कबड्डी: पंजाब के गाँव-देहात के परान

“कौड़ी, कौड़ी, कौड़ी, कबड्डी, कबड्डी, कबड्डी….”

माटी के घेरा के भीतरी जिहां रेडर अऊ स्टापर मन के खेल चलत रहिस – खिलाड़ी मन के आवाज तेज होवत जावत रहिस. ये नजारा साल 2020-2021 के किसान मन के विरोध आन्दोलन बखत दिल्ली के बहिर सिंधु अऊ टिकरी बार्डर मं रहिस. कबड्डी के कमेंट्री मं विरोध के नारा अऊ भासन घलो रहिस. लाखों किसान अऊ बनिहार इहाँ तब तक ले विरोध प्रदर्सन करत रहिन जब तक खेती के तीन कानून रद्द नइ होगिस.

सितंबर 2021 मं हफ्ता भर तक चले खेल के आखिर मं, एक झिन नवा खिलाड़ी आगू आइस : हरियाणा के रोहतक ले शीलू बलहारा. वो ह पंजाब के कबड्डी स्टार्स के लीग मं सामिल होगे, जिहां कम आमदनी अऊ पिछड़ा समाज मन के कतको जवान लइका मन बनेच कमई करत हवंय.

सर्कल-स्टाइल कबड्डी तउन खेल मन ले एक आय जेन ला पंजाब के गाँव के लइका मन खेलथें. येकर सादगी खिंच लेथे: येकर बर कोनो जिनिस के जरूरत नइ परय- अक्सर खिलाड़ी जूता तक ले नइ पहिरेंय. येकर नियम सरल आय, अऊ ये ह माटी मं खेले जाथे.

ये खेल भारी मिहनत वाले आय, जेन ह तऊन नव पीढ़ी ला लुभाथे जेन मन अपन देह मजबूत बनाय मं गरब करथें. ये खेल –जेन ला पंजाब-स्टाइल कबड्डी घलो कहे जाथे – मेला-मड़ई, समाजिक कार्यक्रम अऊ लोकल खेल मं खेले जाथे.

पंजाब मं कबड्डी के सीजन खेती के सीजन के संगे संग चलथे. ये ह बुआई के बाद अक्टूबर मं सुरु होथे अऊ अप्रैल तक चलथे, जब फसल लुवा जाथे.

बाहू अकबरपुर गाँव के एक झिन छोटे किसान के बेटा शीलू बल्हारा, साल 2025 मं टोरंटो के यूनाइटेड ब्रैम्पटन कबड्डी क्लब मं सबले जियादा पइसा मिलेइय्या खिलाड़ी मन ले एक रहिस. क्लब मं तीन महीने के कॉन्ट्रैक्ट (करार) ले स्टार खिलाड़ी मन ला 50 ले 70 लाख रूपिया मिलथे. टॉप स्टॉपर के रूप मं, वो ह अब तक ले एक दर्जन ले जियादा ट्रैक्टर घलो जीते हवय.

बल्हारा के उन्नति बताथे के कबड्डी ह नवा पीढ़ी के सैकड़ों लइका मन के समाजिक अऊ आर्थिक स्थिति मं कतक बदलाव लाय हवय.

सोनी सिंह कहिथे, “गर मंय कबड्डी खेले नइ रइतेंय, त सइकिल बिसोय घलो मोर बर एक ठन चुनोती होय रइतिस.” ओकर कहिनी घलो कुछु अइसनेच हवय. पंजाब के मानसा जिला के भादड़ा गाँव मं एक ठन दलित परिवार मं जन्मे सोनी के ददा बनिहारी करत रहिस. वो ह बताइस, “मंय घलो घर के आमदनी बर आने लोगन के खेत मं बूता करेंय. एक बेर घर के गरीबी ला देख सेना मं जाय के सपना देखे रहेंय, फेर कबड्डी खेले बखत आँखी मं छोट लगे सेती मेडिकल मं फेल हो गेंय.”

चोट लगे के बाद सोनी ह पूरा धियान खेल मं लगाइस. ओकर प्रतिभा ह परिवार ला दू गाँव के दू खोली ले बंगला मं ले गीस.

“कबड्डी ह मोला सब्बो कुछु दे हवय- पइसा, नांव अऊ सम्मान. आज, मोर गाँव भर ला ये बात के गरब हवय के मंय पंजाब अऊ बिदेस मं ओकर नांव बढ़ावत हवंव, 27 बछर के ये खिलाड़ी ह कहिथे, जेन ला ओकर गाँव के नांव सोनी भादड़ा के नांव ले जाने जाथे.

