’جاب کارڈ تو ہے، لیکن کام نہیں ملا‘

صبح کا وقت ہے اور کافی ٹھنڈ ہے، اس لیے منور پھاٹہ (جنکشن) پر بڑی تعداد میں کسان بجھتی ہوئی آگ کے ارد گرد پہنچنے کی کوشش کر رہے ہیں۔ پچھلی رات بھی کافی سردی تھی، اور صبح ہوئی تو اس میں کوئی بہتری دیکھنے کو نہیں ملی، جیسا کہ لکشمی دتّو بوبا بتاتی ہیں، ’’ایسا لگ رہا تھا گویا اوپر سے بارش ہو رہی ہو – ہمارے بدن پر ٹھنڈا پانی گر رہا ہو۔‘‘

ٹھنڈ جتنی شدید تھی، اس سے کہیں زیادہ شدید اس ۴۶ سالہ آدیواسی کسان کا غصہ تھا، جو زمین، پانی، اور اس سے بھی زیادہ اہم، مزدوری کے کام سے متعلق مسائل کو لے کر تھا۔ انہی کی طرح، ہزاروں مرد و خواتین نے اپنے زمینی پلاٹ کی باقاعدگی، پینے کے پانی، اور سب سے اہم، مزدوری کے کام کی فراہمی جیسے طویل مدتی مسائل کو حل کرانے کے لیے پالگھر ضلع کے کلکٹریٹ تک پیدل مارچ کیا۔ وہ بھی ایک باعزت زندگی گزارنا چاہتے ہیں، اس لیے یہ معاملے ان کے لیے بہت ضروری ہیں۔

’’پورا سال تو چھوڑ دیجئے، ہمیں روجگار حامی یوجنا کے تحت ایک دن کا بھی کام نہیں ملتا،‘‘ غصے سے بھری ہوئیں لکشمی کہتی ہیں۔ ان کا اشارہ مہاتما گاندھی قومی دیہی روزگار گارنٹی قانون (منریگا) کی طرف تھا۔ مرکزی حکومت نے حال ہی میں اس قانون میں ساختیاتی تبدیلیاں کی ہیں اور اس کا نام بدل کر ’وکست بھارت – جی رام جی ایکٹ (وی بی-جی رام جی) کر دیا ہے، جس میں کام کی قانونی ضمانت دینے کا وعدہ کیا گیا ہے اور اس پروگرام کے لیے رقم کی فراہمی کا زیادہ تر بوجھ ریاستوں پر ڈال دیا گیا ہے۔

سی پی آئی (ایم) اور آل انڈیا کسان سبھا کی مہاراشٹر اکائی کے ذریعہ نکالے گئے اس احتجاجی مارچ میں شرکت کرنے والے ہزاروں کسانوں کا ایک کلیدی مطالبہ یہ تھا کہ انہیں کم از کم ۶۰۰ روپے کی یومیہ اجرت کے ساتھ ایک سال میں ۲۰۰ دنوں کا ضمانت شدہ روزگار دیا جائے۔ یہ مارچ ۱۹ جنوری، ۲۰۲۶ کو شروع ہوا تھا، اور ڈسٹرکٹ کلکٹر کے ذریعہ ہر ایک مطالبہ کو پورا کروانے کا وعدہ کرنے کے بعد اسے ۲۱ جنوری کو ختم کر دیا گیا۔

لکشی کا تعلق تاوا سے ہے، جو تھانے ضلع میں وارلی آدیواسیوں کا ایک چھوٹا سا گاؤں ہے۔ ’’ہمیں پانچ سال پہلے جاب کارڈ ملا تھا، لیکن ہم میں سے کسی کو بھی اب تک کوئی کام نہیں ملا ہے۔ مرد تو شہر چلے جاتے ہیں، لیکن سبھی عورتیں ان کے ساتھ وہاں نہیں جا سکتیں، اس لیے جو پیچھے چھوٹ گئی ہیں انہیں زندہ رہنے کے لیے کچھ تو کام ملنا ہی چاہیے،‘‘ وہ مضبوطی کے ساتھ کہتی ہیں۔

