बहुरगे नांगर-बइला के दिन

तुकाराम मसल अपन फटफटी मं प्लास्टिक के दू ठन जरकिन बांधके, अपन ट्रेक्टर बर डीजल बिसोय शहर जावत हवय. फेर वो ह अपन वो ट्रेक्टर मन ला लेके काबर नइ जावय?

मसल कहिथे, “येकर ले तेल अऊ पइसा दूनों खइता होही.” एक ठन ट्रैक्टर एक लीटर डीजल मं जियादा ले जियादा पाँच किलोमीटर जाथे, अऊ “ये बखत एक लीटर डीजल के दाम करीबन 100 रूपिया हवय.” अऊ वोला कतको पेट्रोल पंप मन के चक्कर घलो लगाय ला परथे.

डीज़ल के रासनिंग सुरु होगे हे.

महाराष्ट्र के सूखा वाले इलाका धाराशिव जिला के भूम शहर ले करीबन 8 कोस ले जियादा दूरिहा वाकवाड गाँव के 53 बछर के किसान मसल कहिथे, “वो मन हमन ले एक बेर मं कुछेक लीटर देथें.”

वो ह कहिथे, “मंय डीजल बिसोय बर अलग-अलग पेट्रोल पंप मन मं जाथों जेकर ले मंय कम से कम 20-25 लीटर डीजल जुटाय सकंव.” भूम अऊ ओकर तीर-तखार मं बनेच कम पेट्रोल पंप हवंय.

कभू-कभू मसल डीजल बर कतको पंप के चक्कर लगावत 23 ले 27 कोस (70-80 किलोमीटर) के रद्दा नाप लेथे. वो ह कहिथे, “गर मोला हरेक दू-तीन दिन मं थोर बहुत डीजल मिल जाय, त मोर बड़े किस्मत आय.” अऊ कभू-कभू पंप वाले मन जरकिन मं डीजल भरे ले मना कर देथें अऊ कहिथें के ट्रेक्टर ला पेट्रोल पंप तक ले लेके आ.

सियारी सीजन के पहिली मई मं डीजल के मांग भारी बढ़ गिस. वइसे केंद्र सरकार अऊ तेल कंपनी मन के कहना आय के तेल के कोनो कमी नई ये, अऊ पश्चिम एशिया मं चलत लड़ई के घलो येकर उपर कोनो असर परे नइ ये, फेर असलियत कुछु अऊ हवय. 15 मई के बाद ले नौ दिन मं पेट्रोल के दाम चार बेर बढ़ाय के असर शहर मन मं जियादा परिस.

गाँव-देहात मं डीजल के मांग सिरतोन बढ़े हवय. कतको जिला मं हलाकान किसान मन लंबा लाइन, नाप -जोख के कुछु लीटर मिले अऊ अवेइय्या बखत मं डीजल सप्लाई ला लेके चिंता जतावत हवंय.

मसल तउन हज़ारों किसान मन ले के आय जेन मन ये चिंता मं परे हवंय.

जात ले धनगर, मसल करा दू एकड़ जमीन हवय. डेयरी फार्मिंग ओकर कमई के माई साधन आय. परिवार करा नान-कन किराना दुकान घलो हवय. ओकर दू ठन ट्रैक्टर बछर भर उपराहा आमदनी के साधन आय, काबर के वो ह येला तीर-तखार के गाँव के किसान मन ला भाड़ा मं देथे.

तेल के कमी के एक ठन कारन ये घलो आय के अवेइय्या बखत मं येकर किल्लत अऊ बढ़त दाम के डर ले लोगन मन घबराके बिसोवत हवंय अऊ जमा करत हवंय. सरकारी आंकड़ा के मुताबिक, कुछेक जगा मं तेल के औसत बिक्री समान्य ले 150 फीसदी जियादा हवय.

नासिक जइसने जिला मं दुहरा मार परे हवय. गोंदली के दाम बनेच गिरगे हवय, फेर तेल के दाम बढ़ गे हवय. श्री साई पेट्रोल पंप मं मिलेइय्या किसान सुरेश कारभारी गायकवाड़ कहिथे, “मोर गोंदली ह 211 रूपिया क्विंटल बेचाइस.” मतलब एक किलो 2.11 रूपिया मं.

नागपुर ले नासिक तक के समृद्धि हाईवे के कतको पेट्रोल पंप मन मं अऊ संभाजी नगर जिला के वैजापुर, येओला अऊ नासिक के बीच के कस्बा मन मं, डीज़ल टैंकर ला अगोरत ट्रैक्टर अऊ फटफटी मन के लाइन लगे रहिथे. बीते हफ्ता ये रिपोर्टर ह जेन पेट्रोल पंप मन मं गे रहिस, उहाँ बड़े अकन बोर्ड लगे रहिस जेन मं डीजल धन पेट्रोल नइ होय के सूचना देय गे रहिस.

छोटे किसान मन के उपर सबले जियादा मार परे हवय, ट्रैक्टर मालिक जेन मन भाड़ा मं देथें, अब किसान मन ले खुदेच डीजल के इंतजाम करे ला कहत हवंय. बड़े किसान मन ड्रम अऊ टंकी मं डीजल भरके जमा करे सुरू कर दे हवंय. नासिक के वाणी मंडी मं गोंदली कमेइय्या एक झिन किसान न ह पारी ला बताइस के वो ह पहिलीच ले करीबन 2,000 लीटर डीजल जमा कर ले हवय.

महाराष्ट्र भर मं सोशल मीडिया मं अइसने वीडियो छाय हवय जेन मं पेट्रोल पंप मन के बहिर रात भर ट्रैक्टर मन के लाइन दिखत हवय, लाइन ला लेके झगरत हवंय अऊ किसान मन एक पंप ले दीगर पंप जरकिन धरके भागत हवंय.

डीजल बर लगे होड़ सेती कतको अइसने नतीजा देखे ला मिलत हवय जेकर आस नइ रहिस.

जालना जिला के अंबड़ तहसील के शाहपुर गाँव मं 48 बछर के अनीस पठान करा एक एकड़ खेत हवय. वो ह मजूरी करके घलो दू पइसा अऊ जुटा लेथे. हालेच मं, वो ह अपन खेत ला नांगर-बइला ले जुटाय हवय. वो ह कहिथे, “ट्रैक्टर (भाड़ा) के दाम 1,000 रूपिया ले बढ़के 1,500 रूपिया एकड़ होगे हवय.” पठान हमन ला बताथे, “जेन बूता ट्रैक्टर ह आधा दिन मं कर देथे, ओला करे मं नांगर-बइला ला दू दिन लागथे, फेर येकर ले दू पइसा बांच जाथे.” वो ह कहिथे के शाहपुर अऊ ओकर तीर-तखार मं 500 जोड़ी नांगर-बइला हवय.

“ये बछर, इहाँ की अधिकतर किसान मन पहिलीच ले नांगर-बइला ले खेती करे मं लगे हवंय.”