ویرودھاچلم میں زمین سے منسلک فن

میں جب بھی مٹی کی گڑیا کے بارے میں سوچتا ہوں، تو میرا ذہن بچپن کی یادوں کی طرف لوٹ جاتا ہے۔ یہ وہ دن تھے جب ہم ندی کے کنارے گھومتے تھے، تالاب میں مچھلیاں پکڑتے تھے، اور پانی سے مٹی نکال کر اپنے کھلونے بناتے تھے۔ زیادہ تر کھلونے بیل یا ٹریکٹرکی نقل ہوتے تھے، جو ہمارے آس پاس کے کھیتوں میں دکھائی دیتے تھے۔ اس طرح مٹی کے ساتھ میری وابستگی شروع ہوئی۔

بعد میں جب میں نے یہلِل انّا (بڑے بھائی) کے ساتھ سفر کرنا شروع کیا تو یہ وابستگی مزید گہری ہوتی گئی۔ وہ مٹی کے لاتعداد کھلونے اور ماسک بناتے اور جب وہ یہ کام بچوں کو سکھاتے تو ہر طرح کی مورتیں بناتے۔ انہیں دیکھ کرمجھے حیرت ہوتی تھی کہ کیا واقعی مٹی سے یہ چیزیں بن سکتی ہیں؟

اس حیرت میں اس وقت مزید اضافہ ہوا جب ہم میں سے کچھ لوگوں نے مل کر ’کلیمن ویرلگل‘ (تمل میں مٹی کی انگلیاں) نام کا ایک گروپ بنایا، جو پوری طرح مٹی کے کام کے لیے وقف تھا۔ ہم جہاں بھی بچوں کے لیے ورکشاپ منعقد کرنے جاتے، ہم اسی گاؤں کی مقامی مٹی کا استعمال کرتے۔ وہیں سے میری اصل تلاش شروع ہوئی، مٹی کی بھی اور اس کے اندر رچنے بسنے والی کہانیوں کی بھی۔

کچھ سال قبل یہلِل انّا نے سُگُنا اکّا (بڑی بہن) سے ویرودھاچلم میں ایک سیرامک ورکشاپ کے دوران اپنی ملاقات کے بارے میں مجھے بتایا تھا۔ وہاں خواتین کا ایک گروپ سیرامک کا کارخانہ چلا رہا تھا۔ ان کی کہانی سن کر میں نے فیصلہ کیا کہ مجھے ان سے ملنا چاہیے، ان کی گڑیوں کو دیکھنا چاہیے، اور ان کی دنیا کی تصویر کشی کرنی چاہیے۔

پیپلز آرکائیو آف رورل انڈیا (پاری) سے وابستگی کے بعد میں جانتا تھا کہ مجھے یہ کہانی سنانی ہے۔ میں اریالور کی انیتا لائبریری میں منعقد ایک ورکشاپ میں حصہ لینے گیا تھا۔ اس لائبریری کا نام ایک طالبہ انیتا کے نام پر رکھا گیا تھا، جس نے این ای ای ٹی (نیٹ) کی تیاری کے دوران خودکشی کر لی تھی۔ یہاں میری ملاقات سُگُنا سے ہوئی۔ ہم کئی بار ملے، اور آخر کار میں نے ان کے کام کی دستاویز سازی کے لیے ان کے گاؤں کا دورہ کیا۔

یہ جگہ سیرامک کے لیے مشہور ہے۔ پہلے یہاں لوگ حکومتی تعاون سے کام کرتے تھے، لیکن اس بات کو کافی عرصہ گزر چکا ہے۔ اندر داخل ہوتے ہی میں نے دیکھا کہ گھروں کی قطار میں سیرامک ​​کی گڑیوں کو نمائش اور فروخت کے لیے رکھا گیا ہے۔ چونکہ صنعت زوال پذیر ہے، اس لیے مٹی کے دیے اب ہر جگہ موجود ہیں، جو تازہ ڈھلے ہوئے ہیں اور خشک ہونے کے لیے باہر رکھے گئے ہیں۔ ویرودھاچلم اور اس کے گرد ونواح کے گاؤوں میں، سیرامک ​​کی مورتیں اور دیے ہر گلی میں موجود ہیں۔

