खोफी के रखवार खोनोमा के अंगामी

“हरेक अंगामी मरद लोगन मन ला खोफी बनाय ला आय चाही,” नागालैंड के खोनोमा गाँव के 39 बछर के कारीगर, पेलेसली जुओत्सो कहिथे. जुसा (बांस) अऊ 'थुन्ये' (बेंत) ले बने खोफी, अंगामी लोगन मन के पारंपरिक टुकना आय, जेन ला वो मन जलावन लकरी, चऊर, लुवाय फसल अऊ पूजा-पाठ के जिनिस रखे बर बउरथें. वो ह बतावत जाथे. “हमर परंपरा मं येकर बनेच बड़े जगा रहे हवय. ये ह अइसने जिनिस आय जेकर हमन ला हमेसा कदर करे ला चाही.”

कभू समाज अऊ जीविका के एक-दूसर के अटूट हिस्सा रहे ‘खोफी बुनई’ आज खोनोमा में 15 ले घलो कम घर मं बांचे हवय, जेन ला खास करके घर के डोकरा सियानेच मन बनाथें: पेलेसली येकर अपवाद आय.

पचास बछर के उमर मं केपे थोटो के हाथ माहिर अऊ सफई ले चलत हवय, जब वो ह ढिबरी अंजोर वाले ‘तेरु’ मं बइठ के बांस के टुकड़ा मन ला छीलत हवय- ये तेरहू बांस, लकरी अऊ बेंत ले बने एक ठन परछी आय, जेन मं सूखा पाना छवाय हवय. ये तेरहू तरी के छांव, मंझनिया के भारी घाम के धाज ला कम कर देथे.

“मंय बांस कारीगर के एक ठन परिवार ले हवंव. मोर चचेरा भाई अऊ मोला, हमन सब्बो ला खोफी टुकना बुने के हुनर सीखाय गे रहिस,” ये बतावत केपे के हाथ बांस के पट्टी मं चलत रहिथे.

अंगामी, नागालैंड के 17 ठन मान्यता प्राप्त जनजाति मन ले एक आय. खोनोमा 1800 के दसक मं अंगरेज मन के कब्जा के खिलाफ नागा विरोध के एक ठन ऐतिहासिक जगा आय. अंगामी गाँव राज के रजधानी कोहिमा के करीबन 7 कोस दूरिहा पच्छिम मं बसे हवय अऊ ये ह समाज के पारंपरिक रित-रिवाज मन ला माने सेती जाने जाथे, जेन मं जंगल मं खेदा मं जाय-आय रुख काटे मं रोक लगाय अऊ जैविक खेती सामिल हवय.

सात कोस के दायरा मं डोंगरी इलाका मं बसे ये गाँव, पथरा ले बने सड़क, सीढ़ीदार धान के खेत अऊ पारंपरिक घर मन के बहिर सलीका ले राखे लकरी मन ले चिन्हे जा सकथे.

400 ले कुछु जियादा अंगामी परिवार वाले ये गाँव – जेकर आबादी 1,943 (जनगणना 2011) हवय – खास करके चट्टान के सीढ़ी वाले खेत मं धान के खेती, झूम खेती अऊ वन उपज ले अपन गुजर-बसर करथे. अपन लकठा के जंगल मन ला बचाय के काम समाज ह खासकर के खोनोमा, प्रकृति संरच्छन अऊ ट्रैगोपन अभयारण्य' के जरिया ले करथे,

केपे ह अंगामी मरद लोगन मन के कतको पीढ़ी ला मगन होक खोफी टुकना बनावत देखके अपन बचपना गुजारे हवय – हरेक लड़ी ला किनारा के चरों डहर कसके बुनई करे जरूरी होथे, अऊ एक बेर बुने सुरु करे के बाद कारीगर पूरा होय तक ले छोड़े नइ सकय, नइ त टुकना ढीला पर जाही.

