کبیر اور ڈنڈوری کے بُنکروں کے بکھرتے ہوئے تانے بانے

چدریا جھینی رے جھینی، چدریا جھینی رے جھینی
رام نام رس بھینی، چدریا جھینی رے جھینی
اشٹ کام کا چرکھا بنایا، پانچ ٹاٹ کی پونی
نو دس ماس بینن کو لاگے مورکھ میلی کینی
چدریا جھینی رے جھینی

[یہ چادر کتنی باریک، کتنی نفیس ہے۔
رام نام کے رس میں بھیگی ہوئی، آہ یہ چادر کتنی نفیس ہے۔
آٹھ پرتوں والے کنول کے چرخہ نے اس کا سوت کاتا،
اور پانچ طرح کے دھاگوں سے اسے بنایا گیا،
نو دس مہینوں کی بُنائی کے بعد، اے نادان تم نے اسے میلا کر دیا
یہ چادر بڑی نفیس، بڑی باریک بُنی گئی ہے…]

نہرو داس جی کی انگلیوں میں ایک نفاست اور بے عیب ہم آہنگی ہے، جو ہارمونیم کے کی بورڈ پر چلتے ہوئے موسیقی کے سُروں اور جذبات کا جال بُنتی ہیں، جب وہ کبیر کا ایک دوہا گاتے ہیں۔ آپ آسانی سے تصور کر سکتے ہیں کہ کبھی یہی انگلیاں کرگھے پر کس خوبصورتی سے رقص کرتی ہوں گی۔ اگرچہ اب ان کے لیے بُنائی سے زیادہ گانا فطری محسوس ہوتا ہے۔ وہ یہ ورثہ اپنے دو بیٹوں کو منتقل کر چکے ہیں۔ لیکن ایک کبیر پنتھی (یعنی پندرہویں صدی کے صوفی شاعر کبیر کے پیروکار) ہونے کے ناطے، وہ ہمیں اس گیت اور اپنے کام کے درمیان تعلق دکھانا چاہتے ہیں۔

وہ کہتے ہیں، ’’جس طرح خدا اس جسم کو بنانے میں وقت لیتا ہے، اسی طرح ماں کے رحم میں بچے کو پیدا ہونے میں نو مہینے لگتے ہیں۔ ہمارے کبیر صاحب اسی بات کو اور کپڑا بُننے کے عمل کو ایک دوسرے سے جوڑ کر دنیا کو سمجھا رہے ہیں۔‘‘ نہرو داس (۷۸) خود کو بیگاچک کا سب سے معمر بُنکر کہتے ہیں۔

ڈنڈوری ضلع کے ۵۲ گاؤوں پر مشتمل اس خطہ میں، جس میں ان کا اپنا گاؤں سرواہی مال بھی شامل ہے، زیادہ تر آبادی آدیواسیوں پر مشتمل ہے۔ بزرگ بُنکر جس پنیکا برادری سے تعلق رکھتے ہیں، اسے پورے مدھیہ پردیش میں یکساں طور پر درج نہیں کیا گیا ہے۔ ڈنڈوری میں، جہاں وہ رہتے ہیں، انہیں درج فہرست قبائل کے بجائے دیگر پسماندہ طبقات میں شمار کیا جاتا ہے۔ اس کے باوجود صدیوں سے ان کی زندگی ضلع کی ۶۴ فیصد آدیواسی آبادی کے ساتھ باہمی انحصار اور ہم آہنگی میں گزری ہے۔ پنیکا برادری اپنے روایتی پیشہ، یعنی بُنائی سے وابستہ ہے۔

’’ہم نسلوں سے بُنائی کرتے آئے ہیں،‘‘ وہ کہتے ہیں۔ ’’ہمار دائی دادا جو تھے وہ بھی ایہی لا بِن بِن کے پوشے ہیں اور اُن کے جانے بعد کے ہم بھی ہمار بال بچہ کو ایہی لا سے پوشے رہے ہیں، اور ایہی دھندہ کر کے ہمر لا ڈاکا بچہ بھی ہمن لا پال رہے ہیں۔ [ہمارے ماں باپ نے اسی بُنائی کی مدد سے ہمیں پالا پوسا، اور ان کے بعد ہم نے بھی اپنے بچوں کی پرورش اسی کام سے کی؛ اور اب ہمارے بچے بھی یہی پیشہ اختیار کر کے ہماری دیکھ بھال کر رہے ہیں۔] یہ ہمارا بنیادی پیشہ ہے۔‘‘

