پانی، جنگل، اور زیور

چندرما، کاٹھ گولاپ (چمپا؛ فرینگپنی، یا پلومیریا روبرا) کے خوشبودار، کریمی سفید اور زرد پھولوں کو ایک لمبی مالا میں پرو رہی ہیں۔ ان کی تین سنہری نتھیں جو انہوں نے پہن رکھی ہیں، اپریل کی یہ تیز سنہری دھوپ ان کے ہاتھوں میں موجود چمپا کے پھولوں کے گہرے زرد مرکزی حصہ سے بھی زیادہ چمک رہی ہیں۔ وہ اور ان کی گدبا آدیواسی برادری کی ۲۰ دیگر خواتین، اوڈیشہ کے کوراپُٹ ضلع کے پوت پنڈی گاؤں کے ٹھیک باہر کھلی جگہ پر مالائیں پرونے میں مصروف ہیں۔ ان سب نے دو یا تین نتھیں پہن رکھی ہیں۔

’’یہ جو نتھ دائیں طرف ہے، اسے ہم بیسری کہتے ہیں، درمیان والی کو دوندی، اور بائیں والی کو نتّو۔ میں اسے ہمیشہ ہی پہنتی آئی ہوں۔ شاید، میں انہیں پہن کر ہی پیدا ہوئی تھی،‘‘ ۷۰ سال کی چندرما گدبا ہنستے ہوئے کہتی ہیں۔ ان کی دوندی تھوڑی اوپر اٹھتی ہے، جس سے ان کے نچلے ہونٹ جھلکتے ہیں، جو عام طور پر ان کی ناک کے درمیانی حصہ سے لٹکی سونے کی گھنٹیوں سے ڈھکے رہتے ہیں۔

’’پہلے ہمارے گدبا قبیلہ میں، لڑکیوں کو بہت چھوٹی عمر میں ہی یہ تینوں نتھیں پہنا دی جاتی تھیں۔ لیکن اب وہ دیر سے ناک میں سوراخ کرواتی ہیں – عموماً پانچ یا دس سال کی عمر کے بعد۔ اور کبھی کبھی تو نوجوان لڑکیاں ناک میں سوراخ کروانا پسند ہی نہیں کرتیں،‘‘ وہ بتاتی ہیں۔ ہر جملے کے ساتھ ان کے ہنرمند ہاتھ تازہ توڑے گئے پھولوں کی ایک لڑی مالا میں پروتے رہتے ہیں۔ یہ مالائیں شام کو تب کام آئیں گی جب مرد شکار سے لوٹیں گے اور ان کا استقبال ہوگا۔ یہ چَیت پرب (یا چیتر پَرو) کا وقت ہے۔

چیت پرب ۱۴ دن تک چلنے والا زرعی تہوار ہے، جسے اوڈیشہ اور جھارکھنڈ کے کئی آدیواسی قبیلے مناتے ہیں۔ یہ چیتر مہینہ کی شروعات کا اشارہ ہے، جو ہندو کیلنڈر کا پہلا مہینہ ہے۔ تہوار کا وقت، یعنی اپریل کا وسط، روایتی طور پر کھیتوں کے کام سے چھٹی کا وقت ہوتا ہے، جب ہوا میں گرمیوں کے گیت اور موسمی پھل پھولوں کی خوشبو بھری ہوتی ہے۔ گدبا برادری کی نوجوان اور بزرگ عورتیں گیت گاتی ہیں، رقص کرتی ہیں، شراب پیتی ہیں، گاؤں کے دیوتاؤں کو کچے آم چڑھاتی ہیں اور شکار پر گئے مردوں کے استقبال کے لیے مالائیں گونتھتی ہیں۔

یہ روایت کبھی ان برادریوں کی زندگی، غذا، روحانیت اور جنگل کے حیاتیاتی نظام کے شاندار تال میل کی علامت تھی۔ مرد اپریل مہینہ میں شکار پر جاتے تھے، کیوں کہ کھیتوں میں تب کوئی فصل نہیں ہوتی تھی اور جنگل کے قریب رہنے والے قبائل جنگلی بیر، پھل اور جنگلی جانوروں پر زیادہ منحصر رہتے تھے۔ ان کے ذہن میں ہمیشہ سے جنگل پر منحصر رہنے کا جذبہ تھا، لیکن اس کا بیجا استعمال کیے بغیر۔ گزشتہ کچھ دہائیوں سے، جنگلاتی حیات کے تحفظ کا قانون، ۱۹۷۲ کے تحت جنگلی جانوروں کے شکار پر روک لگانے کے بعد، شکار کی روایت صرف علامتی رہ گئی ہے۔ اب مرد جب مچھلی کا شکار کر کے لوٹیں گے، تو شاید انہیں وہی مالائیں پہنائی جائیں گی، جو چندرما اور دیگر عورتیں گونتھ رہی ہیں۔

