कांथा खाली सियनी ना ह

पच्छिम बंगाल के उत्तरी 24 परगना जिला के अपना बापर बाड़ी (बाप के घर) में रहे वाली अरजीना बीबी के सबसे मीठ इयाद उनकर माई औरी आजी के बा. उ कहेली, “हमरा आपन ढंग में आजी के कांथा के काम लउकेला- उ जे तरे- उपरी काट के सीयस औरी कढाई वाला फूल भरस.” अरजीना आगे कहेली, “हम जौन जानेनी, उनहीं के देख के सिखले बानी. हम अभियो ओही तरे सियेनी जइसे ऊ कारस.”

पछिला तीस बरीस से कांथा के काम कर रहल अरजीना कहेली कि उ अपना इ गुन से अपना परिवार के पइसा से बहुत मदद कईले बाड़ी. अब उ चालीस बरीस के लगे बाड़ी. छह गो पूरा तरे से महिला कांथा कारीगर के अगुअई करेली, जेकरा के लगे के बैपारी लोग काम देला.

पच्छिम बंगाल के उत्तरी 2 परगना जिला के बारासात सहर के बहिरौठी इलाका में इ जुलाई के एगो उमसत दोपहरिया ह. जब हमनी अरजीना से उनकर काम के जगह प भेंट कईनी. उनकर पड़ोसिया औरी साथी कार करे वाली नूरानाहर बीबी के बईठका में एगो कामचलाऊ कारखाना बनल बा, जहां कैंची, धागा औरी ट्रेसिंग कागज के डिब्बा चितायिल बा. महिला लोग कांथा कढ़ाई के खास टांका से कपड़ा प कढ़ाई करता लोग.

35 साल के नूरानाहर कहेली, “हमार मरद कांथा कढाई के बितरक हवन. हम कढाई के कुछ कार क के उनकरो मदद करेनी.” उनकर मरद मोहम्मद जलालुद्दीन 43 बारिस. औरी उनकर परिवार के तीन पुस्त कांथा के कार में लागल बा. नूरानाहर तनियक मुस्किया के कहली, “उ एगो माहिर कांथा कारीगर हवन औरी कढाई में बहुत नीमन बाड़न.

लगे खड़ियाययिल जलालुद्दीन के चिढ़ावत अरजीना कहली, “मेयेरा बेशि भालो बानाय, केनो कि आमरा मन दिये शिखेछि, आर मन दिये कांथा बानाइ. छेलेरा तो एइ सब के काज मेने चले. (मेहरारू कुल नीमन कांथा सीएली. काहे से कि हमनी मन से सीखेनी औरी मन से कांथा बनावेनी. मरद लोग एकरा के खाली बैपार जइसन देखेला).”

अरजीना कहेली, “हमार मरद कसाई के कार करेलन. हमरा बियाह के सुरु के दिन में उ हर महीना लमसम 800 रोपया कमा लेस. बाकिर हम अपना हुनर के कमाई से गुजारा करे के चाहत रहनी.”

अरजीना के मन परेला कि जब उ छोट रहली त अपना माई के सहायता से पुरान कपड़ा से डोरा निकालस. जब छोट रहली त हाथ से फेर जब कांथा बनावे के सिखली त सुई से. इ मेंही डोरा के इस्तेमाल फेर पुरान कपड़ा के ‘कांथा फोर’ से बान्हे खातिर कईल जाय- इ एगो खास तरे के सियनी होखे जौना में उबरल कपड़ा- लत्ता से चादर, रजाई औरी मेजपोस बने परिवार खातिर.

अरजीना कहेली, “हमार माई हमनी के आपन पुरान साड़ी औरी धोती बीगे ना देस.” ओकरा दुबारा इस्तेमाल से ना खाली घर के ‘नया’ चीज में माई के आपन ढंग आ जाए, बलुक जब रोपया के मस्किल होखे त एसे परेसानियो कम हो जाए. अरजीना कहेली, “एगो सयान लईकी के समझ प हमरा कब्बो ना बुझाइल कि हमनी के कौनो चीज के कमी बा.”

