ٹرانس خاتون ایشوریہ کی ڈرامائی پیشکش

سُڈلئی کالی یا شمشان کی دیوی کی تعظیم میں اپنے دانتوں سے ہلاک کر کے مرغ کی قربانی دینے کے بعد، وہ اپنے دانتوں تلے تورپّو (بکری کے پھیپھڑے) کو دباتی ہیں اور بائیں ہاتھ سے درانتی کو ہوا میں لہراتے ہوئے تال کے ساتھ آگے بڑھتی ہیں۔ کالی ساڑی میں ملبوس ایشوریہ ایک مصروف سڑک پر پمبئی اور پرئی ڈھول کی آوازوں پر رقص کرتے ہوئے دیوی پُترو پُنکاونتّو امّن مندر سے تیرو ولم شہر میں دریائے پونئی تک جاتی ہیں۔ جلوس کی قیادت کرنے والی تھکی ماندی تیروننگئی (تمل میں ٹرانس خاتون) جب خشک دریا کے کنارے پہنچتی ہیں تو غش کھا کر گر جاتی ہیں۔ یہ محض ایک ’پیش کش‘ نہیں ہے، حالانکہ ۳۷ سالہ ایشوریہ کی اپنی ایک ڈرامہ کمپنی ہے۔ دن کے اختتام پر ڈرامہ اسٹیج ہونے میں ابھی بھی کئی گھنٹے باقی ہیں۔

وہ تمل ناڈو کے ویلور ضلع کے اس گاؤں میں دلت برادریوں کے ذریعہ تمل مہینہ ماسی (مارچ) میں اماواسئی (نئے چاند) کے دوران منعقد کی جانے والی سالانہ تقریب میان کولّئی (شمشان کے تہوار) میں موجود ہیں۔ ریاست میں درج فہرست ذات کے طور پر درج چَکّی لیئر برادری سے تعلق رکھنے والی ایشوریہ گزشتہ دو دہائیوں سے مندر کی اس تقریب کی رسومات میں حصہ لے رہی ہیں۔

’’وہ میں نہیں تھی جو اس دیوانگی کے ساتھ رقص کر رہی تھی،‘‘ وہ بعد میں کہتی ہیں، ’’مجھے تو کچھ بھی یاد نہیں ہے۔ وہ امّن تھیں جنہوں نے مجھے قابو میں کر لیا تھا۔‘‘ امّن، ایک دیوی ہیں جنہیں کالی کے مظہر کے طور پر دیکھا جاتا ہے، اور مقامی برادری ان کی پوجا کرتی ہے۔ رسومات کے اختتام پر رات ۱۰ بجے آخری پیشکش شروع ہو گی۔

رات کا منظر قدرے مختلف ہے۔ ایسا لگتا ہے کہ ایشوریہ نے اپنی طاقت دوبارہ حاصل کر لی ہے۔ اب وہ سڑک کے بیچ میں۱۰x۱۲ فٹ اونچے اسٹیج کے ساتھ آگے بڑھ رہی ہیں۔ وہ میلے کے منتظمین کو بینر لگانے کی ہدایت دے رہی ہیں اور ۵۰۰ واٹ کی دو لائٹیں لگانے کے لیے صحیح جگہ کی نشاندہی کرتی ہیں۔ ’’ان دونوں کو جو اسٹیج کی طرف ہیں، ذرا ترچھا باندھو،‘‘ وہ حکم دیتی ہیں۔ وہ اسٹیج مینیجر، کاسٹیوم ڈیزائنر، لائٹ ڈیزائنر، ڈائریکٹر، ڈرامہ نگار، اور ڈرامہ گروپ کی سربراہ ہیں۔ ایشوریہ اپنے آپ میں ایک فوج کی مانند ہیں جو ’اشوک ناٹک منڈرم‘ کے نام سے ایک ڈرامہ کمپنی چلا رہی ہیں۔ یہ نام اسٹیج پر لگے کپڑوں کے بینر پر جلی حروف میں لکھا ہوا ہے۔

’’یہ واحد ڈرامہ کمپنی ہے جس میں رجنی کانت، وجے کانت، اور خوشبو سب ایک ساتھ ہیں،‘‘ ایشوریہ ہنستے ہوئے بینر کی طرف اشارہ کرتی ہیں اور تمل سنیما کے مشہور ستاروں کی بارے میں کنایتاً کہتی ہیں۔ یہ بعد میں معلوم ہوتا ہے کہ اس دعوے کے پس پشت کیا ہے۔ ان کے پیچھے کئی سر ایک ہی ۲۰۰ واٹ کے ٹنگسٹن بلب کی روشنی میں دستی آئینے پکڑے میک اپ کرتے ہوئے نظر آتے ہیں۔ ان کا گرین روم آج پردے کے بالکل پیچھے موجود رامر مندر ہے۔ چونکہ تمام فنکاروں کے بیک وقت تیار ہونے کے لیے جگہ ناکافی ہے، اس لیے انہیں باری باری تیار ہونا پڑتا ہے۔ یہاں تک کہ کچھ لوگوں نے کرو ورئی (گربھ گرہ، مندر کا وہ مقام جہاں مورتی نصب کی جاتی ہے) پر بھی قبضہ جما لیا ہے۔ انہیں اچھی طرح معلوم ہے کہ دوسرے مندروں کی طرح یہاں کوئی بھی ان سے ’’باہر نکلنے‘‘ کو نہیں کہے گا۔

