कबड्डी: पंजाब के गांव-देहात के जान

“कौड़ी, कौड़ी, कौड़ी, कबड्डी, कबड्डी, कबड्डी...”

माटी के घेरा के भीतर चिल्लहट तेज होत जा रहे. मैदान पर चल रहल ए लड़ाई में एक ओर रेडर बा, त दूसरी ओर स्टॉपर लोग. ई नजारा 2020-21 के किसान आन्दोलन के दौरान दिल्ली के बाहर सिंघु आ टिकरी सीमा के रहे. कबड्डी के आवाज संघर्ष के नारा आ भाषण में घुल मिल गईल रहे. लाखों किसान आ कृषि मजदूर एइजा तब ले विरोध में खड़ा रहलें जब ले तीन गो कृषि कानूनन के रद्द ना कर दिहल गईल.

सितम्बर 2021 में हफ्ता भर ले चले वाला टूर्नामेंट के अंत में एगो नया खिलाड़ी उभरल- हरियाणा के रोहतक के शीलू बलहारा. आगे चलके उ पंजाब के ओ कबड्डी सितारन के लीग में शामिल हो गईलें जहां कम आमदनी आ हाशिया पर रहे वाला समुदाय के युवा लोग आपन आर्थिक स्थिति के मजबूत बना रहल बा.

सर्कल स्टाइल कबड्डी पंजाब के गांवन में लईकन के खेले वाला शुरुआती खेलन में से हवे. एकर लोकप्रियता एकरी सरलता में बा. एकरी खातिर कवनो उपकरण के जरूरत ना होला. इहां तक ले कि ख़िलाड़ी लोग अक्सर बिना जूता पहिने खेलेलें. एकर नियम कुल आसान बा आ ई खेल माटी पर खेलल जाला.

शारीरिक रूप से मेहनत वाला खेल होखला के वजह से ई ओह युवा लोगन खातिर अतिरिक्त आकर्षण के केंद्र होला जिनके मजबूत शरीर बनवला पर गर्व होखेला. ए खेल के पंजाब शैली कबड्डी के नाम से भी जानल जाला आ एके मेला, सामुदायिक समारोह आ स्थानीय टूर्नामेंटन में खेलल जाला.

पंजाब में कबड्डी के मौसम कृषि कलेंडर संघे चलेला. ई अक्टूबर में बीजारोपण के समय शुरू होला आ अप्रैल तक चलेला, जब फसल आवेला.

बहु अकबरपुर गांव के गरीब किसान के बेटा शिलु बलहारा, 2025 में टोरंटो स्थित यूनाइटेड ब्राम्पटन कबड्डी क्लब के सबसे जादे भुगतान पावे वाला खिलाड़ियन में शामिल रहलें. क्लब में तीन महीना के अनुबंध पर स्टार खिलाड़ियन के 50 से 70 लाख रूपया कमाए के मौका मिलेला. शीर्ष स्टॉपर के रूप में उ अब ले एक दर्जन से अधिक ट्रेक्टर भी जीत चुकल बाड़ें.

बलहारा के उभार ओह परिवर्तन के ओर इशारा कर रहल बा जवन कबड्डी के माध्यम से सैकड़ों युवा लोगन के सामाजिक आ आर्थिक स्थिति में आईल बा.

“अगर हम कबड्डी ना खेलले रहतीं त एगो साइकिल कीनल भी चुनौती रहित,” सोनी सिंह कहेलन. उनकर कहानी भी एही तरह के उदाहरण बा. जमींदार जट्ट सिख समुदाय के प्रभुत्व वाला पंजाब के मनसा जिला के भादड़ा गांव में एगो दलित परिवार में जनमल सोनी के पिताजी खेत मजदूर के रूप में काम करें. “हम भी आमदनी बढ़ावे खातिर दूसरी लोगन के खेत में काम करीं. गरीबी दूर करे खातिर एक समय हम सशस्त्र बल में जाए के उम्मीद में रहनी बाकिर कबड्डी खेलत के आंख में चोट लागल आ हम मेडिकल में फेल हो गईनी,” उ बतावेलन.

चोट के बाद सोनी पूरी तरह से खेल पर ध्यान केन्द्रित कर दिहलें. उनके हुनर के वजह से उनकर परिवार गांव में दू कमरा के घर से बंगला में पहुंच गईल बा.

