ट्रैक्टर छोड़ बैल से खेती पर मजबूर किसान

तुकाराम मासल आपन मोटरसाइकिल पर दू ठो बड़ पिलास्टिक के कनस्तर बन्हले, ट्रैक्टर खातिर डीजल कीने शहर चल देले बाड़न. सवाल बा कि ऊ सीधा ट्रैक्टरे काहे नइखन लेके जात?

“तेल आ पइसा दुनो के बरबादी होई,” मासल कहेलन. ट्रैक्टर एक लीटर डीजल में मुश्किल से पांच किमी चलेला. आउर अब डीजल 100 रुपइये लीटर बिकाता. ऊपर से कइएक पेट्रोल पंप के चक्कर लगावे पड़ेला.

डीजल के रासनिंग (सीमित मात्रा में बांटल) शुरू हो गइल बा.

वाकवड़ गांव से आवे वाला 53 बरिस के किसान मासल के कहनाम बा, “एक बेर में कुछे लीटर डीजल मिलेला.” उनकर गांव महाराष्ट्र के सूखा-प्रभावित धाराशिव जिला के भूम टाउन से 25 किमी दूर पड़ेला.

“रोज पांच ठो अलग-अलग पेट्रोल पंप जाइला, तब जाके 20 से 25 लीटर डीजल मिल पावेला. ईहो खाली एक दिन चलेला.”

कवनो-कवनो दिन त मासल के पेट्रोल पंप पर डीजल खोजे में 70 से 80 किमी के चक्कर लाग जाला. ऊ कहेलन, “आ हम अपना के भाग्यशाली समझिला कि दू चाहे तीन दिन में हमरा डीजल मिल जाला.” केतना बेरा त पेट्रोल पंप पिलास्टिक के कनस्तर में डीजल भरे से मना कर देवेला, कहेला ट्रैक्टर लेके आव.

मई में खरीफ सीजन से पहिले डीजल के मांग तेज हो जाला. सरकार आ तेल कंपनी के कहनाम बा कि इंधन के कमी नइखे, बाकिर जमीनी स्तर पर सच कुछ आउर देखाई देत बा. 15 मई के बाद नौ दिन में चार बेरा पेट्रोल के दाम बढ़ गइल, जेकरा से शहर के लोग के जादे परेसानी भइल.

गांव-देहात के भीतरी इलाका सब में डीजर खातिर हाहाकार मचल बा. कइएक जिला के किसान लोग पंप पर लमहर लाइन, कम डीजल आ भविष्य में सप्लाई के डर के बात कर रहल बा.

मासल एह तरह के चिंता से परेशान हजारन किसान में से बाड़न.

जात से धनगर, मासल लगे दू एकड़ के खेत बा. दूध के काम उनकर आमदनी के मुख्य जरिया बा. परिवार के लगे छोट किराना दोकानो बा. दू ठो ट्रैक्टर बा, जेकरा के अलग-अलग गांव में किराया पर देके साल भर ऊपरी आमदनी भी होखेला.

एह संकट के पीछे कुछ हद ले ई बात बा, कि लोग के घबराके एक बेरा में जादे डीजल कीने आ जमा करे लागल बा. एकरा से भविष्ट में डीजल के कमी आ महंगा होखे के डर पैदा हो गइल बा. सरकारी आंकड़ा बतावता कि कुछ इलाका में ईंधन सामान्य से 150 प्रतिशत जादे बिका रहल बा.

नासिक जइसन जिला में लोग दोहरा माल झेल रहल बा. एक त प्याज के दाम गिर गइल बा, दोसर ईंधन महंगा हो गइल बा. सुरेश करभारी गायकवाड़ बतावत बाड़न, “हमरा आपन प्याज खाली 211 रुपइए क्विंटल के भाव में बेचे पड़ता.” मतलब 2.11 रुपइए किलो. एह किसान से पारी श्री साई पेट्रोल पंप पर भेंट भइल रहे.

नागपुर से नासिक वाला समृद्धि हाईवे पर, आ संभाजीनगर जिला के वैजापुर, येवला आ नासिक के बीच के इलाका के पेट्रोप पंप पर ट्रैक्टर आ बाइक सब डीजल टैंक आवे के इंतिजारी में देर रात ले लाइन में लागल रहता. पछिला हफ्ता जवन रिपोर्टर पेट्रोल पंप सब पर गइल रहे, उहंवा कइएक जगह डीजल, चाहे पेट्रोल उपलब्ध नइखे, के बोर्ड लागल रहे

छोट किसान लोग सबले जादे मार खा रहल बा. ट्रैक्टर मालिक लोग अब किराया पर ट्रैक्टर देत घरिया किसान से अपने डीजल लावे के कहे लागल बा. बड़ किसान लोग त डीजल ड्राम आ टंकी में जमा करे लागल बा. नासिक के वाणी मंडी के एगो किसान पारी के बतइलन कि ऊ पहिले से कोई 2,000 लीटर डीजल जमा करके रखले बाड़न.

महाराष्ट्र भर के सोशल मीडिया पर इहे सब वीडियो भरल बा. एह में लोग पेट्रोल पंप के बाहर रात भर ट्रैक्टर लेले लाइन में लागल बा, भीड़ में झगड़ा हो रहल बा, किसान लोग हाथ में कनस्तर लेले डीजल खातिर भटक रहल बा.

डीजल खातिर मचल हाहाकार चलते अब कुछ अनचाहा असर भी देखे के मिल रहल बा.

अड़तालीस साल के अनीस पठान लगे, जलना जिला के आमबड़ तहसील के शाहपुर गांव में एक एकड़ के खेत बा. ऊ घर चलावे खातिर खेती करे के संगे-संगे मजूरियो करेलन. हाल में ऊ खेत जोते खातिर एक जोड़ी बैल लेके अइलन. ऊ कहेलन, “अब ट्रैक्टर 1000 के जगह 1500 रुपइया पर मिल रहल बा. जवन काम ट्रैक्टर आधा दिन में कर देवेला, उहे बैल दू दिन में करेला. बाकिर पइसा बच जाला.” शाहपुर के आस पास कोई 500 जोड़ी बैल बा.

“अबकी साल, जादेतर किसान लोग बैल से खेती करे लागल बा.”