’’میں نے یہ ڈرامہ کمپنی ۲۰۱۸ میں شروع کی تھی۔ خیال یہ تھا کہ اس کے وجود میں آنے کے بعد ٹرانس خواتین کو جنسی کام کرنے یا بھیک مانگنے سے نجات مل جائے گی اور وہ ان کاموں کے بجائے اداکاری کرسکتی ہیں اور ہم خود اداکاری سے کافی آمدنی حاصل کرسکتے ہیں،‘‘ ایشوریہ کہتی ہیں۔ انہوں نے کمپنی کا نام ’اشوک ناٹک منڈرم‘ رکھا۔ ’’دراصل مجھے ایشوریہ نام پسند نہیں ہے۔ یہ نام مجھے میری ٹرانس ماؤں نے دیا تھا۔ میرا نام اشوک ہے، اور مجھے یہ نام پسند ہے۔ اسی لیے میں نے اپنی ڈرامہ کمپنی کا یہ نام رکھا۔‘‘

جیسے جیسے شو کا وقت قریب آتا ہے، لوگ کمبل اوڑھ کر اسٹیج کے سامنے، سڑک کے عین بیچ میں جمع ہونا شروع ہو جاتے ہیں۔ رات بھر چلنے والی اس دلفریب پیشکش کے لیے تیار ہو جاتے ہیں۔ ’’میں ڈرامہ نگار اور اداکارہ دونوں ہوں،‘‘ ایشوریہ کہتی ہیں۔ ’’عموماً ہم افسانوی کہانیاں پیش کرتے ہیں۔ ہم انہیں ناول کہتے ہیں۔ ہم دیومالائی قصے، ہریش چندر، دانا سُر کرنن، نلائنی، نلّ تنگال کی کہانیاں بھی پیش کرتے ہیں۔ اور ہماری پیشکش میں لوک کہانیوں پر مبنی ڈرامے بھی شامل ہوتے ہیں جیسا کہ ہم آج رات ’دَیوم تندا تیرپو‘ [خدائی فیصلہ] پیش کر رہے ہیں۔‘‘ یہ ایک ڈرامہ ہے جو شہزادہ ایلی لارسن اور کلئی سیلوی کی لوک کہانی پر مبنی ہے، جو جرم، سزا، نجات اور الہامی انصاف کی کہانی ہے۔

وجے پوری کی شاندار سلطنت میں، راجا وجے ورمن اور ملکہ وجیہ حکمت اور شفقت کے ساتھ حکومت کرتے ہیں۔ اس شاہی جوڑے کے یہاں دو بچے شہزادہ ایلی لارسن اور شہزادی ایلی لارسی پیدا ہوتے ہیں۔ شہزادی وجاہت اور شرافت کا مجسمہ بنتی ہے، جبکہ شہزادے کا دل تاریکی میں ڈوبا ہوتا ہے، اس کے برتاؤ میں سب کے لیے تکبر اور حقارت ظاہر ہوتی ہے۔ ایک نامبارک دن، شہزادہ اپنی ریاست کے دیہی علاقوں میں گشت کرنے نکلتا ہے۔ اس کی نظر دریا میں غسل کرتی ہوئی ایک نوعمر عورت پر پڑتی ہے۔ اپنی سفلی خواہشات کی وجہ سے وہ اس کے خلاف ناقابل بیان جنسی تشدد کا ارتکاب کرتا ہے اور اسے صدمے سے دوچار کر دیتا ہے۔

پردے کے پیچھے ایشوریہ اپنے ذاتی صدمہ کی کہانی بیان کرتی ہیں، ’’مجھے کافی عرصہ تک یہ بھی معلوم نہیں تھا کہ میں ایک ٹرانس خاتون ہوں۔ جب گھر میں کوئی نہیں ہوتا تھا تو میں اپنے بالوں کو سنوارا کرتی تھی، بندیاں لگاتی تھی، اور میک اپ کرتی تھی۔ اسی دوران غیر متوقع طور پر ایک ٹرانس عورت سے میری ملاقات ہوئی۔ تب میرے ذہن میں پہلی بار یہ خیال آیا کہ شاید میں بھی ایک ٹرانس عورت ہوں،‘‘ اسٹیج پر داخل ہونے کی تیاری کرتے ہوئے وہ کہتی ہیں۔

