عمر دراز لوگوں کا خیال رکھنے کی ضرورت ہے

دُلیشوری سرین کے راشن کارڈ میں ان کی تاریخ پیدائش یکم جنوری ۱۹۶۳ درج ہے۔ لیکن کمزور پڑ چکیں یہ بزرگ خاتون اصل میں کافی بوڑھی ہیں۔ ان کی ۱۶ سال کی پڑپوتی، پرملا کسکو کہتی ہیں، ’’وہ تقریباً ۱۰۰ سال کی تو ہوں گی۔‘‘

ہم مغربی بنگال کے شانتی نکیتن کے باغان پاڑہ محلہ میں ان کے گھر کے باہر بیٹھے ہیں۔ یہاں کی گھماؤدار گلیوں میں آوارہ کتے اور پالے گئے مرغے مرغیاں ساتھ ساتھ دکھائی دیتے ہیں۔ کتے آرام سے پڑے رہتے ہیں، جب کہ مرغے مرغیاں زمین کریدنے میں لگی رہتی ہیں۔

’’شانتی نکیتن…آمار ناتنیر نام [شانتی نکیتن میری نواسی کا نام ہے]۔ یہ کہتے ہوئے دُلیشوری کی آواز دھیمی پڑ جاتی ہے۔ پھر وہ اپنے چھوٹے کٹے ہوئے سفید بالوں میں انگلیاں پھیرتے ہوئے مسکراتی ہیں۔

’’اوکون ہوئی چھیلے [مجھے جوئیں ہو گئی تھیں]،‘‘ وہ ہمیں بتاتی ہیں۔ ’’کس کے پاس اتنا وقت ہے کہ بیٹھ کر انہیں نکالے؟ اس لیے اس نے میرے بال کاٹ دیے،‘‘ دُلیشوری مسکراتے ہوئے اپنے پاس بیٹھی پرملا کی طرف اشارہ کرتی ہیں۔ ’’یہ [پرملا] روز میرے لیے چائے بناتی ہے اور میرے ناخن بھی کاٹتی ہے،‘‘ دُلیشوری پیار سے کہتی ہیں۔

گیارہویں جماعت میں پڑھنے والی پرملا، دُلیشوری کی کمزور پڑ چکی یادداشت کو فوراً درست کر دیتی ہیں اور ضرورت پڑنے پر انہیں پیار سے ٹھیک بھی کر دیتی ہیں۔ دُلیشوری، پرملا اور اپنے پڑپوتے کی بیوی جبا کے ساتھ رہتی ہیں۔ جبا کو اپنے چھوٹے بچے کو بھی دیکھنا ہوتا ہے۔ یہی دونوں سب سے زیادہ ان کی دیکھ بھال کرتی ہیں۔

پرملا سے ہمیں پتہ چلتا ہے کہ دلیشوری اور ان کے شوہر پہلے ایک چاول مل میں کام کرتے تھے، جب کہ بزرگ خاتون خاموشی سے بیٹھ کر کسی اور کے منہ سے اپنے ماضی کا باتیں سنتی رہتی ہیں۔ وہ درمیان میں بول پڑتی ہیں، ’’ہم بولپور میں رہتے تھے۔‘‘ انہیں ٹکڑوں میں اپنی پرانی زندگی یاد ہے – دھان سے جڑی یادیں، محنت مزدوری سے جڑی یادیں۔ دلیشوری بتاتی ہیں، ’’وہ ہمیں مزدوری دیتے تھے۔‘‘ لیکن انہیں یہ یاد نہیں کہ کتنی مزدوری ملتی تھی یا تمام سالوں میں وہ بڑھی بھی تھی یا نہیں۔

آج دلیشوری کو غسل کرنے یا حوائج ضروریہ سے فارغ ہونے کے لیے کھیت میں جانے جیسے روزمرہ کی زندگی سے جڑے کاموں کے لیے دوسروں پر منحصر رہنا پڑتا ہے۔ وہ تقریباً ۳۰۰ میٹر دور لگے عوامی نل پر نہاتی ہیں۔ دلیشوری کہتی ہیں کہ وہ وہاں خود چلی جاتی ہیں، لیکن پرملا فوراً ان کی بات کاٹتے ہوئے بتاتی ہیں کہ انہوں نے کچھ مہینے پہلے سردی شروع ہونے کے بعد سے اب تک غسل نہیں کیا ہے۔