پورا گاؤں متحرک دکھائی دے رہا تھا – مصنوعات کو لاریوں میں لاد کر دوسرے شہروں کو روانہ کیا جا رہا تھا۔ دور افتادہ مقامات سے تاجر بڑی تعداد میں گڑیا خریدنے آئے تھے۔ یہ وہ منظر تھا جس سے ہم گاؤں میں داخل ہوتے ہی روبرو ہوئے تھے۔

ایک چھوٹے سے شیڈ میں، سُگُنا اکّا اور ان کے شوہر اپنی گڑیوں پر کام کر رہے تھے۔ وہ ایک زندہ دل اور باتونی خاتون ہیں – ان کی کہانیاں ایک جگہ سے شروع ہو کر دوسری جگہ پر ختم ہوتی ہیں۔ لیکن جیسے ہی آپ ان کے ساتھ بیٹھتے ہیں، آپ کو احساس ہوتا ہے کہ ان کی زندگی کتنی بھرپور ہے، ان میں کہانیاں کتنی ہیں۔

سُگُنا کی کہانی

ونکّم! میرا نام سُگُنا ہے۔ میں یہ کام ۲۰۰۸ سے کر رہی ہوں۔ میں نے بہت چھوٹی سی عمر میں اپنے والدین کو کھو دیا تھا۔

میرے والد کے گزرنے کے بعد، میری والدہ نے گڑیا بنانے والی قریبی فیکٹری میں کام کرنا شروع کر دیا۔ وہ گڑیوں کو گھر لے آتی تھیں، اور یہی وہ وقت تھا جب میں پہلی بار ان کی طرف متوجہ ہوئی تھی۔ چار سال کی عمر کے بعد میں اسکول سے زیادہ گڑیوں کی طرف راغب تھی۔ میں حیران ہوتی تھی کہ انہیں کیسے بناتے ہیں؟ وہ کس چیز سے بنتی ہیں؟

جب میری والدہ کا انتقال ہوا تو میری دادی نے کہا، ’’تم اب اسکول نہیں جا سکتی، میں تمہاری دیکھ بھال نہیں کر سکتی۔‘‘ انہوں نے مجھے اپنی بہن کے ساتھ اسی فیکٹری میں کام کرنے کے لیے بھیجا تھا۔ اس وقت میری عمر ۱۰ سال تھی۔

پہلے تو مجھے صرف مٹی کو ملانے اور اسے چھاننے کی اجازت تھی، گڑیوں کو چھونے کی نہیں۔ دو سال بعد میں نے سانچوں میں مٹی ڈالنا شروع کیا۔ آہستہ آہستہ میں نے کاسٹنگ کرنا بھی سیکھ لیا۔ لیکن کچھ ہی دنوں بعد اور بہتر کرنے کی خواہش پیدا ہوئی۔ تب میں نے اس فن کو سیکھنے کا فیصلہ کیا۔

مجھے سیکھنے میں چار سال لگے۔ میں نے ۱۴ سال کی عمر میں یہ کام شروع کیا، اور اس دوران روزانہ ۷۵ روپے کماتی تھی۔ فنکار ۱۰۰ روپے کماتے تھے، اور جب میں نے اسی رقم کا مطالبہ کیا تو مجھ سے کہا گیا کہ تم ابھی چھوٹی ہو۔ تو میں نے وہ کام چھوڑ دیا۔

بعد میں، میں نے کنٹریکٹ پر کام کرنا شروع کیا۔ تقریباً ۱۰ کمپنیوں نے مجھے اپنے آرٹ کے آرڈر دیے۔ پھر مجھے احساس ہوا کہ اگر ہم اپنی صلاحیتوں کو نکھارتے رہیں، تو ہمارا کام ہمیں اوپر تک لے جائے گا۔