सोनी पंजाब मं एनआरआई नकोदर क्लब डहर ले खेलथे अऊवो ह बिदेस मं अपन केरियर बनाय हवय. बीते तीन चार बछर मं, वो ह न्यूज़ीलैंड, ऑस्ट्रेलिया अऊ इंग्लैंड मं खेले हवय. सोनी कहिथे, “आज मंय 18-20 ठन फटफटी जीते हवंव, जेन मं एक ठन हार्ले-डेविडसन घलो हवय.”

25 बछर के मनप्रीत सिंह, जेन ला मनी दयालपुर के नांव ले जाने जाथे, एक झिन सिक्योरिटी गार्ड के बेटा आय. वो ह 9 वीं क्लास के बाद स्कूल छोड़ दीस अऊ कुछु बखत तक ले हॉस्पिटल अटेंडेंट के काम करिस. फेर कबड्डी ह ओकर जिनगी के कायापलट कर दीस. साल 2022 ले, वो ह न्यूज़ीलैंड मं चार सीजन अऊ ऑस्ट्रेलिया और इंग्लैंड मं दू दू सीजन खेले हवय.

मनप्रीत, जेकर गाँव दयालपुर (2011 के जनगणना मं डायलपुर लिखाय) कपूरथला अऊ जालंधर जिला मं बगरे हवय, कहिथे, “मोर सपना हवय के मंय अपन गाँव मं एक ठन घर बनवावंव. मंय अपन ददा ले नउकरी छोड़े ला घलो कहे हवंव, फेर वो ह अभू घलो मिहनत करके कमाय ला चाहथे.”

सोनी अऊ मनप्रीत दूनों ला बिदेस मं खेले बर तीन महीन के 15 लाख रूपिया के करार मिलथे. वो ह बताथे के ये एक ठन कठिन खेल आय - माड़ी अऊ खांध मं छोट आम बात आय. फेर ये ह पइसा सेती कम आमदनी वाले परिवार के लइका मन ला अपन डहर खिंच लेथे.

साल 2010 ले 2016 तक, जब शिरोमणि अकाली दल के सरकार रहिस, पंजाब सरकार ह हरेक बछर कबड्डी वर्ल्ड कप ऑर्गनाइज करवाइस अऊ ये खेल ला पइसा कमेइय्या केरियर बना दीस. अब पंजाब मं घरेलू टूर्नामेंट के कुल सालाना बजट करीबन 250 करोड़ रूपिया हवय, अऊ बिदेसी टूर्नामेंट के 150 करोड़ रूपिया अऊ आ जाथे.

साल 1990 ले, कबड्डी एशियन गेम्स के घलो हिस्सा रहे हवय, अऊ ये ह प्रो कबड्डी लीग के जरिया ले सहर मं आइस. फेर ये खेल के एक ठन अलग स्टाइल हवय, जेन ला मानक रूप कहे जाथे, चकोर कोर्ट मं खेले जाथे. अधिकतर नेशनल अऊ इंटरनेशनल टूर्नामेंट सिंथेटिक मैट मं खेले जाथे, अऊ घरेलू कॉम्पिटिशन घलो धीरे-धीरे माटी ले मैट मं आवत हवंय. खिलाड़ी मैट सेती डिजाइन करेगे सपाट तल्ला वाले जूता पहिरथें.

सर्कल-स्टाइल कबड्डी आज घलो माटी के मैदान मं गोल पिच मं खेले जाथे- जेकर घेरा 22 मीटर होथे. हरेक टीम मं रेडर अऊ स्टॉपर होथें. जब कोनो रेडर सामने वाले के सर्कल मं खुसरथे, त ओकर सामना चार स्टॉपर ले होथे. जेन स्टॉपर ला रेडर सबले पहिली छूथे, वो ह रेडर ला अपन जगा मं लहुटे ला रोकथे. वो बखत खेल मं आमना-सामना हो जाथे, वइसे मारपीट के मनाही हवय. हरेक रेड मं, एकेच नियम लागू होथे – चार झिन स्टापर मैदान मं उतरथें, अऊ एक बढिया रेड ले रेडर के टीम ला एक पाइंट मिलथे, फेर कुछेक गाँव के टूर्नामेंट मं खिलाड़ी मन के संख्या अलग-अलग होथे.

