیں۔ آس پاس کے جنگلات کی حفاظت کمیونٹی کے ذریعہ، خاص کر کھونوما نیچر کنزرویشن اور تراگوپن سینکچری کے توسط سے کی جاتی ہے۔

کیپے کھوٹو کئی نسلوں سے کھوفی ٹوکریاں بناتے آ رہے مردوں کو دیکھ دیکھ کر بڑے ہوئے ہیں۔ یہ کام پوری توجہ کے ساتھ کیا جاتا ہے – رِم کے چاروں طرف مضبوطی سے قمچی کی بُنائی کی جاتی ہے، اور ایک بار جب بُنائی کا کام شروع ہو گیا، تو بُنکر بیچ میں رکتے نہیں ہیں، کیوں کہ ایسا کرنے پر یہ ڈھیلی پڑ سکتی ہے۔

کیپے کھوٹو نے حالانکہ بچپن میں ہی یہ ہنر سیکھ لیا تھا، لیکن انہوں نے اس کی مشق کبھی نہیں کی، بلکہ وہ بید اور بانس اکٹھا کرنے میں اپنی ماں کی مدد کرنے لگے۔ اس کے علاوہ وہ دھان کے کھیتوں میں کام کرتے تھے اور ساتھ ہی کوہیما کے مصروف ترین بازار میں واقع اپنے والدین کی پنساری کی دکان کو چلانے میں ان کی مدد کرتے تھے۔

دو دہائی قبل، جب وہ ۳۰ سال کے ہو گئے تو انہوں نے کھوفی کی بُنائی کو اپنا مستقل پیشہ بنا لیا۔ انہوں نے دیکھا کہ کھونوما میں اس ٹوکری کے بُننے والوں کی تعداد کم ہوتی جا رہی ہے، اس لیے وہ اس جانب متوجہ ہوئے۔ وہ اپنے والد کی وراثت کو جاری رکھنا چاہتے تھے۔ ’’سب کچھ ہاتھ سے بُنا جاتا ہے۔ میرے اجداد اپنے ہاتھوں کا استعمال کرتے تھے اور وہی مجھے بھی سکھایا گیا ہے۔ اس کے علاوہ، کھونوما میں ابھی تک کوئی مشین نہیں بنی ہے، جسے اس کرافٹ کے لیے استعمال کیا جا سکے۔‘‘

کھونوما میں اس بانس (بیمبوسا تُلڈا) کی مضبوطی اور پائداری کی وجہ سے اسے ٹوکری بُننے کے لیے استعمال کیا جاتا ہے۔ اسے چیر کر اس کی اچھی پٹیاں بنائی جا سکتی ہیں، اور پھر انہیں مضبوطی کے ساتھ ٹوکری کی بُنائی میں استعمال کیا جا سکتا ہے، جو کہ پھٹے بغیر بھاری وزن کو برداشت کر لیتی ہیں۔

’’جو لوگ ہم سے ٹوکری خریدتے ہیں، وہ صرف تیار مال کو دیکھتے ہیں، انہیں نہیں معلوم کہ اسے بنانے میں کتنا وقت لگتا ہے،‘‘ ماہر دستکار کیپے کھوٹو کہتے ہیں، جو کھوفی کی گول رِم اور چوکور بنیاد بنانے کے لیے استعمال کی گئی لکڑی یا دھات کے چاروں طرف بانس کی پٹیوں کو مضبوطی سے بُن رہے ہیں۔ وہ داؤ (بڑے بلیڈ والا چاقو) جیسے اوزار استعمال کرتے ہیں، اور ان کے ہاتھ میں ایک موٹا کپڑا بھی ہے، تاکہ وہ اپنی انگلیوں کو کٹنے سے بچا سکیں۔