حسب معمول وہ سب سے آخر میں میک اپ کرتی ہیں۔ اس دوران مزاحیہ اداکاروں نے اسٹیج سنبھال لیا ہے، اور اپنی اداکاری کا مظاہرہ کرتے ہوئے محفل کو قہقہہ زار بنا دیا ہے۔ اچانک موسیقی تبدیل ہوجاتی ہے؛ ایشوریہ اسٹیج پر موجود دیگر ٹرانس خواتین میں شامل ہو جاتی ہیں اور ایک بے ڈھنگے نغمہ پر حلقہ بنا کر رقص کرتی ہیں۔ یہ پردہ اٹھانے والا ایک ہلکا پھلکا لوک گیت ہے، جسے تمل گیت کے چھیڑ چھاڑ والے لہجہ میں گایا جاتا ہے۔

گیت ختم ہونے کے بعد کا پہلا منظر ایک محل کا ہے۔ کلئی سیلوی کا کردار ایشوریہ ادا کر رہی ہیں، اور انہیں جلدی جلدی اپنا لباس تبدیل کرنا ہوتا ہے۔

آبرو ریزی کے بعد کلئی سیلوی اپنے بھائی کے ساتھ شاہی عدالت پہنچتی ہے اور انصاف کا مطالبہ کرتی ہے۔ بادشاہ اور ملکہ اپنے بیٹے کی حرکتوں سے غضب ناک ہوجاتے ہیں۔ بغیر کسی امتیاز کے انصاف کے تئیں اپنی وابستگی کا مظاہرہ کرتے ہوئے وہ شہزادے کو کلئی سیلوی سے شادی کرنے کا حکم دیتے ہیں، اس امید میں کہ اس سے اس کی بھیانک غلطی کا ازالہ ہو جائے گا۔ تاہم، کمانڈر ان چیف کی شکل میں محل کی دیواروں کے اندر کام کرنے والی تاریک قوتوں کے دوسرے منصوبے ہیں۔ بادشاہ کا تختہ پلٹنے کی کوشش میں وہ ایک خوفناک منصوبہ تیار کرتا ہے، اور اس میں اپنے معشوقہ موہنا کو شامل کرتا ہے۔ کالے جادو میں ماہر، موہنا شہزادے کو قابو میں کرتی ہے۔ کوٹھے کی ملکہ کا روپ دھار کر وہ اسے اپنی بد روحوں کے زیر اثر رکھتی ہے۔

اس کالے جادو کے زیر اثر شہزادہ ایلی لارسن حتمی غداری کا ارتکاب کرتا ہے۔ وہ اپنے ہی باپ کو قتل کر دیتا ہے اور تخت پر قابض ہوجاتا ہے۔ وجے پوری میں دہشت کا راج قائم ہو جاتا ہے۔ اس کی بیوی سیلوی کو حمل کے دوران اس کے ہاتھوں سب سے خوفناک گھریلو تشدد کا سامنا کرنا پڑتا ہے۔ ملکہ وجیہ اپنے بیٹے کا پاگل پن دیکھ کر اسے بد دعا دیتی ہے، ’’شہزادہ جذام کا شکار ہو جائے!‘‘ موہنا اور کمانڈر اب تخت پر قابض ہو چکے ہیں۔ انہوں نے مصیبت زدہ بادشاہ کو بے دخل کر دیا ہے اور بڑی بے رحمی کے ساتھ اندھی کلئی سیلوی کو سڑکوں پر بھیک مانگنے پر مجبور کر دیا ہے۔

ایشوریہ حمل کے آخری مرحلہ میں موجود ایک عورت کے طور پر اسٹیج پر نمودار ہوتی ہیں۔ ان کی آنکھوں سے خون کی ندیاں بہہ رہی ہیں، اور وہ سڑکوں پر بھیک مانگ رہی ہیں۔ جب وہ زچگی کے بارے میں ایک اداس گیت گاتی ہیں، تو سامعین کی خوشیاں معدوم ہو کر خوف اور آنسوؤں میں تبدیل ہو جاتی ہیں۔ انہوں نے بھیک مانگنے کے لیے اپنے ہاتھوں میں ایک کاسہ پکڑ رکھا ہے۔ سامعین میں سے بہت سے لوگ اس چھوٹے سے کاسے میں کچھ سکے اور کرنسی نوٹ ڈالنے کے لیے اٹھتے ہیں۔ ’’میں اس حال میں کیوںکر پہنچی ہوں؟ میں خون کے اتنے آنسو کیوں بہا رہی ہوں؟ آؤ میں تمہیں بتاتی ہوں…‘‘

گانے کے بعد ان آخری سطورکے ساتھ، وہ منظر کی تبدیلی، یعنی فلیش بیک کی طرف اشارہ کرتی ہیں۔

دوسرے اداکار اسٹیج سنبھال لیتے ہیں۔ ایشوریہ اسٹیج سے نیچے آتی ہیں اور دوبارہ پردے کے پیچھے چھپ جاتی ہیں۔ وہ اپنے گالوں سے خون کی لکیریں صاف کرتی ہیں اور اگلے منظر کے لیے اپنی ساڑی اور میک اپ تبدیل کرتی ہیں۔ ’’میرا اگلا منظر ایک گھنٹہ کے بعد ہی شروع ہوگا،‘‘ وہ اپنی ٹانگیں پھیلاتے ہوئے اور تھوڑا پیچھے جھکتے ہوئے کہتی ہیں۔ ان کے دماغ میں ماضی کے مناظر روشن ہو جاتے ہیں۔