“कबड्डी हमके सब कुछ देले बा- पैसा, प्रसिद्धि आ सम्मान. आज हमार गांव ए बात पर गर्व करेला कि हम ओकर नाम पंजाब आ विदेशन ले पहुंचा रहल बानी,” उ कहेलन. सोनी अपनी गांव के नाम से यानी ‘सोनी भद्रा’ के नाम से लोकप्रिय बाड़ें.

सोनी पंजाब के एनआरआई नकोदर क्लब के ओर से खेलेलें आ उ विदेश ले आपन करियर बनवले बाड़ें. पिछला तीन-चार बरिस में उ न्यूजीलैंड, ऑस्ट्रेलिया आ इंग्लैंड में खेल चुकल बाड़ें. “हम आज 18-20 गो मोटरसाइकिल जीत चुकल बानी. एह में एगो हार्ले डेविडसन भी बा,” सोनी कहेलन.

मनी दयालपुर के नाम से प्रसिद्ध मनप्रीत सिंह सुरक्षा गार्ड के बेटा हवें. कक्षा 9 के बाद उ पढ़ाई छोड़ दिहलें आ कुछ समय खातिर एगो अस्पताल में सहायक के तौर पर काम कईलें. कबड्डी उनकर जिनगी बदल दिहलस. ओकरी बाद 2022 से उ न्यूजीलैंड में चार सीजन आ ऑस्ट्रेलिया आ इंग्लैंड में दू-दू गो सीजन खेल चुकल बाड़ें.

“हमार सपना बा कि हम अपनी गांव में एगो घर बनाईं. हम अपनी पिताजी से भी कहले बानी कि उ काम कईल बंद कर दें बाकिर उनके आपन मिहनत से कमाइल ठीक लागेला,” मनप्रीत कहेलन जिनकर गांव दयालपुर (जनगणना 2011 में जेके डायलपुर लिखल बा) कपूरथला आ जलंधर जिला में फईलल बा.

सोनी आ मनप्रीत के विदेश में खेले खातिर चुनल गइल, त उनके तीन महीना के अनुबंध राशि 15 लाख रूपया मिलेला. उ बतावेलन कि ई एगो कठिन खेल हवे आ एमे घुटना आ कन्धा में चोट लागते रहेला. बाकिर एमे जवन आर्थिक फायदा बा ओकरी वजह से निम्न आय वाला परिवार के लईका लोग एकरी ओर खिंचात जा रहल बा.

शिरोमणि अकाली दल सत्ता में रहे, तब 2010 आ 2016 के बीच पंजाब सरकार हर साल एगो कबड्डी विश्व कप के आयोजन करे. एह तरहा ई खेल आर्थिक रूप से फायदेमंद करियर में बदल गइल. पंजाब में घरेलू टूर्नामेंटन के सलाना बजट लगभग 250 करोड़ रूपया आंकल गईल बा. उहंई विदेश में होखे वाला प्रतियोगिता एह बजट में अउरी 150 करोड़ रूपया जोड़ेला.

कबड्डी 1990 से एशियाई खेलन के हिस्सा हवे आ ई प्रो कबड्डी लीग के माध्यम से शहरी घरन ले पहुंचल. बाकिर ऊ खेल के अलग शैली हवे जेके मानक फ़ॉर्मेट कहल जाला आ आयताकार मैदान पर खेलल जाला. अधिकतर राष्ट्रीय आ अंतरराष्ट्रीय टूर्नामेंट सिंथेटिक मैट पर खेलल जाला. इहां तक ले कि कई गो घरेलू प्रतियोगिता भी धीरे-धीरे माटी से मैट ओर बढ़ रहल बा. खिलाड़ी लोग मैट वाली सतह खातिर डिजाईन कईल गईल सपाट तल वाला जूता पहिनेला.

सर्कल स्टाइल वाला कबड्डी अभी भी माटी वाला जमीन पर गोलाकार पिच पर खेलल जाला जेकर व्यास 22 मीटर होला. हर टीम में रेडर्स आ स्टॉपर्स लोग होलें. जब एगो रेडर विरोधियन के सर्कल में प्रवेश करेला त ओके चार गो स्टॉपर्स के सामना करे के पड़ेला. पहिला स्टॉपर जेके रेडर छुयेला, ओके रेडर के अपनी जोन में लौटे से रोके के होला. ओ समय खेल एगो एकल मुकाबला में बदल जाला हालांकि हमला के अनुमति ना होला. हर रेड में उहे नियम लागू होला– चार गो स्टॉपर लोग मैदान पर उतरेला आ सफल रेड से रेडर के टीम के एक अंक मिलेला जबकि असफल रेड से विपक्षी टीम के एक अंक मिल जाला. आमतौर पर एगो टीम में 12 गो खिलाड़ी होलें सन बाकिर कुछ ग्रामीण टूर्नामेंट में खिलाड़ियन के संख्या अलग भी हो सकेला.

