विरुधाचलम मं माटी कला

माटी के पुतरी/पुतरा मन के सुरता आतेच सात मोला अपन बचपना सुरता आ जाथे –वो बखत जब हमन नदिया के पार मं किंजरत रहेन, तरिया मं मछरी धरत रहेन, अऊ पानी तीर ले माटी निकारके अपन पुतरी बनावत रहेन. अधिकतर पुतरी बइला धन ट्रेक्टर के रहय, हमर तीर-तखार के खेत-खार ले जुरे कतको किसम के पुतरी. अइसने करके माटी ले मोर नाता सुरु होइस.

बाद मं, जब मंय एज़िल अन्ना (बड़े भाई) के संग जाय लगेंय, त ये नात ह अऊ जियादा बढ़गे. वो ह माटी के अनगिनत गुड़िया अऊ मुखऊटा बनवत रहिस, अऊ जब लइका मन ला सिखावत रहिस त रंग-रंग के पुतरी बनावत रहिस. वोला देख के मंय सोचत रहंय- काय माटी ले सिरतोन अतक कुछु बन सकथे?

मोर लगाव तब अऊ बढ़गे जब हमर एक ठन टोली ह माटी कला के एक ठन संस्था कलिमन विरालगल (तमिल मं माटी के ऊँगरी) बनाइस. हमन जिहां घलो लइका मन बर वर्कशाप करे जावत रहेन , वो गाँव के माटी काम मं लावन. इहींचे मोर लगाव सिरिफ माटी भर ले नइ, वो जगा के माटी के खासियत ला जाने मं सुरु होइस.

कुछेक बछर पहिली, एज़िल अन्ना ह मोला विरुधाचलम मं एक ठन माटीकला वर्कशॉप के बखत सुगुना अक्का (बड़ी बहन) ले होय भेंट के बारे मं बताय रहिस, जिहां कुछेक माईलोगन मन मिलके माटीकला के फेक्टरी चलावत रहिन. वो मन के कहिनी सुनके, मंय तय करेंय के मोला वो मन ले भेंट करे ला चाही, वो मन के बनाय पुतरी देखे ला चाही अऊ वो मन के दुनिया के फोटू लेगे ला चाही.

पीपुल्स आर्काइव ऑफ़ रूरल इंडिया (पारी) ले जुड़े के बाद, मोला गम होइस के ये ह एक ठन अइसने कहिनी आय जेल ला बताय जरूरी आय. जब मंय अरियालुर के अनीता लाइब्रेरी मं वर्कशाप करे बर जाय रहेंय, जेकर नांव तऊन नोनी के नांव मं राखे गे रहिस जेन ह नीट परीक्षा के बाद आत्महत्या कर लेय रहिस, त आखिर मोर भेंट सुगुना ले होगे. हमन कतको पईंत मिलेन, अऊ आखिर मं मंय ओकर काम के दस्तावेजीकरन करे बर ओकर गाँव घलो गेंय.

ये जगा चीनी मिट्टी के जिनिस मन के सेती जाने जाथे. पहिली लोगन मन ला काम मं सरकारी मदद मिलत रहिस, फेर अब वो बखत नइ रहिगे. जइसनेच मंय भीतरी गेंय, मंय घर मं कतार मं रखाय चीनी मिट्टी के पुतरी मन ला देखेंय जेन ह बिकाय बर राखे गे रहिस. काबर के ये उदिम कमजोर होगे हवय, येकरे सेती अब माटी के दीया हरेक जगा मं देखे बर मिलथे – तुरते बनाय, सूखाय बर रखाय. विरुधाचलम अऊ ओकर तीर-तखार के गाँव मन मं, चीनी मिट्टी के मूर्ति अऊ दीया करीबन हरेक गली-खोर मं नजर आथे.

गाँव भर मं भागम-भाग लगे रहिस – समान मन ला ढोये जावत रहिस, कतको ट्रक मं लादे जावत रहिस अऊ आने शहर मं भेजे जावत रहिस. दूरिहा-दूरिहा ले बेपारी थोक मं पूर्ति बिसोय आय रहिन. जेन बखत मंय भीतर गेंय इहीच नजारा जइसने मोला परघावत होय.

एक ठन नानकन खोली मं, सुगुना अक्का अऊ ओकर घरवाला अपन पुतरी बनावत रहिन. वो ह खुशमिजाज, बातूनी माइलोगन आय – ओकर गोठ-बात एक जगा ले सुरु होके दूसर जगा मं जाके सिराथे. फेर जब तुमन ओकर संग बइठथो, त मसूस होथे के ओकर जिनगी कतक धनी हवय. ओकर कतक कहिनी वो मं समाय हवय.