دلیشوری کی حالت کوئی غیر معمولی بات نہیں ہے۔ سال ۲۰۱۷-۱۸ کے نیشنل سیمپل سروے (این ایس ایس) کے مطابق، ہندوستان میں تقریباً ۷۰ فیصد بزرگ اپنی روزمرہ کی زندگی کے لیے دوسروں پر منحصر ہیں، اور خواتین کی حالت اس سے بھی زیادہ خراب ہے۔

پرملا کہتی ہیں، ’’کبھی کبھی جب ہم آس پاس نہیں ہوتے، تو یہ اکیلے ہی نکل پڑتی ہیں۔ پھر ہمیں انہیں ڈھونڈنے جانا پڑتا ہے اور واپس لانا پڑتا ہے۔‘‘ وہ مزید بتاتی ہیں، ’’یہ کہتی ہیں کہ اپنی بیٹی کے گھر جا رہی ہیں۔‘‘

پرملا بتاتی ہیں کہ کئی بار دُلیشوری یہ کہہ کر گھر سے ننگے پاؤں باہر نکل جاتی ہیں کہ انہیں نیم کی ٹہنیاں جمع کرنی ہیں۔ لیکن واپس لوٹتے وقت وہ گھر کا راستہ بھول جاتی ہیں۔

اس محلہ میں زیادہ تر سنتال کنبے رہتے ہیں اور دلیشوری کا تعلق بھی اسی آدیواسی برادری سے ہے۔ شانتی نکیتن کے بالکل درمیان میں ہونے کے باوجود باغان پاڑہ ہر سال ریاست کے الگ الگ حصوں سے بڑی تعداد میں آنے والے سیاحوں کی نظروں سے تقریباً غائب ہی رہتا ہے۔ کچے گھروں کے درمیان حالیہ برسوں میں کچھ پکّے مکان بھی بن گئے ہیں، جن میں زیادہ تر مبینہ اونچی ذاتوں اور خوشحال طبقہ کے لوگ رہتے ہیں۔ کئی سنتال عورتیں ان گھروں میں ملازمہ کے طور پر کام کرتی ہیں۔ مرد، چاہے جوان ہو یا بزرگ، وہ مالی کا یا پھر ایسے ہی چھوٹے موٹے دوسرے کام کرتے ہیں۔

دُلیشوری کی بیٹی روبی مرمو کہتی ہیں، ’’یہاں پہلے بہت بڑا باغیچہ ہوا کرتا تھا۔‘‘ ان کی یہ یاد اس محلہ کے نام کا مطلب بھی سمجھا دیتی ہے۔ بنگالی میں ’باغان‘ کا مطلب باغیچہ ہوتا ہے۔ وقت کے ساتھ باغیچہ چھوٹا ہوتا گیا اور قصبہ پھیلتا چلا گیا۔

گھریلو ملازمہ روبی کہتی ہیں، ’’لیفٹ کی سرکار کے وقت ماں کو کچھ پیسے ملے تھے۔‘‘ لیکن وہ رقم بیت الخلاء بنوانے یا گھر میں رنگ روغن کروانے کے لیے بھی کافی نہیں تھی۔ یہ کچا گھر دلیشوری کے بیٹے بھرت سرین اور ان کی فیملی کا ہے۔ ایک حادثہ کے بعد بھرت سرین کے جسم کے بائیں طرف کے اوپری حصہ نے کام کرنا بند کر دیا تھا، جس کے بعد سے وہ کام نہیں کر پا رہے ہیں۔ ان کی بیوی لکشمی اور بیٹی گھریلو ملازمہ ہیں۔ جن گھروں میں وہ کام کرتی ہیں، وہاں سے انہیں ۱۰۰۰ روپے ملتے ہیں۔ لکشمی کو خواتین کے لیے چل رہی سرکاری اسکیم ’لکشمی بھنڈار‘ سے اضافی ۱۵۰۰ روپے بھی ملتے ہیں۔

