सियान मन के सेवा बर सब्बो के संग जरूरी

दुलेश्वरी सरेन के रासन कार्ड मं ओकर जनम तारीख 1 जनवरी, 1963 लिखाय हवय. फेर ये ह दुब्बर अऊ सियानिन संथाल आदिवासी महतारी असल मं ओकर ले कतको बछर जियादा उमर के हवय. “ओकर उमर करीबन 100 बछर होही,” प्रमिला किस्कू कहिथे, जेन ह ओकर परपोती आय अऊ ओकर उमर करीबन 16 बछर हवय.

हमन पश्चिम बंगाल के शांतिनिकेतन के बागनपारा मोहल्ला मं, एक झिन नब्बे बछर के सियानिन के घर के बहिर बइठे हवन.इहाँ के घुमावदार गली-खोर मं, अवारा कुकुर अऊ पोसे कुकरी अपन जगा बर एक-दूसर ले ठेलम-ठेला मं लगे हवंय – कुकुर मन जिहां अलसाय सुते हवंय, उहिंचे कुकरी मन ठुनके मं मगन हवंय.

“शांतिनिकेतन…आमार नातनिर नाम [शांतिनिकेतन…ये मोर पोती के नांव आय],” दुलेश्वरी के बोली धीमा पर जाथे. अऊ मुचमुचावत वो ह अपन कटाय पाके चुंदी मं हाथ फेरथे.

“उकुन होये छिलो [मुड़ मं जुआँ हो गे रहिस],” वो ह हमन ला बताथे. “ ककर करा अतक बखत हवय के वोला बइठ के निकारे? ते पाय के मोर चुंदी ला काट दीन,” दुलेश्वरी अभू घलो मुचमुचावत, अपन बगल मं बइठे प्रमिला कोती हाथ दिखाथे. “वो [प्रमिला] ह रोज मोर बर चाय बनाथें अऊ मोर नाख़ून काटथे,” दुलेश्वरी भारी मया ले बताथे.

11 वीं क्लास मं पढ़ेइय्या प्रमिला, दुलेश्वरी के बिसोरे बात ला तुरते बताथे के जरूरत परे ले भारी मया ले चुंदी ला कोर घलो देथे. दुलेश्वरी, प्रमिला अऊ अपन परपोती के बहुरिया जबा संग रहिथे; जबा ला अपन खुद के लइका के घलो देखभाल करे ला होथे. ये दूनोंच ओकर बड़े सेवा करेइय्या आंय.

प्रमिला ले हमन ला पता चलिस के दुलेश्वरी अऊ ओकर घरवाला एक ठन चऊर मिल मं बूता करत रहिन, फेर वो सियानिन ह कलेचुप बइठे कोनो दीगर ला अपन गुजरे बखत के बात ला बतावत सुनत हवय. “हमन बोलपुर मं रहत रहेन,” वो ह बीच मं बोल परथे. अपन जिनगी के गुजरे बखत थोर-थोर करके सुरता आथे- धान के सुरता, बनि-भूति के सुरता. “वो मन हमन ला रोजी देवत रहिन,” दुलेश्वरी कहिथे, फेर ओला ये सुरता नइ आय के कतक धन अतक बछर मं रोजी घलो बढ़े रहिस.

आज दुलेश्वरी ला अपन रोज के कुछु काम बर अपन सेवा करेइय्या मन के भरोसे रहे ला परथे, जइसने नुहाय धन गरु-हरू होय बर खेत मं जाय. वो ह करीबन 300 मीटर दूरिहा एक ठन सार्वजनिक नल मं नुहाथे. दुलेश्वरी के कहना रहिस के वो ह उहाँ खुदेच जाथे, फेर प्रमिला तुरते ओकर बात ला काटत कहिथे के कुछु महिना पहिली जब ले जाड़ सुरु होय हवय, तब ले वो ह नुहाय नइ ये.

दुलेश्वरी के हालत कोनो नवा बात नो हे. साल 2017- 2018 के राष्ट्रीय नमूना सर्वेक्षण (एनएसएस) के मुताबिक, भारत मं करीबन 70 फीसदी सियान अपन रोज के जिनगी चलाय बर दीगर के भरोसे हवंय, अऊ माइलोगन मन के हालत त अऊ घलो जियादा खराब हवय.

“कभू-कभू जब वो ह देखथे के हमन तीर मं नइ अन, त वो ह अकेल्लाच कहूँ चले जाथे,” प्रमिला कहिथे. “तब हमन ला वोला खोज के घर लाय ला परथे,” वो नोनी ह बताथे, “वो ह कहिथे के वो ह अपन बेटी के घर जावत हवय.”

कभू-कभू दुलेश्वरी जुच्छा गोड़ निकर जाथे, ये कहत के वो ह लीम के मुखारी टोरे बर जावत हे. फेर वो ह लहूटे बखत घर के रद्दा भुला जाथे, प्रमिला बताथे.