कबड्डी के ये स्टाइल ला न कोनो औपचारिक खेल संरचना मिले हवय न सरकारी मान्यता, ये ह समाज के समर्थन ले फरत-फूलत हवय अऊ हो सकथे ये देस (भारत) के अकेल्ला खेल आय जेन ह बगेर कोनो औपचारिक बेवस्था के न सिरिफ बांचे हवय फेर हरेक बछर अऊ पोठ होवत जावत हवय.

पंजाब के करीबन सब्बो 12,500 ले जियादा गाँव मन मं टूर्नामेंट होथे. किसान समाज पइसा देथे, फेर गाँव के बिदेस मं रहेइय्या (नॉन-रेसिडेंट इंडियन/एनआरआई ) दिल खोलके मदद करथें. राज मं टूर्नामेंट मं एंट्री फ़्री हवय काबर के अधिकतर येला तिहार जइसने देखे जाथे. टूर्नामेंट के हिसाब ले, देखेइय्या मन 5,000 ले 50,000 तक हो सकथें.

इनाम के रकम बनेच अलग-अलग होथे. एक ठन बढ़िया टूर्नामेंट के बजट 10 ले 50 लाख तक हो सकथे, संगे संग उपर ले कार, फटफटी धन कंबाइन हार्वेस्टर जइसने इनाम घलो होथें. हरेक हिस्सा लेवेइय्या टीम ला एक भाग लेगे के फीस मिलथे जेन ला 12 झिन गड़ी/ खिलाड़ी मं बांटे जाथे. जइसने- जइसने टीम जीतत जाथे, रकम बढ़त जाथे, जेन मं विजेता बर खास इनाम होथे. निजी इनाम- बेस्ट रेडर धन स्टॉपर- नगद अऊ जिनिस दूनों देय जाथे. बड़े बजट वाले आयोजन मं, टॉप खिलाड़ी ला अक्सर हार्ले-डेविडसन बाइक, ट्रैक्टर धन महिंद्रा थार जइसने जिनिस इनाम मं मिलथे.

सबले बड़े टूर्नामेंट नवंबर के बाद होथे, जब टॉप खिलाड़ी बिदेस ला लहूटथें.

लेहल खुर्द के 42 बछर के बलकार सिंह कहिथे, “मंय ये टूर्नामेंट ला एक झिन खिलाड़ी, देखेइय्या अऊ अब एक ऑर्गनाइज़र के रूप मं करे हवं. कबड्डी कतको पीढ़ी ले पंजाब अऊ पंजाबी मन के चिन्हारी रहे हवय. हमन कबड्डी स्टार्स ला देखत, खेलत अऊ ओकर गाथा मन ला सुनत बड़े होय हवन.”

संगरूर जिला के लेहल खुर्द गाँव जवेइय्या रोड मं कोनो खास चहल–पहल नइ रहय. फेर येकर मुहटा मं साल 1971 के भारत-पाकिस्तान युद्ध के शहीद अऊ वीर चक्र ले सम्मानित नायक गुरजंत सिंह के मूर्ति लगे हवय. ये बहादुर बेटा के सुरता मं गाँव मं 1972 ले हरेक दिसंबर मं कबड्डी टूर्नामेंट होथे. ये बछर के टूर्नामेंट 11 ले 13 दिसंबर तक होइस, जेकर समापन तउन दिन होईस जेन दिन नायक गुरजंत सिंह ह अपन जान निछावर कर देय रहिस.

11 दिसंबर के दिन, कार्यक्रम के सुरुआत ये पूर्व फौजी ला सुरता करे के संग होइस, जेकर बाद लइका मन के मैच होइस. वइसे देखेइय्या माइलोगन मन बनेच कम रहिन, फेर आयोजक ह माइलोगन मन बर प्रदर्सन मैच करवाके कुछु नवा करे के कोसिस करिस. एक ठन नवा कार्यक्रम ट्रॉली-लोडिंग मुकाबला रहिस, जेन मं टीम मन 75 बोरी ला ट्राली मं लादिन, जेन मं हरेक मं 35 किलो अनाज भरे रहिस, जेकर ले वो मन के ताकत अऊ तालमेल बर भारी ताली बाजिस. फ़ाइनल मैच बिहनिया 2 बजे तक चलिस.