सुगुना के कहिनी

वणक्कम (जय जोहार)! मोर नांव सुगुना आय. मंय साल 2008 ले ये काम करत रहे हवं. मोर बनेच छोटे उमर मं मोर दाई-ददा दूनों गुजर गे रहिन.

मोर ददा के गुजर जाय के बाद, मोर दाई ह लकठा के एक ठन पुतरी बनेइय्या फेक्टरी मं काम करे लगिस. वो ह घर मं पुतरी लावत रहिस, तभे मोला पहिली बेर वो ला देख के जाने के मन होइस. चार बछर के उमर मं मोला स्कूल ले जियादा पुतरी मन भाय. मंय अक्सर सोचत रहंव: ये कइसने बनथे? ये ह कोन जिनिस ले बनथे?

जब मोर दाई गुजरगे, त मोर डोकरी दाई ह कहिस, “तंय अब स्कूल नइ जाय सकस. मंय तोला पोसे नइ सकंव.” वो ह मोला अपन दीदी के संग उहिच फेक्टरी मं काम करे भेज दीस. मंय वो बखत 10 बछर के रहेंय.

पहिली त मोला सिरिफ माटी मिलाय अऊ छाने के काम देय जाय – पुतरी मन ला छुये तक ले नइ देवंय. दू बछर बाद, मंय माटी ले सांचा मं डारे सुरु करेंय. धीरे-धीरे मंय ढलाई घलो सीख लेंय. फेर कुछेक बखत बाद, मोला अऊ कुछु बढ़िया करे के मं करिस. ओकर बाद मंय ये हुनर ला सीखे के फइसला करेंय.

मोला सीखे मं चार बछर लाग गे. मंय 14 बछर के उमर मं सुरु करे रहेंय अऊ 75 रूपिया रोजी कमावत रहेंय. माटी कारीगर 100 रूपिया कमावत रहिन, अऊ जब मंय वो मन ले अतकेच मांगेंय, त वो मन कहिन, “तंय अभी लइका हस.” ते पायके मंय उहाँ काम करे छोड़ देंय.

बाद मं, मंय ठेका मं काम करे सुरु करेंय- करीबन 10 ठन कंपनी ले मोला बनाय के ऑर्डर मिलिस. वो बखत मोला गम होइस: गर हमन अपन हुनर ला बढ़ावत रहिबो, त हमर काम हमन ला आगू ले जाही.

धीरे-धीरे लोगन मन मोर सम्मान करे लगिन. वो बखत सिरिफ माटी कारीगर मन चौकी मं बइठत रहिन: बाकि सब्बो मन भूंइय्या मं. फेर उहिच लोगन मन जेन मन कभू मोला मना कर देय रहिन, अब मोला लहूट के आय बर कहे लगिन. मोर सफई- आंखी, होंठ, नान-नान जिनिस मन – मोर काम ला दूसर ले अलग बनावत रहिस.

फेर कुछेक जगा मं बात सहन ले बहिर रहिस. जऊन तरीका ले वो मन माईलोगन मन ला देखेंय, जेन तरीका ले वो मन हमर मजाक उड़ावंय- मंय लहुट के जाय ले मना करे देंय, चाहे वो मं कतको घलो तनखा देवंय.

अइसनेच एक ठन फेक्टरी मं मोर भेंट मोर घरवाला ले होईस. जेन ह बिदेस जाय ला चाहत रहिस, फेर मंय ओकर ले कहेंय, “गर हमन बिहाव करबो, त तोला मोर संग रहिके ये कंपनी ला चलाय परही.” बस इहीच मोर सर्त रहिस.

मोला ये काम अतक काबर भाथे? हो सकत हे येकरे सेती के ये ह माटी ले बने हवय – मंय येला गढ़थों, ये मं परान डारथों, अऊ लोगन मन येकर गुन गाथें. इही खुसी मोला आगू बढ़े के प्रेरना देथे.

ये इलाका मं सिरिफ दू-तीन माइलोगन मं माटी के काम करथें: मंय अकेल्ला अवं जेन ह जम्मो तरह ले मूर्ति बनाथों. इहाँ के पहिली माई माटीकला कारीगर. मोर सपना हवय के मंय अपन एक ठन अलग ब्रांड बनावंव- एक ठन अलग किसम के पुतरी.

एक पईंत, एक झिन नामी मरद माटीकला कारीगर ह मोला कहिस, “ये काम माइलोगन मन के बस के नो हे. गर तोर गाड़ी खराब हो जाही त काय होही? वोला कोन पेलही?” त मंय गाड़ी बिसोंय, अकेल्ला आवंव –जावंव, आर्डर लेंय अऊ खुदेच काम करेंय- वो बखत मोर उमर सिरिफ 16 धन 17 बछर रहे होही.

