बूढ़-पुरनिया के संभारल समाज के फर्ज बा

राशन कार्ड पर दुलेश्वरी सरेन के जनम 1 जनवरी 1963 के लिखल बा. बाकिर देह-हाथ से एकदम कमजोर पड़ चुकल ई बूढ़ मेहरारू सांचो बहुते उमिरगर बाड़ी. उनकर 16 बरिस के परपोती बाड़ी, प्रमिला किस्कू. ऊ कहेली, “ऊ 100 बरिस के त जरूर होइहन.”

हमनी पस्चिम बंगाल में शांतिनिकेतन के बागानपाड़ा मोहल्ला में उनकर घर के बाहर बइठल बानी. इहंवा के सांकर आ घुमावदार गली सब में आवारा कुकुर आ पालतू मुरगी-मुरगा सब संगे-संगे भागत-धउड़त बा. कुकुर सब आराम से पड़ल बा, आ मुरगा-मुरगी जमीन खोदे में लागल बा.

“शांतिनिकेतन... आमार नातनिर नाम (शांतिनिकेतन हमार नातिन के नाम बा),” ई कहत दुलेश्वरी देवी के आवाज धीरे हो जाता. फेरु ऊ आपन छोट कटल उज्जर केश में अंगुरी फेरके मुस्काए लागत बाड़ी.

“उकुन होएछिलो (हमरा ढील पड़ गइल बा),” ऊ बतावेली. “केकरा लगे हमार माथा हेरे के एतना समय बा? एही से ई हमार केस काट देली,” दुलेश्वरी मुस्कात लगे बइठल प्रमिला ओरी देखावत बाड़ी. “ई (प्रमिला) रोज हमरा चाय बना के देवेली आ हमार नोहो (नाखून) काट देवेली,” दुलेश्वरी दुलार से कहली.

ग्यारहमा में पढ़े वाली प्रमिला, दुलेश्वरी के भूलल बात सब के तुरंत याद दिलावे लागत बाड़ी आ जरूरत पड़ला पर धीर से उनकर बातो सुधार देत बाड़ी. दुलेश्वरी, प्रमिला आ आपन परपोता के घरवाली जबा संगे रहेली. जबा के आपन छोट-छोट बच्चा सब के भी देखे के होखेला. इहे दुनो लोग दुलेश्वरी के सबले जादे देखभाल करेला.

प्रमिला से पता चलल कि दुलेश्वरी आ उनकर घरवाला पहिले एगो चाउर मिल में काम करत रहे. उहंई बुजुर्ग दुलेश्वरी चुपचाप बइठ के केकरो आउर के मुंह से आपन बीतल जिनगी के बात सुनत बाड़ी. फेरु ऊ बीचे में टोक देत बाड़ी, “हम बोलपुर में रहत रहीं.” पुरान दिन के उनका आधा-अधूरा याद बा. धान, खेत आ मजूरी के कुछ तस्वीर मन में उभर आवेला. “हमनी के मजूरी मिलत रहे.” बाकिर उनका इयाद नइखे, केतना, चाहे एतना बरिस में मजूरी बढ़ल भी कि ना.

आज दुलेश्वरी देवी नहाए, चाहे शौच खातिर खेत जाए जइसन रोज के काम दोसरा के सहारे करेली. ऊ नहाए खातिर कोई 300 मीटर दूर लागल सामुदायिक नल पर जाली. दुलेश्वरी देवी कहेली कि उ उहंवा अपने चल जाली. बाकिर प्रमिला उनकर बात तुरंत कटली आ बतइली कि ऊ कुछ महीना पहले सरदी सुरु भइला के बाद से अबले नइखी नहइले.

दुलेश्वरी देवी अइसन जिनगी जिए वाला अकेला नइखी. नेशनल सैंपल सर्वे (एनएसएस) 2017-18 कहेला कि भारत में 100 में कोई 70 बुजुर्ग लोग के आपन रोज के काम खातिर दोसरा पर निर्भर रहे पड़ेला. मेहरारू लोग के स्थिति त आउरो खराब बा.

प्रमिला बतावेली, “केतना बेरा जब हमनी ना होखिले, त ई अकेलहीं निकल जाली. फेरु हमनी के इनका खोजे जाए पड़ेला आउर लउटा के लावे पड़ेला.” सयान लड़की आउर बतावत गइली, “कहेली कि हम त आपन बेटी के घरे जात बानी.”

प्रमिला बतावेली कि कइएक बेरा दुलेश्वरी खालिए गोड़ घर से निकल जाली, ई कहत कि उनका डंटी (टहनी) बटोरे के बा. आउर लउटे घरिया रस्ता भुला जाली.

