जड़कल्ला तिहार के गुरतुर कलेवा हुरडा

चूल्हा के आगि ले निकरत धुंवा अऊ झुराय जुवार के महक हवा मं बगरे हवय. हुरडा तिहार चलत हे! तुरते टोर के लाय जुवार, जेन ला हुरडा के नांव ले जाने जाथे,एक ठन लोकप्रिय व्यंजन आय, येती किसान मन अपन फसल धरके आय हवंय अऊ मराठवाड़ा के गाँव अऊ कस्बा मन मं स्टॉल लगाय हवंय.

“लोगन मन आतुर होके अगोरत हवंय,” लोंढयाचीवाड़ी के जुवार कमेइय्या किसान सूर्यकांत मैंद कहिथे. वो ह जालना जिला के अपन पांच एकड़ खेत मं बेदरी अऊ मालडंडी किसिम के जुवार कमाथे. ये परिवार ह अग्घन (दिसंबर) मं आधा फसल लू लेथे, जब फसल ये बखत कोंवर घलो होथे, बाकि फसल माघ धन फागुन (फरवरी या मार्च) मं लुये जाथे, जब वो ह पाक जाथे.

भारी जतन करके टोरे कोंवर जुवार के फसल (हुरडा) ला धर के, मैंद जालना शहर डहर निकर परथे. 55 बछर के किसान कहिथे के वो ह हर सीजन मं करीबन 40 किलो कोंवर जुवार 150 रूपिया किलो के हिसाब ले बेचथे.

स्टॉल मं हुरडा बनाय के कम धीरे अऊ पहिली ले तय मुताबिक काम आय अऊ ये मं माईलोगन मन के असल हाथ रहिथे. जुवार के कोंवर जुफ्फा ला जुन्ना सूखाय जुवार के ढेंठा ले खंचवा मं झुरे जाथे. झुरी मन ला अलटे-पलटे अऊ एक समान भुने बर लंबा छड़ी काम मं लाय जाथे. बखत के धियान रखे महत्तम आय. छत्रपति संभाजीनगर (पहिली औरंगाबाद) जिला के 45 बछर के किसान भीमा नाना दखने बताथे, “येला बनेच जल्दी हेर दे जाय त पके नइ रहय; येला बनेच बखत तक राखे रहे ले ये ह सूख जाथे.”

भुनाय के बाद, माईलोगन मन भूसी निकारे बर दाना ला अपन हथेली मं रमजथें. ओकर बाद रांधे के काम सुरु होथे. “बिहनिया ले लेके बनेच संझा तक मंय आन माईलोगन मन के संग रंधनीच मं रहिथों,” सविता दखने कहिथे. “हमन ला खेत ले सीधा अवेइय्या जिनिस मन ला परोसे मं गरब मसूस होथे.”

महाराष्ट्र जुवार के सबले बड़े उत्पादक आय - भारत के कुल जुवार उत्पादन 4.80 करोड़ टन (2020-21) के 36 फीसदी इही राज मं होथे. फेर, अब राज मं कम किसान जुवार कमावत हवंय – राज मं ये फसल के रकबा 2013-14 मं 2.80 करोड़ हेक्टेयर से घटके 2018-19 मं 1.60 करोड़ हेक्टेयर आगे हे, पीआईबी के एक ठन विज्ञप्ति मं ये बात कहे गे हवय.

अकास भरोसा नइ होय सेती, इलाका के किसान बोर अऊ टपक सिंचाई काम मं लाथें, मैंद के गांव मं कोनो केनाल नइ ये. ओकर कहना आय के हाल के बछर मं कम पानी गिरे सेती घाम मं बोर मं सूखा गे हें. वो अपन खेत मं सोयाबीन, दार अऊ गहूँ घलो कमाथे, अऊ संगे-संग बछर भर साग भाजी घलो कमाथे.

शेवाले जइसने किसान मन के कहना आय के बिक्री गिरे हवय, फेर औरंगाबाद जिला मं अभू घलो लोगन मन के पसंद के कतको जगा हवंय जइसे नानाचिवाड़ी (चिकलथाना गाँव), खाटोड़ (कचनेर गाँव), महाकाल (ताहेरपुर गाँव) अऊ देवगिरी (धुरकिन गाँव), जिहां ये सीजन मं हजारों लोगन मन आथें.