آہستہ آہستہ لوگ میری عزت کرنے لگے۔ ان دنوں، صرف فنکار ہی میزوں پر بیٹھتے تھے۔ دوسرے کارکن فرش پر بیٹھتے تھے۔ لیکن وہی لوگ جنہوں نے مجھے ایک بار نکال دیا تھا مجھے واپس بلانے لگے۔ میری فنشنگ – آنکھیں، ہونٹ، چھوٹی چھوٹی تفصیلات – نے میرے کام کو نمایاں کر دیا۔

لیکن کچھ جگہیں ناقابل برداشت تھیں۔ جس طرح وہ خواتین کو دیکھتے تھے، جس طرح انہوں نے ہمارا مذاق اڑایا، میں نے وہاں واپس جانے سے انکار کر دیا، چاہے کتنی بھی بڑی تنخواہ کیوں نہ ہو۔

اپنے شوہر سے میری ملاقات ایسی ہی ایک فیکٹری میں ہوئی تھی۔ وہ بیرون ملک جانا چاہتے تھے، لیکن میں نے ان سے کہا، ’’اگر ہم شادی کرتے ہیں، تو آپ کو میرے ساتھ رہنا پڑے گا اور یہ کمپنی چلانا پڑے گی۔‘‘ بس یہی میری شرط تھی۔

مجھے یہ کام اتنا پسند کیوں ہے؟ شاید اس لیے کہ یہ مٹی کا کام ہے، میں مٹی کو شکل دیتی ہوں، اسے زندہ کرتی ہوں، اور لوگ اس کی تعریفیں کرتے ہیں۔ اس سے ملنے والی خوشی سے مجھے اس کام کو جاری رکھنے کا حوصلہ ملتا ہے۔

اس علاقہ میں صرف دو یا تین خواتین ہی مٹی کا کام کرتی ہیں۔ میں واحد فنکار ہوں جس کو اس فن پر مکمل دسترس حاصل ہے۔ مٹی کا کام کرنے والی میں یہاں کی پہلی خاتون فنکار ہوں۔ میرا خواب ہے کہ میں اپنا ایک برانڈ بناؤں اور الگ اسٹائل والی گڑیا بناؤں۔

ایک دفعہ، ایک معروف مرد فنکار نے مجھ سے کہا، ’’یہ عورت کا کام نہیں ہے، اگر آپ کی گاڑی خراب ہو جائے تو کیا ہوگا؟ اسے کون دھکہ دے گا؟‘‘ اس لیے میں نے اپنی گاڑی خریدی، اکیلے سفر کیا، آرڈر لیے، اور اپنی مصنوعات کو خود پہنچایا۔ اس وقت میری عمر صرف ۱۶ یا ۱۷ سال رہی ہوگی۔

لوگوں نے میرا مذاق اڑایا: ’’تم ایک لڑکی ہو، کیا واقعی تم ہمیشہ یہ کام کر سکوگی؟‘‘ اس نے مجھے مضبوط بنایا۔ میں نے بڑی مورتیں بنانا شروع کیں، ایسی مورتیں جس کے بارے میں لوگ کہتے ہیں کہ عورتیں نہیں بنا سکتیں۔

انہوں نے مجھے مغرور کہا، یہ بھی کہا کہ میں خود سر ہوں۔ لیکن اسی خیال نے میری حفاظت کی۔ اس کے بعد کسی کو مجھے برا کہنے کی جرأت نہیں ہوئی۔

جب ہم نے یہ کام شروع کیا تو ہمیں یقین تھا کہ یہ دستکاری کئی نسلوں تک جاری رہے گی۔ لیکن آج اسے زندہ رکھنا مشکل ہے۔ گجرات اور کرائیکل جیسے مقامات پر اب مشینیں گڑیا بناتی ہیں۔ ہم جیسے چھوٹے دستکار ان کا مقابلہ نہیں کر سکتے۔

