کشمیر کی شادیوں اور وازوں پر ایران جنگ کا اثر

’’ہم نے یہ کھانا گیس پر پکانے کا ارادہ کیا تھا،‘‘ ریاض احمد بجھتے ہوئے انگاروں کو خاموشی سے دیکھتے ہوئے کہتے ہیں۔ ’’لیکن قلت کی وجہ سے مجھے گیس کے بجائے لکڑی استعمال کرنا پڑی۔ اب اس پر تقریباً دوگنا خرچ آ رہا ہے۔‘‘

ریاض احمد انچاری (۵۰) ایک ’وازہ‘ ہیں، یعنی روایتی کشمیری باورچی۔ درحقیقت وہ یہاں اپنے ایک دوست کی بہن کی شادی میں ہیڈ وازہ (سربراہ باورچی) کی ذمہ داری نبھا رہے ہیں۔ مگر اس وقت وہ ایک ایسے مسئلہ سے دوچار ہیں جس کا پہلے کبھی تصور بھی نہیں کیا گیا تھا۔

یہاں سے تقریباً ۳۰۰۰ کلومیٹر دور واقع ایران میں جاری جنگ، کشمیر کی شادیوں کو متاثر کر رہی ہے۔

پہلے، گھر میں چاروں طرف چہل پہل دکھائی دے رہی تھی۔ کچھ لوگ روایتی گیت گا رہے تھے تو کچھ رقص میں مصروف تھے، جب کہ ان میں سے چند لوگ مہمانوں کی خاطر مدارت کے لیے ادھر اُدھر دوڑ رہے تھے۔ گھر پر لگی رنگ برنگی روشنیوں کی لڑیاں رات میں دلکش نظارہ پیش کر رہی تھیں۔

مجھے ہمیشہ سے وازوں میں، ان کی کہانیوں، ان کی نسل در نسل منتقل ہونے والی تراکیبِ پکوان میں خاص دلچسپی رہی ہے۔ اسی دلچسپی کے باعث رات تقریباً گیارہ بجے، جب وہ شادی کے لیے کھانا تیار کر چکے تھے، میں ان باورچیوں کے ساتھ بیٹھ گیا۔

ہر وازہ اپنے فن میں بے مثال مہارت رکھتا ہے۔ ایک گوشت کو حیرت انگیز مہارت اور نفاست سے کاٹنے کا ماہر ہے۔ دوسرا دھیمی آنچ پر پکنے والے کھانوں کے وقت اور مراحل کو بخوبی سمجھتا ہے۔ جب کہ ایک اور باورچی مصالحوں کی ایسی فطری سمجھ رکھتا ہے کہ صرف ایک نظر میں بتا سکتا ہے کہ کس پکوان میں کون سا ذائقہ کم ہے۔

چھبیس سال کا تجربہ رکھنے والے ہیڈ وازہ، ریاض احمد کے لیے گیس سلنڈروں کا انتظام کرنا اب تقریباً اتنا ہی مشکل ہو گیا ہے جتنا خود دعوت کا کھانا تیار کرنا۔ آج انہیں سرینگر کے رینہ واری علاقہ میں ہونے والی اس شادی کے لیے ۲۰۰ سے زائد باراتیوں کی خاطر ۱۱۰ کلوگرام گوشت اور ۵۰ کلوگرام سے زیادہ چکن پکانا ہے۔ لیکن ایل پی جیگیس کی قلت نے ان کے کام کو انتہائی دشوار بنا دیا ہے۔

ریاض، جنہوں نے پچھلے سال تقریباً ڈھائی لاکھ روپے کمائے تھے، کہتے ہیں، ’’مجھے اس سال اس رقم کے نصف کی بھی توقع نہیں ہے۔‘‘ گیس کی کمی نے انہیں شادیوں کے بعض ٹھیکے مسترد کرنے پر بھی مجبور کر دیا ہے۔

کشمیر کا روایتی کثیر پکوانی دسترخوان، وازوان، وادی بھر میں شادیوں کی تقریبات کا ایک لازمی جزو ہے۔ آج رات کی ضیافت میں کباب، طبخ ماز، چکن، میتھی، روغن جوش، رِستہ، قورمہ، آب گوشت، پنیر اور گوشتابہ جیسے پکوان شامل ہیں۔

سرینگر کے مخدوم صاحب علاقہ سے تعلق رکھنے والے مؤرخ ظریف احمد ظریف کے مطابق، ’’وازوان اس کثیر پکوانی ضیافت کا کشمیری نام ہے جو تقریباً ۷۰۰ سال قبل وسطی ایشیا سے آنے والے تاجروں کے ذریعہ کشمیر پہنچی تھی۔‘‘

وہ مزید کہتے ہیں، ’’اس کے سات بنیادی پکوانوں میں سے پانچ وسطی ایشیا سے آئے تھے، جب کہ رِستہ اور گوشتابہ کو ہم نے شامل کیا تھا۔‘‘

صدیوں کے دوران، وازوان صرف ایک کھانے کی روایت نہیں رہا بلکہ کشمیری مہمان نوازی، تہذیب اور ثقافتی شناخت کی علامت بن چکا ہے۔