اسی وجہ سے لکشمی نے ڈہانو بلاک میں واقع اپنے آدیواسی گاؤں کے ۱۵۰ لوگوں کے ساتھ اس پیدل مارچ میں حصہ لیا تھا۔ پہلے دن کے اختتام پر، چاروٹی سے ۳۰ کلومیٹر کا فاصلہ طے کرنے کے بعد یہ لوگ منور-پالگھر روڈ کے قریب واقع ایک کھلے میدان میں رکے؛ تھکان تو تھی لیکن جذبہ کم نہیں ہوا تھا۔ اگلی صبح کو کافی بھاگم بھاگ تھی، کیوں کہ حوائج ضروریہ کے لیے وہاں بنائے گئے عارضی بیت الخلاء کے سامنے لوگوں کی قطاریں لگی ہوئی تھیں اور پانی کے ٹینکر سڑکوں کے کنارے کھیتوں میں تھے۔ مارچ میں شامل ضعیف لوگ ترپال پر لیٹے ہوئے تھے، جب کہ مردوں اور عورتوں کا گروہ چھوٹے چھوٹے دائروں میں بیٹھا ہوا خاموشی سے باتیں کر رہا تھا۔ وہیں، الگ الگ گاؤوں سے تعلق رکھنے والے لوگوں کا ایک گروہ انہیں گرما گرم کھچڑی پیش کر رہا تھا، تاکہ آگے کا مارچ کرنے سے پہلے ان کے پیٹ میں کچھ چلا جائے – کیوں کہ انہیں پالگھر کلکٹریٹ کی جانب ابھی ۲۳ کلومیٹر اور چلنا تھا۔

قومی دیہی روزگار گارنٹی قانون (نریگا) سال ۲۰۰۵ میں بنایا گیا تھا، جس کا نام ۲۰۰۹ میں بدل کر مہاتما گاندھی کے اعزاز میں منریگا کر دیا گیا۔ یہ قانون ہندوستان کے سب سے امید افزا سماجی تحفظ کے اقدام میں سے ایک تھا، جس کے تحت قانونی طور پر طے شدہ کم از کم اجرتوں کے ساتھ دیہی علاقوں کے ہر گھر کے افراد کو ہر سال ۱۰۰ دنوں کے غیر مہارتی کام دینے کی ضمانت دی گئی تھی۔ اس کا مقصد معاش کو بہتر کرنا، دیہی علاقوں کے بنیادی ڈھانچوں کی تعمیر، سماجی شمولیت کو فروغ، اور مقامی نظام حکومت کو مضبوط کرنا تھا، تاکہ اس سے عورتیں، درج فہرست ذاتوں اور درج فہرست قبائل کے لوگ فیضیاب ہو سکیں۔ لیکن حقیقت یہ ہے کہ بڑے بڑے دعووں کے باوجود، اس پروگرام کا پرانا ورژن بھی پوری طرح کامیاب نہیں ہو پایا تھا۔

ریاست کے نئے بنائے گئے ضلعوں میں سے ایک، دیہی پالگھر کے یہ لوگ اس قانون کو صحیح طریقے سے نافذ نہ کرنے کی وجہ سے ناراض ہیں۔ تاوا کے ہرشن کھڑکے نے پاری کو بتایا، ’’حامی یوجنا [ضمانت شدہ کام] کی اثر انگیزی بہت کم ہے۔ ہمارے گاؤں میں کوئی سڑک نہیں ہے، بجلی نہیں ہے، پانی کے ذرائع نہیں ہیں۔ گاؤں کے لوگوں کو کوئی کام مہیا نہیں کرایا جا رہا ہے کیوں کہ وہاں کوئی دیہی بنیادی ڈھانچہ ہی نہیں ہے۔‘‘

اس مارچ میں لوگوں کا غصہ اور ان کی بے چینی صاف دکھائی دے رہی تھی۔

کئی لوگوں کا خیال تھا کہ منریگا صرف کاغذوں پر تھا، بھلے ہی آج غلط ارادے سے اس کا نام بدل کر اسے اور خراب کر دیا گیا ہو۔ بچّو موہنکر یاد کرتے ہیں کہ انہیں ۲۰۲۴ میں صرف ۱۶ دنوں کا کام ملا تھا، جب ان سے ایک چھوٹے سے باندھ میں کھدائی کر کے اس کی ریت کو باہر نکالنے کے لیے کہا گیا تھا۔ ’’ہم ۴۰-۵۰ لوگ تھے، بندھاریاچا گاڑ کاڑھائلا [باندھ سے ریت نکالنے کے لیے]،‘‘ ۵۶ سالہ بچّو کہتے ہیں۔ ان کے پاس اُس بھرے ہوئے کاغذ کا ریکارڈ بھی موجود ہے، جس پر کام کی تکمیل کا بیورہ درج ہے۔ ’’لیکن مجھے پیسے کبھی نہیں ملے۔ میں روجگار سیوک [روزگار افسر] سے رابطہ کرتا رہا۔ لیکن اس کا جواب ہمیشہ یہی ہوتا تھا، ’آئے گا، آئے گا۔‘ میں نے جو کڑی محنت کی تھی، آخر اس کا پیسہ کیوں نہیں آیا؟‘‘ وہ سوال کرتے ہیں۔

