ایرانی جنگ نے تباہ کی سانگوی گاؤں کی خوشحالی

دسمبر ۲۰۱۹ میں ۵۰ سالہ سبھاش بکِّڑ، جو تقریباً دو دہائیوں تک چھترپتی سمبھاجی نگر میں قائم ایک ٹرانسپورٹ کمپنی میں ٹرک ڈرائیور رہے تھے، اپنی زندگی کے ایک نئے اور بلند سفر پر روانہ ہوئے۔

’’میں نے دو دوستوں کے ساتھ مل کر اپنی ٹرانسپورٹ کمپنی قائم کی اور تین ٹرک اور کنٹینر خریدے۔ ہم تینوں ایک ہی گاؤں کے رہنے والے تھے اور ملک بھر میں ٹرک چلا چکے تھے۔ پونے میں مقیم ایک دوست نے ضامن بن کر ہماری مدد کی،‘‘ وہ یاد کرتے ہیں۔

یہ صرف بکّڑ اور ان کے شراکت داروں کی ڈرائیور سے مالک بننے کی حیرت انگیز کہانی کا آغاز نہیں تھا، بلکہ ان کے گاؤں سارنی سانگوی کے ۸۰ نوجوانوں کے لیے بھی ایک نئے دور کی شروعات تھی۔ اس کا مطلب یہ تھا کہ ۱۴۶۰ افراد پر مشتمل اس گاؤں میں تقریباً ہر چوتھا گھرانہ ٹرکوں کے کاروبار سے وابستہ ہو چکا تھا۔ سارنی سانگوی، خشک سالی سے متاثرہ بیڈ ضلع کی کیج تحصیل کا ایک جڑواں گاؤں ہے۔

سال ۲۰۲۵ تک سارنی سانگوی ٹرکوں اور ٹرک کنٹینروں (جنہیں شپنگ یا کارگو کنٹینر بھی کہا جاتا ہے) کا گاؤں بن چکا تھا۔ ان ۸۰ افراد کی مشترکہ ملکیت میں ۴۰۰ ٹرک اور لوڈنگ کنٹینر تھے۔ کاروبار تیزی سے فروغ پایا اور ملک کی کئی بڑی ٹرانسپورٹ کمپنیوں نے انہیں اپنا کام آؤٹ سورس کرنا شروع کر دیا۔ بہت سے لوگوں نے ایک دوسرے کی ضمانت پر قرض حاصل کر کے کامیابی کی منزلیں طے کیں۔ اور، گاؤں کے سرپنچ سنیل کیدار نے پاری کو بتایا، ’’ہم نے دیوالی کے موقع پر کھیتوں میں تمام ٹرکوں کی پوجا کر کے جشن منایا۔‘‘

یوں ٹرک اور کنٹینر اس گاؤں کے نئے دیوتا بن گئے تھے۔

لیکن، آج ان میں سے بہت سے ٹرک اور کنٹینر اپنی منزلوں پر یا مختلف شاہراہوں پر کھڑے ہیں۔ گاؤں میں ہمیں ان میں سے بہت کم نظر آئے۔ ایران کے خلاف امریکہ اور اسرائیل کی جنگ نے سارنی سانگوی کی خوشحالی کو شدید دھچکا پہنچایا ہے، جو پہلے ہی دیگر عوامل، خصوصاً سڑکوں پر عائد متعدد اور مسلسل بڑھتے ہوئے ٹیکسوں کے باعث کمزور پڑ چکی تھی۔

بکّڑ کے دوست ہنومنت پوار (۴۲) کہتے ہیں، ’’یہ جنگ ہماری مشکلات میں تازہ ترین اضافہ ہے۔‘‘

جنگ کے باعث پیدا ہونے والی قلت اور خوف کے سبب ذخیرہ اندوزی نے ڈیزل کی قیمت کو، جو ۲۰۱۹ میں ۶۰ روپے فی لیٹر تھی، اب ۱۰۰ روپے فی لیٹر تک پہنچا دیا ہے۔ غیر اعلانیہ کٹوتی کے باعث مطلوبہ مقدار میں ڈیزل حاصل کرنا بھی مشکل ہو گیا ہے۔ پندرہ ٹرکوں کے مالک ہنومنت پوار، جو ملک بھر میں بنیادی طور پر الیکٹرانک اشیاء اور تیز رفتار فروخت ہونے والی صارفین کی مصنوعات کی ترسیل کرتے ہیں، شدید تشویش میں مبتلا ہیں۔

سبھاش بکّڑ کہتے ہیں، ’’یہ کاروبار اب معاشی طور پر فائدہ مند نہیں رہا۔‘‘ ان کے دفتر کے قریب صرف چار یا پانچ بڑے کنٹینروں والے ٹرک کھڑے نظر آتے ہیں۔ وہ سانگوی میں واقع اپنے دفتر میں پاری سے بات کرتے ہوئے کہتے ہیں، ’’ٹول ٹیکس بہت زیادہ ہے، ڈیزل کی قلت نے ہماری نقل و حمل کو متاثر کر دیا ہے، اور ہمارے کچھ ٹرک ڈیزل نہ ملنے کی وجہ سے مختلف مقامات پر پھنسے ہوئے ہیں۔‘‘ اس کے علاوہ ڈرائیوروں کی تنخواہیں، مال برداری کے جمود کا شکار کرایے اور دیگر بے شمار مشکلات بھی درپیش ہیں، جب کہ گاڑیوں کی دیکھ بھال کے اخراجات مسلسل بڑھ رہے ہیں۔