مقامی طور پر بھی بہت کم تعاون ملتا ہے۔ لوگ کہتے ہیں، ’’ان کمہاروں، ان کوراوروں کی بنائی گڑیوں کو کون خریدے گا؟‘‘ آہستہ آہستہ، وہ اپنے ہی ہنر سے دور ہو تے گئے۔

اب، صرف عام مٹی کا کام ہی فروخت ہوتا ہے۔ فوری طور پر سانچوں میں ڈھالا ہوا، خشک کیا ہوا اور بھونڈے طریقے سے پینٹ کیا ہوا۔ لیکن حقیقی سیرامک ​​کا کام الگ ہے۔ اس میں وقت کے ساتھ ساتھ، نگہداشت اور مہارت کی ضرورت بھی ہوتی ہے۔ اور ان تمام کوششوں کے بعد بھی خریدار تلاش کرنا مشکل ہے۔

کچھ لوگوں کے خراب کام نے اس دستکاری کو بدنام کر دیا ہے۔ کبھی کبھی میں سوچتی ہوں کہ کیا یہ فن یکسر ختم ہو جائے گا؟

اچھی مٹی – پنروتی مٹی – اب شاذ و نادر ہی ہم تک پہنچتی ہے۔ بہترین معیار کی مٹی اب برآمد کی جاتی ہے اور اس میں سے ہمیں بچی کھچی ملتی ہے۔ ایک ٹن کی قیمت ۳-۴ ہزار روپے ہوتی ہے۔ اس میں مکسنگ کے لیے جس نوع کی مٹی کی ضرورت ہے، اس کی قیمت ۱۰ ہزار روپے ہے۔ جہاں تک آمدنی کا سوال ہے، تو ۲۰۰ گڑیوں پر حاصل ہونے والے ۵۰۰۰ روپے سے اخراجات کے بعد ہماری اصل آمدنی بمشکل ۱۰۰۰ روپے ہوتی ہے۔

ہم کچی مٹی خریدتے ہیں، اسے خود بینٹو نائٹ، سوڈا سلیکیٹ اور سلیکا کے ساتھ ملاتے ہیں۔ اس سے مضبوطی اور چمک کو بہتر بنانے میں مدد ملتی ہے۔ صرف سادہ مٹی سے وہ مضبوطی نہیں ملتی ہے۔

میں نے اپنے والدین کو بہت جلد کھو دیا تھا۔ میری دادی نے میری پرورش کی، اور اس کام نے مجھے پناہ اور سایہ دیا – دھوپ میں سخت محنت سے بہتر، وہ کہتی ہیں۔

میں نے قریب میں ہی شادی کی، تاکہ میں اپنی کمپنی شروع کر سکوں۔ ابھی اس کے تین سال ہو گئے ہیں۔ میرے والد کا انتقال اس وقت ہوا جب میں تین سال کی تھی، جب چھ سال کی تھی تو والدہ گزر گئیں۔ میری بہنیں وہاں سے چلی گئیں، لیکن میں ٹھہری رہی – کیونکہ مجھے سیرامک کا کام پسند ہے۔ اس کام نے مجھے پہچان دلائی۔

لیکن وقت بدل گیا ہے۔ خام مال مہنگا ہے، منافع کم۔ بڑی مقدار میں اچھی مٹی صرف امیر لوگ ہی خرید سکتے ہیں۔ یہاں کی خواتین سے اب بھی توقع کی جاتی ہے کہ وہ گھر میں ہی رہیں۔ اگر میری ڈیزائنیں پسند کی جاتی ہیں، تو وہ کہیں گے کہ یہ سب اس کے ستاروں کی وجہ سے ہے۔ اگر پسند نہیں کی جاتیں تو وہ اس کا الزام میری بد قسمتی پر ڈالیں گے۔ اس لیے اب میں اپنے ماڈلوں کو اپنے پاس ہی رکھتی ہوں۔