वइसे वो ह ये हुनर ​​कम उमर मं सीख लेय रहिस, फेर वो ह येला वनाय नइ रहिस. येकर छोड़, वो ह अपन दाई के बेंत अऊ बांस ला संकेले अऊ बेचे मं मदद करे, धान के खेत मं बूता करे, अऊ कोहिमा के चहल-पहल वाले बजार मं अपन दाई-ददा के एक ठन नान-कन किराना दुकान मं हाथ बंटाय जइसने काम करत रहय.

ये ह सिरिफ बीस बछर पहिली के बात आय, जब वो ह 30 बछर के होइस, तब खोफी ओकर पक्का जीविका बन गीस. ये कोती ओकर धियान तब गीस, जब वो ह देखिस के खोनोमा मं बांस कारीगर मन कम होवत जावत हवंय, अऊ वो ह अपन ददा के विरासत ला आगू ले जाय ला चाहत रहिस. “सब्बो कुछु हाथ नले बुने जाथे. मोर पुरखा मन अपन हाथ ले काम करत रहिन, अऊ मोला घलो इही सिखाय गे हवय. येकर छोड़, खोनोमा मं ये कारीगरी बर कोनो सही मसीन घलो नइ ये.”

खोनोमा मं, बुनई बर ‘इंडियन टिम्बर बैम्बू’ ला सबले पहिली काम मं लाय जाथे,काबर के ये भारी मजबूत अऊ लचीला होथे. ये मं पातर-पातर पट्टी बनाय जा सकथे अऊ कसके बुनइ करे जा सकथे. ये ह बगेर टूटे फूटे भारी वजन घलो झेल सकथे.

“जउन लोगन मन हमर समान बिसोय ला आथें, वो मन बस तियार टुकना ला देखथें, फेर वो मन ला ये पता नइ होवय के येला बनाय मं कतक बखत लागथे,” माहिर कारीगर केपे कहिथे. वो ह बांस के पट्टी मन ला लकरी धन लोहा के सांचा के चरों कोती ले कसके बुनत “ खोफी’ के गोल किनारा अऊ स्कोर तल्ला बनाथे. ओकर अऊजार मन ले एक “दाओ’ (चौड़ा पल्ला वाले छुरी) अऊ ऊँगली मन ला कटे ला बचाय बर मोठ कपड़ा के तुकड़ा घलो होथे.

“मंय सबले पहिली ‘तेरुजो’ले पानी लाके सुरु करथों,” केपे कहिथे, जेन ह गाँव के ताजा पानी के सार्वजनिक नल के बात करत हवय. “हमन ला बांस ला तीन दिन तक ले पानी मं फिलो के राखे ला परथे. ये काम मं सबले जियादा बखत लागथे, अऊ तब तक ले अगोरे ला परथे जब तक के बांस अतक कोंवर अऊ लचक वाले न हो जाय के ओकर ले पातर-पातर पट्टी बनाय जा सकय.”

नान-नान टुकना बनाय मं हफ्ता ले 10 दिन लाग जाथे, फेर बड़े टुकना बर 40 दिन तक ले लग सकथे. एक बेर बने के बाद, हरेक टुकना मं एक ठन गुंथे “खेलीये ’(मुड़ी कोती के पट्टी) लगाय जाथे, अऊ ओकर सतह ला चिक्कन अऊ छेदा मन ला तोपे बर राख अऊ बेंत के छीलन ले पलिस करे जाथे. येकर दाम 5,000 ले 15,000 रूपिया होथे.

खोफी बुनई के कमई वो मं लगे मिहनत अऊ हुनर ला नइ दिखावय. एक कारीगर महिना भर मं दू ले चार ठन टुकना बनाय सकथे. एक ठन टुकना ले कुल कमई, जेन मं भाड़ा अऊ समान के खरचा ला निकार देय जाय त, करीबन 1,000 ले 1,500 रूपिया होथे. येकरे सेती, एक झिन कारीगर खोफी बुनई ले महीना मं मुस्किल ले 4,000 ले 6,000 रूपियाच कमा पाथे.