’’جب مجھے احساس ہوا کہ میں ایک ٹرانس خاتون ہوں، تو میں اپنی ماں کے سامنے رو پڑی،‘‘ وہ کہتی ہیں۔ ’’میں نے ان سے پوچھا کہ ایشور نے مجھے اس طرح کیوں پیدا کیا ہے۔ میری ماں نے جواب دیا، ’اگر کوئی بچہ تمہاری ران پر مٹی ڈالتا ہے تو تم اسے دھوتی ہو یا بچے کو کاٹ دیتی ہو؟ لہٰذا، میرا بیٹا چاہے کوئی بھی ہو، وہ میرے لیے قیمتی ہے، تم کیوں رو رہے ہو، راجا، پیارے بچے؟‘ ایسے وقتوں میں بھی جب ٹرانس خواتین کے بارے میں کوئی شعور نہیں تھا، میری ماں نے مجھے قبول کیا۔ میری ماں میرا خدا ہے۔ اس نے مجھے تسلی دی اور میرا سب سے بڑا سہارا بنی۔‘‘

’’میں نے صرف دسویں جماعت تک تعلیم حاصل کی ہے۔ انتہائی غربت کی وجہ سے میں تعلیم پر توجہ نہیں دے سکتی تھی۔ میں دسویں جماعت پاس نہیں کرسکی۔ اس کے بعد میں نے پڑھائی چھوڑ دی۔ میں کام پر گئی، بجری توڑے اور کچھ دوسرے محنت طلب کام کیے،‘‘ ایشوریہ بتاتی ہیں۔ تھیٹر کے ساتھ ان کی دلچسپی کی یادیں ابھی واضح طور پر تازہ ہیں۔

’’ایک بار ہمارے گاؤں کے میلے میں ایک ڈرامہ ٹولی پرفارم کرنے آئی۔ میرے تمام دوستوں نے مجھ سے ان کے سامنے ڈانس کرنے کو کہا۔ میں نے کیا، سب نے میری تعریف کی اور کہا کہ میں نے بہت اچھا ڈانس کیا ہے۔ انہوں نے مجھے اپنا وزیٹنگ کارڈ دیا اور کہا، ’پہلے اسٹڈی کرو، اور اگر تم اس کے بعد ڈرامے میں دلچسپی رکھتی ہو تو ہمارے گروپ میں شامل ہو جاؤ‘۔‘‘

’’میں نے شروع میں ڈرامے میں حصہ صرف اس لیے لیا کہ میرے گھر والوں کے پاس پیسے نہیں تھے۔ بعد میں مجھے یہ کام پسند آنے لگا اور ڈرامہ میرا پیشہ بن گیا۔ اس وقت ہمیں پوری رات کی پیشکش کے لیے محنتانہ کے طور پر ۲۰ روپے ملتے تھے۔ بہت سی ڈرامہ کمپنیوں سے میری شناسائی ہوئی،‘‘ وہ بتاتی ہیں۔ ڈرامہ کمپنیاں فنکاروں کو ان کی صلاحیتوں کی بنیاد پر پیشگی رقم دیتی ہیں۔ قاعدہ یہ ہے کہ ایک بار جب آپ کسی کمپنی سے ایڈوانس لیتے ہیں تو آپ کو اس وقت تک ان کے ساتھ رہنا پڑتا ہے جب تک کہ آپ ایڈوانس واپس نہیں کر دیتے۔

’’مجھ پر ۷ لاکھ روپے کا قرض تھا۔ مجھے اپنی ماں کے علاج کے لیے پیسوں کی ضرورت تھی۔ قرض ادا کرنے میں ۱۰ سال کا وقت لگا۔ اس دوران میں قرض دہندہ کے پاس رہی۔‘‘ اور یہ بھی صرف اس لیے ممکن ہوا کیونکہ وہ ایک مقبول فنکارہ تھیں۔ ’’مجھے اپنی تنخواہ سے بھی زیادہ رقم تحفے کے طور پر ملتی تھی۔ میری پوری تنخواہ قرض کی ادائیگی میں چلی جاتی تھی۔ [بعد میں] میری والدہ کا کینسر سے انتقال ہوگیا۔‘‘

کمپنی میں ایک اور فنکار رجنی اپنا سین ختم کرنے کے بعد لباس تبدیل کرنے کے لیے بیک اسٹیج آتے ہیں۔ ’’یہ ہے رجنی کانت!‘‘ ایشوریہ کہتی ہیں۔ ’’ابھی یہ رجنی کانت ہے، پہلے شرت کمار تھا۔ پہلے اس کا جسم کسی پہلوان کی طرح تھا۔ جب میں۱۴ سال کی تھی، تب وہ ایک اسٹار اداکار تھا۔ لوگ اس کے ساتھ کام کرنے کے لیے مسابقت کرتے تھے۔ اس وقت میں اس کی معاون تھی،‘‘ ایشوریہ نے ہنستے ہوئے کہا۔ اس اداکار کا اصل نام ونائیکم ہے، اور اس کی عمر پچاس کے آس پاس ہے۔ ’’انا ملائی فلم کے رجنی کانت اور موجودہ رجنی میں فرق ہے، یہ میرے لیے بھی سچ ہے،‘‘ وہ ہنستے ہوئے کہتے ہیں۔