ए तरह के कबड्डी के ना त कवनो औपचारिक खेल संरचना मिलल बा आउर ना ही आधिकारिक मान्यता. ई समुदाय के समर्थन पर ही फल-फूल रहल बा. एकरा अलावे ई शायद भारत के एकमात्र ग्रामीण खेल हवे जवन बिना कवनो औपचारिक प्रणाली के खाली जीयते नईखे बल्कि हर साल अउरी मजबूत होत जात रहल बा.

पंजाब के 12,500 से अधिक गांवन में लगभग हर जगह टूर्नामेंट आयोजित होला. खेती करे वाला समुदाय धन से मदद करेला, जबकि गांव के अप्रवासी भारतीय लोग (एनआरई लोग) दिल खोल के समर्थन देला. राज्य में टूर्नामेंट में प्रवेश निशुल्क हवे, काहे कि एके खेल से जादे त्यौहारन मानल जाला. टूर्नामेंट के आकार के अनुसार दर्शकन के संख्या 5,000 से 50,000 ले हो सकेला.

पुरस्कार के राशि बहुत अलग-अलग होला. एगो बढ़िया टूर्नामेंट के बजट 10-50 लाख रूपया ले हो सकेला, आ साथ में पुरस्कार में कार, मोटरसाइकिल आ इहां तक कि कंबाइंड हार्वेस्टर भी शामिल होला. हर प्रतिभागी टीम के उपस्थिति शुल्क मिलेला जेके 12 खिलाड़ियन में बांटल जाला. जईसे-जईसे टीम आगे बढ़ेले, पुरस्कार आ भुगतान बढ़त जाला आ विजेता खातिर विशेष पुरस्कार होला. व्यक्तिगत पुरस्कार– सर्वश्रेष्ठ रेडर या स्टॉपर, नकद आ सामान दूनो रूप में दिहल जाला. ढेर बजट वाला आयोजनन में शीर्ष खिलाड़ियन के अक्सर हार्ले डेविडसन बाइक, ट्रेक्टर या महिंद्रा थार जईसन व्यक्तिगत पुरस्कार भी दिहल जाला.

सबसे बड़ टूर्नामेंट शीर्ष खिलाड़ी लोग के बिदेस से लौटला पर नवम्बर के बाद आयोजित कईल जाला.

“हम इ टूर्नामेंट के जीयले बानी, पहिले एगो खिलाड़ी के रूप में, फिर दर्शक के रूप में आ अब आयोजक के रूप में,” लेहल खुर्द के 42 साल के बलकार सिंह बतावेलन. “कबड्डी पीढ़ियन से पंजाब आ पंजाबियन के पहचान रहल ह. हमनी के कबड्डी के सितारा लोगन के कहानी देखत, खेलत आ सुनत के बड़ भईल बानी जा.”

संगरूर जिला के लेहल खुर्द गांव के रास्ता अपनी ओर हल्ला कर के ना बोलावेला. बाकिर एकरी प्रवेश द्वार पर नायक गुरजंत सिंह के पुतला गर्व से खड़ा बा जे 1971 के भारत-पाकिस्तान युद्ध के शहीद आ वीर चक्र के पुरस्कार प्राप्तकर्ता रहलें. ए बहादुर बेटा के याद में गांव 1972 से हर दिसम्बर में कबड्डी टूर्नामेंट के आयोजन कर रहल बा. ए साल के टूर्नामेंट 11 से 13 दिसम्बर तक आयोजित भईल आ ओही दिने खतम भईल जहिया नायक गुरजंट सिंह अपनी जीवन के आहुति देले रहलें.

कार्यक्रम के शुरुआत 11 दिसम्बर के पूर्व सैनिकन के सम्मानित कर के भईल आ एकरी बाद बच्चन के मैच भईल. दर्शक में महिला लोगन के संख्या लगभग ना के बराबर रहे बाकिर आयोजक लोग महिला प्रदर्शन मैच के जरिये एगो नया प्रयोग करे के कोशिश कईलें. एगो नया प्रतियोगिता के रूप में ट्राली लोडिंग प्रतियोगिता भईल. टीम 75 बोरा हटवलस आ हर बोरा में 35 किलो अनाज भरल रहे. ओ लोगन के ताकत आ सहभागिता खातिर जोरदार ताली बजा के उनकर सम्मान कईल गईल. अंतिम मैच रात के 2 बजे ले चलल.