تمام ۴۰ ماڈلز جو ہم بناتے ہیں وہ میرے ڈیزائن کردہ ہیں۔ باہر ان کی قیمت۵۰۰۰ روپے ہوگی۔ یہاں ہم کم قیمت پر فروخت کرتے ہیں، لیکن پھر بھی لوگ سوچتے ہیں، ’’اگر یہ مقامی ہے، تو یہ کمتر معیار کو ہوگا۔‘‘

تمام گڑیوں میں، مجھے مُروگن کی مورت بنانا سب سے زیادہ پسند ہے۔ زیورات سے آراستہ کرنا، قلغی چڑھانا، محراب بنانا مجھے پسند ہے۔

نزدیک میں واقع سرکاری بھٹہ ابھی کھلا نہیں ہے، اس لیے ہم پرائیویٹ بھٹے کا استعمال کرتے ہیں، جو ۲۰-۲۵ روپے فی کلو چارج کرتے ہیں، جبکہ سرکاری نرخ ۱۷-۱۸ روپے ہے۔ اگر ہم سب متحد ہو کر حکام سے رابطہ کریں تو شاید حالات بدل جائیں۔ لیکن یہاں لوگ تعاون نہیں کرتے۔ تنجاور کی بات الگ ہے۔ وہاں اتحاد ہے اور حکومت کا تعاون بھی حاصل ہے۔

ہمارے مواد – سفید بینٹو نائٹ، بھٹی کی مٹی – دوسری ریاستوں سے آتے ہیں۔ ایک ٹن اچھی مٹی کی قیمت ۱۵ ہزار روپے ہے، لیکن ہماری ایک گڑیا ۳۰ روپے میں فروخت ہے۔ ہم کیسے اس کے متحمل ہوسکتے ہیں؟ یہاں تک کہ رنگوں کی قیمت بھی ۲۰۰ سے ۳۰۰ روپے فی گرام ہے۔

ہم نے پانچ سال پہلے ایک ایسوسی ایشن قائم کی تھی، لیکن کوئی حقیقی تعاون نہیں ملا۔ اگر حکومت خام مال پر سبسڈی دے یا کم قیمت پر مشینری دستیاب کرائے تو یہ دستکاری زندہ رہ سکتی ہے۔ ابھی کے لیےصرف بڑی صنعتوں کو منافع مل رہا ہے؛ چھوٹے فنکار اس کام کو کسی طرح جاری رکھے ہوئے ہیں۔

اتنے سالوں کے بعد بھی لوگ پوچھتے ہیں کہ ’’اس نے کیا حاصل کیا ہے؟‘‘ تو ا س سے تکلیف پہنچتی ہے۔

جب ہم نے یہ کام شروع کیا تو آندھرا پردیش اور گجرات سے تاجر ہماری گڑیوں کو خریدنے آتے تھے۔ اب یہ چیزیں صرف آیودھ پوجا اور نوراتری کولو تہواروں کے دوران ہی فروخت ہوتی ہیں۔ باقی سال مندی رہتی ہے۔ صرف اگل ویلکّو – مٹی کے دیے – مستقل طور پر فروخت ہوتے ہیں۔ ہم انہیں عموماً ایک روپیہ میں فروخت کرتے ہیں، یہ زیادہ تر مندروں اور تہواروں کے لیے شمالی ہندوستان کو برآمد کیے جاتے ہیں۔

ہم اپنی مصنوعات کو گوداموں کے حوالے کر دیتے ہیں کیونکہ ہم انہیں ذخیرہ کرنے کی استطاعت نہیں رکھتے۔ بچولیوں کے منافع کو ہم بمشکل برداشت کرسکتے ہیں۔ اگر ہمارے پاس سرمایہ ہوتا تو ہم تہوار کے موسم تک اپنا اسٹاک رکھ سکتے تھے اور براہ راست فروخت کر سکتے تھے۔