بچّو کو دوبارہ کبھی کام نہیں ملا۔ ’’مجھے سمجھ نہیں آتا کہ ایسے میں یہ کام کی حامی [گارنٹی] کیسے ہے؟‘‘ وہ پوچھتے ہیں، اور اپنے ہاتھ کے گہرے گھٹّے کو دکھاتے ہیں، جو سخت کام کرنے کی وجہ سے پڑ جاتے ہیں۔

تھانے اور پالگھر ضلع کے گاؤوں میں اس قسم کا غصہ اور بے چینی ہر جگہ موجود ہے، جس میں ڈہانو تعلقہ بھی شامل ہے، جہاں سب سے کمزور قبائلی برادریاں رہتی ہیں۔

’’صرف [منریگا کا] نام بدل دینا ہی کافی نہیں ہے،‘‘ مُرباڑ گاؤں کے ۴۵ سالہ سکھا رام کھارپڑے کا کہنا تھا۔ ’’اور بھی کئی لوگوں کو کام اور اجرت کی ضرورت ہوتی ہے، لیکن گاؤں کے کچھ ہی لوگوں کو کام ملتا ہے – ایک بار میں [کام کی تلاش میں سرگرداں] سو میں سے صرف پانچ یا چھ لوگوں کو۔‘‘

جو لوگ جنگل کے مضافات میں رہتے ہیں، ان کے گزر بسر کے لیے موسمیاتی کھیتی کافی نہیں ہے۔ گاؤوں کے زیادہ تر لوگوں کے پاس کھیت کے چھوٹے چھوٹے ٹکڑے ہیں، جن پر صرف خریف کی فصل ہی اگتی ہے؛ سینچائی کا کوئی انتظام نہیں ہے۔ ایسے میں ضمانت شدہ کام ہی ان کی زندگی کو چلانے کا واحد ذریعہ بچ جاتا ہے، لیکن اکثر یہ کام انہیں ملتا ہی نہیں ہے۔

’’جنگل کی وہ زمینیں تو ہمارے نام پر ہی نہیں ہیں،‘‘ مینا فڑولے کا کہنا تھا۔ آدیواسی کسان حقوق جنگلات قانون، ۲۰۰۶ کے تحت اپنی زمین کا مالکانہ حق مانگ رہے ہیں۔ اس قانون میں درج فہرست ذاتوں اور روایتی طور پر جنگل میں رہنے والوں کے جنگلاتی زمین اور وسائل سے متعلق حقوق کو تسلیم کیا گیا ہے۔ پڑھیں: زمینی حقوق کے لیے ایک بار پھر لمبا مارچ

ان کی تکلیفوں اور معاش حاصل کرنے کی روزمرہ کی جدوجہد کی فہرست کافی لمبی ہے۔

’’سینچائی کا کوئی انتظام نہیں ہے کہ ہم یومیہ آمدنی کے لیے سال بھر سبزیاں اُگا کر انہیں بیچ سکیں۔ ہم محنت مزدوری کرنے کے لیے اینٹ بھٹوں پر جاتے ہیں یا تعمیراتی جگہوں پر کام کرنے کے لیے شہروں کا رخ کرتے ہیں،‘‘ سکھا رام کھارپڑے کہتی ہیں۔ ان کے، اور لکشمی اور بچّو جیسے دوسرے لوگوں کے لیے منریگا کے تحت معاش کے تحفظ کا وعدہ کبھی پورا ہی نہیں ہوا۔

’’ہمارے گاؤں میں تو نوجوان گریجویٹس کو بھی نوکری نہیں ملتی۔ آپ ہمارے بارے میں کیا پوچھ رہی ہیں جنہیں پڑھنا لکھنا بھی نہیں آتا؟‘‘ ۴۵ سالہ مینا کہتی ہیں، جنہوں نے کبھی رسمی تعلیم حاصل نہیں کی۔

