മഹാരാഷ്ട്രയിലെ കർഷകർ കാളകളിലേക്ക് മടങ്ങുന്നു

തുക്കറാം മാസൽ രണ്ട് വലിയ പ്ലാസ്റ്റിക്ക് പാട്ടകൾ തൻ്റെ മോട്ടോർസൈക്കിളിൽ കെട്ടിവെച്ച്, ട്രാക്ടറുകൾക്കുള്ള ഡീസൽ വാങ്ങാൻ പട്ടണത്തിലേക്ക് തിരിച്ചു. അങ്ങിനെയെങ്കിൽ എന്തുകൊണ്ട്, ട്രാക്ടറിൽത്തന്നെ പോകുന്നില്ല?

“അങ്ങിനെ ചെയ്യുന്നത്, ഇന്ധനവും പൈസയും പാഴാക്കും,” മാസാൽ പറയുന്നു. ഒരു ലിറ്റർ ഡീസൽകൊണ്ട് ട്രാക്ടർ സഞ്ചരിക്കുക പരമാവധി അഞ്ച് കിലോമീറ്ററാണ് ശരാശരി. “ഒരു ലിറ്റർ ഡീസലിന് 100 രൂപയ്ക്കടുത്ത് വേണം.” അത് വാങ്ങാൻ വിവിധ പമ്പുകളിൽ പോകേണ്ടിയും വരും.

ഡീസലിലെ റേഷനിംഗ് ആരംഭിച്ചുകഴിഞ്ഞു.

“ഓരോ തവണയും അവർ കുറച്ച് ലിറ്റർ മാത്രമേ തരൂ,” മഹാരാഷ്ട്രയിൽ വരൾച്ചാ സാധ്യത നേരിടുന്ന ധാരാശിവ് ജില്ലയിലെ ഭൂം പട്ടണത്തിൽനിന്ന് 25 കിലോമീറ്റർ അകലെയുള്ള വാക്‌വാഡ് ഗ്രാമത്തിൽനിന്നുള്ള 53 വയസ്സുള്ള കർഷകനാണ് അദ്ദേഹം.

“ഡീസൽ വാങ്ങാൻ ഞാൻ അഞ്ച് വ്യത്യസ്ത പമ്പുകളിൽ പോവാറുണ്ട്. എന്നാലേ ഒരു ദിവസത്തേക്കാവശ്യമായ 20-25 ലിറ്റർ വാങ്ങാൻ പറ്റൂ,” അദ്ദേഹം പറയുന്നു. ഭൂമിനും ചുറ്റുവട്ടത്തിനുമിടയിൽ വളരെ കുറച്ച് പമ്പുകൾ മാത്രമേയുള്ളു.

ചില ദിവസങ്ങളിൽ ഡീസൽ അന്വേഷിച്ച് പമ്പുകളിൽ പോകാൻ 70-80 കിലോമീറ്റർ സഞ്ചരിക്കേണ്ടിവരാറുണ്ട്. “രണ്ടോ മൂന്നോ ദിവസം കൂടുമ്പോൾ കിട്ടണമെങ്കിൽ നല്ല ഭാഗ്യവും വേണം,” അദ്ദേഹം പറയുന്നു. ചിലപ്പോൾ പമ്പിലുള്ളവർ പ്ലാസ്റ്റിക്ക് പാട്ടകളിൽ ഡീസൽ തരാൻ വിസമ്മതിക്കുകയും ചെയ്യും. ട്രാക്ടർ കൊണ്ടുവരാൻ പറയും അവർ.

