काहे मुरझाइल जाता फरत-फूलात सांगवी?

दिसंबर 2019 में पचास बरिस के सुभाष बिक्कड़ आपन जिनगी के नया शुरुआत करे निकल पड़लन. ऊ दू दसक ले छत्रपति संभाजीनगर के एगो ट्रांसपोर्ट कपंनी में ट्रक ड्राइवर हस.

सुभाष के कहनाम बा, “हम दू गो दोस्त लोग संगे मिलके आपन ट्रांसपोर्ट कंपनी शुरू कइनी. तीन ट्रक आ कंटेनर कीनल गइल. हमनी तीनों एके गांव के रहीं आउर रात भर ट्रक चलावत रहीं. पुणा के एगो दोस्त गारंटर बनके हमनी के मदद कइलक.”

एह फैसला से सुभाष बिक्कड़ के जिनगी नया करवट लेलक. ट्रक ड्राइवर से मालिक बने के उनकर सफर, साझेदार दोस्त लोग के संगे-संगे सारणी सांगवी के दोसर 80 नौजवान लोग के भी किस्मत बदल देलक. मात्र 1460 आबादी वाला एह गांव में हर चौथा परिवार ट्रक ढुलाई के कारोबार में लाग गइल. सारणी सांगवी सूखा से जूझे वाला बीड़ जिला के कैज तहसील के एगो जुड़वां गांव बा.

साल 2025 आवत-आवत सारणी सांगवी ट्रक आ मा ढोवे वाला कंटेनरन (शिपिंग, चाहे कार्गो कंटेनर) के गांव बन गइल. गांव के ई 80 नौजवान लोग लगे मिलाके 400 ट्रक आ लोडिंग कंटेनर हो गइल. काम एतना बढ़ल कि देश के बड़-बड़ ट्रांसपोर्ट कंपनी सब आपन ढुलाई के जिम्मा ओह लोग के देवे लागल. एक-दोसरा के भरोसा आ गारंटी पर केतना लोग मालिक बन गइल. सरपंच सुनील केदार मुस्कात कहेलन, “एतना ट्रक हो गइल कि दीवाली पर खेत में सभे ट्रक के एक संगे पूजा कइल गइल.”

ट्रक-कंटेनर अब गांव के भाग्य-विधाता बन गइल रहे.

बाकिर आज एकरा में से बहुते तादाद में ट्रक आ कंटेनर या त ओह जगह पर फंसल बा, जहंवा ओकरा भेजल गइल रहे, चाहे रस्ता पर खड़ा बा. गांव में हमनी के गिनती के ट्रक नजर आइल. अमरीका-इजराइल के ईरान पर युद्ध सारणी सांगवी के तरक्की के पहिया जाम कर देले बा. ऊपर से बढ़त रोड टैक्स जइसन केतना बोझा सब पहिले के एकर कमर तुड़त आ रहल बा.

ई लड़ाई, बिक्कड़ के साथी, 42 साल के हनुमंत पवार कहेलन, “हमनी के सबसे नयका मुसीबत बा.”

सन् 2019 में डीजल के भाव 60 रुपइया प्रति लीटर रहे. लड़ाई चलते पैदा भइल किल्लत आ घबराहट में खरीददारी चलते एकर भाव 100 रुपइया लीटर ले पहुंचल गइल बा. कुल मिलाके राशनिंग जइसन हालात बा. जरूरत भर डीजल मिलल दुश्वार हो गइल बा. पवार लगे 15 गो ट्रक बा. ऊ इलेक्ट्रॉनिक सामान आ एफएमसीजी के सामन सब देस भर में भेजेलन. उनका आवे वाला समय के चिंता लागल बा.

“अब ई काम में कवनो फायदा नइखे रह गइल,” बिक्कड़ कहेलन. हमनी के उहंवा बड़का कंटेनर वाला खाली चार-पांच ट्रक ही खड़ा देखाई पड़ल. सांगवी के आपन दफ्तर में ऊ पारी के बतइलन, “टोल टैक्स बहुत बा. डीजल कम होखे चलते हमनी के ट्रांसपोर्ट पर असर पड़ल बा. डीजल ना मिले से हमनी के केतना ट्रक सब अलग-अलग जगह पर फंसल बा. इहे ना एकरा अलावे ड्राइवर लोग के पगार, मालभाड़ा के स्थिर दर आ दोसर तरह के भी परेसानी बनल बा. रखरखाव के खरचो बढ़त जा रहल बा.”