2,600 ले जियादा ये वोटर वाले गाँव मं, जिहां के जियादातर लोगन मन जाट सिख आंय, ये टूर्नामेंट ला सामूहिक जिम्मेदारी मानथें. जम्मो पंचायत ये मं हिस्सा लेथे अऊ तियारी कतको महीना पहिले सुरु हो जाथे. ये आयोजन ह गाँव के नान कं अर्थब्यवस्था ला बढ़ाथे- छोला कुलचा, कुसियार के रस अऊ मूंगफली बेचेइय्या तीन दिन मं ओतक कमा लेथें जतक असर वो मन महीना भर मं कमाथें. देखेइय्या अधिकतर नवा पीढ़ी लइका मन होथें, वइसे सब्बो उमर के मरद लोगन मन के मंझनिया तक मैदान मं अवई लगे रहिथे. जइसने बेर बूड़थे अऊ बड़े बिजली बत्ती बरथे, सियान मन चले जाथें, अऊ जवान लइका मं बनेच रतिहा तक ले खेल के मजा लेवत रहिथें.

पंजाबी जिहां घलो गीन, कबड्डी वो मन के संग गीस – चाहे वो कनाडा होय, यूएस होय, यूके होय धन ऑस्ट्रेलिया. बिदेस मं होवेइय्या टूर्नामेंट सिरिफ खेल भर आयोजन नइ होवय, फेर सांस्कृतिक मड़ई होथे, जेन ह बिदेस मं रहेइय्या समाज ला पंजाब के माटी ले जोड़थे.

पंजाब लैंग्वेज डिपार्टमेंट के रिसर्च ऑफिसर डॉ. सुखदर्शन सिंह चहल, जेकर करा ये खेल ले बिदेस ले नाता उपर अपन काम बर पीएच.डी मिले हवय, कहिथे: “पंजाब ले बिदेस पलायन 20 वीं सदी के सुरु होय रहिस, अऊ पंजाबी जिहां घलो गीन, वो मन अपन संग पंजाब-स्टाइल कबड्डी ले गीन. काबर के पलायन के सुरू के लहर कनाडा अऊ इंग्लैंड डहर रहिस, ते पायके पंजाब-स्टाइल कबड्डी ला सबले पहिली उहिंचे के बिदेस मं जगा मिलिस.”

इंग्लैंड मं 1950 के दसक ले टूर्नामेंट होवत आवत हवंय, जेकर सीजन मई ले अगस्त के सुरु तक चलथे. कनाडा मं ये ह जून ले सितंबर तक चलथे, जेकर बाद यूनाइटेड स्टेट्स मं टूर्नामेंट होथे. ओवरसीज़ कैलेंडर मार्च मं न्यूज़ीलैंड मं सुरु होथे, अऊ अप्रैल मं ऑस्ट्रेलिया मं चले जाथे. ये दुनिया भर मं बगरे ये पक्का करथे के ये खेल पंजाब के सैकड़ों खिलाड़ी मन बर बछर भर रोजी-रोटी के जरिया बने रहय.

47 बछर के ब्रिटिश सांसद तनमनजीत सिंह ढेसी, जेन ला तन ढेसी के नांव ले जाने जाथे, वो ह कहिथे, “इंग्लैंड मं पंजाबी समाज कबड्डी ले बनेच जुड़े हवय. ये वो मन के संस्कृति अऊ परंपरा के हिस्सा आय, अऊ अपन माटी ले जुड़े रहे के एक ठन तरीका घलो आय.”

60 बछर के कबड्डी प्रमोटर कुलवंत संघा, कहिथें : “पंजाब के कोनो नव खिलाड़ी तीन महीना के इंग्लैंड सीजन मं आसानी ले 10 लाख रूपिया कमा सकथे, फेर स्टार खिलाड़ी 40-50 लाख रूपिया कमाथें.”

पंजाब के बाहर सबले बड़े कबड्डी सर्किट कनाडा मं होथे. कनाडा मं रहेइय्या प्रमोटर मंजीत सिंह लाली कहिथें, “हरेक बछर करीबन 100 कबड्डी खिलाड़ी पंजाब ले कनाडा जाथें. एक खिलाड़ी एक सीजन मं कम से कम 10 लाख रूपिया कमाथे, फेर टॉप 10-15 झिन 50-70 लाख रूपिया कमाथें.”

कबड्डी के अर्थव्यवस्था सिरिफ खिलाड़ी मन तक ले नइ ये फेर कोच, सपोर्ट स्टाफ अऊ खासकर के कमेंटेटर मन ला घलो रोजगार देथे.

