कांथा कोनो मामूली सिलाई भर नो हे’

पश्चिम बंगाल के उत्तरी 24 परगना जिला के अरजीना बीबी की अपन बापेर बाड़ी (ददा के घर/ मायका) के सबले मयारू सुरता ओकर दाई अऊ ममादाई (नानी) ले जुड़े हवंय. पुरखौती ले मिले सुई के हुनर ला लेके वो ह कहिथे, “ मोर ममदाई के तरीका मोर कांथा (कथरी) के काम मं झलकथे- जेन किसम ले वो ह एक दूसर के उपर ले टांका लगावत रहिस अऊ कढ़ाई वाले फूल भरत रहिस.” अरजीना बतावत जाथे, “मंय जउन घलो कुछु जनत हवंव, वोला देख के सीखे हवंव. मंय अभू घलो वइसनेच सिलाई करत हवंव जइसने वो ह करत रहिस.”

बीते 30 बछर ले कांथा काढ़ाई करत चले आवत अरजीना कहिथे के ये हुनर ह वोला अपन परिवार के आमदनी मं बनेच मदद करे हवय. अब वो ह करीबन चालीस बछर के हवय अऊ छै कांथा कारीगर मन के एक ठन मंडली के मुखिया आय, जेन ला लोकल बेपारी मन काम देथें.

पश्चिम बंगाल के उत्तरी 24 परगना जिला के बारासात शहर के बहिर इलाका मं जुलाई के मंझनिया रहिस, जब हमन अ अरजीना ले ओकर काम करे के जगा मं मिले रहेन. ओकर परोसिन अऊ संग मं काम करेइय्या नूरानाहर बीबी के बैठकी खोली मं बने एक ठन कामचलाऊ कारखाना (वर्कशॉप) मं धागा, कैंची अऊ ट्रेसिंग पेपर के डब्बा मन बगरे परे हवंय. माइलोगन मन कांथा हस्तकला के खास टांका ले कपड़ा मन के उपर कढ़ाई करत हवंय.

35 बछर के नूरानाहर कहिथे, “मोर घरवाला कांथा सामान के डिस्ट्रीब्यूटर के काम करथे. मंय कढ़ाई के कुछु काम करके ओकर मदद करथों.” ओकर घरवाला 43 बछर के मोहम्मद जलालुद्दीन अऊ ओकर परिवार तीन पुस्त ले कांथा के काम मं लगे हवंय. नूरानाहर हांसत कहिथे, “ वो ह माहिर कांथा कारीगर आय अऊ कढ़ाई मं भारी बढ़िया हवय.”

लकठा मं ठाढ़े जलालुद्दीन ला चिढ़ावत अरजीना कहिथे, “मेये’रा बेशी भालो बनाए, क्येनो कि आमरा मोन दिए शिकेची, आर मोन दिए कांथा बनायी. छेले’रा तो एई शोब के काज मेने चोले [माइलोगन मन सबले बढ़िया कांथा सिलथें, काबर के ये कला ले हमन मन जुड़े हवय. मरद लोगन मन सिरिफ कारोबार के रूप मं देखथें].”

अरजीना कहिथे, “मोर घरवाला कसाई के काम करथे. हमर बिहाव के सुरु के बखत मं, वो ह हरेक महीना करीबन 800 रूपिया कमावत रहिस. फेर मंय अपन हुनर ले कमई करे ला चाहत हवंव.”

अरजीना ला सुरता हवय जब वो ह लइका रहिस त वो ह जुन्ना कपड़ा मन ले धागा निकारे मं अपन दाई के हाथ बंटावत रहिस अऊ जब वो ह कांथा बनाय सीखे सुरु करिस त सुई ले काम करत रहिस. ये बारीक धागा मन ला जुन्ना कपड़ा मन के कांथा फोर बांधे बर काम मं लाय जावत रहिस – ये ह खास किसम के सिलाई होथे, जेकर ले बांचे कपड़ा ले चद्दर, रजाई अऊ टेबिल कवर बनत रहिस जेन ला परिवार ह घर मं बउरत रहिस.

अरजीना कहिथे, “मोर दाई हमन ला अपन जुन्ना लुगरा अऊ धोती ला नइ फेंके देवत रहिस.” वोला फिर ले काम मं लाय ले न सिरिफ घर के ‘नवा’ जिनिस मं दाई के अपन तरीका आ जावय, फेर तंगी बखत, दिक्कत घलो कम होवत रहिस. अरजीना कहिथे, “मोला कभू नइ लगिस के बचपना मं हमन ला कोनो जिनिस के कमी रहिस.”