लोगन मन महाराष्ट्र भर ले अऊ ओकर बहिर ले आथें - औरंगाबाद शहर के बहिर इलाका मं, जालना रोड तीर, किसान अऊ ओकर परिवार हरियर रंग के तंबू के आगू घूमत रहिथें, गोठियावत रहिथें अऊ नान-नान लइका मन खुल्ला जगा मं खेलत रहिथें.

ताते-तात हरियर अनाज ला गुर, दही अऊ चटनी के संग परोसे जाथे. सविता कहिथे, “ये कठिन काम आय, फेर जब पहुना खाना ला सरहथे, त लागथे के मिहनत सुफल होगे.” 35 बछर के सविता मुचमुचा परथे अऊ बताथे के कइसने हुरडा पार्टी ओकर बड़े परिवार ला एक जगा ले आथे: “इहाँ तक के हमर घर के नान-नान नोनी मन घलो मदद करथें –वो मन हमन लेवो सब्बो सीखत हवंय, ठीक वइसनेच जइसने हमन अपन महतारी ले सीखे हवन.”

हुरडा ला दीगर पारंपरिक महाराष्ट्रीयन व्यंजन जइसने के भजने पीसान (भुनाय जुवार, चना दार अऊ हुरडा मिझारे) ले बने थालीपीठ, कोतिम्बिरवड़ी (ताजा धनिया अऊ चना के आटा) अऊ मसालेदार मूंगफली के चटनी संग परोसे जाथे. “ गुर येकर मीठ ला बढ़ाथे. अऊ लेसुन धन मूंगफली वाले चटनी येला अऊ घलो मीठ बनाथे. दही स्वाद ला अऊ घलो मीठ बना देथे,” नानाचीवाड़ी पार्टी मं आय उर्वा अमृतकर कहिथे.

ये इलाका के कतको लोगन मन बर ये ह सीजन के अनाज खाय के अऊ ओसध दूनों आय. सूर्यकांत मैंद कहिथे, “ये ह देह ला गरम रखथे अऊ पचे मं मदद करथे.”

हुरडा के बखत ह उपराहा कमई बर घलो बढ़िया होथे. सुनीता तांगड़े जड़कल्ला के अपन कमई बचाके बछर भर के दीगर खरचा चलाथे. 26 बछर के सुनीता कहिथे, “मंय सिरिफ ये तीन महिना काम करथों.” 16 बछर के उमर मं बियाहे सुनीता बर हुरडा के सीजन, जीविका के जरिया आय. वो ह अपन किसान ददा ज्ञानेश्वर शेवाले बर काम करथे, जेन ह छत्रपति संभाजीनगर जिला के चिकलथाना गाँव मं भाड़ा मं एक जगा लेके हुरडा पार्टी करथे.

शेवाले कहिथे, “अब बनेच अकन नव हुरडा सेंटर खुल गे हे, येकरे सेती भीड़ बंटत हवय.” लागत घलो बढ़त हवय. “पहिली हुरडा हमन ला 90-100 रूपिया किलो परत रहिस, अऊ अब ये ह 150-160 रूपिया किलो हवय. भूने बर कंडा घलो 2.50 ले 3 रूपिया किलो हवय, अऊ हमन ला एक किलो भूने बर 15 ठन कंडा लागथे.”

ओकर बाद घलो, हुरडा पार्टी मं कमी आय के कोनो आरो नइ ये. साथ बछर के अलका अमृतकर कहिथे के हुरडा तिहर वोला विदर्भ के माटी ले जोड़थे, जिहां लोगन मन जुवार के जगा हरियर गहूँ ला भूनथें. वो ह हांसत कहिथे, “मराठवाड़ा मं जुवार के चलन हवय. फेर तुमन जिहां जावव, मंसा एकेच आय – फसल के तिहार, अपन लोगन मन के मेल मिलाप.”

अनुवाद: निर्मल कुमार साहू