परोस मं अधिकतर संथाल मनके घर हवय, उहिच आदिवासी समाज जेकर से दुलेश्वरी घलो आथे. शांतिनिकेतन के मंझा मं बसे के बाद घलो,बगानपारा ह ओ बड़े संख्या मं आवेइय्या सैलानी मनके नजर मं नइ आवय जेन मन हरेक बछर राज के अलग-अलग जगा ले इहां आथें. कच्चा (माटी के) घर मनके बीच मं, कुछेक पक्का घर घलो अब खड़े होगे हवंय, जेन ह अधिकतर ऊंच जात अऊ बड़े लोगन मनके आय. कतको संथाल माईलोगन मन अइसने घर मन मं बूता (घर के काम) करथें. मरद लोगन मन, चाहे जवान होवंय धन सियान, माली के काम करथें धन कोनो छोटे मोटे बूता करके गुजारा करथें.

दुलेश्वरी के बेटी रूबी मुर्मू, कहिथे, इहाँ कभू एक ठन बड़े बगीचा होवत राहिस." ओकर सुरता मुताबिक ये इलाका के नांव के मतलब, बांग्ला मं बागान के मतलब बगीचा होथे. बखत गुजरत ये बगीचा ह छोटे होवत गिस अऊ सहर ह बाढ़त गिस.”

“जब लेफ्ट फ्रंट के सरकार रहिस, तब दाई ले कुछु पइसा मिले रहिस,” घर मन मं बूता करेइय्या रूबी कहिथे. फेर ये पइसा न टायलेट बनाय बर अऊ न घर के लिपाई-पुताई कराय लइक रहिस. ये माटी के घर दुलेश्वरी के बेटा भारत सरेन अऊ ओकर परिवार के आय. एक ठन अलहन मं देह के डेरी हिस्सा मं लोकवा मारे के बाद भारत सरेन बूता करे नइ सकत हवय. ओकर घरवाली लक्ष्मी अऊ ओकर बेटी घर मन मं बूता करथें, जेकर घर मं बूता करथें, वो मन 1,000 रूपिया देथें. लक्ष्मी ला महतारी मं बर बने सरकारी योजना ले 1,500 रूपिया अऊ मिलथे- ये योजना के नांव घलो ओकरेच नांव लक्ष्मी भंडार मं हवय.

“हमन ओला दिन मं बस दू बखत खाय बर देथन,” लक्ष्मी अपन नानचिक पोता ला नहलवाय बर धरे मं लगे रहत कहिथे.

दुलेश्वरी ला भाजी अऊ साग भारी भाथे. कभू कभू, ओकर बेटी ओकर बर खास पकवान बनाके लाथे. “मंय अक्सर ओकर ले मिले बर आथों, काबर के मंय उहिच घर के लकठा मं बूता करथों,” रूबी कहिथे, जेन ह साठ बछर के हवय. “फेर मोला ओकर चिंता लगे रहिथे,” वो ह कहिथे, “मोर मा (महतारी) अब डोकरी सियान होगे हवय; वोला सेवा के जरूरत हवय.”

फेर कोनो सेवादार रखे ओकर बस के नो हे. रूबी घर मन मं काम बूता करके सिरिफ 1,500 रूपिया कमाथे. अऊ ओकर दाई ला सरकार डहर ले विधवा पेंसन मिलथे, 1,000 रूपिया अऊ- पेंसन के सब्बो खरचा अऊ कागजात बनाय के जिम्मा रुबिच उपर हवय. बहिर ले कोनो मदद नइ मिले सेती, देखभाल के ये सब्बो जिम्मेदारी घर के माईलोगन मन के उपर आ जाथे.

“नोजोर कोमे गेछे [मोर नजर कम होगे हवय],” दुलेश्वरी कहिथे, मोला आपरेसन के जरूरत हवय. हो सकथे वो ह मोतियाबिंद के बात करत होय, फेर घर के कोनो ला घलो पक्का मालूम नइ ये.

“रात ए भालो घूमते पारी ना [ रतिहा मं मोला बने करके नींद नइ परय],” वो ह कहिथे. सियान मन मं ये ह एक ठन आम बात आय. ते पायके, वो ह अपन अधिकतर बखत दिन मं खटिया मं परे रहिथे, अक्सर मंझनिया तक सुतत रहिथे.

बागनपारा के भीड़भाड़ वाले इलाका मं, कभू जंगल मन मं बास करेइय्या संताल मन के अब जल, जंगल अऊ जमीन नइ ये. जेन नान-नान जगा मं वो मन रहिथें, उहाँ न त कोनो तिहार मनाय बर बने जगा हवय अऊ न जुरके नाचे-गाये बर. संताल कार्यकर्ता अऊ शिक्षाविद बोरो बास्की कहिथे, “येकरे सेती ये समाज के पारंपरिक अऊ सांस्कृतिक जीवनशैली नंदावत जावत हवय.”

“गर एक झिन लइका ला पोसे बर गांव भर के जरूरत होथे, त सियान मन के सेवा बर घलो गांव के जरूरत पर सकथे. बगानपारा मं दुलेश्वरी जइसने माईलोगन मन ला अक्सर अपन शहर के घर मं ये कमी ला माने ला परथे. “निजेर काज कोरबे, ना माके देखबे? [काय वो मन मोर सेवा करहीं धन अपन काम बूता करहीं],” दुलेश्वरी अभू घलो मुचमुचावत सवाल करथे.

रिपोर्टर ये कहिनी मं मदद सेती प्रलय मन्ना के आभार जतावत हवय