ഖാരിഫ് വിളവുകാലത്തോടടുപ്പിച്ച് മേയ് മാസത്തിൽ ഡീസലിനുള്ള ആവശ്യക്കാർ വർദ്ധിച്ചു. ഇന്ധനക്ഷാമമൊന്നുമില്ലെന്ന് കേന്ദ്രസർക്കാരും എണ്ണക്കമ്പനികളും ആവർത്തിക്കുന്നുണ്ടെങ്കിലും, പശ്ചിമേഷ്യയിലെ യുദ്ധം മൂലം, നിലവിലുള്ള സ്ഥിതി വ്യത്യസ്തമാണ്. മേയ് 15-ന് ശേഷമുള്ള ഒമ്പത് ദിവസത്തിനുള്ളിൽ പെട്രോളിൻ്റെ വില നാല് തവണ വർദ്ധിപ്പിച്ചത് നഗരങ്ങളെയാണ് കൂടുതലും ബാധിച്ചത്.

ഗ്രാമപൃദേശങ്ങളിലാകട്ടെ, ഡീസലിനുള്ള പരക്കംപായൽ വസ്തുതയാണ്. അത് വർദ്ധിക്കുകയും ചെയ്യുന്നു. വിവിധ ജില്ലകളിലെ കർഷകർ, പമ്പുകളിലെ നീണ്ട ക്യൂവും, വാങ്ങാവുന്ന ഡീസലിൻ്റെ അളവും ഇന്ധനവിതരണത്തിലെ അനിശ്ചിതത്വവും ഓർത്ത് ആശങ്കാകുലരാണ്.

അത്തരം ആയിരക്കണക്കിന് കർഷകരിൽ ഒരാളാണ് മസാൽ.

ധംഗർ ജാതിക്കാരനായ മാസലിന് സ്വന്തമായി രണ്ടേക്കർ ഭൂമിയുണ്ട്. കന്നുകാലിവളർത്തലാണ് പ്രധാന വരുമാനമാർഗ്ഗം. കുടുംബം ഒരു ചെറിയ പലചരക്കുകടയും നടത്തുന്നുണ്ട്. സമീപത്തെ ഗ്രാമങ്ങളിലെ കർഷകർക്ക് ട്രാക്ടർ വാടകയ്ക്ക് നൽകുന്നതിലൂടെ ഒരു അധികവരുമാനവും അദ്ദേഹം നേടുന്നു.

വെപ്രാളപ്പെട്ട് വാങ്ങിക്കൂട്ടുകയും കരുതിവെക്കുകയും ചെയ്യുന്നതാണ് ഇന്ധനക്ഷാമത്തിനുള്ള ഒരു പ്രധാന കാരണം. ഔദ്യോഗിക കണക്കുകൾപ്രകാരം, ചില സ്ഥലങ്ങളിലെ ശരാശരി ഇന്ധനവില്പന സാധാരണത്തേക്കാൾ 150 ശതമാനംവരെ അധികമാണ്.

നാസിക്ക് പോലുള്ള ജില്ലകളിൽ ഇരട്ടപ്രഹരമാണ് കിട്ടിയത്. സവാള വില കുത്തനെ ഇടിഞ്ഞു. അതേസമയം ഇന്ധനവില കുതിച്ചുയരുകയും ചെയ്തു. “എൻ്റെ സവാളകൾക്ക് ക്വിൻ്റലിന് കിട്ടിയത് വെറും 211 രൂപയാണ്,” ശ്രീ സായ് പെട്രോൾ പമ്പിൽവെച്ച് ഞങ്ങൾ കണ്ടുമുട്ടിയ സുരേഷ് കർഭാരി ഗെയ്ക്‌വാഡ് എന്ന കർഷകൻ പറയുന്നു. അതായത്, ഒരു കിലോയ്ക്ക് 2.11 രൂപ.

നാഗ്പുരിൽനിന്ന് നാസിക്കിലേക്കുള്ള സമൃദ്ധി ഹൈവേയിലുള്ള പെട്രോൾ പമ്പുകളിലും, സംഭാജി നഗർ ജില്ലയിലെ വൈജാപുർ പട്ടണത്തിലും, ഇയോള, നാസിക്ക് എന്നിവിടങ്ങളിലും ഡീസൽ ടാങ്കറുകൾ കാത്ത് പാതിരാത്രികളിലും ട്രാക്ടറുകളും മോട്ടോർസൈക്കിളുകളും ക്യൂ നിൽക്കുന്നത് കാണാമായിരുന്നു. കഴിഞ്ഞയാഴ്ച ഈ റിപ്പോർട്ടർ സന്ദർശിച്ച മിക്ക പമ്പുകളിലും, പെട്രോളും ഡീസലും ലഭ്യമല്ലെന്ന ബോർഡുകൾ കണ്ടിരുന്നു.

