ایران جنگ کا اثر: بیلوں سے کھیت جوتتے کسان

تُکا رام ماسل اپنی موٹر سائیکل پر دو بڑے پلاسٹک کے ڈبے باندھ کر ڈیزل خریدنے شہر کی طرف نکل پڑتے ہیں۔ لیکن وہ اپنے ٹریکٹر سیدھے پٹرول پمپ پر کیوں نہیں لے جاتے؟

’’اس سے ایندھن اور پیسے دونوں برباد ہوں گے،‘‘ ماسل کہتے ہیں۔ ان کے مطابق، ایک ٹریکٹر زیادہ سے زیادہ پانچ کلومیٹر فی لیٹر ڈیزل کا اوسط دیتا ہے اور ’’اب ڈیزل کی قیمت تقریباً ۱۰۰ روپے فی لیٹر ہو گئی ہے۔‘‘ اس کے علاوہ انہیں کئی پٹرول پمپوں کے چکر لگانے پڑتے ہیں۔

ڈیزل کی راشننگ شروع ہو گئی ہے۔

مہاراشٹر کے خشک سالی سے متاثرہ دھاراشیو ضلع کے بھوم قصبہ سے تقریباً ۲۵ کلومیٹر دور واک وَڈ گاؤں کے ۵۳ سالہ کسان ماسل کہتے ہیں، ’’وہ ہر بار صرف کچھ لیٹر ڈیزل ہی دیتے ہیں۔‘‘

’’میں پانچ الگ الگ پٹرول پمپوں پر جا کر ڈیزل خریدتا ہوں، تاکہ کم از کم ۲۰-۲۵ لیٹر جمع کر سکوں، جو ایک دن کے لیے کافی ہو،‘‘ وہ بتاتے ہیں۔ بھوم اور اس کے آس پاس پٹرول پمپ بہت کم ہیں۔

کچھ دنوں میں ماسل ڈیزل کی تلاش میں ایک پمپ سے دوسرے پمپ تک ۷۰-۸۰ کلومیٹر کا فاصلہ طے کرتے ہیں۔ وہ کہتے ہیں، ’’اور تب بھی میں خود کو خوش قسمت مانتا ہوں، بشرطیکہ ہر دو تین دن میں کچھ ڈیزل مل جائے۔‘‘ کئی بار پٹرول پمپ کے ملازم پلاسٹک کے ڈبوں میں ڈیزل بھرنے سے بھی منع کر دیتے ہیں اور ٹریکٹر کو سیدھے پمپ پر لانے کی شرط رکھتے ہیں۔

خریف کے موسم سے پہلے مئی کے مہینہ میں ڈیزل کی مانگ اچانک بڑھ گئی۔ حالانکہ، مرکزی حکومت اور تیل کمپنیاں یہ دعویٰ کر رہی ہیں کہ مغربی ایشیا میں جنگ کے باوجود ایندھن کی کوئی کمی نہیں ہے، لیکن زمینی حقیقت کچھ اور ہی ہے۔ شہروں میں ۱۵ مئی کے بعد نو دنوں میں پٹرول کی قیمت چار بار بڑھائے جانے کا اثر دکھائی دیا۔

دیہی علاقوں میں ڈیزل کے بارے میں واقعی بے چینی ہے اور یہ لگاتار بڑھ رہی ہے۔ کئی ضلعوں میں فکرمند کسان لمبی قطاروں، خرید کی پابندیوں اور مستقبل میں سپلائی سے متعلق غیر یقینی کی بات کر رہے ہیں۔

ماسل بھی ایسے ہزاروں کسانوں میں شامل ہیں جو اس تشویش میں مبتلا ہیں۔

دھنگر برادری سے تعلق رکھنے والے ماسل کے پاس دو ایکڑ زمین ہے۔ ڈیری صنعت ان کی آمدنی کا بنیادی ذریعہ ہے۔ فیملی پنساری کی ایک چھوٹی دکان بھی چلاتی ہے۔ ان کے دو ٹریکٹر اضافی آمدنی کا ذریعہ ہیں، جنہیں وہ آس پاس کے گاؤوں کے کسانوں کو کرایے پر دیتے ہیں۔