’’ہمیں کھانے اور عزت کے ساتھ جینے کے لیے سخت محنت کرنی پڑتی ہے،‘‘ ایشوریہ مزید کہتی ہیں۔ ’’اس کام سے مجھے خوشی ملتی ہے، لیکن ساتھ ہی ایک ٹرانس ویمن کے طور پر، ہمیں بہت زیادہ تشدد کا سامنا کرنا پڑتا ہے۔ کچھ گاؤوں میں تو ہم محفوظ طریقے سے پیشاب کرنے تک نہیں جا سکتے۔ بہت سی ٹرانس خواتین نے اس وجہ سے یہ کام چھوڑ دیا ہے۔‘‘ اپنی ماں کی موت کے بعد ایشوریہ نے صنفی تصدیق کی سرجری کروائی۔ لیکن جب وہ ڈرامہ کی پیشکش کے لیے واپس گئیں تو ان کی جدوجہد جاری رہی۔

’’اس وقت سرجری کروانے والی ٹرانس خواتین کو ناٹک ٹولیوں میں قبول نہیں کیا جاتا تھا۔ میری سرجری کے بعد تین سال تک، جب بھی میں ٹولی کے ساتھ جاتی تھی تو میں لنگی اور قمیض پہنتی تھی، ساڑی پہننے پر وہ ہمیں قبول نہیں کرتے تھے۔ بہت سی کمپنیوں نے مجھے صرف اس وجہ سے مسترد کر دیا تھا کہ میں کون ہوں۔ میں مزید بے عزتی برداشت نہیں کر سکتی تھی۔ اسی وقت میں نے سوچا کہ میں خود اپنی ڈرامہ کمپنی کیوں شروع نہیں کر سکتی؟ کسی اور کے لیے کام کرنے کے بجائے مجھے اپنے جیسی دوسری ٹرانس خواتین کے ساتھ کاروبار شروع کرنا بہتر لگا،‘‘ وہ کہتی ہیں۔

سال ۲۰۱۸ میں ایشوریہ نے خود کی ڈرامہ کمپنی شروع کرنے کے لیے گاؤں کے ایک نجی ساہوکار سے ایک بڑی رقم ناقابل یقین حد تک زیادہ شرح سود پر قرض لی۔ کمپنی شروع کرنے کے کچھ مہینوں کے اندر، کووڈ۔۱۹ کی وجہ سے لاک ڈاؤن کا اعلان کر دیا گیا۔ ان جیسی ٹرانس فنکاروں کو وبائی مرض سے بچنا مشکل تھا۔ انہیں پہلے سے اس بات کا علم تھا کہ وہ قرض میں ڈوبی ہوئی ہیں جس کی ادائیگی مشکل تھی۔

’’لاک ڈاؤن کے بعد بھی ڈرامے سے ہونے والی آمدنی ناکافی تھی۔ میں نے دوسری ٹرانس خواتین کے ساتھ کڈئی وصول [بھیک مانگنے] کے لیے جانا شروع کیا۔ مجھے اس بات کا برا لگتا تھا کہ ہر شخص ہمیں نفرت اور گری ہوئی نگاہ سے دیکھتا تھا۔ اس لیے میں ڈرامے میں واپس آگئی،‘‘ وہ کہتی ہیں۔ ایشوریہ کو یقین ہے کہ اگر وہ بھیک مانگنا جاری رکھتیں یا جنسی کام (سیکس ورک) میں لگ جاتیں تو یقینی طور پر زیادہ کماتیں۔ ’’لیکن ہمیں یہ پسند نہیں ہے۔ مجھے یہ اچھا لگتا ہے، یہ میری زندگی ہے، میری دنیا ہے، اس طرح میں پیسہ کماتی ہوں؛ یہی وہ چیز ہے جس سے ہم کھاتے ہیں اور عزت سے جیتے ہیں۔‘‘

ان کی کمپنی میں اس وقت پانچ سے چھ ٹرانس خواتین فنکار تھیں، لیکن اب یہ تعداد تقریباً ۱۰تک پہنچ گئی ہے۔ حالانکہ شوز کی تعداد پہلے جیسی نہیں رہی۔ ان کے شوز کی تعداد ایک سال میں۲۵۰ سے کم ہو کر ۱۶۰-۱۸۰ تک رہ گئی ہے۔ کمپنی تمل ناڈو کے بہت سے اضلاع میں پرفارم کرتی ہے، تہواروں کے موسم میں مہینہ میں تقریباً ۲۵ شو ملتے ہیں۔