संगरूर के 43 बछर के सतपाल माही खाडिल, जेन ह 24 बछर ले माइक संभाले हवय, कहिथे, “एक कमेंटेटर बिदेस मं एक सीजन मं 10-12 लाख रूपिया कमा सकथे. देस मं, वो ह हरेक टूर्नामेंट मं 10,000-20,000 रूपिया कमाथें.”

सतपाल भूमिहीन दलित परिवार ले हवय – ओकर ददा रोजी मजूरी करत रहिस. “ मंय घलो मजूर बन जातेंय. फेर मोला रेडियो मं खेल कमेंट्री सुने अऊ किताब पढ़े पसंद रहिस, जेकर ले मोर हुनर मं धार आइस. कबड्डी ह सब्बो कुछु बदल दीस – आज मोर करा एक ठन घर हवय, एक ठन कार हवय, अऊ मंय ऑस्ट्रेलिया, इंग्लैंड अऊ कनाडा घूम चुके हवंव.”

सतपाल जइसने कमेंटेटर टूर्नामेंट के आधार होथें, जेन ह अपन जोशीला आवाज ले हजारों देखेइय्या मन ला जोरके राखथें. वो खिलाड़ी मन के परिचय कराथें, रणनीति समझाथें, रोमांच पैदा करथें, अऊ जब टूर्नामेंट बिदेस मं होथे त सांस्कृतिक पुल के काम घलो करथें.

एक झिन अऊ कमेंटेटर, 34 बछर के अमन लोपों कहिथे: “मंय साल 2007 मं सुरु करे रहेंय, अऊ मोर पहिला बिदेसी कार्यक्रम साल 2010 मं कनाडा मं रहिस. तब ले, मंय हर वो देस मं होय आयोजन मं गेंय जिहां प्रोफेशनल कबड्डी खेले जाथे.” मोगा के लोपों गाँव के बासिंदा अमन करा सिरिफ डेढ़ एकड़ खेत हवय. फेर कबड्डी कमेंट्री ले होवेइय्या कमई ले वो ह एक ठन “बढ़िया घर” मं रहिथे अऊ एसयूवी मं आथे-जाथे.

पूर्व खिलाड़ी गुरलाल सिंह घनौर, जेन ह पंजाब कबड्डी एसोसिएशन के अध्यक्ष घलो आंय, ओकर मुताबिक ये खेल पब्लिक लाइफ के लॉन्चिंग पैड बनगे हवय – अब वो ह आम आदमी पार्टी (आप) के टिकट मं घनौर ले विधायक (एमएलए) हवंय. पंजाब कबड्डी एसोसिएशन राज के चार बड़े कबड्डी एसोसिएशन मन ले एक आय, जेन मं हरेक मं ये बखत के अऊ जुन्ना खिलाड़ी अऊ प्रमोटर सामिल हवंय. ओकर करा टीम मन रजिस्टर्ड हवंय अऊ वो ह खुद होक टूर्नामेंट के आयोजन करथे.

लुधियाना के गालिब कलां गाँव के 43 बछर के जगदीप सिंह, जेन ला ‘जग्गा गालिब’ के नांव ले जाने जाथे, वो ह जब साल 2001 मं टूर्नामेंट मं सामिल होय सुरु करिस, त पइसा कम रहिस. वो ह करीबन 20 बछर तक खेलिस अऊ अब कोच अऊ टैलेंट स्काउट के रूप मं काम करथे. वो ह कहिथे के बीते 15 बछर मं ये खेल मं पइसा कतको गुना बढ़गे हवय.

फेर ये खेल के सफलता के संग संग रिस-रार घलो बढ़े हवय. साल 2022 मं, ब्रिटिश-इंडियन खिलाड़ी 38 बछर के संदीप नंगल अंबिया, जेन ह ये खेल के टॉप स्टार्स मन ले एक रहिस अऊ नशा (ड्रग्स) के खिलाफ अभियान चलावत रहिस, ओकर जालंधर के मल्लियां खुर्द मं एक ठन टूर्नामेंट बखत गोली मारके हत्या कर दे गीस. पुलिस ला शक हवय के ये हत्या कबड्डी के दुश्मनी सेती होय रहिस.

एक अऊ कमी लिंग के भेदभाव आय, जेकर ले माईलोगन मन ला बनेच कम मउका मिलथे. ये ह एक ठन अइसने कमी आय जेन ला मेजर कबड्डी लीग – जेन ह चार ठन एसोसिएशन मन ले एक आय – अपन बैनर के तहत हरेक टूर्नामेंट मं कम से कम एक नोनी मन के मैच कराके ये कमी ला पूरा करे के कोसिस करत हवय.

