ಮಹಾರಾಷ್ಟ್ರದ ರೈತರು ಮತ್ತೆ ಎತ್ತುಗಳನ್ನು ಬಳಸುವಂತೆ ಮಾಡಿದ ಇರಾನ್‌ ಯುದ್ಧ

ತುಕಾರಾಂ ಮಸಾಲ್‌ ಎರಡು ದೊಡ್ಡ ಪ್ಲಾಸ್ಟಿಕ್‌ ಕ್ಯಾನುಗಳನ್ನು ತನ್ನ ಬೈಕಿಗೆ ಕಟ್ಟಿಕೊಂಡು ಟ್ರ್ಯಾಕ್ಟರಿಗೆ ಹಾಕಲು ಬೇಕಾಗಿ ಡೀಸೆಲ್‌ ತರಲು ಹೊರಟಿದ್ದರು? ಆದರೆ ಅವರ್ಯಾಕೆ ಟ್ರ್ಯಾಕ್ಟರನ್ನೇ ಪೇಟೆಗೆ ತೆಗೆದುಕೊಂಡು ಹೋಗುತ್ತಿಲ್ಲ?

“ಅದರಿಂದ ಡೀಸೆಲ್‌ ಮತ್ತೆ ಹಣ ಎರಡೂ ವೇಸ್ಟ್‌ ಆಗುತ್ತೆ” ಎನ್ನುತ್ತಾರೆ ಮಾಸಳ್.‌ ಟ್ರ್ಯಾಕ್ಟರ್‌ ಒಂದು ಲೀಟರ್‌ ಡೀಸೆಲ್ಲಿಗೆ ಹೆಚ್ಚೆಂದರೆ ಐದು ಕಿಲೋಮೀಟರ್‌ ಮೈಲೇಜ್‌ ಕೊಡಬಲ್ಲದು. “ಈಗ ಒಂದು ಲೀಟರ್‌ ಡೀಸೆಲ್‌ ಬೆಲೆ ಹೆಚ್ಚೂ ಕಡಿಮೆ 100 ರೂಪಾಯಿ ಆಗಿದೆ.” ಜೊತೆಗೆ ಅವರು ಡೀಸೆಲ್‌ ಹುಡುಕಿಕೊಂಡು ಹಲವು ಪೆಟ್ರೋಲ್‌ ಬಂಕ್‌ ಅಲೆಯಬೇಕು.

ಈಗ ಡೀಸೆಲ್ ಪಡಿತರ ಪದ್ಧತಿ ಆರಂಭವಾಗಿದೆ.

ಮಹಾರಾಷ್ಟ್ರದ ಬರಪೀಡಿತ ಧಾರಾಶಿವ ಜಿಲ್ಲೆಯ ಭೂಮ್ ಪಟ್ಟಣದಿಂದ ಸುಮಾರು 25 ಕಿಲೋಮೀಟರ್ ದೂರದಲ್ಲಿರುವ ವಾಕ್ವಾಡ್ ಗ್ರಾಮದ 53 ವರ್ಷದ ರೈತ ಮಾಸಳ್ ಹೇಳುತ್ತಾರೆ, “ಬಂಕಿನಲ್ಲಿ ನಮಗೆ ಬೇಕಿರುವಷ್ಟು ಡೀಸೆಲ್‌ ಕೊಡುವುದಿಲ್ಲ.” ಈ ಭೂಮ್‌ ಪ್ರದೇಶದಲ್ಲಿ ಬಹಳ ಕಡಿಮೆ ಪೆಟ್ರೋಲ್‌ ಬಂಕುಗಳಿವೆ. ಕನಿಷ್ಠ 20-25 ಲೀಟರ್‌ ಡೀಸೆಲ್‌ ಕೊಳ್ಳಲು ಐದು ಬಂಕ್‌ಗಳನ್ನು ಅಲೆಯುತ್ತೇನೆ” ಎಂದು ಅವರು ಹೇಳುತ್ತಾರೆ.

ಕೆಲವು ದಿನ ಡೀಸೆಲ್‌ ಹುಡುಕಿಕೊಂಡು ಮಸಾಲ್‌ ಅವರು 70-80 ಕಿಲೋಮೀಟರ್‌ ಸುತ್ತಾಡುತ್ತಾರೆ. “ಪ್ರತಿ ಎರಡು ಮೂರು ದಿನಕ್ಕೆ ಒಂದಷ್ಟಯ ಡೀಸೆಲ್‌ ಸಿಕ್ಕರೆ ಅದೇ ಅದೃಷ್ಟ.” ಅದೂ ಅಲ್ಲದೆ ಕೆಲವೊಮ್ಮೆ ಪೆಟ್ರೋಲ್‌ ಬಂಕುಗಳಲ್ಲಿ ಪ್ಲಾಸ್ಟಿಕ್‌ ಕ್ಯಾನಿಗೆ ಡೀಸೆಲ್‌ ಹಾಕುವುದಿಲ್ಲ, ಟ್ರ್ಯಾಕ್ಟರನ್ನೇ ತನ್ನಿ ಎನ್ನುತ್ತಾರೆ.