ചെറുകിട കർഷകരാണ് കൂടുതൽ ദുരിതം അനുഭവിച്ചത്. ട്രാക്ടറുകൾ വാടകയ്ക്ക് കൊടുക്കുന്ന ഉടമസ്ഥർ, കർഷകരോട്, ഇന്ധനം സ്വന്തം നിലയ്ക്ക് സംഘടിപ്പിക്കണമെന്ന് ആവശ്യപ്പെട്ടിരുന്നു. വലിയ കർഷകരാകട്ടെ, ഡ്രമ്മുകളിലും ടാങ്കുകളിലും ഡീസൽ കരുതിവെക്കാനും ആരംഭിച്ചു. 2,000 ലിറ്റർ ഡീസൽ താൻ ശേഖരിച്ചുവെച്ചിട്ടുണ്ടെന്ന്, നാസിക്കിലെ വാനി കമ്പോളത്തിലെ ഒരു സവാളക്കർഷകൻ പാരിയോട് പറഞ്ഞു.

പെട്രോൾ പമ്പുകളുടെ പുറത്ത് ട്രാക്ടറുകൾ നിരനിരയായി കിടക്കുന്നതും, ക്യൂവിലുള്ളവർക്കിടയിൽ തർക്കങ്ങൾ ഉയരുന്നതും, കർഷകർ പാട്ടകൾ ചുമന്ന് ഡീസലന്വേഷിച്ച് ഒരു പമ്പിൽനിന്ന് മറ്റൊരു പമ്പിലേക്ക് നെട്ടോട്ടമോടുന്നതുമായ ദൃശ്യങ്ങൾ സാമൂഹികമാധ്യമങ്ങളിൽ നിറഞ്ഞോടുകയാണ്.

പ്രതീക്ഷിക്കാത്ത പ്രത്യാഘാതങ്ങളാണ് ഡീസലിനുവേണ്ടിയുള്ള നെട്ടോട്ടം സൃഷ്ടിക്കുന്നത്

ജാൽന ജില്ലയിലെ അംബാദ് തെഹ്സിലിലെ ഷഹപുർ ഗ്രാമത്തിൽ ഒരേക്കർ ഭൂമിയുണ്ട് 48-കാരനായ അനീസ് പഠാന്. ദിവസക്കൂലിക്ക് ജോലിചെയ്താണ്, കൃഷിയിൽനിന്നുള്ള തുച്ഛമായ വരുമാനത്തെ അദ്ദേഹം മറികടക്കുന്നത്. ഈയിടെ അദ്ദേഹം കൃഷിഭൂമിയിൽ ഉഴവിനായി രണ്ട് കാളകളെ ഉപയോഗിച്ചിരുന്നു. ട്രാക്ടറുകളുടെ വാടക 1,000-ത്തിൽനിന്ന് 1,500 രൂപയായി ഒരേക്കറിന്. ”അരദിവസം ട്രാക്ടറുപയോഗിച്ച് ചെയ്യുന്ന പണി കാളകളെക്കൊണ്ട് ചെയ്യിപ്പിക്കാൻ രണ്ടുദിവസം വേണം. പക്ഷേ പൈസ ലാഭിക്കാം,” പത്താൻ പറയുന്നു. ഷഹ്പുരിൻ്റെ ചുറ്റുവട്ടത്തായി ഒരുപക്ഷേ 500 ഇണക്കാളകളെ കിട്ടിയേക്കാമെന്ന് അദ്ദേഹം കൂട്ടിച്ചേർക്കുന്നു.

“ഈ വർഷം മിക്ക കർഷകരും കാളകളിലേക്ക് തിരിഞ്ഞിട്ടുണ്ട്.”