یہاں سے سو میٹر کے اندر، کم از کم ۱۰۰ ورکشاپ ہیں۔ ان میں سے زیادہ تر میں مختلف قسم کی گڑیا بنائی جاتی ہیں، باقی میں دیے بنائے جاتے ہیں۔ زیادہ تر لوگ اگل کے کام کی طرف متوجہ ہو گئے ہیں۔ یہ گڑیا کے برعکس مستحکم اور محفوظ کام ہے۔ گڑیا بنانے میں ایک غلطی کا مطلب مکمل نقصان ہوتا ہے۔ اب ہم بھی آئندہ سال تک اس کام میں منتقل ہونے کا ارادہ رکھتے ہیں۔

سومتی کی کہانی

میرا نام سومتی ہے۔ میں۱۵ سالوں سے سیرامک کی ​​گڑیا کی ایک چھوٹی کمپنی چلا رہی ہوں۔ کبھی یہ گڑیا فروخت ہوتی ہے، کبھی نہیں۔ بارش کے دوران کچھ بھی خشک نہیں ہوتا؛ کام رک جاتا ہے۔ میں اکثر سوچتی ہوں کہ آیا مجھے اس کام کو جاری رکھنا چاہیے یا نہیں۔

میری شادی ممبئی میں ہوئی تھی اور کچھ عرصہ تک میں سورت میں رہی۔ میرے شوہر بہت زیادہ شراب پیتے تھے۔ میں نے انہیں چھوڑ دیا اور ۲۰۰۵ میں گھر واپس آ گئی۔ میں نے سیرامک سیکھنا شروع کیا، اور جلد ہی ایک چھوٹی ورکشاپ قائم کی۔ میں نے اس کام کے ذریعہ اپنے بیٹے کی پرورش کی۔ وہ اب کالج میں ہے۔

ہم اپنی ایک گڑیا ۲۵ روپے میں فروخت کرتے ہیں، جبکہ خریدار انہیں ۱۰۰ روپے میں دوبارہ بیچتے ہیں۔ کرایہ، رنگ اور اجرت ادا کرنے کے بعد بمشکل ہی کچھ بچتا ہے۔ پھر بھی میں اتنا ضرور جانتی ہوں کہ میں اس کام کو نہیں چھوڑ سکتی۔

ہمیں سکھانے والا کوئی نہیں ہے۔ میں نے جو کچھ بھی سیکھا ہے دوسروں کو دیکھ کر اور تنہا تجربہ کر کے سیکھا ہے۔

جب بس کے کرایے کے لیے دو روپے بھیادا کرنا مشکل تھا، تو میں تین کلومیٹر پیدل چل کر کام پر جاتی تھی۔ میں شروع شروع میں ایک دن میں ایک گڑیا بناتی تھی، اب ایک گھنٹہ میں بنا سکتی ہوں۔ خالی ہاتھ کام پر جانے سے لے کر اپنے پیروں پر کھڑے ہونے تک، میں نے ایک طویل سفر طے کیا ہے۔

زندگی اب بہتر ہے، حالانکہ کاروبار سست ہے۔ قیمتیں بڑھ گئی ہیں، لیکن خریدار اب بھی سودے بازی کرتے ہیں۔ جس دن کاروبار اچھا ہوتا ہے، ہم اچھا کھاتے ہیں۔ اگر اچھا نہیں ہوتا، تو میں اگلے دن کی مٹی یا بجلی کے بل کی فکر میں رات گزارتی ہوں۔ میں اپنے بچہ کی وجہ سے آگے بڑھتی رہی ہوں۔

کبھی کبھی میں اپنے آپ سے پوچھتی ہوں کہ میں نے شادی کیوں کی، بچہ کیوں پیدا کیا؟ جب وہ پوچھتا ہے کہ میں نے اسے کسی بہتر اسکول میں کیوں نہیں بھیجا تو مجھے تکلیف ہوتی ہے۔ لیکن اس کے باوجود اس کام کی وجہ سے ہم زندہ رہے۔

