மகாராஷ்டிர விவசாயிகளை பாதிக்கும் ஈரான் போர்

ட்ராக்டர்களுக்கு டீசல் வாங்க இரண்டு பெரிய பிளாஸ்டிக் கேன்களை மோட்டார்சைக்கிளில் இணைத்து டவுனுக்கு செல்கிறார் துக்காராம் மசல். ஏன் ட்ராக்டர்களை அவர் நேரடியாக எடுத்து செல்லவில்லை?

“எரிபொருளும் பணமும்தான் வீணாகும்,” என்கிறார் மசல். அதிகபட்சமாக ஒரு லிட்டருக்கு ஐந்து கிலோமீட்டர் ட்ராக்டர் செல்லும். ஆனால் “டீசலின் விலை தற்போது லிட்டருக்கு 100 ரூபாயாக இருக்கிறது.” மேலும் அவர் பல எரிபொருள் நிலையங்களை சுற்றி அலைய வேண்டியிருக்கும்.

எனவே டீசலை மிச்சம் பிடிக்கும் வேலை தொடங்கிவிட்டது.

“ஒவ்வொரு முறையும் கொஞ்சமாகதான் டீசல் எங்களுக்கு தருகிறார்கள்,” என்கிறார் 53 வயது விவசாயி. அவர் வசிக்கும் வக்வாத் கிராமம், மகாராஷ்டிராவில் பஞ்சம் பாதிக்கும் தாராஷிவ் மாவட்டத்திலுள்ள பூம் டவுனிலிருந்து 25 கிலோமீட்டர் தொலைவில் இருக்கிறது.

“ஒருநாள் வரையுமாவது தாக்குப்பிடிக்க தேவையான 20-25 லிட்டர் டீசலை வாங்க ஐந்து வெவ்வேறு பெட்ரோல் நிலையங்களுக்கு செல்கிறேன்,” என்கிறார். பூம் பகுதியை சுற்றி பல எரிபொருள் நிலையங்கள் இருக்கின்றன.

சில நாட்களில் மசல் 70-80 கிலோமீட்டர்களுக்கு டீசல் தேடி செல்வதுண்டு. “ஒவ்வொரு இரண்டு அல்லது மூன்று நாட்களுக்கு டீசல் கிடைத்தால் எனக்கு அதிர்ஷ்டம்தான்,” என்கிறார். சில நேரங்களில் எரிபொருள் நிலையங்களில் பிளாஸ்டிக் கேன்களில் டீசல் கொடுக்க மறுக்கப்படும். ட்ராக்டர்களை கொண்டு வந்து நிரப்பிக் கொள்ளும்படி சொல்லப்படுவதும் உண்டு.

டீசலுக்கான தேவை சம்பா பருவத்தில் அதிகமானது ஒன்றிய அரசும் எண்ணெய் நிறுவனங்களும் எரிபொருள் பற்றாக்குறை இல்லை என சொன்னாலும் மேற்காசிய போர் முடிவது போல் தெரியவில்லை. களம் வேறாக இருக்கிறது. மே 15 தொடங்கி ஒன்பது நாட்களில் நான்கு முறை பெட்ரோல் விலை உயர்த்தப்பட்டிருக்கிறது.

கிராமங்காளில் டீசல் பற்றாக்குறை அதிகரித்துக் கொண்டிருக்கிறது. பல மாவட்டங்களில் நீண்ட வரிசைகளும் வாங்குவதற்கான வரம்புகளும் நிச்சயமற்றத்தன்மையும் இருப்பதாக விவசாயிகள் சொல்கின்றனர்.

பதற்றத்தில் இருக்கும் விவசாயிகளில் மசலும் ஒருவர்.

தங்கர் சமூகத்தை சேர்ந்த மசலுக்கு சொந்தமாக இரு ஏக்கர் நிலம் இருக்கிறது. பால் விவசாயம்தான் முக்கிய வருவாய் ஆதாரம். ஒரு சிறு கடையையும் அவரது குடும்பம் நடத்துகிறது. அவரின் இரு ட்ராக்டர்களுக்கு வருடத்துக்கு தேவையான கூடுதல் வருமானத்தை கொடுக்கும். பிற கிராம விவசாயிகளுக்கு அவற்றை அவர் வாடகைக்கு விடுவார்.