“ये ह कभू नइ सिरेइय्या काम आय अऊ पैसा घलो बखत मं नइ मिलय. ते पायके बेंच अकन लोगन मन येला छोड़ देथें,” पेलेसली कहिथे, जेन ह अपन हाथ ले कुछु बनाय ले ‘जी जुड़ा जाय’ ला जरुर मानथे.

पेलेसली कोहिमा बजार मं अपन परिवार के नान-कन किराना दुकान मं काम करथे. ओकर कहना आय के कतको करीगर खेती धन मजूरी करके दू पइसा जोर लेथें, अऊ ठलहा बखत मं बुनई करथें.

“पहिली हमन शहर जावत रहेन, दुकान लगावत रहेन अऊ टुकना बेचत रहेन. अब सब्बो कुछु पहिली ऑर्डर मिले के बाद होथे. अब तो अंगामी लोगन मन घलो पहिली कस नइ बिसोवंय,” पेलेसली बतावत जाथे.

परंपरागत रूप ले, अंगामी माइलोगन मन के काम ये कला मं जरूरी आय फेर नजर मं नइ आवय

“मंय कतको सियान अंगामी माईलोगन मन ला जंगल जाय बखत बिचार करत देखे हवंव. वो मन साफ़ अकास वाले दिन ला चुनथें, जेकर ले वो मन बढ़िया ढंग ले खोजे सकंय,” 29 बछर के सेंसन पेसिये कहिथे, जेन ह सूक्खा जंगली फूल अऊ गहूँ भूसी/ कुट्टी बेचे के एक ठन नान कन दुकान चलाथे. “वो ह जंगल मं घंटों गुजार देवय, कोनहा-कोनहा छान मारय. ये काम कतको दिन तक ले चल सकथे.”

टुकना के डिज़ाइन अऊ ओकर बउरे के तरीका उपर घलो माईलोगन मन के असर रहिस. खोनामा के घुमावदार सड़क मं भारी बोझा ढोय ला सुभीता बनाय बर, वो मन गुंथाय खेली के सुझाव दे रहिन.

“अंगामी माइलोगन मन जंगल ले बनाय के कच्चा माल (सामान) संकेलके लाथें अऊ बांस बनाय मं मदद करथें. वो मन बुनई के काम नइ करंय. खोफी बनाय अक्सर मरद मन के काम मने जाथे,” किक्रुनेइनुओ जेडबी लेतुत्सु कहिथे, जेन ह उरा एकेडमी के टीचर आय. ये एकेडमी अंगामी लोगन मन के महतारी भाखा, तेन्यिदे ला बचाय मं लगे हवय.

ये बखत, ये काम मं माईलोगन मन के भागीदारी कम होगे हवय. अब कतको माइलोगन मन खेती- बारी, घर के काम बूता धन छूते मोटे जिनिस बेचे मं धियान देथें – जइसने के किण्वित सोयाबीन, मिर्चा, लेसून अऊ करील/बासा ले बने 'एक्सोन चटनी'.

“हमनेच [माइलोगन] आं, जेन मन खेत मं टुकना बऊरथन अऊ वोला बजार मं ले जाथन. फेर अब अधिकतर माईलोगन मन ‘खोफी’ बउरे छोड़त हवन.प्लास्टिक के थैली अऊ दीगर जिनिस काम मं लाय जियादा सुभीता आय,” किक्रुनेइनुओ कहिथे.

कतको बदलाव के संगे संग, इहींचे के बांस मिले घलो मुस्किल होगे हवय, जेकर सेती बनाय के लागत बढ़ गे हवय. ‘इंडिया स्टेट ऑफ़ फ़ॉरेस्ट रिपोर्ट' (आईएसएफआर) 2023के मुताबिक, नागालैंड मं बांस के इलाक मं ले-देके बढ़त देखे गे हवय – 2021 अऊ 2023 के बीच मं ये बढ़त सिरिफ 0.084 फीसदी रहिस.