ہنومنت پوار کہتے ہیں، ’’آپ یقین نہیں کریں گے، لیکن سمبھاجی نگر (سابقہ اورنگ آباد) سے بنگلورو جا کر واپس آنے کے ایک ہی چکّر پر ہمیں صرف سڑک کے ٹول ٹیکس کی مد میں ۴۰ ہزار روپے ادا کرنے پڑتے ہیں۔ اس سفر کے لیے ہمیں مال برداری کا کرایہ ۵۵ ہزار روپے ملتا ہے، لیکن ایندھن، ڈرائیوروں کی تنخواہوں، ان کے کھانے اور دیگر متفرق اخراجات سمیت ہمارے کل اخراجات ۶۰ سے ۷۰ ہزار روپے تک پہنچ جاتے ہیں۔‘‘ پوار کا کہنا ہے کہ ایران کے تنازع سے پہلے ہی ہندوستان کی اپنی معاشی پالیسیوں نے چھوٹے کاروباروں کو شدید نقصان پہنچایا تھا۔

ایران مخالف جنگ نے پہلے سے موجود ان مالی بوجھ پر ایک اور تباہ کن ضرب لگائی، کیوں کہ اس کے نتیجہ میں ڈیزل کی قیمتوں اور قلت نے ان کے اخراجات مزید بڑھا دیے۔ سرپنچ کے علاوہ ہم صرف بکّڑ اور پوار سے ہی ملاقات کر سکے، کیوں کہ زیادہ تر لوگ ان نئے چیلنجوں سے نمٹنے کے لیے گاؤں سے باہر تھے۔

سانگوی میں زیادہ تر آبادی ونزاری برادری پر مشتمل ہے، جسے مہاراشٹر میں خانہ بدوش قبیلہ کے طور پر درج کیا گیا ہے۔ اس برادری کا روایتی پیشہ گنے کی کٹائی رہا ہے۔ ہر سال موسمِ سرما میں مراٹھواڑہ سے ہزاروں خاندان گنے کی فصل کاٹنے کے لیے شوگر بیلٹ کی طرف ہجرت کرتے ہیں اور شوگر ملوں میں عارضی مزدوروں کے طور پر کام کرتے ہیں۔ سبھاش بکّڑ اور ہنومنت پوار کے والدین بھی کئی برس تک یہی کام کرتے رہے۔ لیکن یہ دونوں دوست نوعمری ہی میں روزگار کی تلاش میں سمبھاجی نگر چلے گئے تھے۔

محدود تعلیم، انتھک محنت اور خطرہ مول لینے کے جذبے کی بدولت، سانگوی کے یہ ٹرک ڈرائیور، جو بعد میں ٹرانسپورٹ کمپنیوں کے مالک بنے، ۲۰۲۵ تک غربت اور ناخواندگی پر قابو پا چکے تھے۔ انہوں نے روزگار کی خاطر برسوں پر محیط ہجرت کا سلسلہ ختم کر دیا، زرعی زمینیں خریدیں، بہتر مکانات تعمیر کیے اور اپنے کاروبار کو وسعت دینے کے لیے مزید ٹرک خریدے۔ اس کے نتیجہ میں سانگوی اور آس پاس کے گاؤوں کے نوجوان مردوں اور عورتوں کے لیے ٹرک ڈرائیور، معاون عملہ اور دفتری ملازمین کی صورت میں روزگار کے نئے مواقع بھی پیدا ہوئے۔

لیکن اسی دوران نئی سرکاری پالیسیوں، ٹیکسوں اور ٹول فیسوں کی بھرمار نے ان کے اخراجات میں مسلسل اضافہ کر دیا۔ سال ۲۰۱۹ میں ایک ٹرک اور کنٹینر کی قیمت ۱۹ لاکھ روپے تھی، جو آج بڑھ کر ۲۷ لاکھ روپے ہو چکی ہے۔ سانگوی کے زیادہ تر ٹرک بینکوں اور نجی مالیاتی اداروں سے سات سالہ مساوی ماہانہ قسطوں (ای ایم آئی) پر خریدے گئے ہیں، مگر اب یہ قسطیں پہلے کی طرح ’آسان‘ نہیں رہیں۔

ہنومنت پوار بتاتے ہیں کہ جب انہوں نے یہ کاروبار شروع کیا تھا تو ایک ٹرک سے ہر ماہ ڈیڑھ لاکھ روپے تک منافع ہو جاتا تھا، جو ایک ٹرک ڈرائیور کی تنخواہ سے تقریباً ۱۰ سے ۱۵ گنا زیادہ تھا۔ زیادہ ٹرک، طویل فاصلے کے سفر اور تیز کاروبار کا مطلب زیادہ منافع تھا، لیکن اب تقریباً ہر سفر پر انہیں نقصان اٹھانا پڑ رہا ہے۔

وہی بکّڑ اور پوار، جو کبھی سانگوی کے نوجوانوں کے لیے کامیابی کی مثال تھے، آج انہیں مشورہ دے رہے ہیں کہ ’’فی الحال اس کاروبار میں قدم رکھنا مناسب نہیں۔ حکومت کی پالیسیاں، خصوصاً ٹیکسوں سے متعلق، اس کاروبار کے لیے سازگار نہیں ہیں۔‘‘

اور ایران کی جنگ نے ٹرک اور کنٹینر کے اس کاروبار پر گویا آخری ضرب لگا دی ہے۔