येकरे सेती जब वो ह 30 बछर पहिली, बिहाव के बाद अरजीना गूमा गाँव ले बारासात आइस, त वो ह कांथा कारीगर मन के एक ठन मंडली मं सामिल होगे, जेन ला ओकर परोस के माइलोगन मन जलालुद्दीन जइसने लोकल कपड़ा डिस्ट्रीब्यूटर के मदद ले बनावत रहिन.

अट्ठाईस बछर बाद, अब अरजीना सबले सियान होय अऊ हुनर के मुताबिक मंडली के मुखियाई करत हवय.

अरजीना बताथे, “कांथा सामान के डिस्ट्रीब्यूटर 6-8 लोगन मन के टोली मं कारीगर मन ला काम मं राखथें.” मंडली ला मिले काम ओकर सदस्य मन ला बांटे जाथे.

अरजीना के मंडली ला हरेक महीना 30-35 ऑर्डर मिलथे. अरजीना कहिथे, “हमन डिस्ट्रीब्यूटर बर सैंपल के रूप मं कतको किसम के डिजाइन बनाथन.” कमीशन वाले काम के संग, मेंबर मन ला डिस्ट्रीब्यूटर ला फाइनल डिजाइन, फ़ैब्रिक, दो-प्लाई धागा अऊ सिलाई के दूसर सामान मिलथे. कारीगर ट्रेसिंग पेपर मं डिजाइन बनाथे, अऊ कढ़ाई करे बखत येला काम मं लाथें. वो मन अक्सर जैकेट, सूट सेट, साड़ी धन रजाई के काम करथें. वो मन कॉटन, सिल्क, खादी अऊ आरगेंजा जइसने फ़ैब्रिक काम मं लाथें.

दुर्गा पूजा तिहार के बखत हरेक महीना आर्डर बढ़के 40-45 कमीशन हो जाथे. जलालुद्दीन, जेन ह अरजीना के कारीगर मन के मंडली संग काम करेइय्या माई डिस्ट्रीब्यूटर आंय, कहिथें, “जियादा डिमांड पूरा करे बर ये बखत कतको कारीगर मंडली मं काम करथें.” वो ह आर्डर बर कच्चा माल लेगे अऊ अर जिनिस ला देगे बर हरेक महीना कुछ बेर कोलकाता अऊ बारासात शहर जाथे. वो ह कांथा सामान बनाय अऊ डिस्ट्रीब्यूटर के रूप मं हरेक महीना 40,000 ले 50,000 रूपिया कमाथे.

हरेक कारीगर मन के कमई अपन कढ़ाई के सफाई, जिनिस के लंबाई अऊ डिजाइन मं काम के मुताबिक अलग-अलग होथे. अरजीना के मंडली के सदस्य मन के औसतन महीना के कमई 8,000-10,000 रूपिया हवय.मंडली के मुखिया कारीगर के रूप मं, अरजीना 10,000 ले 12,000 रुपिया कमाथे. वो ह हरेक महीना 2,000 ले 3, 000 रूपिया उपराहा घलो कमा लेथे, अऊ अक्सर ये जिनिस मन ला प्रदर्सनी अऊ मेला मन मं बेचे बर जलालुद्दीन के मदद लेथे.

येकर ले अरजीना ला अपन परिवार के आमदनी मं भारी मदद मिलथे. वो ह अपन घरवाला अऊ बेटा के परिवार के सात परानी के घर मं रहिथे. दूनों मरद लोगन मन अपन कसाई के दुकान मं काम करथें, जेकर ले वो मन ला महीना मं 25,000 रूपिया ले थोकन जियादा आमदनी हो जाथे.

अरजीना कहिथे, “कांथा सधारन सिलई ले कहूँ जियादा बन चुके हवय.”

बीते कुछेक दसक मं कांथा जिनिस मन के लेवाली बढ़े हवय. ये मं कोनो दू मत नइ ये के येकर वजह ये हस्तकला के ‘फिर ले काम मं लाय’ के बात आय- जेन ह ये बखत भारी चलन मं हवय.

नामी कारोबारी ब्रांड घलो ‘फिर ले बने’ फैशन ला बढ़ावा देथें.

साल 2008 मं, पश्चिम बंगाल के नक्शी कांथा ला जियोग्राफिकल इंडिकेशन (जीआई) टैग देय गे रहिस, जेन ह कांथा कढ़ाई के दू ठन भारी चलन के शैली ले एक ठन आय. दीगर शैली ला पार तोला कहे जाथे.

