کانتھا کی مدد سے آسان ہوتی زندگی

ارجینا بی بی کی مغربی بنگال کے شمالی ۲۴ پرگنہ ضلع میں اپنے باپیر باڑی (والد کے گھر) کی سب سے پیاری یادیں ان کی دادی اور ماں سے جڑی ہیں۔ ’’میری کانتھا کی سلائی میں مجھے اپنی دادی کا ویسا ہی ہنر دکھائی دیتا ہے، جیسے وہ ٹانکوں کو پرتوں میں کراس کر کے لگاتی تھیں اور کشیدہ کیے ہوئے پھولوں کو بھرتی تھیں،‘‘ وہ وراثت میں ملے اپنے اس ہنر کے بارے میں کہتی ہیں۔ ’’میں جو کچھ بھی جانتی ہوں، وہ ان کو ہی دیکھ دیکھ کر سیکھا ہے۔ آج بھی میں ویسا ہی کام کرتی ہوں جیسا وہ کرتی تھیں،‘‘ ارجینا مزید کہتی ہیں۔

تقریباً تین دہائی سے کانتھا کشیدہ کاری کرتی آ رہیں ارجینا کہتی ہیں کہ اس ہنر نے انہیں اپنی فیملی کی مالی حالت کو بہتر کرنے کے قابل بنایا ہے۔ اب چالیس سال کی عمر کے اواخر میں، وہ چھ خواتین پر مشتمل کانتھا کاریگروں کے گروپ کی قیادت کر رہی ہیں جنہیں مقامی تاجروں سے کام ملتا ہے۔

ہم ارجینا سے جولائی کی ایک گرم دوپہر کو، مغربی بنگال کے شمالی ۲۴ پرگنہ ضلع کے باراسات شہر کے باہری علاقہ میں ان کی پڑوسن اور ساتھ کام کرنے والی نور نہار بی بی کے گھر کے دیوان خانہ میں بنے ان کے عارضی کارخانہ (ورکشاپ) میں ملتے ہیں، جہاں دھاگوں کے ڈبے، قینچی اور ٹریسنگ پیپر بکھڑے پڑے ہیں۔ یہ عورتیں کپڑوں پر کانتھا کی خاص رننگ اسٹچ سے کشیدہ کاری کر رہی ہیں۔

’’میرے والد کانتھا سے متعلق سامان کے سپلائر ہیں،‘‘ ۳۵ سالہ نور نہار بتاتی ہیں۔ ’’میں کڑھائی کا کچھ کام کر کے ان کی مدد کرتی ہوں۔‘‘ ان کے شوہر محمد جلال الدین (۴۳) اور ان کا خاندان تین نسلوں سے کانتھا کے کاروبار سے جڑا ہوا ہے۔ ’’وہ بھی ایک ماہر کانتھا کاریگر ہیں اور بہت اچھی کشیدہ کاری کرتے ہیں،‘‘ نور نہار مسکراتے ہوئے کہتی ہیں۔

پاس ہی کھڑے جلال الدین کو چھیڑتے ہوئے ارجینا کہتی ہیں، ’’میئیرا بیشی بھالو بنائے، کیونو کہ آمرا مون دیئے شکیچی، آر مون دیئے کانتھا بنائی۔ چھیلیئرا تو ایئی شوب کے کاج مینے چولے [عورتیں بہتر کانتھا بناتی ہیں، کیوں کہ اس دستکاری سے ہمارا جذباتی رشتہ ہوتا ہے۔ مرد اسے صرف پیشہ مانتے ہیں]۔‘‘

’’میرے شوہر قصائی کا کام کرتے ہیں۔ شادی کے ابتدائی دنوں میں وہ ماہانہ تقریباً ۸۰۰ روپے کماتے تھے،‘‘ ارجینا کہتی ہیں۔ ’’لیکن میں اپنے ہنر کا استعمال کرنا چاہتی تھی اور اپنی کمائی خود کرنا چاہتی تھی۔‘‘

ارجینا کو یاد ہے کہ وہ چھوٹی عمر میں اپنی ماں کی مدد کرتی تھیں۔ جب انہوں نے کانتھا کا کام سیکھنا شروع کیا، وہ پرانے کپڑوں سے دھاگے اُدھیڑتی تھیں – پہلے ہاتھ سے اور پھر سوئی سے۔ ان باریک دھاگوں کا استعمال پرانے کپڑوں کو کانتھا پھور – جو ایک خاص قسم کی رننگ اسٹچ (سیدھی سلائی) ہے، سے جوڑ کر چادر، رضائی اور میز پوش بنانے میں کیا جاتا تھا۔

’’میری ماں ہمیں کبھی بھی پرانی ساڑیاں اور دھوتی پھینکنے نہیں دیتی تھیں،‘‘ ارجینا بتاتی ہیں۔ انہیں دوبارہ استعمال میں لانے سے نہ صرف ماں کا انفرادی انداز ان ’نئے‘ گھریلو سامانوں میں شامل ہو جاتا تھا، بلکہ مالی مشکلات میں گھر کا کچھ بوجھ بھی کم ہوتا تھا۔ ’’مجھے کبھی محسوس نہیں ہوا کہ بچپن میں ہمیں کسی چیز کی کمی تھی،‘‘ وہ کہتی ہیں۔