یہ بحران جزوی طور پر لوگوں کے ذریعہ گھبراہٹ میں زیادہ خریداری اور مستقبل میں کمی اور قیمتوں میں اضافہ کے خدشہ کی وجہ سے ایندھن جمع کرنے سے بھی پیدا ہوا ہے۔ سرکاری اعداد و شمار کے مطابق، کچھ علاقوں میں ایندھن کی فروخت اوسط سے ۱۵۰ فیصد زیادہ درج کی گئی ہے۔

شری سائیں پٹرول پمپ پر ملے کسان سریش کربھاری گائکواڑ کہتے ہیں، ’’مجھے اپنی پیاز کے لیے صرف ۲۱۱ روپے فی کوئنٹل ملے۔‘‘ یعنی ایک کلو پیاز کے صرف ۱۱ء۲ روپے ملے۔

ناگپور سے ناسک تک سمردھی مہامارگ اور چھترپتی سمبھاجی نگر ضلع کے ویجاپور، ییولا اور ناسک کے درمیان واقع قصبوں کے پٹرول پمپوں پر ٹریکٹر اور موٹرسائیکلیں رات دیر تک ڈیزل ٹینکروں کے آنے کا انتظار کرتی دکھائی دیتی ہیں۔ پچھلے ہفتہ اس رپورٹر کے ذریعہ دیکھے گئے کئی پٹرول پمپوں پر ڈیزل یا پٹرول دستیاب نہ ہونے کے بورڈ لگے ہوئے تھے۔

چھوٹے کسانوں کی حالت اور بھی خراب ہے۔ جو کسان اپنے ٹریکٹر کرایے پر دیتے ہیں وہ اب کھیتی کرنے والوں سے خود ڈیزل کا انتظام کرنے کو کہہ رہے ہیں۔ وہیں بڑے کسانوں نے ڈرموں اور ٹنکیوں میں ڈیزل جمع کرنا شروع کر دیا ہے۔ ناسک کی ونی منڈی میں ملے پیاز کے ایک کسان نے بتایا کہ انہوں نے تقریباً ۲۰۰۰ لیٹر ڈیزل پہلے ہی جمع کر کے رکھ لیا تھا۔

مہاراشٹر بھر میں سوشل میڈیا پر ایسے ویڈیو بھرے پڑے ہیں، جن میں پٹرول پمپوں کے باہر رات بھر کھڑے ٹریکٹر، قطاروں میں ہونے والے تنازعات اور ڈیزل کی تلاش میں ایک پمپ سے دوسرے پمپ تک ڈبے لے کر گھومتے کسان دکھائی دیتے ہیں۔

ڈیزل کے لیے جاری اس افراتفری کے حیرت انگیز نتائج دکھائی دے رہے ہیں۔

انیس پٹھان (۴۸) شاہ پور گاؤں میں ایک ایکڑ زمین کے مالک ہیں۔ کھیتی سے ہونے والی آمدنی کو وہ مزدوری کر کے بڑھاتے ہیں۔ حالیہ دنوں میں وہ اپنے کھیت کی جُتائی کے لیے بیلوں کی ایک جوڑی کا استعمال کر رہے ہیں۔ وہ کہتے ہیں، ’’ٹریکٹر کا کرایہ ۱۰۰۰ روپے فی ایکڑ سے بڑھ کر ۱۵۰۰ روپے فی ایکڑ ہو گیا ہے۔ بیل جو کام دو دن میں کرتے ہیں، ٹریکٹر آدھے دن میں کر دیتا ہے۔ لیکن اس سے پیسے بچ جاتے ہیں۔‘‘ پٹھان کے مطابق، شاہ پور اور اس کے گرد و نواح میں تقریباً ۵۰۰ جوڑی بیل ہیں۔

’’اس سال زیادہ تر کسان پہلے سے ہی بیلوں کی مدد لینے لگے ہیں۔‘‘