ಖಾರಿಫ್‌ ಹಂಗಾಮಿ ಶುರುವಾಗುವ ಮೊದಲೇ ಡೀಸೆಲ್‌ ಬೇಡಿಕೆ ತೀವ್ರವಾಗಿ ಹೆಚ್ಚಾಯಿತು. ಪಶ್ಚಿಮ ಏಷ್ಯಾದದಲ್ಲಿನ ಯುದ್ಧದ ಪರಿಸ್ಥಿತಿಯ ನಡುವೆಯೂ ದೇಶದಲ್ಲಿ ಇಂಧನ ಕೊರತೆಯಿಲ್ಲ ಎಂದು ಕೇಂದ್ರ ಮತ್ತು ತೈಲ ಕಂಪನಿಗಳು ಹೇಳುತ್ತಿವೆಯಾದರೂ ವಾಸ್ತವ ಬೇರೆಯೇ ಇದೆ. ಮೇ ಹದಿನೈದರ ನಂತರ ಒಂಬತ್ತು ದಿನಗಳ ನಡುವೆ ಪೆಟ್ರೋಲ್‌ ಬೆಲೆಯನ್ನು ನಾಲ್ಕು ಬಾರಿ ಹೆಚ್ಚಿಸಲಾಯಿತು. ಇದರಿಂದ ನಗರ ಪ್ರದೇಶಗಳು ಹೆಚ್ಚು ತೊಂದರೆಗೊಳಗಾದವು.

ಗ್ರಾಮೀಣ ಪ್ರದೇಶಗಳಲ್ಲಿ ಡೀಸೆಲ್‌ ಕೊರತೆ ವಿಪರೀತವಾಗಿದ್ದು, ದಿನದಿಂದ ದಿನಕ್ಕೆ ಹೆಚ್ಚುತ್ತಲೂ ಇದೆ. ಹಲವು ಜಿಲ್ಲೆಗಳ ರೈತರು ಬಂಕುಗಳಲ್ಲಿನ ಉದ್ದನೆಯ ಸರತಿ ಸಾಲುಗಳು, ಖರೀದಿ ಮಿತಿ ಮತ್ತು ಭವಿಷ್ಯದ ಪೂರೈಕೆಗೆ ಸಂಬಂಧಿಸಿದ ಅನಿಶ್ಚಿತತೆ ಕುರಿತು ಆತಂಕಕ್ಕೆ ಒಳಗಾಗಿದ್ದಾರೆ.

ಈ ಆತಂಕದಿಂದ ಪೀಡಿತರಾಗಿರುವ ಸಾವಿರಾರು ರೈತರಲ್ಲಿ ಮಾಸಳ್ ಕೂಡ ಒಬ್ಬರು.

ಧನಗರ್ ಜಾತಿಗೆ ಸೇರಿದ ಮಾಸಳ್ ಅವರಿಗೆ ಎರಡೂವರೆ ಎಕರೆ ಭೂಮಿಯಿದೆ. ಹೈನುಗಾರಿಕೆ ಅವರ ಪ್ರಮುಖ ಆದಾಯದ ಮೂಲ. ಜೊತೆಗೆ ಕುಟುಂಬವು ಸಣ್ಣ ದಿನಸಿ ಅಂಗಡಿಯನ್ನೂ ನಡೆಸುತ್ತಿದೆ. ಅವರ ಎರಡು ಟ್ರಾಕ್ಟರುಗಳು ವರ್ಷವಿಡೀ ಹೆಚ್ಚುವರಿ ಆದಾಯದ ಮೂಲವನ್ನು ಒದಗಿಸುತ್ತವೆ, ಏಕೆಂದರೆ ಅವರು ನೆರೆಯ ಊರುಗಳ ರೈತರಿಗೆ ಅವುಗಳನ್ನು ಬಾಡಿಗೆಗೆ ನೀಡುತ್ತಾರೆ.‌