چندرما جلدی سے ایک لمبی مالا اپنے سر کے چھوٹے سے جوڑے پر باندھ لیتی ہیں اور زیورات کے بارے میں بتانا جاری رکھتی ہیں، ’’بیسری، دوندی اور نتّو، یہ گدبا، پرجا، ڈونگرا اور کئی دوسری آدیواسی برادریوں کی عورتیں پہنتی ہیں۔ کچھ عورتیں میری طرح لال پتھر جڑی سونے کی دوندی پہنتی ہیں، تو کچھ صرف بیسری اور نتّو پہنتی ہیں۔ بائیں اور دائیں نتھوں کو بُلک بھی کہتے ہیں۔‘‘

اوڈیشہ کے ۶۴ درج فہرست قبائل میں کل ۳۰ قبائل کوراپُٹ ضلع میں رہتے ہیں، جن میں گدبا ایک اہم آدیواسی گروہ ہے۔ ریاست کے تقریباً ۶۰ ہزار گدباؤں میں سے تقریباً ۸۰ فیصد اکیلے کوراپُٹ میں رہتے ہیں۔ اس برادری کی زندگی اپنے ماحولیات پر پوری طرح منحصر ہے۔ ’’یہ لوگ اپنا زیادہ تر وقت جنگل سے ایندھن، لکڑی، کھانا، کیندو پتے وغیرہ جمع کرنے میں گزارتے ہیں،‘‘ بِدیُت موہنتی کہتے ہیں۔ وہ اس خطہ میں ایک غیر منافع بخش ادارہ چلاتے ہیں، جو آدیواسیوں کے درمیان مشترکہ وسائل کی حفاظت کے لیے بیداری پھیلانے کا کام کرتا ہے۔ ’’ان کا جنگل سے رشتہ ان کی ثقافت، طرز زندگی اور معاش میں جھلکتا ہے،‘‘ وہ اپنی بات پوری کرتے ہیں۔

’’ہم ان کے [جنگل اور چرند و پرند کے] ساتھ رہتے ہیں، اس لیے انہیں پہنتے ہیں،‘‘ ۶۷ سالہ کلاما گدبا اپنے ننگُل (کان کی بالیاں) دکھاتے ہوئے کہتی ہیں۔ سانپ کی شکل کی سونے کی بالیاں جو تقریباً ایک سینٹی میٹر چوڑی ہیں، ان کے کانوں میں لٹک رہی ہیں۔ ’’ہم جنگل کے لوگ ہیں، اور یہ سانپ بھی۔ یہ ہمارے دوست ہیں،‘‘ وہ مزید کہتی ہیں۔ وہ اسی گرام پنچایت مہادیو پور کے محلہ میں رہتی ہیں، اور ان سے میری پہلی ملاقات مالائیں گونتھتے وقت ہوئی تھی۔

وہ قریب کے تالاب میں کھانے کے لیے مچھلیاں پکڑنے آئی ہیں۔ ’’یہ بَیرا ہے،‘‘ وہ سانپ کے سر والی گرئی مچھلی دکھاتے ہوئے کہتی ہیں۔ ’’گزشتہ ایک دہائی سے سبزیاں اور کُکُرمُتّے نایاب ہوتے جا رہے ہیں۔ بہت زیادہ گرمی پڑ رہی ہے، اور ہر سال جنگل میں آگ لگ جاتی ہے، جو ہماری ہری سبزیاں کھا جاتی ہے،‘‘ کلاما بتاتی ہیں۔

’’ہمیں اپنے آس پاس جو ملتا ہے، وہی استعمال کرتے ہیں۔ پھولوں، لال مٹی اور پھلوں سے ہم اپنی لڑکیوں کی نوعمری سے نوجوانی [بالغ ہونے] کا جشن مناتے ہیں۔ شادی کی تقریبوں میں ہم پتّے، لکڑی اور پھولوں کا استعمال کرتے ہیں۔ لیکن اب سب کچھ غائب ہوتا جا رہا ہے – جیسے یہ ننگل،‘‘ کلاما کہتی ہیں۔

’’یہ جو بالیاں آپ دیکھ رہی ہیں، ہماری ثقافت کی نشانی ہیں۔ میں نے اپنی ماں اور دادی کو انہیں پہنے دیکھا اور وہ دونوں کانوں میں دو دو ننگل پہنتی تھیں۔ وہ کہتی تھیں کہ سانپ ہماری زمین اور جنگل کی نشانی ہیں۔ کوئی بھی لڑکی یا عورت اسے پہن سکتی ہے۔ یہ زیور سونے کا یا پیتل کا بنا ہوتا ہے۔ ایک جوڑی ننگل بنانے میں ایک تولہ [۶۶ء۱۱ گرام] سونے کی ضرورت ہوتی ہے،‘‘ کلاما بتاتی ہیں۔ ’’لیکن آج کل کی لڑکیاں انہیں نہیں پہنتیں۔ شاید اسی لیے ہمارے جل (پانی)، جنگل بھی خطرے میں ہیں۔‘‘

ترجمہ نگار: قمر صدیقی