’’ہمیں پورٹّاسی کے مہینہ سے لے کر تائی کے مہینہ [ستمبر سے فروری] تک کوئی شو نہیں ملتا ہے۔ یہ سال کے مشکل ترین مہینے ہوتے ہیں،‘‘ وہ کہتی ہیں۔ ’’آف سیزن کے دوران، ہم گھر پر [کام کے بغیر] رہتے ہیں۔ ہم ان دنوں میں جو پیسہ کماتے ہیں وہ کھانے کے لیے بچاتے ہیں۔ جب ہمارے پاس ڈرامے کا کام ہے تو ہم بھیک کیوں مانگیں؟ جب کوئی کام نہیں ہے تو ہمیں ایسا کرنا پڑے گا۔ ایسی صورتحال نہیں آنی چاہیے۔‘‘

ایشوریہ کا خیال ہے کہ آف سیزن کے دوران حکومت کی جانب سے شوز کی شکل میں ملنے والا کچھ تعاون ایک اچھا قدم ہوگا۔ ’’تمل ناڈو حکومت کی ’اِلّم تیڈی کلوی‘ [دروازے پر تعلیم] پہل کے تحت میں نے ضلع بھر میں سرکاری اسکولوں اور کالجوں کے قریب رہنے والے تعلیمی بلاکس اور برادریوں کا دورہ کرنا شروع کیا۔ ہم نے گانے اور رقص کے ذریعے اس پروگرام کے بارے میں بیداری پیدا کی،‘‘ وہ بتاتی ہیں۔ انہیں تمل ناڈو حکومت کی جانب سے سال ۲۰۲۳ میں بہترین ٹرانس پرسن کا ایوارڈ ملا۔ ریاستی سطح کا ایوارڈ تیرو ننگ یر ایک ایسے ٹرانس جینڈر شخص کو تسلیم کرتا ہے اور اس کی تعظیم اور تکریم کرتا ہے جس نے اپنی برادری کی فلاح و بہبود کے لیے کام کیا ہو اور اپنی کوششوں سے اپنا کریئر بھی بنایا ہو۔

ایشوریہ جلد ہی اسٹیج پر دوبارہ داخل ہوں گی، لہٰذا وہ اپنے ایکٹ سے پہلے ایک چھوٹی سی جھپکی لیتی ہیں۔ ان کے بیدار ہونے تک ان کا لباس اور میک اپ تیار ہو جاتا ہے۔ وہ تولئی کرگم کی پیشکش کرنے والی ہیں۔ سر پر سومبو (چھوٹا برتن)، جس کا وزن ڈیڑھ کلوگرام ہے، رکھ کر رقص کی پیشکش کی جاتی ہے۔ پیتل کا ایک اور بڑا برتن جسے تولئی کہتے ہیں، پانی سے بھرا ہوتا ہے۔ اس کا وزن تقریباً ۱۵ کلو ہوتا ہے اور اسے سومبو کے اوپر رکھا جاتا ہے۔

رات کے ۲ بجے ہیں اور سامعین کو بیدار اور مشغول رکھنے کے لیے وقفہ کے دوران یہ پیچیدہ رقص پیش کیا جا رہا ہے۔

’’میں۲۰ سال سے رقص کر رہی ہوں۔ میں نے ۱۷ سال کی عمر میں یہ کام شروع کیا تھا۔ میں نے تمل ناڈو کے تقریباً تمام اضلاع میں پرفارم کیا ہے۔ یہ میرا تولئی کرگم ہے جس نے مجھے شہرت دی ہے۔ میرے بہترین پرفارمنس کے دنوں میں ڈرامے کے منتظمین صرف اس کمپنی کو بک کرتے تھے جس کے ساتھ میں رہتی تھی۔ حالانکہ میں ۲۰ روپے کی تنخواہ پر کام کرتی تھی، لیکن اپنے ناظرین کی جانب سے مجھے بطور تحفہ ۵۰۰ روپے تک مل جاتے تھے۔ اس طرح میں نے اپنے کنبے کی کفالت کی۔ اب میں کبھی کبھار ہی رقص کرتی ہوں کیونکہ ڈاکٹر نے مجھے رقص نہ کرنےکا مشورہ دیا ہے۔ برسوں تک رقص کرنے کی وجہ سے میری گردن کی ہڈیوں کو نقصان پہنچا ہے۔ پہلے جو ۳۰ منٹ کی پیشکش ہوا کرتی تھی وہ اب خصوصی درخواستوں کی وجہ سے ۱۰ منٹ کی رہ گئی ہے۔

ایشوریہ جب اسٹیج پر اپنے فن کا مظاہرہ کرتی ہیں، تو جس طرح وہ گھڑوں کو اپنے سر پر متوازن کرتے ہوئے رقص کرتی ہیں اور آس پاس پانی چھلکتا ہے، اس سے ان کے کئی سالوں کے تجربے کا واضح طور پر اندازہ لگایا جا سکتا ہے۔ رقص کے بعد اپنے بھیگے کپڑوں میں ہی وہ مائیکروفون پکڑ کر اپنی پرکشش آواز میں گانا سدھاکر کا گیت گانے لگتی ہیں۔