ಮುಂದೆ ಸಿಗುವುದಿಲ್ಲವೆನ್ನುವ ಭಯ ಮತ್ತು ಬೆಲೆ ಹೆಚ್ಚಬಹುದೆನ್ನುವ ಮುನ್ನೆಚ್ಚರಿಕೆಯಿಂದ ಖರೀದಿ ಮಾಡುವುದು ಮತ್ತು ದಾಸ್ತಾನು ಮಾಡುತ್ತಿರುವುದು ಕೊರತೆಗೆ ಕಾರಣವಾಗುತ್ತಿದೆ. ಅಧಿಕೃತ ಲೆಕ್ಕಾಚಾರದ ಪ್ರಕಾರ, ಕೆಲವು ಸ್ಥಳಗಳಲ್ಲಿ ಸರಾಸರಿ ಇಂಧನ ಮಾರಾಟವು ಸಾಮಾನ್ಯಕ್ಕಿಂತ ಶೇಕಡಾ 150ರಷ್ಟು ಹೆಚ್ಚಾಗಿದೆ.

ನಾಸಿಕ್‌ ತರಹ ಜಿಲ್ಲೆಗಳಲ್ಲಿ ಎರಡೆರಡು ಹೊಡೆತ ಬೀಳುತ್ತಿದೆ. ಒಂದೆಡೆ ಇಂಧನ ಬೆಲೆ ಏರುತ್ತಿದ್ದರೆ, ಇನ್ನೊಂದೆಡೆ ಈರುಳ್ಳಿ ಬೆಲೆ ಕುಸಿಯತೊಡಗಿದೆ. ಶ್ರೀಸಾಯಿ ಪೆಟ್ರೋಲ್‌ ಬಂಕಿನಲ್ಲಿ ನಮ್ಮನ್ನು ಭೇಟಿಯಾದ ರೈತ ಸುರೇಶ್‌ ಕರ್ಭಾರಿ ಗಾಯಕವಾಡ್‌ “ಈರುಳ್ಳಿ ಮಾರಿದೆ. ಕ್ವಿಂಟಾಲಿಗೆ ಸಿಕ್ಕಿದ್ದು ಕೇವಲ 211 ರೂಪಾಯಿ” ಎಂದರು. ಅಂದರೆ ಒಂದು ಕೇಜಿಗೆ 2.11 ರೂ.

ನಾಗಪುರದಿಂದ ಸಾಸಿಕ್‌ ತನಕದ ಸಮೃದ್ಧಿ ಹೆದ್ದಾರಿಯ ಗುಂಟ ಇರುವ ಪೆಟ್ರೋಲ್‌ ಬಂಕುಗಳಲ್ಲಿ ಮತ್ತು ಸಂಭಾಜಿ ನಗರ ಜಿಲ್ಲೆಯ ವೈಜಾಪುರ, ಯೆ ಓಲಾ ಮತ್ತು ನಾಸಿಕ್ ನಡುವಿನ ಪಟ್ಟಣಗಳಲ್ಲಿ, ಟ್ರಾಕ್ಟರುಗಳು ಮತ್ತು ಬೈಕುಗಳಲ್ಲಿ ಜನರು ತಡರಾತ್ರಿಯ ತನಕ ಡೀಸೆಲ್‌ ಬರುವುದನ್ನೇ ಕಾಯುತ್ತಾರೆ. ಕಳೆದ ವಾರ ಈ ವರದಿಗಾರ ಹಲವು ಪೆಟ್ರೋಲ್‌ ಬಂಕುಗಳಿಗೆ ಭೇಟಿ ನೀಡಿದ್ದರು, ಅಲ್ಲೆಲ್ಲ ಡೀಸೆಲ್ ಅಥವಾ ಪೆಟ್ರೋಲ್ ಲಭ್ಯವಿಲ್ಲ ಎಂದು ಘೋಷಿಸುವ ಬೋರ್ಡ್‌ಗಳನ್ನು ಹಾಕಲಾಗಿತ್ತು.

ಇದರಿಂದಾಗಿ ಸಣ್ಣ ರೈತರು ಹೆಚ್ಚು ತೊಂದರೆಗೊಳಗಾಗಿದ್ದಾರೆ. ವಾಹನಗಳನ್ನು ಬಾಡಿಗೆಗೆ ನೀಡುವ ಟ್ರಾಕ್ಟರ್ ಮಾಲೀಕರು ಡೀಸೆಲ್ ವ್ಯವಸ್ಥೆಯನ್ನು ನೀವೇ ಮಾಡಿಕೊಳ್ಳಿ ಎಂದು ರೈತರಿಗೆ ಹೇಳತೊಡಗಿದ್ದಾರೆ. ದೊಡ್ಡ ರೈತರು ಡ್ರಮ್ ಮತ್ತು ಟ್ಯಾಂಕ್‌ಗಳಲ್ಲಿ ಡೀಸೆಲ್ ಸಂಗ್ರಹಿಸಲು ಪ್ರಾರಂಭಿಸಿದ್ದಾರೆ. ನಾಸಿಕ್‌ನ ವಾನಿ ಮಾರುಕಟ್ಟೆಯ ಈರುಳ್ಳಿ ರೈತರೊಬ್ಬರು ತಾವು ಈಗಾಗಲೇ ಸುಮಾರು 2,000 ಲೀಟರ್ ಸಂಗ್ರಹಿಸಿರುವುದಾಗಿ ಪಾರಿಗೆ ತಿಳಿಸಿದರು.