एहीसे जब अरजीना 30 साल पहिले बियाह के बाद गुमा गांव से बारासात अईली, त उ कांथा कारीगर लोग के एगो गोल (समूह) में आ गईली. जौना में उनकर पड़ोस के मेहरारू लोग जलालुद्दीन जइसन अपना लगहीं के लुग्गा-कपड़ा बितरक के मदद से बनावत रहे.

अठठ्टाइस साल बाद, अब अरजीना बढ़ भयिला गुने औरी अपना गुन के चलते अपना गोल के अगुअई करतारी.

अरजीना बतावेली, “कांथा वाला बितरक 6-8 जना कारीगर के गोल के काम प राखेला.” गोल के दहल काम फेर कारीगर लोग में बांट दहल जाला.

अरजीना के गोल के हर महीना 30-35 ऑर्डर मिल जाला. उ कहेली, “हमनी बितरक के चुने खातिर नमूना जइसन कई गो डिजाइन बनावेनी.” हर कमीसन वाला काम के साथे, सदस्य के बितरक से चुनल डिजाइन, कपड़ा, दू-प्लाई तागा औरी सियनी के दूसर समान मिलेला. कारीगर ट्रेसिंग पेपर प डिजाइन बनावेला औरी कढ़ाई के बेरिया एकरा के नमूना जइसन इस्तेमाल करेला. अइसे इ जैकेट, सूट सेट, साड़ी औरी रजाई प कार करेला. उ लोग सूती, रेसमी, खादी औरी ऑरगेंजा जइसन कपड़ा इस्तेमाल करेला.

दुर्गा पूजा परब के बेरिया इ ऑर्डर हर महीना बढ़ के 40-50 कमीसन हो जाला. अरजीना के करीगरन के गोल के साथे काम करे वाल अगुआ बितरक जलालुद्दीन कहेलन, “बेसी मांग पूरा करे खातिर ए बेरा कई गो कारीगर गोल में सामिल हो जाला.” उ ऑर्डर खातिर कच्चा माल लेवे औरी तईयार काम के पहूंचावे खातिर हर बेर महीना में कुछ चक्कर कोलकाता औरी बारासात सहर के लगावेलन. उ कांथा बनावे औरी बितरक के रूप में हर महीना 40,000 से 50,000 ले कमा लेने.

उनकर कढाई के महीनी, चीज के लम्बाई, औरी डिजाइन के मस्किल. अरजीना के गोल के सदस्य लोग के महीना के औसत कमाई 8,000 से 10,000 रोपया बा. गोल के अगुआ के रूप में अरजीना 10,000 से 12,000 रोपया कमाली. उ हर महीना 2,000-3,000 रोपया के अलगे से नमूना अपनहूं बनावेली. औरी इ चीज के मेला औरी परदरसनी में बेचे खातिर जलालुद्दीन के मदद लेली.

एसे अरजीना के अपना परिवार में पइसा के मदद हो जाला. उ अपना दुनू बेटा के परिवार औरी अपना मरद के साथे सात लोग वाला घर में रहेली. जहां दुनु आदमी कसाई के आपन दोकान चलावेला. औरी 25,000 से तनियक बेसी आमदनी घर में ले आवेला.

अरजीना कहेली, “कांथा एगो साधारन गुलनी (रनिंग स्टिच) से कहीं बेसी हो गईल बा.”

पछिला कुछ साल से कांथा वाला सामान के मांग में तेजी आईल बा. एमे कवनो सक नईखे कि एकर कुछ कारन त एकर फेर से इस्तेमाल करे वाला बात बा- जौन कि एह बेर बहुत चलन में बा.

हर बेर चलत चलन (फैशन) के परमुख कंपनियों आगे बढ़ावेला.

2008 में, पच्छिम बंगाल के नक्शी कांथा के जियोग्राफिकल इंडिकेशन(जी आई) चीन्हा (टैग) दहल गईल रहे. जे कांथा कढाई के दू गो खूब चले वाला तरीका में से एगो ह. दुसरका ढंग के पार टोला कहल जाला.