گاؤں میں برادری کے لیے لگائے گئے تازہ پانی کے نل کی طرف اشارہ کرتے ہوئے کیپے کھوٹو کہتے ہیں، ’’میں سب سے پہلے تیروزو سے پانی لاتا ہوں۔ ہمیں بانس کو تین سے سات دنوں تک پانی میں بھگو کر رکھنا پڑتا ہے۔ اس میں سب سے زیادہ وقت لگتا ہے، آپ کو تب تک انتظار کرنا پڑے گا جب تک کہ بانس پوری طرح ملائم اور لچکدار نہ ہو جائے، تاکہ میں اسے چیر کر پتلی پٹیاں بنا سکوں۔‘‘

چھوٹی ٹوکریوں کو بُننے میں ہفتہ سے ۱۰ دن تک لگ سکتے ہیں، جب کہ بڑی ٹوکریاں ۴۰ دنوں میں تیار ہوتی ہیں۔ تیار ہو جانے کے بعد، ہر ایک ٹوکری میں چوٹی دار کھیلیے (سر کا پٹّہ) لگائی جاتی ہے اور اس کی سطحوں کو ملائم اور سیل بند کرنے کے لیے راکھ اور بید کے بُرادے سے پالش کی جاتی ہے۔ یہ ٹوکریاں تقریباً ۵۰۰۰ سے ۱۵ ہزار روپے میں فروخت ہوتی ہیں۔

کھوفی کی بُنائی سے اتنی کمائی نہیں ہو پاتی، جتنی اس میں محنت اور ہنر لگتا ہے۔ ایک بُنکر مہینہ میں دو سے چار ٹوکریاں ہی بُن سکتا ہے۔ نقل و حمل اور سامان کی لاگت گھٹانے کے بعد، ایک ٹوکری سے اوسط کمائی تقریباً ۱۰۰۰ سے ۱۵۰۰ روپے تک ہی ہوتی ہے۔ اس طرح، کھوفی کی بُنائی سے ایک بُنکر مہینہ میں تقریباً ۴۰۰۰ سے ۶۰۰۰ روپے ہی کما سکتا ہے۔

’’یہ کبھی نہ ختم ہونے والا کام ہے اور ضروری نہیں ہے کہ آپ کی ہمیشہ کمائی ہو ہی۔ اسی لیے بہت سے لوگوں نے یہ کام چھوڑ دیا ہے،‘‘ پیلیسیلی کہتے ہیں، لیکن ’’خود اپنے ہاتھوں سے کچھ بنانے میں جو اطمینان ملتا ہے‘‘ اسے وہ تسلیم کرتے ہیں۔

وہ کوہیما کے بازار میں اپنی فیملی کے ذریعہ کھولی گئی ایک چھوٹی سی پنساری کی دکان پر کام کرتے ہیں۔ وہ بتاتے ہیں کہ کئی بُنکر ایسے ہیں جو کھیتی باڑی اور دہاڑی مزدوری کر کے کماتے ہیں اور خالی وقت میں ٹوکریاں بُنتے ہیں۔

’’پہلے، ہم شہر جاتے تھے اور وہاں دکان کھول کر ٹوکریاں بیچتے تھے۔ اب آرڈر آنے پر ہی بناتے ہیں۔ انگامی لوگ بھی اب اُتنا نہیں خریدتے،‘‘ پیلیسیلی مزید کہتے ہیں۔

روایتی طور پر، انگامی عورتیں اس دستکاری میں اہم رول ادا کرتی تھیں، جو کہ کم نظر آتا تھا۔

’’میں نے ایسی کئی بزرگ عورتوں کو دیکھا ہے جو جنگل جانے کا پلان بناتی تھیں۔ وہ جب آسمان پوری طرح صاف ہوتا تھا، تب وہاں جاتی تھیں، تاکہ اچھی طرح چیزیں تلاش کر سکیں،‘‘ ۲۹ سالہ سینسن پیسی یے کہتی ہیں، جن کی ایک چھوٹی دکان ہے جہاں وہ خشک جنگلی پھول اور گندم کے ڈنٹھل بیچتی ہیں۔ ’’وہ جنگل میں گھنٹوں گزارتی تھیں، اور ہر ایک کونے کو چھانتی تھیں۔ یہ سلسلہ کئی دنوں تک چلتا تھا۔‘‘