हनुमंत पवार के कहनाम बा, “रउआ बिस्वास ना होई, पर संभाजीनगर (पहिले औरंगाबाद) से बेंगलुरु के एगो चक्कर लगा के आवे में हमनी के 40,000 रुपइया टोल टैक्स देवे पड़ता. उहे ट्रिप खातिर हमनी के 55000 रुपइया मालभाड़ा मिलेला. बाकिर डीजल, ड्राइवर के पगार, ओकर खाना-पीना आ दोसर खरचा मिला लीहीं, त कुल 60 से 70 हजार के खरचा बा.” पवार के मानीं, त ईरान संगे लड़ाई सुरु होखे से पहिले से भारत सरकार के नीति छोट कारोबारी लोग के नुकसान पहुंचावत रहे.

ईरान पर युद्ध से पैदा भइल डीजल के बढ़ल खरचा ओह लोग खातिर कमर तुड़ देवे वाला साबित भइल बा. गांव में सरपंच के छोड़ दीहीं, हमनी के सुभाष बिक्कड़ आ हनुमंत पवारे से भेंट हो पाइल. बाकि जादेतर लोग एह नयका संकट से निपटे खातिर गांव से बाहर रहे.

सांगवी में खास करके वंजारी लोग रहेला. एह लोग के महाराष्ट्र में घुमंतू जनजाति के मानल जाला. एह लोग के पेशा ईंख काटल रहल बा. मराठवाड़ा के हजारन परिवार सरदी में चीनी मिल वाला इलाका में गन्ना काटे खातिर पलायन करेला आ चीनी कारखाना में अस्थायी मजूर के रूप में काम करेला. बिक्कड़ आ पवार के माई-बाऊजी लोग भी सालों तक इहे कइले रहे. दुनो दोस्त लोग सयान भइला के बादे से रोजगार खातिर संभाजीनगर चल गइल रहे.

कम पढ़ल-लिखल होखला के बावजूद खूब मेहनत करे आ जोखिम उठावे के करेजा वाला सांगवी के ई ट्रक ड्राइवर लोग के 2025 तक गरीबी आ अशिक्षा पीछे छोड़ देलक. ऊ लोग रोजगार खातिर होखे वाला हर साल के पलायन के रोकलक, खेती के जमीन कीनलक आ अच्छा घर बनइलक. काम बढ़ावे खातिर ऊ लोग आउर ट्रक कीनलक. एकर असर ई भइल कि सांगवी आ लगे के गांव के नौजवान (लइका आ लइकी) खातिर ट्रक चालक, हेल्पर आ दफ्तर के कर्मचारी के काम पैदा भइल.

बाकिर एही बीच कइएक नयका नीति सब आइल, कर आ टोल लागू भइल. एकरा चलते लागत बढ़त चल गइल. सन् 2019 में एगो ट्रक आ कंटेनर के दाम 19 लाख रुपइया रहे. आज ऊ 27 लाख के हो चुकल बा. सांगवी के जादेतर ट्रक बैंक आ निजी वित्तीय संस्थान से सात साल के समान महीना के किस्त पर वाला लोन अब. अब एह किस्त सब के चुकावल ‘आसान’ नइखे रह गइल.

पवार के मुताबिक कारोबार शुरू करत घरिया एगो ट्रक से महीना के डेढ़ लाख ले नफा हो जात रहे. ई ओह पगार से कोई 10 से 15 गुना जादे रहे, जे उऩका ट्रक ड्राइवर के रूप में मिलत रहे. जादे ट्रक, लमहर यात्रा, आ तेज कारोबार के माने रहे, जादे मुनाफा. बाकिर अब लगभग हर यात्रा में उनका घाटा उठावे के पड़ रहल बा.

बिक्कड़ आ पवार, जे एक समय में गांव के नौजवानन खातिर मिसाल रहे, आज सलाह दे रहल बा, “अभी एह कारोबार में मत अइह. सरकार के नीति, खास करके टैक्स, हमनी के मदद करे के जगहा, कठिनाई बढ़ावता.”

आउर ट्रक-कंटेनर के धंधा खातिर ईरान युद्ध ताबूत में अंतिम कील साबित भइल.