कुल मिलाके, कबड्डी ह पंजाब के गाँव-देहात के धड़कन के रूप मं अपन नांव ला सही साबित करे हवय.

खिलाड़ी मन ला हीरो के दरजा मिलथे, अऊ वो मन ला सांस्कृतिक कार्यक्रम अऊ गाँव के सभा मन मं सुरता करे जाथे. दिलजीत दोसांझ ले लेके गुजरे सिद्धू मूसे वाला तक, कतको गायक मन ये खेल ला सुरता करे हवंय. बब्बू मान के गाना “कबड्डी कबड्डी” ला यू ट्यूब मं 1.1 करोड़ ले जियादा बेर देखे गे हवय.

अऊ जब समाज के बात आथे त खिलाड़ी मन सबले आगू होथें. सितंबर 2020 मं लागू होय तीन कृषि कानून के खिलाफ दिल्ली के सरहद मं धरना नवंबर 2020 मं सुरु होय रहिस अऊ कानून मन ला रद्द होय तक बछर भर ले जियादा चलिस. जइसने- जइसने दिन हफ्ता अऊ महीना मं बदलत गीस, जेन ह चलत रहय, समाज किसान मन के संग हो गीस: डाक्टर मन अपन होके मदद करिन. नामी गायक मन अपन प्रस्तुती दीन, अऊ कबड्डी खिलाड़ी मन हौसला बढ़ाय बर विरोध वाले जगा ला खेल के मैदान बना दीन.

साल 2020-21 मं, देस भर के किसान तीन कृषि कानून – किसान (सशक्तिकरण एवं संरक्षण) मूल्य आश्वासन एवं कृषि सेवा समझौता अधिनियम 2020, किसान उत्पाद व्यापर एवं वाणिज्य (प्रोत्साहन एवं सुविधा) अधिनियम 2020 अऊ आवश्यक वस्तु (संशोधन) अधिनियम 2020 के खिलाफ विरोध करे बर जुरे रहिन, जेन ला सितंबर 2020 मं संसद मं पास ककरे गे रहिस. सरकार नवंबर 2021 मं कानून मन ला रद्द करे बर सहमत होइस. आंदोलन ऊपर पारी के कहिनी मन ला पढ़व: कृषि कानून के खिलाफ विरोध: पूरा कवरेज

सिंघु अऊ टिकारी मं, खिलाड़ी मन न सिरिफ मैच मं भाग लीन, वो मन, धरना स्थल मं अनुशासन बनाय अऊ लॉजिस्टिक्स मैनेज करे के काम घलो अपन मन ले करिन अऊ लंगर (भंडारा) मं घलो योगदान दीन, जेकर ले खेल अऊ समाज के रिस्ता मजबूत होईस.

फुटबॉलर ले कबड्डी प्रमोटर बने टोनी संधू, जेन ह टूर्नामेंट के आयोजन करेइय्या मेजर कबड्डी लीग के सचिव आय, कहिथे के जब घलो किसान मन ले जुड़े कोनो समस्या होथे, त कबड्डी खिलाड़ी मन हमेसा सबले पहिली जुवाब देवेइय्या मन ले होथें.

फुटबॉलर ले कबड्डी प्रमोटर बने टोनी संधू, जेन ह टूर्नामेंट के आयोजन करेइय्या मेजर कबड्डी लीग के सचिव आय, कहिथे के जब घलो किसान मन ले जुड़े कोनो समस्या होथे, त कबड्डी खिलाड़ी मन हमेसा सबले पहिली जुवाब देवेइय्या मन ले होथें.

साल 2010 मं पहिला कबड्डी वर्ल्ड कप मं इंडिया टीम के कैप्टन मंगत सिंह मांगी ये बात ला समझाथें. जालंधर जिला के बग्गा गाँव के 41 बछर के मंगत सिंह मांगी, जेन ला कबड्डी के “किंग” घलो कहे जाथे, सवाल करत कहिथे, “कबड्डी गाँव के खेल आय, जेन ला गाँव के लइका मन खेलथें अऊ समाज मदद करथे. कबड्डी खिलाड़ी दूर कइसने रह सकथें? आज मंय जेन घलो हवंव, वो कबड्डी अऊ ये खेल के पाछू खड़े समाज के सेती हवं.”

अनुवाद: निर्मल कुमार साहू