ए गांव में 2,600 मतदाता बाड़ें जेमे अधिकांश लोग जट्ट सिख हवें आ एइजा टूर्नामेंट के एगो सामूहिक कर्तव्य के तरह मानल जाला. पूरा पंचायत एमे योगदान देला आ तैयारी महीनन पहिले से शुरू हो जाला. ई आयोजन एगो छोट ग्रामीण अर्थव्यवस्था के बढ़ावा देला, छोला-कुलचा, गन्ना के रस आ मूंगफली बेचे वाला लोग तीन दिन में महीना भर के कमाई कर लेवेला. हर उमिर के आदमी लोग मैदान में उपस्थित रहेला बाकिर ज़्यादातर दर्शक लोग युवा होलें. जईसे ही सूरज डूबेला आ फ्लडलाइट चालू होला, बुजुर्ग लोग अपनी घरे लौट जालें आ युवा लोग देर रात ले अंतिम कड़ा मुकाबला के रोमांच खातिर ओइजा जमल रहेलें.

जहां भी पंजाबी लोग गईल बाड़ें, कबड्डी उनकी संघे गईल बा चाहे उ कनाडा होखे, अमेरिका, ब्रिटेन या ऑस्ट्रेलिया. विदेशन में आयोजित टूर्नामेंट खाली खेल आयोजन ले सीमित नईखे बल्कि ई सांस्कृतिक मेला होला जवन उहां के समुदाय के पंजाब के माटी के धड़कन से जोड़ेला.

पंजाब भाषा विभाग के एगो शोध अधिकारी डॉ. सुखदर्शन सिंह चहल खेल के विदेश सम्बन्धन पर अपनी काम खातिर पीएचडी प्राप्त कईले बाड़ें; उनकर कहनाम बा, “पंजाब से विदेशी प्रवासन 20वीं सदी के शुरुआत में शुरू भईल आ जहां भी पंजाबी लोग गईलें, पंजाब शैली के कबड्डी अपनी संघे ले के गईलें. प्रवासन के शुरुआती दिशा कनाडा आ इंग्लैंड के ओर रहे एसे पंजाब शैली के कबड्डी सबसे पहिले ओइजे विदेश में आपन पैर जमवलस.

इंग्लैंड में 1950 के दशक से टूर्नामेंट आयोजित कईल जा रहल बा आ एकर सीजन मई से ले के अगस्त के शुरुआत ले चलेला. कनाडा में ई जून से सितम्बर ले चलेला आ एकरी बाद अमेरिका में टूर्नामेंट होला. विदेशी कैलेंडर मार्च से न्यूजीलैंड में शुरू होला आ अप्रैल में ऑस्ट्रेलिया में स्थानांतरित हो जाला. ए वैश्विक फैलाव से ई खेल सैकड़ों पंजाब खिलाड़ियन खातिर साल भर जीवकोपार्जन के स्रोत प्रदान करेला.

टैन ढेसी के नाम से लोकप्रिय ब्रिटिश सांसद तनमनजीत सिंह ढेसी (47) के कहनाम बा, “इंग्लैंड में पंजाबी समुदाय के कबड्डी से गहरा सम्बन्ध बा. ई उनकी संस्कृति आ परम्परा के हिस्सा हवे आ साथ ही अपनी जड़ से जुड़ल रहे के तरीका भी हवे.”

उमिर के 60वां फेंटा में पहुंचल कबड्डी प्रमोटर कुलवंत सांघा कहेलन, “पंजाब से आवे वाला नया खिलाड़ी इंग्लैंड के तीन महीना के सीजन में आसानी से 10 लाख रूपया कमा सकेला जबकि स्टार खिलाड़ी लोग 40-50 लाख रूपया कमायेलें.

कनाडा पंजाब से बाहर सबसे बड़ कबड्डी सर्किट के मेजबानी करेला. “हर साल लगभग 100 कबड्डी खिलाड़ी पंजाब से कनाडा आवेलें. एक खिलाड़ी एक सीजन में कम से कम 10 लाख रूपया कमाला जबकि शीर्ष 10-15 खिलाड़ी 50-70 लाख रूपया के बीच कमायेलें,” कनाडा स्थित प्रमोटर मनजीत सिंह लाली कहेलन.