مجھے یہاں رہتے ہوئے ۱۷ سال ہو گئے ہیں۔ مٹی جمع کرنے سے سانچے میں ڈھالنے تک میں ہر مرحلہ سے واقف ہوں۔ مجھے فخر محسوس ہوتا ہے جب لوگ کہتے ہیں، ’’آپ نے ایک عورت ہوتے ہوئے بھی بہت اچھا کام کیا ہے۔‘‘ میں نے یہاں تک پہنچنے کے لیے ایک طویل سفر طے کیا ہے۔ اگرچہ کاروبارمیں غیریقینی رہتی ہے، لیکن اس کام سے عزت بھی ملتی ہے۔

کے گُن شیکھرن کی کہانی

میں ۲۵ سال سے اس میدان میں ہوں۔ کووڈ تک کاروبار اچھا رہا۔ اس کے بعد سب کچھ رک گیا۔ میں نے ایک بار آٹھ مزدوروں کے ساتھ ایک کمپنی چلائی تھی۔ اب میں تنہا کام کرتا ہوں۔

خام مال کی قیمتیں زیادہ ہیں، منافع کم ہے۔ میں ۳۰۰ گڑیوں پر تقریباً ۹۰۰۰ روپے خرچ کرتا ہوں اور اگر سب کچھ ٹھیک رہا تو بمشکل ۱۰۰۰ سے ۱۵۰۰ روپے منافع حاصل کرتا ہوں۔ اگر مٹی یا رنگ میں کچھ کمی رہ جائے، تو یہ مکمل نقصان ہے۔

یہاں تک کہ بازار بھی بدل گیا ہے۔ اب کوئی بھی آرائشی گڑیا نہیں خریدتا۔ ایل ای ڈی ٹیلی ویژن کی آمد اور شوکیسوں کی گرتی ہوئی تعداد کی وجہ سے لوگ انہیں پرانا خیال کرنے لگے ہیں۔

حال ہی میں میری بیوی پھیپھڑوں کے انفیکشن کی وجہ سے چل بسیں۔ لوگ کہتے ہیں کہ اس کام میں اڑنے والی دھول کی وجہ سے ان کی موت ہوئی ہے۔ میرے دو بیٹے ہیں۔ میں اب ان کے پرائیویٹ اسکول کے اخراجات کو برداشت نہیں کرسکتا۔ میں کاروبار اور کنبے کو رواں دواں رکھنے کے لیے جدوجہد کر رہا ہوں۔

دھول کی الرجی اور پھیپھڑوں کی بیماریاں ہمارے درمیان عام ہیں۔ اگر حکومت نے سیرامک ​​گڑیوں کو اس طرح فروغ دیا جس طرح انہوں نے اگل دیوں کو فروغ دیا تھا اور لوگوں سے ’’ویرودھاچلم میں بنی ہوئی مٹی کی گڑیا خریدنے‘‘ کے لیے کہے، تو شاید چیزیں بحال ہو جائیں۔

ہم نے سرکاری اسکیموں اور بینک قرضوں کے لیے درخواستیں دی ہیں، لیکن جائیداد یا ضمانت کے بغیر، کوئی ہماری مدد نہیں کرتا۔ ہم صرف اپنے ہاتھوں سے کام کرتے رہتے ہیں اور اس دستکاری میں جو کچھ باقی رہ گیا ہے اسے سنبھالے ہوئے ہیں۔

ان عورتوں اور مردوں کے لیے، یہ مٹی ایک ہنر سے زیادہ ہے۔ یہ بقا، یادداشت، اور ایک ضد ہے۔ اس کام سے نہ تو مستقل آمدنی ہوتی ہے اور نہ ہی وہ پہچان جس کی یہ مستحق ہے، پھر بھی دستکار اپنے کام میں مصروف ہیں۔ جیسے جیسے صنعتیں مشینوں کا رخ کرتی ہیں اور بازار آگے بڑھتا ہے، یہ ہاتھ اس شے کو شکل دیتے رہتے ہیں۔ اور جو چیز قائم رہتی ہے وہ ہے کام کا وقار اور زمین سے پیدا ہونے والے آرٹ کی انمٹ خوبصورتی۔

یہ اسٹوری سب سے پہلے تمل زبان میں لکھی گئی تھی۔

ترجمہ نگار: شفیق عالم