जल, जंगल अऊ जेवर

चंद्रमा काठगोलाप (चंपा) (फ्रेंजिपानी, या प्लुमेरिया रूब्रा) के महकत झक उज्जर अऊ पिंयर फूल मन के लंबा माला बनावत हवय. ओकर सुग्घर सुनहरा नथिनी –तीन ठन- ये चइत (अप्रैल) के मंझनिया के झक पिंयर सुरुज के संग संग ओकर हाथ मं धराय सुग्घर चंपा फूल मन के बीच के पिंयर जगा ला घलो मात देवत हे. वो अऊ ओकर गदबा आदिवासी समाज के एक कोरी (20) आने माइलोगन मन ओडिशा के कोरापुट जिला के पुथपोंडी गाँव के ठीक बहिर एक ठन खुल्ला जगा मं माला पिरोय मं मगन हवंय. सब्बो मन दू धन तीन नथिनी पहिरे हवंय.

“जउनि डहर के नथिनी ला हमन बेसरी कहिथन, बीच वाले लादोंडी कहिथें, अऊ डेरी कोती के ला नत्तो. मंय ये मन ला हमेसा पहिरत आवत हवं. हो सकथे, मंय येकरेच संग जन्मे होंव,” 70 बछर के चंद्रमा गदाबा हांसत कहिथे. ओकर दोंडी थोकन ऊपर ऊठ जाथे, जेकर ले ओकर तरी के होंठ दिख जाथे नइ त ओकर नाक के लट/ पट ले लटके सोन के घंटी मं लुकाय रहिस.

“पहिली हमर गदबा जनजाति मं, नोनी मन ला बचपनाच ले तीनों ला पहिरा दे जावत रहिस. फेर अब वो मन, पांच धन दस बछर के उमर के बाद नाक छिदवाथें. कभू-कभू त कम उमर के नोनी मन ला अपन नाक छिदवाय निच्चट नइ भावय,” वो ह कहिथे. बोलत जावत, ओकर माहिर हाथ तुरते टोरे फूल के माला पिरोवत रहिस, जेन ला संझा के बखत खेदा (शिकार) ले लहूट के आय मरद लोगन मन के परघनी करे बखत पहिराय जाही. ये चइत परब (येला चैत्र पर्व घलो कहे जाथे) आय.

ओडिशा अऊ झारखंड के कतको आदिवासी समाज के मनेइय्या 14 दिन के खेती के तिहार, चैत परब,हिंदू कैलेंडर के पहिली महिना के चइत के सुरु होय के प्रतीक आय. ये तिहार, बीच चइत मं, पारंपरिक रूप ले खेती किसानी के सुस्ताय के बखत घलो होथे, जब हवा घाम के गीत अऊ ये सीजन के फर अऊ फूल ले भर जाथे. गदबा समाज के जवान अऊ सियान माईलोगन मन गाथें, नाचथें, मंद पीथें, गाँव के देंवता मन ला कइंच्चा आमा चढ़ाथें, अऊ खेदा करके लहूटे मरद लोगन मन ला परघाय बर माला पिरोथें.

ये रिवाज कभू ये समाज के जिनगी, वो मन के खाय के तरीका, आध्यात्मिक बिस्वास अऊ जंगल के पर्यावरन तंत्र के गियान के अनूठा संबंध के प्रतीक रहिस. मरद मन चइत बखत खेदा (शिकार) करे जावत रहिन काबर के वो बखत कोनो फसल खेत मं नइ रहय अऊ जंगल के तीर रहेइय्या समाज ला जंगली जामुन, फल अऊ जंगली जानवर उपर आसरित रहे ला परय. फेर वो मन के सोच-बिचार जंगल के नुकसान करे बगेर ओकर भरोसे रहे के रहिस. बीते कुछ दसक ले, खेदा के परंपरा के रसम ला निभाय जइसने होगे हवय, खास करके वन्यजीव संरक्षण अधिनियम, 1972 के तहत जंगली जानवर मन ला मारे मं रोक लगे के बाद ले. जानवर के जगा अब मरद लोगन मन मछरी धरके लहुटथें, त चंद्रमा अऊ दीगर लोगन मन माला पहिराके वो मन के परघनी करथें.