कबड्डी के अर्थव्यवस्था खाली खिलाड़ी लोगन ले सीमित नईखे, एसे कोच, सहायक, कर्मचारी आ खास तौर पर कमेंटेटर लोगन के भी फायदा मिलेला.

“एगो कमेंटेटर सीजन में 10-12 लाख रूपया ले कमा सकेला. देश में इ लोग प्रति टूर्नामेंट 10,000-20,000 रूपया कमायेला,” सतपाल माही खडिल (43) बतावेलन जे पिछला 24 साल से माइक्रोफोन के पीछे काम कर रहल बाड़ें.

सतपाल एगो भूमिहीन दलित परिवार से हवें – उनकर पिता एगो दिहाड़ी मजदूर रहलें. “हमहूं मजदूर बन के रह जईतीं बाकिर हमके रेडियो पर खेल के कमेंटरी सुनल आ किताब पढ़ल पसंद रहे. एसे हमार हुनर में बढ़ोत्तरी भईल. कबड्डी से हमार सब कुछ बदल गईल- आज हमरी लगे एगो घर, एगो कार बा आ हम ऑस्ट्रेलिया, इंग्लैंड आ कनाडा के यात्रा भी कर चुकल बानी.”

सतपाल जईसन कमेंटेटर लोग टूर्नामेंट्स के जान होलें जे अपनी उर्जावान आवाज से हजारन दर्शकन के बांध के रखेलें. उ लोग खिलाड़ियन के परिचय देलें, रणनीति समझावेलें, उत्साह पैदा करेलें आ जब टूर्नामेंट्स अंतर्राष्ट्रीय स्तर पर होला त सांस्कृतिक पुल के काम करेलें.

एगो अउरी कमेंटेटर अमन लोपो (34) कहेलन, “हम 2007 में शुरू कईनी आ हमार पहिला विदेश के असाईनमेंट 2010 में कनाडा में रहे. तब से, हम हर ओ देश में इवेंट कवर कईनी जहां पेशेवर कबड्डी खेलल जाला.” मोगा के लोपो गांव के अमन के लगे खाली डेढ़ एकड़ खेती के जमीन बा. बाकिर कबड्डी के कमेंटरी से भईल कमाई से उ एगो ‘बढ़िया घर’ में रहेलन आ एसयूवी चलावेलें.

पूर्व खिलाड़ी गुरलाल सिंह घनौर पंजाब कबड्डी संघ के अध्यक्ष भी हवें आ ई खेल उनकरी खातिर सार्वजनिक जीवन में प्रवेश के एगो माध्यम बन गईल. इहां के अब आम आदमी पार्टी (एएपी) के टिकट पर घनौर से विधायक हवें. पंजाब कबड्डी संघ राज्य के चार प्रमुख कबड्डी संघन में से एक हवे जेमे वर्तमान आ पूर्व खिलाड़ी आ प्रचारक लोग शामिल बाड़ें. उनकी लगे पंजीकृत टीम बा आ उ लोग स्वतन्त्र रूप से टूर्नामेंट आयोजित करवावेलें.

जग्गा गालिब नाम से मशहूर लुधियाना के गालिब कलां गांव के रहे वाला जगदीप सिंह (43) जब 2001 में अइसन टूर्नामेंटन में हिस्सा लेवे शुरू कईले रहलें तब पईसा वाला इनाम एतना ढेर ना रहे. उ लगभग 20 साल ले खेललें आ अब कोच आ टैलेंट स्काउट के रूप में काम कर रहल बाड़ें. उनकर कहनाम बा की पिछला 15 साल में ए खेल में पईसा कई गुना बढ़ गईल बा.

बाकिर ए खेल में सफलता के संघे-संघे कड़वा प्रतिद्वंद्विता में भी वृद्धि भईल बा. खेल के प्रमुख सितारन में से एक ब्रिटिश-भारतीय खिलाड़ी संदीप नंगल अम्बिया (38) मादक पदार्थन के खतरा के खिलाफ अभियान चलावत रहलें आ जालंधर के मलियान खुर्द में एगो टूर्नामेंट के दौरान अपना के गोली मार लिहलें. पुलिस के संदेह बा कि ए हत्या के कारण कबड्डी के प्रतिद्वंद्विता रहे.