عورتیں یہ بھی طے کرتی تھیں کہ ٹوکری کا ڈیزائن کیسا ہو اور اسے کیسے استعمال کیا جائے۔ اس میں چوٹی نما کھیلیے (پٹّہ) لگانے کا مشورہ انہی عورتوں کا تھا، تاکہ کھونوما کی گھماؤدار سڑکوں پر بھاری وزن آسانی سے ڈھویا جا سکے۔

’’انگامی عورتیں جنگل سے خام مال اکٹھا کرتی ہیں اور بانس کو تیار کرنے میں مدد کرتی ہیں۔ وہ بُنائی کا کام نہیں کرتیں۔ کھوفی بنانا عام طور پر مردوں کا کام تصور کیا جاتا ہے،‘‘کیکرونینیو زیڈ بی لیزیتسو کہتی ہیں، جو ایک مدرس ہیں اور یورا اکیڈمی سے جڑی ہوئی ہیں، جو انگامی لوگوں کی مادری زبان، تینیی دائی کو بچانے میں مصروف ہے۔

آج کل، ٹوکری بُننے کے اس عمل میں عورتوں کی حصہ داری کافی کم ہو گئی ہے۔ زیادہ تر اب کھیتی باڑی، گھریلو کاموں پر توجہ کیے ہوئی ہیں یا چھوٹے موٹے سامان، جیسے خمیر شدہ سویابین، ہری مرچ، ادرک اور بانس کی جڑوں سے تیار کی گئی اکھونی چٹنی بیچتی ہیں۔

’’ہم [عورتیں] ہی ان ٹوکریوں کو کھیتوں میں استعمال کرتے ہیں اور انہیں بازار لے جاتے ہیں۔ لیکن، اب بہت سی عورتیں کھوفی استعمال نہیں کرتیں۔ ان کی جگہ پلاسٹک کی تھیلیاں اور اس جیسی دوسری چیزیں استعمال کرنا زیادہ آسان ہو گیا ہے،‘‘ کیکرونینیو کہتی ہیں۔

ان تبدیلیوں کے ساتھ ساتھ، مقامی سطح پر ملنے والے بانس بھی اب آسانی سے دستیاب نہیں ہیں، جس کی وجہ سے لاگت بڑھ گئی ہے۔ ہندوستان میں جنگل کی صورتحال سے متعلق رپورٹ (آئی ایس ایف آر) ۲۰۲۳ کے مطابق، ناگالینڈ میں ۲۰۲۱ سے ۲۰۲۳ کے درمیان بانس کی پیداوار والے رقبہ میں محض ۰۸۴ء۰ فیصد کا ہی اضافہ ہوا ہے۔

کچھ بُنکر پڑوسی ریاست منی پور سے بانس منگواتے ہیں، لیکن یہ مہنگا پڑتا ہے کیوں کہ ڈرائیور زیادہ کرایہ لیتے ہیں، اس لیے کہ گھماؤدار سڑکوں پر بانسوں کو گرنے سے روکنے کے لیے انہیں گاڑی دھیرے دھیرے چلانی پڑتی ہے۔

تازہ بانسوں کا تقریباً ۱۰۰ کلو کا گٹھر، جس کی قیمت تقریباً ۳۰۰۰ روپے ہوتی ہے، اسے ٹرک کے ایک معمولی سے حصہ میں لادا جاتا ہے، جب کہ یہی ٹرک ایک یا دو ٹن دوسرے سامان لاد کر چل سکتا ہے۔ ڈھلائی کی لاگت ساجھا کرنے کے لیے ٹوکری بُنکر اکثر دوسرے مال تیار کرنے والوں کے ساتھ اشتراک کرتے ہیں۔