चंद्रमा तुरते अपन मुड़ मं बने नानकन जुड़ा मं लंबा माला बांध लेथे अऊ जेवर ला लेके गोठियावत रहिथे. “बेसरी, दोंडी अऊ नत्तो,गदबा, परजा, डोंगरा अऊ कतको आने आदिवासी समाज के माईलोगन मन पहिरथें. कुछेक माईलोगन मन मोर जइसने लाल पत्थर लगे सोना के दोंडी पहिरथें, फेर कुछु माईलोगन मन नाक के दूनों डहर सिरिफ बेसरी अऊ नत्तो पहिरथें.वो मन नाक के किनारा मं लगे नथिनी ला बुलक घलो कहिथें.”

ओडिशा के तीन कोरी चार (64) अनुसूचित जनजाति मन ले डेढ़ कोरी (30) कोरापुट मं रहिथें, अऊ गदबा वो मन ले एक ठन बड़े आदिवासी समाज आय. राज के करीबन 60,000 गदबा मन ले करीबन 80 फीसदी सिरिफ कोरापुट मं रहिथें. ये समाज के जिनगी अपन परिवेश ऊपर भारी आसरित हवय. विद्युत मोहंती, जेन ह ये इलाका मं आदिवासी मन मं सार्वजनिक संसाधन मन के सुरच्छा कोती जागरूकता बगराय बर एक ठन सेवा भावी संस्था चलाथें. कहिथें, “वो मन अपन अधिकतर बखत ये जंगल ले जलावन लकरी, इमारती लकरी, खाय के जिनिस अऊ तेंदू पत्ता टोरे मं गुजार देथें.” वो ह बतावत जाथे, “जंगल संग वो मन के नाता वो मन के संस्कृति, जिनगी गुजारे के ढंग अऊ जीविका मं झलकथे.”

67 बछर के कलमा गदबा कहिथे, “हमन ओकर संग रइथन, ते पायके पहिरथन.” वो ह मोला अपन नागुल, मतलब कान के कुंडल दिखावत रहिस. ओकर कान मं सोना के कुंडली मारे सांप जइसने लटकन रहिस, जेन मं हरेक एक सेंटीमीटर चाकर हवय. वो ह आगू कहिथे, “हमन जंगल के लोगन आन, अऊ ये साँप घलो. ये हमर संगवारी आंय.” कलमा, महादेवपुट के उहिच ग्राम पंचायत के एक ठन गाँव मं रहिथे जिहां चंद्रमा अऊ मोर भेंट होय रहिस. जब वो ह आने माइलोगन के संग माला बनावत रहिस.

वो ह लकठा के तरिया मं तिहार बर मछरी धरे आय हवय. “ये ह बयरा आय,” वो अपन हाथ मं सांप कस मछरी धरे कहिथे. “करीबन दस बछर ले साग-भाजी अऊ पुटू कम होगे हवय. भारी घाम परत हवय. अऊ हरेक बछर जंगल मं आगि लग जाथे जेन ह हमर हरियर फसल खा जाथे,’ कलमा कहिथे.

“हमन अपन तीर-तखार मं जेन घलो मिलथे, वोला बऊरथन. जब हमर नोनी मन के जवान होय ला धरथें त येकर तिहार मनाय बर फर-फूल अऊ लाल माटी बऊरथन. हमन अपन बर-बिहाव के रसम मं पाना, लकरी अऊ फूल काम मं लाथन. फेर अब ये सब्बो दुब्बर होवत जावत हवय, ठऊका नागुल जइसने,” कलमा कहिथे.

“ये जो झुमका देखत हव ये हमर संस्कृति के चिन्हारी आय. मंय अपन दाई अऊ डोकरी दाई ला घला येला पहिरत देखे हवं, वो दूनों अपन कान मं दू-दू ठन झुमका पहिरत रहिन. वो मोला बताथे के ये सांप हमर जमीन अऊ जंगल के चिन्हारी आंय. कोनो घलो नोनी धन माईलोगन ह येला पहिर सकथे, वो चाहे सोन के बने होय धन पीतल के. एक जोड़ी सोन के नंगुलु बर करीबन 1 तोला सोन (11.66 ग्राम) लागथे,” कलमा कहिथे. “फेर आजकल के नवा पीढ़ी के नोनी मन येला नइ पहिरेंय. हो सकत हे ते पायके हमर जल-जंगल घलो बिपत मं हवंय.”

अनुवाद: निर्मल कुमार साहू