பதற்றம் கொண்டு நிறைய வாங்கி பதுக்கி வைப்பதும் பற்றாக்குறை உருவாக ஒரு முக்கிய காரணம். சில இடங்களில் சராசரி எரிபொருள் விற்பனை 150 மடங்கு அதிகமாக இருக்கிறது.

நாசிக் போன்ற மாவட்டங்களில் இரண்டு பிரச்சினைகள். வெங்காய விலை சரிந்து, எரிபொருள் விலை உயர்ந்திருக்கிறது. “ஒரு குவிண்டால் வெங்காயங்களுக்கு வெறும் 211 ரூபாய்தான் எனக்கு கிடைத்தது,” என்கிறார் ஸ்ரீ சாய் பெட்ரோல் நிலையத்தில் நாம் சந்தித்த சுரேஷ் கர்பாரி கெய்க்வாட் என்ற விவசாயி. அதாவது கிலோ ரூ.2.11.

நாக்பூரிலிருந்து நாசிக் வரை செல்லும் சம்ருத்தி நெடுஞ்சாலையின் எல்லா பெட்ரோல் நிலையங்களிலும் வைஜாபூர், யெவோலா மற்றும் நாசிக் டவுன்களின் நிலையங்களிலும் ட்ராக்டர், பைக்குகள் இரவு டீசல் டேங்கர்கள் வரும் வரை வரிசை கட்டி நிற்கின்றன. கடந்த வாரத்தில் நாம் சென்ற பல பெட்ரோல் நிலையங்களில் இருப்பு இல்லை என்பற்கான அறிவிப்புகள் வைக்கப்பட்டிருந்தன.

சிறு விவசாயிகள் மோசமாக பாதிப்படைந்திருக்கின்றனர். ட்ராக்டர்களை வாடகைக்கு விடுபவர்கள், டீசலுக்கு விவசாயிகளே ஏற்பாடு செய்து கொள்ளும்படி சொல்கின்றனர். பெருவிவசாயிகள் ட்ரம்களிலும் டாங்குகளிலும் டீசலை சேமித்து வைக்கின்றனர். நாசிக்கை சேர்ந்த விவசாயி ஒருவர், ஏற்கனவே 2,000 லிட்டர் வரை சேமித்து வைத்திருப்பதாக கூறுகிறார்.

பெட்ரோல் நிலையங்களில் வரிசை கட்டி நிற்கும் ட்ராக்டர்கள், வரிசைகளை மீறுவோரிடம் ஏற்படும் சண்டைகள், கேன்களுடன் டீசல் தேடி விவசாயிகள் அலைவது போன்ற சம்பவங்களின் காணொளிகள் மகாராஷ்டிராவின் சமூக ஊடக தளங்களில் நிரம்பியிருக்கின்றன.

டீசல் தேடி அலைவதும் எதிர்பாராத விளைவுகளை உருவாக்குகிறது.

48 வயது அனீஸ் பதானுக்கு சொந்தமாக ஒரு ஏக்கர் நிலம் ஷாப்பூர் கிராமத்தில் இருக்கிறது. அவர் வருமான இழப்பை தினக்கூலி வேலை கொண்டு சமாளிக்கிறார். சமீபத்தில் மாடுகளை கொண்டு அவர் நிலத்தை உழுதிருக்கிறார். “ட்ராக்டர் வாடகை 1,000 ரூபாயிலிருந்து 1,500 ரூபாயாக ஒரு ஏக்கருக்கு உயர்ந்துவிட்டது,” என்கிறார் அவர். “ட்ராக்டர்கள் அரை நாளில் செய்யும் வேலையை மாடுகள் செய்ய இரண்டு நாட்கள் பிடிக்கிறது. ஆனால் பணம் மிச்சமாகிறது,” என்கிறார் பதான். ஷாப்பூரை சுற்றி 500 ஜோடி மாடுகள் இருக்கும் என்கிறார் அவர்.

“இந்த வருடத்தில் பெரும்பாலான விவசாயிகள் இங்கு மாடுகளை பயன்படுத்தத் தொடங்கிவிட்டனர்.”