میکال پہاڑی سلسلہ کے گھنے جنگلات کے درمیان واقع بیگاچک زیادہ تر بیگا آدیواسیوں کا مسکن ہے، جو پہاڑوں پر رہتے ہیں اور بیور کھیتی (جھوم یا منتقل ہوتی کاشتکاری) کرتے ہیں۔ لیکن یہاں گونڈ آدیواسی بھی آباد ہیں جو مستقل زراعت کرتے ہیں، اگھریا لوہا پگھلانے کا کام کرتے ہیں، جبکہ اہیر مویشی پالتے ہیں۔ دامنِ کوہ میں رہنے والے پنیکا بُنکر ہیں، جو اس علاقہ کی اکثریتی بیگا آبادی کے لیے کپڑے اور ٹیکسٹائل فراہم کرتے ہیں۔ بیگا برادری کو ریاست میں ایک نہایت کمزور قبائلی گروہ کا درجہ دیا گیا ہے۔

نہرو داس جی تقریباً ایک دہائی پہلے کے زمانہ کو یاد کرتے ہوئے کہتے ہیں، ’’اُن دنوں ہم بالکل ویسے ہی کپڑے بُنتے تھے جیسے بیگا لوگ ہم سے چاہتے تھے۔ ان کے مرد اور عورتیں دونوں ہمارے بنائے ہوئے کپڑے پہنتے تھے۔ مرد بنڈی جیکٹ بنواتے تھے، جبکہ عورتیں بگرا، مونگی اور چاک دھریا مانگا کرتی تھیں۔‘‘ وہ بیگا ساڑیوں کی مختلف اقسام کے نام گنوا رہے ہیں، جن میں ہر ایک کی بُنائی کا انداز الگ ہوتا تھا۔ پنیکا برادری ان ساڑیوں کے بدلے اناج یا روزمرہ کی ضروری اشیاء حاصل کیا کرتی تھی۔

’’ہمارا اور بیگا لوگوں کا رشتہ اسی وقت سے قائم ہے، جب سے یہ کائنات وجود میں آئی،‘‘ وہ کہتے ہیں۔ ’’اُن دنوں جب ہم کپڑا بیچنے بازار جاتے تھے تو دس منٹ میں سارا مال فروخت ہو جاتا تھا۔ یہاں تک کہ وہ چادریں بھی ہم ہی بناتے تھے، جنہیں بیگا لوگ اوڑھتے تھے۔‘‘

گاؤں میں خود انتظامی نظام (نار ویہ وستھا) بہت مضبوط تھا اور برادریاں مشترکہ دیہی وسائل کے تصور پر یقین رکھتی تھیں۔ اس سوچ کے تحت فطرت کی ہر چیز اور انسانوں کی زندگیاں ایک دوسرے سے جڑی ہوئی سمجھی جاتی تھیں۔ کسی ایک پر آنے والی مصیبت سب پر اثر انداز ہوتی تھی۔ ’’گاؤں کے سربراہ کو مقدم کہا جاتا تھا۔ اُس وقت ہمارے سماج میں اونچ نیچ یا درجہ بندی نہیں تھی۔ لیکن اب حالات بہت بدل گئے ہیں،‘‘ پچاس کی عمر پار کر چکے سنیل داس، جو نہرو داس جی کے وسیع خاندان کا حصہ ہیں، کہتے ہیں۔

آج کل کم ہی لوگ روایتی بُنائی کو جاری رکھنے میں دلچسپی رکھتے ہیں۔ مزدوری میں زیادہ پیسہ ملتا ہے۔ سنیل داس کہتے ہیں، ’’بُنائی بہت محنت طلب کام ہے۔ یہ ہاتھ کا کام ہے، اس میں وقت لگتا ہے۔ اگر کسی فیملی کے دو سے تین لوگ دو دن تک ایک ساڑی بُننے میں لگے رہیں، اور ہم وہ ساڑی ۲۰۰۰ سے ۲۳۰۰ روپے میں بیچیں، تو مزدوری بھی کیسے پوری ہوگی؟ آپ ہی بتائیے ہم کیسے گزارہ کریں؟‘‘