’’چائے پینے کا الگ گلاس
ایس سی، ایس ٹی کے لیے نہیں کوئی گلاس؟
چھوا چھوت کے مظالم
امبیڈکر نے توڑ کر کیا پاش پاش…

سیٹیوں، نعرۂ تحسین اور تالیوں کی آواز سے مجمع زندہ ہو جاتا ہے۔ کچھ تو ہاتھ اٹھا کر رقص کرتے ہیں، اور کچھ تحفے کے طور پر ایشوریہ پر نوٹوں کی بارش کرتے ہیں۔ ’’یہ ایک کالونی کا علاقہ [دلتوں کی بستی] ہے۔ یہاں سنیما اور عقیدت کے گیت کا اثر نہیں ہوتا،‘‘ ایشوریہ نے اسٹیج سے دور ایک بار مجھے آگاہ کیا۔ ’’یہاں صرف امبیڈکر کے گیت سے لطف اندوز ہوا جاتا ہے۔‘‘

پو پھوٹ رہا ہے، اور ہم ڈرامے کے اختتام کے قریب ہیں، قسمت کا آخری موڑ اپنے ساتھ بدلہ اور انصاف لے کر آ رہا ہے۔

اپنی مایوسی کی گہرائیوں میں، شکشت خوردہ راجہ ایلی لارسن اور اس کی نابینا ملکہ کلئی سیلوی ایک دوسرے کو دوبارہ مل جاتے ہیں۔ کلئی سیلوی کے پاس اپنے عقیدہ کے سوا کچھ نہیں بچا، وہ دیوی کالی کی طرف رجوع کرتی ہے۔ بے پناہ مصائب اور ناانصافی سے پیدا شدہ اس کی دعائیں کالی ماتا کے کانوں تک پہنچتی ہیں۔ کالی ان کے سامنے حاضر ہو جاتی ہیں۔

وہ جوڑے کو دعا دیتی ہیں اور ان کے زخموں کو مندمل کرتی ہیں۔ ان کا الہامی انصاف انہیں اذیت دینے والوں تک پہنچتا ہے: موہنا کو سمندر کی گہرائیوں میں ڈوبنے، گہرائیوں کی مخلوقات کا شکار بننے کے لیے ملعون کیا جاتا ہے۔ کمانڈر کی اسکیمیں اس کے جادوگرنی اتحادی کے بغیر بکھر جاتی ہیں۔ بادشاہ ایلی لارسن اور ملکہ کلئی سیلوی کو ان کے جائز مقام پر بحال کر دیا جاتا ہے۔

اسٹیج پر، ایشوریہ سامعین کو واپس نابینا کلئی سیلوی سے ملواتی ہیں، جو سڑکوں پر بھیک مانگتی ہوئی بھٹکتی ہے۔ اس بار وہ دیوی کالی کی پوجا کر رہی ہے۔ دیوی اس کے سامنے حاضر ہوتی ہیں اور انصاف دلانے کا وعدہ کرتی ہیں۔ پانچ ٹرانس ویمن آرٹسٹ کالی کے رقص کے اس آخری منظر میں کالی کا کردار ادا کر رہی ہیں۔ مٹی کے برتنوں میں آگ جلائی جاتی ہے۔ نیم کے پتے گچھوں میں رکھے جاتے ہیں۔ پانچ کالی، جن میں سے ہر ایک مختلف رنگوں کے لباس میں ملبوس ہیں، جوش سے رقص کر رہی ہیں، شور (کولاوئی) مچا رہی ہیں اور قطار میں کھڑے ہوکر اسٹیج پر چڑھتی ہیں۔

ٹرانس خاتون فنکارہ سیمبا (۲۳) اپنے ہاتھوں کو شدت سے مروڑ رہی ہیں، ساتھ میں وہ مرغ کا گلا کاٹ کر خون چوس رہی ہیں۔ ایشوریہ بھیڑ کو راستہ بنانے کا اشارہ کرتی ہیں۔ ایک سیکنڈ میں، سیمبا اپنے منہ میں مرغ لے کر گلی کے آخر تک بھاگتی ہیں اور غائب ہو جاتی ہے۔ کچھ فنکار سیمبا کے پیچھے بھاگتے ہیں اور انہیں واپس لے کر آتے ہیں۔ کالی پرسکون حالت میں واپس آتی ہیں۔ وہ سامعین میں موجود لوگوں میں مقدس راکھ اور کمکم تقسیم کرتے ہیں اور ڈرامہ ختم ہو جاتا ہے۔

فنکار صبح ہوتے ہی پیک اپ کرنا شروع کر دیتے ہیں۔ ایونٹ آرگنائزر ایڈوانس بکنگ کے لیے ادا کی گئی رقم کاٹ کر ایشوریہ کو بقایا رقم دیتا ہے۔ ایشوریہ اپنے مول تول سے ایک ہزار روپے کی ایک چھوٹی رقم حاصل کرتی ہیں۔