कुछेक कारीगर अब परोसी राज मणिपुर ले बांस मंगाथें, फेर ये ह महंगा परथे, काबर के गाड़ीवाला जियादा भाड़ा लेथे, काबर के वोला घुमावदार रोड मं गाड़ी धीरे चलाय ला परथे जेकर ले बांस झन टूटय.

करीबन एक क्विंटल (100 किलो) ताजा बांस के बंडल, जेकर दाम करीबन 3,000 रूपिया होथे, ट्रक मं बनेच कम जगा घेरथे: फेर उहिच ट्रक मं अक्सर एज धन दू टन मिले जुले सामान आ जाथे. कारीगर अक्सर संगी कारीगर मन के संग मिलके लाथें जेकर ले भाड़ा बाँट सकंय.

“गर तीर-तखार मं बांस मिल जाथे, त सुभीता होथे अऊ सस्ता परथे. फेर नइ मिलय, त मोला जियादा खरचा करे ला परथे, अऊ ये ह एक ठन अऊ बोझा बं जाथे,” पेलेसली कहिथे.

ये बूता करत कारीगर मन के सेहत उपर घलो खराब असर परथे.

“घंटों मुड़ ओरमा के बूता करे सेती मोर पीठ मं दरद होय ला लगे हवय,” करीबन 40 बछर उमर एक झिन कारीगर छाटो कुओत्सो कहिथे. “मोर खांध हमेसा पीरावत रहिथे अऊ नजर घलो कमजोर होवत जावत हवय. अब चेत धरे घलो मुस्किल होवत जावत हवय. हमर मिहनत के सायदेच कोनो सराहथे. वो मन हमर बनाय जिनिस घलो नइ बिसोवंय. आय ये काम मं पहिली कस मजा नइ ये.”

खोफी कारीगर मन हरेक बछर घटत जावत हवंय. केपे जइसने सियान कारीगर ला सुरता हवय के वोला बचपनाच मं खोफी बुनई सिखाय गे रहिस, फेर आय अइसने नइ ये. अंगामी के नवा पीढ़ी ये हुनर ला सिखेच नइ ये, वो मन सहर मं बढ़िया तनखा वाले नउकरी करे जियादा भाथें. येकरे सेती ये हुनर ह धीरे-धीरे नंदावत जावत हवय, अऊ येला आगू बढ़ेइय्या कोनो घलो साफ नजर नइ आवय.

नागालैंड के कला अऊ संस्कृति विभाग के कुछु मदद मिले हवय, जेन ह कार्यशाला, हॉर्नबिल फेस्टिवल मं प्रदर्सनी अऊ नागालैंड हथकरघा अऊ हस्तशिल्प विकास निगम (एनएचएचडीसी) के जरिया ले छोटे अनुदान देके 'खोफी' बुनई ला बढ़ावा देथे.

फेर कारीगर मं छोट-मोट बिघन, चुकारा मं देरी अऊ दीगर दिक्कत मन के बात करथें. अंगामी ट्रैवल गाइड विबू इरालू बताथें के टुकना मन ला बेचे मं दिक्कत आवत रहिथे. वो ह कहिथे, लेवाल मन तक ले सामान जेन हालत मं पहुँच थे, वो मं कतक कमी हवय,” अऊ वो ह ये घलो बतावत जाथे के ओकर चचेरा भाई-बहिन, जेन ह खोफी बुनथे, वो मन ला घलो अइसने कतको दिक्कत झेले ला परथे.

अइसने कतको बाधा बिघन के बाद घलो, खोफी बुनई ला आगू ले जाय के भार अंगामी समाज उपर हवय. पेलेसाली कहिथे, “ ये ह धीर बूता आय, फेर ये ह हमर परंपरा आय. ये कला के संग हमन अपन बिचार अऊ पहिचान ला आगू ले जाथन.”

अनुवाद: निर्मल कुमार साहू