اپنے چھوٹے پوتے کو نہلانے کی کوشش کرتی لکشمی کہتی ہیں، ’’ہم انہیں دن میں بس دو وقت کا کھانا دے پاتے ہیں۔‘‘

دلیشوری کو ہری پتّہ دار سبزیاں بہت پسند ہیں۔ کبھی کبھی ان کی بیٹی اپنے ہاتھ سے بنائی گئی کوئی خاص چیز ان کے لیے لے کر آتی ہے۔ ساٹھ کی عمر پار کر چکیں روبی کہتی ہیں، ’’میں ان سے اکثر ملنے آ جاتی ہوں، کیوں کہ میں پاس کے ہی ایک گھر میں کام کرتی ہوں۔‘‘ وہ مزید کہتی ہیں، ’’مجھے ان کی فکر تو رہتی ہی ہے۔ ماں اب بوڑھی ہو گئی ہیں، انہیں دیکھ بھال کی ضرورت ہے۔‘‘

لیکن کسی دیکھ بھال کرنے والے کو کام پر رکھنا ان کے لیے ممکن نہیں ہے۔ روبی گھریلو ملازمہ کے طور پر صرف ۱۵۰۰ روپے کماتی ہیں۔ ان کی ماں کو ریاستی حکومت کی طرف سے بڑھاپے کے پنشن کی شکل میں ۱۰۰۰ روپے مزید ملتے ہیں۔ اس سے جڑے کاغذی کاموں اور خرچوں کو بھی روبی ہی سنبھالتی ہیں۔ باہر سے کسی قسم کی دیکھ بھال کی سہولت نہ ہونے کی وجہ سے یہ ذمہ داری فیملی کی خواتین پر ہی سب سے زیادہ آ جاتی ہے۔

دُلیشوری کہتی ہیں، ’’نوجور کومے گیچھے [میری آنکھوں کی روشنی کم ہو گئی ہے]۔ مجھے آپریشن کی ضرورت ہے۔‘‘ شاید وہ موتیابین کی بات کر رہی ہیں، لیکن ان کی فیملی میں یہ کوئی یقینی طور پر نہیں جانتا۔

’’رات اے بھالو گھماتے پاری نا [مجھے رات میں اچھی نیند نہیں آتی]،‘‘ وہ مزید کہتی ہیں۔ یہ بزرگ لوگوں کی عام شکایت رہتی ہے۔ اس لیے وہ دن کا زیادہ تر وقت بستر پر ہی گزارتی ہیں اور کئی بار دوپہر تک سوتی رہتی ہیں۔

کبھی جنگل میں رہنے والے سنتالوں کے پاس بھیڑ بھاڑ والے باغان پاڑہ محلہ میں جل (پانی)، جنگل اور زمین جیسی چیزوں تک رسائی نہیں رہی۔ جن چھوٹے چھوٹے کنبوں میں وہ رہتے ہیں، وہاں نہ تو تہوار منائے جانے کی مناسب جگہ ہے اور نہ ہی اکٹھا ہو کر ناچنے گانے کی۔ سنتال سماجی کارکن اور ماہر تعلیم بورو باسکی کہتے ہیں، ’’اس سے برادری کی روایتی اور ثقافتی طرز زندگی آہستہ آہستہ ختم ہوتی جا رہی ہے۔‘‘

اگر ایک بچہ کی پرورش کے لیے پورے گاؤں کی ضرورت پیش آتی ہے، تو شاید بزرگوں کی دیکھ بھال کے لیے بھی پوری برادری کی ضرورت ہوتی ہے۔ باغان پاڑہ میں رہنے والی دلیشوری جیسی خواتین کو شہر کی اس تنگ زندگی میں ان کمیوں کے ساتھ ہی جینا پڑتا ہے۔ مسکراتے ہوئے دلیشوری پوچھتی ہیں، ’’نجیر کاج کوربے، نا آماکے دیکھ بے؟ [وہ اپنا کام کریں گی یا میری دیکھ بھال کریں گی؟]‘‘

رپورٹر اس کہانی میں مدد کے لیے پرلے مَنّا کی شکر گزار ہیں۔