’’یہ کہنا مشکل ہے کہ ہماری روزانہ کی آمدنی کتنی ہے۔ ہم ڈرامے کی قسم اور تقریب کے لحاظ سے ایک شو کے لیے ۲۵ ہزار سے ۳۰ ہزار روپے کے درمیان محنتانہ وصول کرتے ہیں۔ مختلف فنکاروں کی تنخواہیں مختلف ہوتی ہیں۔ بکنگ کے لحاظ سے تجربہ کار فنکاروں، خصوصاً موسیقاروں کی تنخواہ ۱۵۰۰ سے ۲۰۰۰ روپے تک ہوتی ہے، جب کہ نوجوان فنکاروں کو ۱۰۰۰ سے ۱۲۰۰ روپے تک ملتے ہیں۔ کبھی کبھی میرے پاس بمشکل ۲۰۰۰ روپے باقی رہ جاتے ہیں، اور کبھی تو کچھ بھی نہیں بچتا،‘‘ ایشوریہ کہتی ہیں۔

اور پھر کچھ توقف کے بعد وہ مزید کہتی ہیں، ’’اب یہ کمپنی میری ہے، لیکن میں اس کی اصل مالک نہیں ہوں۔ ہمیں اس کے مالک کو بھی کچھ رقم دینی ہوتی ہے جس کے پیسے ہم نے اس کمپنی کو بنانے میں لگائے ہیں۔‘‘ ایشوریہ کے ذریعہ شروع میں لیے گئے قرض کے سات ہندسوں کے اعداد میں چھ سالوں میں چار گنا اضافہ ہوا ہے، جس میں کچھ اضافی قرض اور بھاری سود بھی شامل ہے۔

’’ہمیں [مالک کو] جو ادا کرنا ہے اس کا انحصار اس بات پر ہے کہ ہم نے کتنی کمائی کی ہے،‘‘ وہ کہتی ہیں۔ جب مالی معاملات کی بات آتی ہے تو ایشوریہ کافی کم سخن ہو جاتی ہیں۔ وہ گاؤں میں سود کی موجودہ شرحوں اور طریقوں کے پیش نظر اپنے چیلنجوں سے بخوبی واقف ہیں۔ لیکن وہ تفصیلات بتانے سے گریز کرتی ہیں کیونکہ انہیں اس کے ممکنہ برے نتائج کا خدشہ ہے۔

’’وہ رقم کبھی واپس نہیں کی جا سکتی۔ یہ ویسے ہی رہتی ہے۔ میں نے جو قرض لیا ہے اس پر میں ماہانہ سود ادا کرتی ہوں۔ لیکن ہم اصل رقم کبھی واپس نہیں کرسکتے،‘‘ ایشوریہ کہتی ہیں۔ وہ اپنے سامنے آنے والے چیلنجوں کو کم نہیں سمجھتیں، لیکن ان کا نقطہ نظر واضح رہتا ہے۔ ڈرامہ انہیں پیسے کمانے یا قرض کی ادائیگی کے بجائے آگے بڑھنے کی تلقین کرتا ہے۔

ڈرامے کے تمام ساز و سامان گاڑی کی چھت پر لوڈ کر دیے گئے ہیں۔ وین روانہ ہو جاتی ہے۔ عقبی کھڑکی پر ایشوریہ کی ایک بڑی تصویر چسپاں ہے۔ یہ گروپ آدھے گھنٹہ کے سفر کے بعد کلوَئی چوراہے پر پہنچتا ہے۔ یہ وہ مقام ہے جہاں سے فنکاروں کو پرفارمنس کے دنوں میں اٹھایا اور چھوڑا جاتا ہے۔ ایشوریہ کا سیزن کے لیے کرایے کا مکان یہاں سے ۱۰۰ میٹر کے فاصلہ پر ہے، جس کی چہار دیواری ناریل کے پتوں سے بنی ہوئی ہے۔

’’میں نہیں جانتی کہ مجھے اس فن سے اتنا پیار کیوں ہے۔ یہ صرف پیسے کے لیے نہیں ہے۔ میں ڈرامے میں جو کردار ادا کرتی ہوں، ان کے ذریعے میں اپنے دکھ اور سکھ کا اظہار کرسکتی ہوں،‘‘ ایشوریہ کہتی ہیں، ’’اس سے کوئی فرق نہیں پڑتا کہ مجھے کتنی ہی مشکلات کا سامنا کرنا پڑتا ہے۔ جب میں اسٹیج پر ہوتی ہوں، تو اس وقت کوئی چیزمعنی نہیں رکھتی۔ لہٰذا میں کسی بھی مشکل کو زندگی کا ایک حصہ محض سمجھتی ہوں۔‘‘

اضافی معلومات کی فراہمی کے لیے ہم کویتا مرلی دھرن کے شکرگزار ہیں۔

یہ اسٹوری مرنالنی مکھرجی فاؤنڈیشن (ایم ایم ایف) سے ملی فیلوشپ کے تحت لکھی گئی ہے۔

ترجمہ نگار: شفیق عالم