روایتی طور پر وازوان، نسل در نسل منتقل ہونے والے باورچیوں کے ہاتھوں لکڑی کی آگ پر تیار کیا جاتا تھا۔ تاہم گزشتہ ۱۵ برسوں کے دوران، شہری علاقوں میں جگہ کی کمی کے باعث، ایل پی جی گیس سلنڈروں نے بتدریج لکڑی کی جگہ لینا شروع کر دی، کیوں کہ گیس پر کھانا پکانے کے لیے نسبتاً کم جگہ کی ضرورت ہوتی ہے۔

ریاض بتاتے ہیں، ’’اگر کسی گاہک کے پاس ۱۰ ضرب ۱۲ فٹ کی جگہ ہو تو ہم گیس پر ۱۵۰ کلوگرام گوشت پکا سکتے ہیں۔ لیکن اتنی ہی مقدار لکڑی پر پکانے کے لیے تقریباً چھ گنا زیادہ جگہ درکار ہوگی۔ اس کے علاوہ، گیس کے استعمال سے دھواں بھی نہیں ہوتا۔‘‘

مگر ایل پی جی کی قلت نے بہت سے وازوں کو دوبارہ روایتی طریقہ، یعنی لکڑی کی آگ پر کھانا پکانے کی طرف لوٹنے پر مجبور کر دیا ہے۔

ریاض کہتے ہیں، ’’اتنا کھانا پکانے کے لیے میں چار چھوٹے گیس سلنڈر خریدتا، جن پر نقل و حمل سمیت تقریباً ۴۵۰۰ روپے کا خرچ آتا۔ اب مجھے لکڑی استعمال کرنا پڑ رہی ہے، اور اس کے لیے دس کوئنٹل لکڑی درکار ہے۔ اس پر تقریباً ۸۵۰۰ روپے خرچ ہوں گے، جو گیس کے مقابلے میں تقریباً دوگنا ہے۔‘‘

اس قلت کے منفی اثرات صرف باورچیوں تک محدود نہیں ہیں، بلکہ شادیوں سے وابستہ پورے معاشی نظام کو متاثر کر رہے ہیں۔

ریاض کہتے ہیں، ’’گیس نہ ملنے کی وجہ سے مجھے چار یا پانچ تقریبات کے آرڈر چھوڑنے پڑے، جس سے تقریباً ایک لاکھ روپے کا نقصان ہوا۔ لیکن یہ نقصان صرف میرا نہیں ہے۔ اس سے وہ تمام لوگ بھی متاثر ہوتے ہیں جو کھانا پکانے میں میری مدد کرتے ہیں۔ ان تقریبات کے لیے مجھے تقریباً ۲۵ افراد کی ضرورت پڑتی۔‘‘

’’۱۵۰ کلوگرام کھانا تیار کرنے کے لیے پانچ وازوں کی ضرورت ہوتی ہے، جن میں دو ہیڈ باورچی اور تین معاون شامل ہوتے ہیں، اور اس کام میں دو دن لگتے ہیں۔ اس لیے ہونے والا نقصان ان کے خاندانوں کو بھی متاثر کرتا ہے۔ اگر یہی صورتحال برقرار رہی تو میرا خیال ہے کہ مجھے اس سیزن میں اپنی نصف بکنگز منسوخ کرنا پڑیں گی۔‘‘ ان وازوں میں سے بعض، خصوصاً معاون باورچی، ضلع بڈگام کے گاؤں بیرواہ سے تعلق رکھتے ہیں، جو اس فن اور مہارت کا ایک اہم مرکز سمجھا جاتا ہے۔

اس بحران کے اثرات صرف ریاض تک محدود نہیں ہیں، بلکہ سرینگر کے دیگر باورچی بھی اس سے متاثر ہو رہے ہیں۔

سرینگر کے قدیم علاقہ نواکدل سے تعلق رکھنے والے ایک اور وازہ، وسیم احمد مٹو بتاتے ہیں کہ حال ہی میں انہیں ۱۹ کلوگرام کا ایک گیس سلنڈر ۳۰۰۰ روپے میں خریدنا پڑا کیوں کہ ان کے پاس کوئی دوسرا راستہ نہیں تھا۔ متعلقہ گاہک کے پاس لکڑی پر کھانا پکانے کے لیے مناسب جگہ موجود نہیں تھی۔

پورے سرینگر میں لوگ گیس سلنڈر حاصل کرنے کے لیے مشکلات کا سامنا کر رہے ہیں۔

میں جس شادی میں شریک ہوا تھا وہ بخیر و خوبی انجام پا گئی، لیکن میرے دوست زاہد احمد، جو اس شادی کے میزبان تھے، کہتے ہیں، ’’جب میں نے سنا کہ شاید لاک ڈاؤن لگ جائے، تو میں نے فیصلہ کیا کہ اپنی بہن کا نکاح سادگی سے کروں گا۔‘‘ تاہم وہ یہ بھی تسلیم کرتے ہیں کہ بہت سی شادیوں میں میزبانوں نے باراتیوں کی تعداد کم کر دی ہے اور وازوان میں پیش کیے جانے والے پکوانوں کی تعداد بھی گھٹا دی ہے۔

ایران میں جاری جنگ، کشمیر میں ایک مختلف نوعیت کے نقصانات کا سبب بن رہی ہے۔