एगो अउरी नकारात्मक पहलू लैंगिक असमानता बा. इहां महिला लोगन खातिर बहुत कम अवसर उपलब्ध बा. इ एगो अइसन अंतर बा जेके मुख्य कबड्डी लीग – चार संघन में से एक आ, हर टूर्नामेंट में कम से कम एगो लड़कियन के मैच शामिल कर के पाटे के कोशिश कर रहल बा.

कुल मिला के देखल जाओ, त कबड्डी वास्तव में पंजाब के ग्रामीण धड़कन के रूप में अपना नाम पर खरा उतरल बा.

खिलाड़ियन के लोक-नायकन निहर प्रतिष्ठा होला आ ओ लोगन के गीतन में आ गांव के सभा में सम्मानित कईल जाला. दिलजीत दोसांझ से लेकर स्वर्गीय सिद्धू मूसेवाला तक, कई गो गायक लोग ए खेल के श्रद्धांजलि दे चुकल बा. बब्बू मान के गाना ‘कबड्डी कबड्डी’ के यूट्यूब पर 11 मिलियन से अधिक बेर देखल जा चुकल बा.

आ जब ए कुल के बदला देवे के बारी आवेला त ई खिलाड़ी लोग हमेशा आगे रहेला. सितम्बर 2020 में लागू तीन कृषि कानूनन के खिलाफ दिल्ली के सीमा पर नवम्बर 2020 में शुरू भईल धरना कानूनन के रद्द होखे तक एक साल से अधिक समय ले चलल. जईसे-जईसे दिन हफ्ता में आ फिर महीना में बदलत गईल आ समय बढ़ते जात रहे, समुदाय के लोग किसानन के पीछे मजबूती से खड़ा हो के उनकर समर्थन कईलें. डॉक्टर लोग स्वेच्छा से काम कईलें, लोकप्रिय गायक लोग प्रदर्शन कईलें आ कबड्डी खिलाड़ी लोग मिल के धरना स्थल के एगो खेल के मैदान में बदल दिहलें ताकि सबकर मनोबल उंच बनल रहे.

साल 2020-21 में संसद में पारित तीन कृषि कानून किसान (सशक्तिकरण एवं संरक्षण) मूल्य आश्वासन एवं कृषि सेवा समझौता अधिनियम 2020, किसान उत्पाद व्यापर एवं वाणिज्य (प्रोत्साहन एवं सुविधा) अधिनियम 2020 आ आवश्यक वस्तु (संशोधन) अधिनियम 2020 के खिलाफ पूरा देश के किसान लोग एकट्ठा भईलें. सरकार नवम्बर 2021 में ए कानूनन के रद्द कईला के सहमति दिहलस. आन्दोलन से जुड़ल पारी के स्टोरीज पढ़ीं: कृषि कानूनन के विरोध: फुल कवरेज

सिंघु आ टिकरी में खिलाड़ी लोग खाली मैचन में हिस्सा ना लिहलें बल्कि धरना में अनुशासन बनाये रखे में आ कुल सर-सामान संभाले में भी स्वयंसेवक के तौर पर योगदान दिहलें फिर लंगर (सामुदायिक रसोई) में भी योगदान दिहलें जेसे खेल आ समाज के बीच के सम्बन्ध मजबूत भईल.

मेजर कबड्डी लीग के सचिव फुटबाल खिलाड़ी से कबड्डी प्रमोटर बनल टोनी संधू ए टूर्नामेंट के आयोजन कईलें, उनकर कहनाम बा कि कबड्डी खिलाड़ी हमेशा किसानन से सम्बंधित कवनो भी मुद्दा पर प्रतिक्रिया देवे वाला लोगन में से होलें.

उद्घाटन वाला कबड्डी विश्व कप 2010 के कप्तान मंगत सिंह मांगी ए भावना के समझावेलें. “कबड्डी एगो ग्रामीण खेल हवे जेके ग्रामीण युवा खेलेलें आ समुदाय एके बना के रखेला. कबड्डी खिलाड़ी अलग कईसे रह सकेलें?” जालंधर के बग्गा गांव के मंगत सिंह (41) कहेलन जिनके कबड्डी के राजा भी कहल जाला. “हम आज जवन कुछ भी बानी उ कबड्डी आ ओ समुदाय के वजह से बानी जे ए खेल के पीछे मजबूती से खड़ा बा.”

अनुवाद: विमल चन्द्र पाण्डेय