’’اگر بانس کہیں پاس میں ہی مل جائے، تو یہ آسان اور سستا ہوتا ہے، ورنہ مجھے زیادہ پیسے خرچ کرنے پڑتے ہیں، جو کہ میرے لیے ایک بوجھ بن جاتا ہے،‘‘ پیلیسیلی کہتے ہیں۔

اس کام کی وجہ سے بُنکروں کی صحت پر بھی برا اثر پڑتا ہے۔

’’گھنٹوں تک جھکے رہنے کی وجہ سے میری پیٹھ میں درد رہنے لگا ہے،‘‘ تقریباً پچاس سال کے ایک بُنکر، چھاٹو کیوتسو کہتے ہیں۔ ’’میرے کندھوں میں ہمیشہ درد رہتا ہے اور میری آنکھیں کمزور ہونے لگی ہیں۔ اب توجہ مرکوز رکھنا مشکل ہوتا جا رہا ہے۔ لوگ ہماری محنت کو نہیں دیکھتے۔ وہ ہمارے کام کو بھی نہیں خریدتے۔ اب اس شعبہ میں مزہ باقی نہیں رہا۔‘‘

ہر سال کھوفی بُنکروں کی تعداد گھٹتی جا رہی ہے۔ کیپے کھوٹو جیسے بزرگ بُنکروں کو یاد ہے کہ کیسے انہیں اپنی زندگی کی شروعات میں ہی کھوفی بُننا سکھایا گیا تھا، لیکن اب ایسا نہیں ہوتا۔ نوجوان انگامی اس ہنر کو بالکل بھی نہیں سیکھ رہے ہیں اور شہروں میں محفوظ، تنخواہ والی نوکریاں حاصل کرنے کو ترجیح دیتے ہیں۔ نتیجہ یہ ہے کہ یہ ہنر آہستہ آہستہ ختم ہوتا جا رہا ہے، اور آئندہ اس کی حفاظت کرنے والا کوئی دکھائی نہیں دے رہا ہے۔

ناگالینڈ میں محکمہ فن و ثقافت کی طرف سے تھوڑی بہت مدد آئی ہے، جو ورکشاپ، ہارن بل فیسٹیول میں نمائش اور ناگالینڈ ہینڈ لوم اینڈ ہینڈی کرافٹس ڈیولپمنٹ کارپوریشن (این ایچ ایچ ڈی سی) کے توسط سے چھوٹی مالی مدد کے ذریعہ کھوفی کی بُنائی کو فروغ دینے کی کوشش کر رہا ہے۔

لیکن ٹوکری بُنکروں کا کہنا ہے کہ اس قسم کی مداخلت قلیل مدتی ہے۔ وہ خریداروں کی طرف سے تاخیر سے ہونے والی ادائیگی اور دیگر مسائل کی بات کرتے ہیں۔ انگامی ٹریول گائڈ ویبو ایرالو کا کہنا ہے کہ ٹوکریوں کی مارکیٹنگ میں کئی رکاوٹیں ہیں۔ ’’تیار مال خریداروں تک کیسے پہنچے، اس کو لے کر کئی کمیاں ہیں۔‘‘ وہ بتاتے ہیں کہ کھوفی کی بُنائی کرنے والے ان کے چچازاد بھائیوں کو بھی ایسی ہی مشکلات کا سامنا کرنا پڑ رہا ہے۔

ایسے حالات میں، کھوفی کی بُنائی کو زندہ رکھنے کی ذمہ داری انگامی برادری پر ہی آتی ہے۔ ’’یہ دھیما کام ہے، لیکن یہ ہماری روایت ہے،‘‘ پیلیسیلی کہتے ہیں۔ ’’اس ہنر کے ساتھ ہمارا جذبہ اور شناخت جڑی ہوئی ہے۔‘‘