اس لیے جب ارجینا ۳۰ سال پہلے شادی کے بعد گوما گاؤں سے باراسات آئیں، تو اپنے پڑوس کی عورتوں اور جلال الدین جیسے مقامی کپڑا سپلائز کی مدد سے بنائے جا رہے کانتھا کاریگروں کے گروپ کے ساتھ جڑ گئیں۔

اٹھائیس سال بعد آج ارجینا اپنے تجربے اور مہارت کی بنیاد پر پورے گروپ کی سربراہ ہیں۔

’’کانتھا مصنوعات کے تاجر ۶ سے ۸ ممبران پر مبنی گروپ میں شامل کاریگروں کو کام دیتے ہیں،‘‘ ارجینا بتاتی ہیں۔ گروپ کو ملا کام پھر ممبران میں تقسیم کر دیا جاتا ہے۔

ارجینا کے گروپ کو ہر مہینے ۳۰-۳۵ آرڈر ملتے ہیں۔ ’’ہم ایک ڈیزائن کی کئی شکلیں بنا کر نمونہ کے طور پر سپلائرز کو دکھاتے ہیں،‘‘ وہ کہتی ہیں۔ ہر کام کے لیے سپلائرز حتمی ڈیزائن، کپڑا، دو تاگے والا دھاگہ اور دیگر سامان دیتے ہیں۔ کاریگر ٹریسنگ پیپر پر ڈیزائن بناتے ہیں اور کشیدہ کاری کے دوران اسے دیکھتے ہیں۔ وہ عام طور پر جیکٹ، سوٹ، ساڑیوں یا رضائیوں پر کام کرتی ہیں۔ کپڑوں میں سوتی، ریشم، کھادی اور آرگینزا کا استعمال ہوتا ہے۔

دُرگا پوجا کے دوران آرڈر بڑھ کر ۴۰-۴۵ ہو جاتے ہیں۔ ’’اس دوران مانگ بہت زیادہ رہتی ہے، اس لیے کئی کاریگر گروپ میں شامل ہو جاتے ہیں،‘‘ جلال الدین بتاتے ہیں، جو ارجینا کے گروپ کے سب سے بڑے سپلائر ہیں۔ وہ خام مال لینے اور تیار مال جمع کرنے کے لیے ہر مہینہ کئی بار کولکاتا اور باراسات جاتے ہیں۔ ایک کاریگر اور سپلائر کے طور پر وہ ماہانہ ۴۰ سے ۵۰ ہزار روپے کماتے ہیں۔

ہر ایک کاریگر کی آمدنی اس کی کشیدہ کاری کی باریکی، کپڑے کی لمبائی اور ڈیزائن کی پیچیدگی پر منحصر ہوتی ہے۔ ارجینا کے گروپ کے ممبران کی اوسط ماہانہ آمدنی ۸ سے ۱۰ ہزار روپے ہے۔ گروپ کی سربراہ ہونے کے ناطے ارجینا ۱۰ سے ۱۲ ہزار روپے پاتی ہیں۔ اس کے علاوہ، وہ الگ سے بھی کچھ ٹکڑے بناتی ہیں جس سے انہیں ہر مہینے ۲-۳ ہزار روپے مزید ملتے ہیں۔ انہیں فروخت کرنے میں جلال الدین اکثر نمائشوں اور میلوں میں ان کی مدد کرتے ہیں۔

اس سے ارجینا اپنی فیملی کی مالی حالت میں اہم تعاون فراہم کر پاتی ہیں۔ وہ اپنے شوہر اور بیٹے کی فیملی کے ساتھ سات رکنی گھر میں رہتی ہیں۔ شوہر اور بیٹا دونوں ہی اپنی قصائی کی دکان پر کام کرتے ہیں اور دونوں مل کر تقریباً ۲۵ ہزار روپے ماہانہ کماتے ہیں۔

’’کانتھا اب صرف ایک عام سیڑھی سلائی سے کہیں زیادہ بن چکا ہے،‘‘ ارجینا کہتی ہیں۔

گزشتہ چند دہائیوں میں کانتھا مصنوعات کی مانگ میں تیزی سے اضافہ ہوا ہے۔ اس میں کوئی شک نہیں کہ اس کا کچھ کریڈٹ کانتھا کے ’ری پرپزنگ‘ پہلو کو بھی جاتا ہے، جو آج کل کے فیشن میں خاصا مقبول ہے۔

مین اسٹریم کے تجارتی برانڈ بھی ’دوبارہ استعمال کیے جانے والے‘ فیشن کو فروغ دیتے ہیں۔

سال ۲۰۰۸ میں مغربی بنگال کی کانتھا کشیدہ کاری کی دو مقبول شکلوں میں سے ایک نقشی کانتھا کو جغرافیائی نشان کا (جی آئی) ٹیگ دیا گیا۔ دوسری شکل کو پار تولا کہا جاتا ہے۔