نہرو داس جی کی کمزور ہوتی بینائی اور بڑھتی عمر نے اب ان کے اور ان کی بیوی کے لیے بُنائی کو مشکل بنا دیا ہے۔ فیملی کے کئی افراد، جیسے سنیل داس کے تقریباً ۶۵ سالہ چچا گنگو داس، اب روایتی ساڑیوں کے ساتھ ساتھ دوسری چیزیں بھی بنانے لگے ہیں۔ سنیل داس کہتے ہیں، ’’وہ گاہکوں کی مانگ کے مطابق کرتا، پاجامہ اور دوسری قسم کی سوتی ساڑیاں بھی بناتے ہیں، جس سے کچھ زیادہ آمدنی ہو جاتی ہے۔ بیگا خواتین اب پہلے کی طرح روایتی ساڑیاں نہیں پہنتیں، اسی لیے یہ ہنر زوال کا شکار ہو رہا ہے۔‘‘

حکومت نے اس علاقہ میں روایتی پِٹ لومز (جو زمین میں نصب ہوتے تھے) کی جگہ فریم لوم متعارف کرانے کی کوشش کی ہے۔ سنیل داس، جو خود بھی فریم لوم استعمال کرتے ہیں، کہتے ہیں، ’’نئے کرگھوں کے ذریعہ اگر تین لوگ مل کر ایک ٹیم کی طرح کام کریں تو ہم ایک مہینہ میں ۱۵ سے ۲۰ ساڑیاں بنا سکتے ہیں، جبکہ اسی مدت میں پِٹ لوم پر صرف دو سے تین ساڑیاں بُنی جا سکتی ہیں۔ حکومت ہمیں کرگھا فراہم کرتی ہے اور ٹریننگ بھی دیتی ہے۔‘‘ لیکن ایک مہینہ میں تین لوگوں کے لیے ۳۰ ہزار روپے کی آمدنی بھی اس رقم کا صرف ایک تہائی ہے جو وہ شہر میں تعمیراتی مزدور بن کر کما سکتے ہیں۔

گنگو داس کہتے ہیں، ’’آجیوِکا اسکیم کے تحت حکومت ہر چھ مہینے میں ایک بار ۱۰ ہزار روپے دیتی ہے۔ وہ دھاگہ، کرگھا اور بازار تک رسائی میں بھی مدد کرتے ہیں۔ لیکن اس کے باوجود ہم بُنائی سے اتنی آمدنی حاصل نہیں کر پاتے۔ ہمیں ان چیزوں سے خاطر خواہ فائدہ نہیں ہوتا۔‘‘ گنگو داس نے روایتی بُنائی کو بیرونی دنیا تک پہنچانے کی کوشش کی ہے۔ وہ سرکاری نمائشوں میں اپنے اسٹال بھی لگا چکے ہیں۔

سنیل داس کے مطابق، آگے بڑھنے کا راستہ سرکاری ٹیکسٹائل کالج کے ذریعہ نکل سکتا ہے۔ ان کے چار بچے ہیں۔ ان کی ایک غیر شادی شدہ بیٹی کالج میں پڑھتی ہے جبکہ بیٹا گیارہویں جماعت میں ہے۔ ان کی خواہش ہے کہ اپنے بیٹے کو کسی ایسے کالج میں بھیجیں جہاں وہ بُنائی کی نئی تکنیکیں سیکھ سکے، جو خاندانی پیشہ کو سہارا دے سکیں۔

’’کبیر صاحب ہمارے لیے خدا کی مانند ہیں۔ یہ کام انہی کا کرم ہے۔‘‘ نہرو داس جی کی آواز میں اس معروف شاعر کا ذکر کرتے ہوئے ایک خاص یقین جھلکتا ہے۔ وہ کہتے ہیں، ’’ہمارے ماں باپ اور بزرگوں پر اُن کا کرم ہے کہ ہم آج بھی یہ کام کر رہے ہیں اور آئندہ بھی کرتے رہیں گے۔ اگر لوگ ہماری بُنی ہوئی ساڑیاں پہننا چھوڑ بھی دیں، تو ہم اپنے لیے بُنیں گے۔ لیکن بُنائی نہیں چھوڑیں گے۔‘‘

اسٹوری میں استعمال کی گئی ساڑیوں کی تصویریں خود بُنکر سنیل داس نے کھینچی ہیں۔

یہ اسٹوری سب سے پہلے ہندی زبان میں درج کی گئی تھی۔

یہ اسٹوری مرنالنی مکھرجی فاؤنڈیشن (ایم ایم ایف) کی فیلوشپ کے تعاون سے لکھی گئی ہے۔