नक्शी में प्रकृति से सीखल जाला- फूल, जनरवा, इंहां ले कि इंसानी रूप. दुसरा ओर पार टोला में ज्यामिति के आकार होला. अरजीना बतावेली, “नक्शी बेसी हिन्दू मेहरारू करे लोग काहे से कि इस्लाम में जीव के नक़ल कईल मना बा. मुसलमान मेहरारू पार टोला करे में माहिर रहली कुल.” उ आगे कहली, “अब अइसन कौनो फरक नईखे रह गईल. हमनी कांथा के सब रूप जाननी औरी बनावेनी कि काम मिल सके.”

अरजीना कहेली, “इतना मस्किल डिजाइन के पूरा करे में हमरा एक महीना से बेसी लाग जाला.” उ एगो साड़ी के ओर इशारा कईली जौणा प उ काम कईले रहली. औरी जेकरा से उनका 2,000 से 3,000 मिलत रहे. इ चीज बजार में कम से कम 10,000 रोपया में बिकात रहे. बाकिर अरजीना कहतारी कि उनका जइसन कारीगर के मुनाफा के सही हिस्सा ना मिलेला. “मांग बढ़ला के बादो हमनी कारीगर लोग ला मोनाफा के हिस्सा कम बा.”

अरजीना हर दिन 4 घंटा कांथा के कार करेली. उ कहेली, “हमनी मेहरारू लोग के अपना परिवारों के धेयान राखे के होला.” अपना गोल के अगुआ कारीगर भईला के नाते आपन औरी जिम्मेदारी के बारे में बतावत अरजीना कहली, “हम जलालुद्दीन के संघे लगे के कस्बा में औरी सिटी सेंटर में जानी. बिक्रेता से बतियावेनी, तईयार माल पहुंचावेनी. नया ऑर्डर लेनी औरी कारीगर लोग खातिर चुकौनी (भुगतान) जमा करेनी.”

अरजीना कहेली, (बाकिर) हमरा इ सब काम के बुझाला. हमरा आपन काम पसंद बा. इ कला हमारा परिवार के मस्किल में सहारा देहलस.”

इ कला से प्रेम होखला के बादो, उ ना चाहेली कि उनकर पोता-पोती इ काम करे. अरजीना बतावेली, “हमार आवग पक्का नईखे. औरी कांथा के समान मांग के आसरे बा, जौन बदलत रहेला. हम चाहेनी कि हमार पोता-पोती पढ़ाई करे औरी ओकनी के कवनो पक्का सरकारी नोकरी मिले.”

अरजीना के बगल में काम करत नूरानाहर हंकारी में मूड़ी डोलावली. तीन गो छोट लयिकिन के माई नूरानाहर कहली, “भले इ कला ह जौन हम अपना माई से सीखनी, बाकिर इ हम अपना बेटी कुल के सिखावे में असमंजस में बानी.” “हम चाहतानी कि ऊ अपना पढ़ाई प धेयान दे जेसे ऊ आपन जिनगी नीमन बना सके.” नूरानाहर अपने हाई इस्कूल पास हई.

अपना परिवार में इ कला के आगे बढावे में संकोच के बादो, नूरानाहर औरी अरजीना नईखे चाहत लोग कि इ कला ख़तम हो जाए. अपना कारखाना में आवे वाला एगो जापानी टूरिस्ट के फोटो देखा के नूरानाहर कहली, “हमरा इ जान के बहुत खुसी होला कि हमनी के हुनर के बड़ाई हमनी के संस्कृति के बहरा के लोगो करेला.” दुनू महिला लोग मेला, इंटरनेश्नल एक्सपोर्ट औरी बिदेसी टूर ग्रुप के जरिये कांथा के बढावा देला के राज्य सरकार के कोसिस के बड़ाई करेला.

नूरानाहर कहेली, “हमनी के गायीला के ढेर दिन बादो हमरा उम्मीद बा कि केहू ना केहू इ कला के सीखे वाला होई जे हमनी के गियान औरी हुनर के ज़िंदा राखी.”

अनुवाद: स्मिता वाजपेयी