نقشی شکل قدرت سے اخذ کی جاتی ہے – جس میں پھول، جانور، یہاں تک کہ انسانی شکلوں کی بھی سلائی کی جاتی ہے۔ دوسری جانب پار تولا میں ہندسی شکلیں ہوتی ہیں۔ ’’نقشی زیادہ تر ہندو عورتوں کے ذریعہ کی جاتی تھی، کیوں کہ اسلام میں جانداروں کی شکلوں کی نقل کرنا منع ہے۔ مسلم عورتیں پار تولا میں مہارت رکھتی تھیں،‘‘ ارجینا بتاتی ہیں۔ ’’اب ایسا کوئی فرق نہیں رہا،‘‘ وہ کہتی ہیں، ’’ہم کانتھا کی تمام قسموں کو جانتے اور کرتے ہیں، تاکہ مناسب مقدار میں کام ملتا رہے۔‘‘

’’اتنا پیچیدہ ڈیزائن پورا کرنے میں مجھے ایک مہینہ سے زیادہ وقت لگتا ہے،‘‘ ارجینا ایک ساڑی کی طرف اشارہ کرتے ہوئے کہتی ہیں، جسے بنانے پر انہیں ۲-۳ ہزار روپے ملیں گے۔ وہی ساڑی بازار میں کم از کم ۱۰ ہزار روپے میں فروخت ہوگی۔ لیکن ارجینا کہتی ہیں کہ ان کے جیسے کاریگروں کو منافع کا مناسب حصہ نہیں ملتا۔ ’’مانگ بڑھنے کے باوجود، ہم کاریگروں کا فائدہ بہت کم ہے۔‘‘

ارجینا ہر دن تقریباً ۴ گھنٹے کانتھا پر کام کرتی ہیں۔ ’’ہم عورتوں کو گھر بھی سنبھالنا ہوتا ہے،‘‘ وہ کہتی ہیں۔ ’’میں جلال الدین کے ساتھ آس پاس کے قصبوں یا شہر کے مرکز میں بھی جاتی ہوں۔ میں مصنوعات فروشوں سے بات کرتی ہوں، انہیں تیار کام دیتی ہوں، نئے آرڈر اور سامان لاتی ہوں اور کاریگروں کے لیے پیسے بھی لیتی ہوں،‘‘ اپنی اضافی ذمہ داریوں کے بارے میں بتاتے ہوئے وہ کہتی ہیں۔

’’لیکن مجھے یہ سب کارآمد لگتا ہے،‘‘ ارجینا کہتی ہیں۔ ’’مجھے اپنا کام بہت پسند ہے اور اس ہنر نے میری فیملی کو مشکل گھڑی میں سنبھالا ہے۔‘‘

کانتھا سے اپنی گہری وابستگی کے باوجود، وہ اپنے پوتے پوتیوں کو یہ کام کرنے کے لیے آمادہ نہیں کرنا چاہتیں۔ ’’میری آمدنی طے نہیں ہے اور کانتھا مصنوعات کی مانگ پر منحصر ہے، جو بدلتی رہتی ہے،‘‘ ارجینا سمجھاتی ہیں۔ ’’میں چاہتی ہوں کہ میرے پوتے پوتیاں تعلیم حاصل کریں اور سرکاری نوکری جیسی مستقل نوکری پائیں۔‘‘

ارجینا کے پاس بیٹھ کر کام کر رہیں نور نہار بھی ان سے اتفاق کرتے ہوئے سر ہلاتی ہیں۔ ’’یہ ایک ہنر ہے جو میں نے اپنی ماں سے سیکھا ہے، لیکن میں اسے اپنی بیٹیوں کو سکھانے سے جھجکتی ہوں،‘‘ تین بیٹیوں کی ماں نور نہار کہتی ہیں۔ ’’میں چاہتی ہوں کہ وہ اپنی تعلیم پر توجہ دیں، تاکہ وہ اپنے لیے بہتر زندگی بنا سکیں۔‘‘ نور نہار خود ہائی اسکول پاس ہیں۔

حالانکہ، اپنے گھروں میں اس ہنر کو آگے بڑھانے میں انہیں جھجک ہے، نور نہار اور ارجینا نہیں چاہتیں کہ کانتھا ختم ہو جائے۔ جاپانی سیاحوں کی تصویریں دکھاتے ہوئے نور نہار کہتی ہیں، ’’اچھا لگتا ہے کہ ہمارے ہنر کی تعریف ہمارے ثقافتی دائرہ کے باہر کے لوگ بھی کرتے ہیں۔‘‘ دونوں خواتین ریاستی حکومت کی کوششوں، میلوں، بین الاقوامی برآمدات اور غیر ملکی سیاحوں کے گروپ کے ذریعہ کانتھا کو مل رہی مقبولیت کی تعریف کرتی ہیں۔

’’ہمارے جانے کے بہت بعد بھی، امید ہے کہ کوئی اس ہنر کو آگے بڑھاتا رہے گا اور ہمارے علم و ہنر کو زندہ رکھے گا،‘‘ نور نہار کہتی ہیں۔

ترجمہ نگار: قمر صدیقی