ಮಹಾರಾಷ್ಟ್ರದಾದ್ಯಂತ ಸಾಮಾಜಿಕ ಮಾಧ್ಯಮ ವೇದಿಕೆಗಳು ಪೆಟ್ರೋಲ್ ಪಂಪ್‌ಗಳ ಮುಂದೆ ರಾತ್ರಿಯಿಡೀ ಸಾಲಾಗಿ ನಿಂತಿರುವ ಟ್ರಾಕ್ಟರುಗಳು, ಸರತಿ ಸಾಲಿನಲ್ಲಿ ನಡೆಯುವ ವಾಗ್ವಾದಗಳು ಮತ್ತು ರೈತರು ಡೀಸೆಲ್ ಹುಡುಕಾಟದಲ್ಲಿ ಒಂದು ನಿಲ್ದಾಣದಿಂದ ಇನ್ನೊಂದಕ್ಕೆ ಕ್ಯಾನ್‌ಗಳನ್ನು ಹೊತ್ತೊಯ್ಯುವ ವೀಡಿಯೊಗಳಿಂದ ತುಂಬಿಹೋಗಿವೆ.

ಡೀಸೆಲ್‌ ಖರೀದಿಗಾಗಿ ನಡೆಯುತ್ತಿರುವ ಈ ಪೈಪೋಟಿ ನಿರೀಕ್ಷಿತ ಪರಿಣಾಮಗಳನ್ನು ಉಂಟುಮಾಡುತ್ತಿದೆ.

ಜಲ್ನಾ ಜಿಲ್ಲೆಯ ಅಂಬಾದ್ ತಹಸಿಲ್‌ನ ಶಾಹಪುರ ಗ್ರಾಮದ 48 ವರ್ಷದ ಅನೀಸ್ ಪಠಾಣ್ ಒಂದು ಎಕರೆ ಭೂಮಿಯನ್ನು ಹೊಂದಿದ್ದಾರೆ. ಕೂಲಿ ಕೆಲಸದ ಮೂಲಕ ಅವರು ತಮ್ಮ ಕೃಷಿ ಆದಾಯವನ್ನು ಸರಿದೂಗಿಸುತ್ತಾರೆ. ಇತ್ತೀಚೆಗೆ, ಅವರು ತಮ್ಮ ಹೊಲವನ್ನು ಉಳಲು ಒಂದು ಜೊತೆ ಎತ್ತುಗಳನ್ನು ಬಳಸುತ್ತಿದ್ದಾರೆ. “ಟ್ರಾಕ್ಟರ್ ಬಾಡಿಗೆ ದರ ಎಕರೆಗೆ 1,000ದಿಂದ 1,500 ರೂಪಾಯಿಗಳಿಗೆ ಏರಿದೆ” ಎಂದು ಅವರು ಹೇಳುತ್ತಾರೆ. “ಟ್ರಾಕ್ಟರುಗಳು ಅರ್ಧ ದಿನದಲ್ಲಿ ಮಾಡಿ ಮುಗಿಸುವ ಕೆಲಸಕ್ಕೆ ಎತ್ತುಗಳು ಎರಡು ದಿನ ತೆಗೆದುಕೊಳ್ಳುತ್ತವೆ, ಆದರೆ ಹಣ ಉಳಿಯುತ್ತೆ” ಎಂದು ಪಠಾಣ್ ನಮಗೆ ತಿಳಿಸಿದರು. ಶಾಹಪುರ ಮತ್ತು ಸುತ್ತಮುತ್ತ ಸುಮಾರು 500 ಜೋಡಿ ಎತ್ತುಗಳಿವೆ ಎಂದು ಅವರು ಹೇಳಿದರು.

“ಈ ವರ್ಷ, ಇಲ್ಲಿನ ಹೆಚ್ಚಿನ ರೈತರು ಈಗಾಗಲೇ ಎತ್ತುಗಳನ್ನು ಬಳಸಲು ಶುರುಮಾಡಿದ್ದಾರೆ.”