मोहल्ला में जादेतर संताल परिवार लोग रहेला. दुलेश्वरी देवी भी इहे आदिवासी समुदाय से बानी. शांतिनिकेतन के बीच में होखला के बादो बागानपाड़ा हर साल राज्य के अलग-अलह हिस्सा से भारी तादाद में आवे वाला पर्यटक के नजर से लगभग ओझले रहेला. कच्चा घर के बीच-बीच में हाल के कुछ साल में पक्को मकान सब बन गइल बा. एकरा में जादेतर कथित ऊंच जात आ संपन्न वर्ग रहेला. संताल मेहरारू लोग इहे घर सब में घरेलू कामगार के काम करेली. मरद लोग, चाहे बूढ़ हो कि जवान, माली, चाहे अइसने छोट-मोट काम करेला.

दुलेश्वरी देवी के बेटी रूबी मुर्मू के कहनाम बा, “इहंवा पहिले बहुते बड़-बड़ बगान सब रहे.” उनकर याद आइल बात एह मोहल्ला के नाम के मतलब समझा देता. बांग्ला में ‘बागान’ के मतलब बगइचा होखेला. समय के साथ बगइचा छोट होखत गइल, कस्बा बड़.

दोसरा के घर में काम करे वाली रूबी कहेली, “लेफ्ट फ्रंट के सरकार रहे त माई के तनी कुछ पइसा मिल जात रहे.” बाकिर ऊ पइसा ना त शौचालय बनावे, आउर ना घर में पोताई करावे लायक रहे. ... ई कच्चा घर दुलेश्वरी के लइका भरत सरेन आ उनकर परिवार के बा. एगो दुर्घटना में भरत सरेन के देह के बावां ओरी के ऊपरी हिस्सा बेकाम हो गइल. एकरा बाद से ऊ काम ना कर पावेलन. उनकर घरवाली लक्ष्मी आ लइकी लोग घरेलू कामगार बा. एह काम से उनका 1,000 रुपइया मिलेला. लक्ष्मी के, मेहरारू खातिर चल रहल सरकारी योजना ‘लक्ष्मी भंडार’ से भी अलग से 1,500 रुपइया मिल जाला.

“हमनी उनका बस दू बखत के खाना खिया पाइला,” आपन छोट पोता के नहलाए के कोशिश करत लक्ष्मी कहली.

दुलेश्वरी देवी के साग-पात बहुते नीमन लागेला. कबो-कबो उनकर लइकी आपन हाथ से बनावल कोई खास चीज उनका खातिर लेके आवेली. साठ के आस-पास के रूबी कहेली, “हम उनका से अक्सरहा भेंट करे आ जाइला, काहेकि हम लगहीं के एगो घर में काम करिला.” ऊ इहो कहेली, “हमरा अब उनकर चिंता होखेला. माई बहुते बूढ़ हो गइल बाड़ी, उनका देखभाल के जरूरत बा.”

दुलेश्वरी देवी कवनो देखभाल करे वाला के काम पर ना रख सकेली. रूबी के घरेलू कामगार के रूप में खाली 1,500 रुपइया मिलेला. उनकर माई के राज्य सरकार से 1,000 के विधवा पेंशन मिलेला. ई सब के कागजी काम आ खरचा उहे देखेली. देखभाल करे वाला के काम पर ना रख सके चलते ई जिम्मेदारी परिवार में मेहाररुए लोग पर बा.

“नोजोर कोमे गेछे (हमरा आंख से अब कम लउकेला). ऑपरेशन होखे के चाहीं.” लागता ऊ आपन मोतियाबिंद के बात करतारी. बाकिर परिवार में केकरो निश्चित रूप से नइखे पता.

ऊ कहेली, “रात ए भालो घुमाते पारी ना (हमरा रात में ठीक से सुत ना पाइला).” बूढ़ लोग में ई आम परेशानी बा. एही से ऊ दिन भर बिछौने पर ओठंगल रहेली, आउर केतना बेरा दुपहरिया ले सुतल रहेली.

कबो जंगल में रहे वाला संताल लोग बागानपाड़ा के तंग बस्ती में आज जल, जंगल आ जमीन से दूर हो गइल बा. जवन छोट-छोट जगह में ऊ लोग रहेला, उहंवा परब-तेहार मनावे आ जुटान करके नाचे-गावे के भी जगह नइखे बचल. संताल समाज के कार्यकर्ता आ शिक्षा से जुड़ल बोरो बोस्की कहेलन, “एह हालत में समाज के पुरनका संस्कृति आ जिए के तरीका खतम भइल जा रहल बा.”

एगो लइका के पोसे में, जइसे पूरा गांव-जवार के जरूरत पडेला, उहे तरहा बूढ़ के संभारे खातिर भी समाज चाहीं. बागानपाड़ा में दुलेश्वरी देवी जइसन मेहरारू लोग के शहर के एह घिचपिच बस्ती में सब कुछ मन मसोस के झेले पड़ेला.

कहानी में मदद खातिर रिपोर्टर प्रलय मन्ना के आभार प्रकट करत बाड़न.