नक्शी शैली मं प्रकृति के असर रहिथे – फूल, जानवर, इहाँ के तक के मइनखे के रूप घलो. दूसरी कोती, पार तोला मं ज्योमेट्रिक आकार (गणित के चिन्हा धन, रिन, गुना, भाग जइसने) होथे. अरजीना बताथे,”नक्शी अधिकतर हिंदू माइलोगन मन करत रहिन काबर के इस्लाम मं जीव-जन्तु के नकल (मूर्ति) करे मना आय. मुस्लिम माईलोगन मन पार तोला मं माहिर रहिन.’ वो ह आगू बताथे, “ अब अइसने कोनो फरक नइ ये, हमन कांथा के सब्बो शैली ला जानथन अऊ करथन जेकर ले काम मिल सकय.”

अरजीना कहिथे, “अतक मुस्किल डिजाइन ला पूरा करे मं मोला महीना भर ले जियादा लग जाथे.” वो ह एक ठन लुगरा कोती आरो करथे जेन ला वो ह करे रहिस अऊ येकर ले वोला 2,000-3000 रूपिया मिलही. इहीच जिनिस ह बजार मं कम से कम 10,000 रूपिया मं बिकाही, फेर अरजीना कहिथे के ओकर जइसने कारीगर मन ला मुनाफा के सही हिस्सा नइ मिलय. “ लेवाली बढ़े के बाद घलो, हम कारीगर मन बर मुनाफा के मार्जिन कम हवय.”

अरजीना हरेक दिन 4 घंटा कांथा के काम करथे. वो ह कहिथे, “ हम माइलोगन मन ला अपन परिवार के घलो धियान रखे ला होथे.” अपन मंडली के मुखिया गरिग्र के रूप मं अपन उपराहा जिम्मेवारी मन ला बतावत अर्जीना कहिथे, “मंय जलालुद्दीन के संग लकठा के कस्बा धन सिटी सेंटर मं घलो जाथे. मंय दुकानदार मन ले गोठ-बात करथों, तियार समान मन ला देथों, नवा आर्डर अऊ जानकारी लेथों, अऊ करोग्र मन के चुकारा बर वसूली करथों.”

अरजीना कहिथे, “[फेर] मोला ये सब्बो काम के लागथे. मोला अपन काम भाथे अऊ ये कला ह मोर परिवार ला तंगी मं सहारा दे हवय.”

ये हुनर ले मया होय के बाद घलो, वो नइ चाहय के ओकर पोता-पोती मन येला करेंय. अरजीना बताथे, “ मोर आमदनी बंधे नइ ये अऊ कांथा जिनिस के लेवाली उपर रहिथे जेन ह बदलत रहिथे. मंय चाहत हवं के मोर पोता-पोती मन पढ़े लिखें अऊ वो मन ला कोनो सरकारी नऊकरी मिलय.”

अर्जुन के बगल मं काम करत नूरानाहर राजी होवत मुड़ हिलाथे. तीन झिन नान नान नोनी मन के महतारी, वो ह कहिथे, “भलेच ये ह एक ठन हुनर आय जेन ला मंय अपन महतारी ले सीखे हवं, फेर मंय येला अपन बेटी मन ला सिखाय मं हिचकत हवं. मंय चाहत हवं के वो मन अपन पढ़ई उपर धियान देवंय जेकर ले वो मन अपन जिनगी बढ़िया गुजार सकेंय.” नूरानाहर खुदेच हाईस्कूल पास हवय.

अपन परिवार मं ये हुनर ला आगू बढ़ाय मं झझके के बाद घलो, नूरानाहर अऊ अरजीना नइ चाहंय के कांथा नंदा जावय. अपन कारखाना मं अवेइय्या जापानी टूरिस्ट मन के फोटू मन ला दिखावत, नूरानाहर कहिथे, “ ये जानके मोर मन खुस हो जाथे के हमर हुनर ला हमर संस्कृति के बहिर के लोगन मन घलो सराहथें.” दूनों माईलोगन मन मेला मन मं, बिदेस मं भेजे अऊ विदेशी टूर ग्रुप के जरिया ले कांथा ला बढ़ावा देय के राज सरकार के उदिम ला सराहथें.

नूरानाहर कहिथे, “ हमर नइ रहे के बनेच बखत बाद घलो मोला आस हवय के ये हुनर ला सीखेइय्या कोनो न कोनो हमर गियान अऊ हुनर ला आगू बढ़ावत ले जाही.”

अनुवाद: निर्मल कुमार साहू