سرکاری کاغذات سے ان تشویشوات کی تصدیق ہوتی ہے۔ دیہی روزگار کے پروگراموں سے متعلق کمپٹرولر اور آڈیٹر جنرل کے ۲۰۲۰ کے کارکردگی والے جائزہ میں کہا گیا ہے کہ منریگا جیسی اسکیموں میں اکثر مزدوروں کے پیسے کئی ضلعوں میں تاخیر سے ادا کیے گئے، حالانکہ قانونی طور پر آپ یہ پیسے ۱۵ دنوں سے زیادہ روک کر نہیں رکھ سکتے۔ سال ۲۰۲۵ کے اختتام پر منریگا کو بدل کر وی بی-جی رام جی کر دینے کی کافی تنقید ہو رہی ہے۔ نئے قانون میں کام کے دنوں کی تعداد ۱۰۰ سے بڑھا کر ۱۲۵ کی گئی ہے جو بہت زیادہ نہیں ہے، لیکن رقم کی فراہمی کا بوجھ ریاستوں پر ڈال دیا گیا ہے، تاکہ مرکز کی جوابدہی کو کم کیا جا سکے۔

دسمبر ۲۰۲۵ میں، ماہرین اقتصادیات بشمول جوزف اسٹگلٹز اور تھامس پِکیٹی نے ایک کھلا خط لکھ کر ہندوستانی حکومت کو آگاہ کیا تھا کہ اس قسم کی تبدیلی ایک ’’تاریخی غلطی‘‘ ہوگی، اور یہ بھی کہا تھا کہ دیہاتوں سے ہونے والی مہاجرت کو روکنے کے لیے وقت پر اجرتوں کی ادائیگی اور رقم کی یقینی فراہمی ضروری ہے۔

تاہم، مرکزی وزراء کا دعویٰ ہے کہ یہ اصلاح شدہ قانون ’’مطالعات اور ماہرین کی آراء‘‘ پر مبنی ہے، جن میں دھوکہ دہی سے متعلق تشویشوں کا ذکر کیا گیا ہے۔ لیکن، بہت سے کسانوں کا ماننا ہے کہ اس قسم کی باز یقین دہانیاں اُن کھیتوں اور روزمرہ کی محنت مزدوری سے کوسوں دور ہیں، جن سے ان کا گھر چلتا ہے۔

جنوری ۲۰۲۶ کے اس احتجاج میں، تھانے اور پالگھر ضلع کے کسانوں اور مزدوروں نے پالگھر کلکٹریٹ تک پہنچنے کے لیے ۵۵ کلومیٹر کا پیدل سفر کیا۔ سی پی آئی (ایم) اور آل انڈیا کسان سبھا (اے آئی کے ایس) کی قیادت میں نکالے گئے اس مارچ میں زمین سے متعلق حقوق، پانی، اور روزگار کے لیے مطالبات کیے گئے۔

ضلع انتظامیہ کے ساتھ لمبی بات چیت اور ان کے ہر ایک مطالبہ پر تحریری یقین دہانی کے بعد، یہ مارچ ۲۱ جنوری کی شام کو ختم کر دیا گیا۔

مہاراشٹر کسان سبھا کے سربراہ ڈاکٹر اجیت نَوَلے نے احتجاجیوں کو بتایا کہ انتظامیہ نے زمین کی جانچ سے لے کر حقوق کے نفاذ اور کام کی ضمانتوں تک، ان کے سبھی مطالبات کو ’’اگلے تین مہینوں کے اندر‘‘ پورا کرنے کی یقین دہانی کرائی ہے۔ انتظامیہ نے احتجاجیوں کے وفد سے کہا کہ وہ ان کے مطالبات کو حکومت تک پہنچا دے گی، تاکہ جہاں کہیں بھی ریاست کے دخل کی ضرورت ہو وہ اس میں مدد کرے۔

کسان اور مزدور جب واپسی کے لیے اپنے سامان باندھنے لگے، تو کلکٹریٹ کا احاطہ آہستہ آہستہ ۲۲ جنوری، بروز جمعرات کی صبح تک خالی ہو گیا۔ لوگوں نے واپسی کے سفر کے لیے اپنے کمبل، جھنڈے، اور کھانا پکانے کے برتن باندھ لیے تھے؛ وہاں شک و شبہ اور راحت کا ملا جلا ماحول تھا۔

’’ہمیں بتایا گیا کہ حکومت نے ہمارے مطالبات کو تسلیم کر لیا ہے اور انہیں تین مہینوں میں پورا کر دیا جائے گا،‘‘ لکشمی نے اپنے گاؤں والوں کے ساتھ ٹیمپو پر سوار ہونے سے پہلے کہا۔ ’’اگر انہوں نے اپنے وعدے پورے نہیں کیے، تو ہم دوبارہ آئیں گے – دوبارہ مارچ کریں گے۔‘‘

ترجمہ نگار: قمر صدیقی