लोगन मन मोर मजाक उड़ावंय: “ तंय नोनी अस, काय तंय सब्बो दिन ये काम करे सकबे?”

ओकर ले मंय अऊ घलो मजबूत बन गेंय. मंय अऊ घलो बड़े मूर्ति बनाय सुरु कर देंय- जऊन ला ले के लोगन मन कहत रहेंय के माइलोगन मन बनाय नइ सकंय.

वो मन मोला घमंडिन कहिन, कहिन के मोर बेवहार बने नइ ये. फेर इहीच बात ह मोर काम आइस. ओकर बाद कोनो घलो खराब बेवहार करे के हिम्मत नइ करिन.

जब हमन सुरु करे रहेन, त हमन ला लगे रहिस के ये कला कतको पीढ़ी तक ले चलत जाही. आज, ये ला बचाय मुस्किल होगे हवय. गुजरात अऊ कराईकल जइसने जगा मन मं अब मसीन ले पुतरी बनाय जावय हे. हमर जइसने छोटे बनेइय्या येकर आगू ठहरे नइ सकन.

लोकल मं घलो, बनेच कम मदद मिलथे, लोगन मन कहिथें, “ये कुम्हार,ये कुरावर मन के बनाय पुतरी ला कोन बिसोही?” धीरे-धीरे, वो मन अपन काम ला छोड़ दे हवंय.

अब, सिरिफ सादा माटी ले बने जिनिस मन बेचाथें - सांचा मं तुरते बनाय, सुखाय अऊ सस्ता रंग मं रंगाय. फेर असल सिरेमिक काम अलग होथे – येकर बर बखत, देखरेख अऊ हुनर के जरूरत होथे. अतक मिहनत के बाद घलो, लेवाल मिले मुस्किल आय.

कुछु लोगन मन के घटिया काम ह ये कला के नांव ला खराब कर दे हवय. कभू-कभू मंय सोचथों के काय ये कला ह नंदा जाही.

बढ़िया माटी - पनरुती माटी - अब हमन ला भारी मुस्किल ले मिल पाथे. सबले बढ़िया किसिम (क्वालिटी) के माटी बहिर भेजे जाथे: हमन ला बांचे खुचे माटी मिलथे. एक टन माटी के दाम 3,000-4,000 रूपिया परथे: जऊन माटी के हमन ला मेंझारे के जरूरत परथे ओकर दाम 10,000 रूपिया होथे. 10 कोरी (200 नग) पुतरी ले मिलेइय्या 5,000 रूपिया, खरचा काटके हमन ला मुस्किल ले 1,000 रूपिया मिलथे.

हमन माटी बिसोथन, वोला बेंटोनाइट, सोडा सिलिकेट अऊ सिलिका के संग मेंझारथन. येकर ले मजबूती अऊ चमक बढ़ जाथे. सिरिफ सादा माटी नइ टिकय.

बचपना मं मोर दाई-ददा गुजर गीन. मोर डोकरी दाई ह मोला पालिस-पोसिस, अऊ ये काम ह मोला ठीहा-ठिकाना दीस – घाम मं कड़ा मिहनत करे के बाद, वो ह कहिथे.

मंय जल्दी बिहाव कर लेंय जेकर ले अपन कंपनी सुरु करे सकवं. अब तीन बछर होगे हवय. मंय जब तीन बछर के रहेनी मोर ददा गुजर गे रहिस, अऊ मोर छै बछर के उमर मं मोर दाई. मोर दीदी-बहिनी मन दूरिहा चले गिन, फेर मंय इहींचे रहेंय-काबर के मोला चीनी मिट्टी के बरतन भारी भाथे. इहीच ह मोला वो बनाइस जेन मंय हवं.

फेर बखत बदल गे हवय. कच्चा माल महँगा हवय, मुनाफ़ा कम. सिरिफ पइसा वाले लोगन मन बढ़िया माटी थोक मं बिसोय सकथें. इहाँ माइलोगन मन ले अभू घलो इहीच आस करे जाथे के वो मन घर-गृहस्थी संभालें. गर मोर डिज़ाइन बढ़िया चल निकरही, त सब्बो ह ओकर मन के किस्मत मं हवय, वो ह कहिथे. गर नइ चलिस, त वो मन येकर जम्मो दोस मोर बदकिस्मती ला दिहीं. येकरे सेती अब मंय अपन मूर्ति अपन तीरेच मं राखथों.

हमर बनाए सब्बो दू कोरी (40) मूर्ति मोर डिज़ाइन के आय. बहिर, येकर दाम 5,000 रूपिया होथे. इहाँ हमन कम दाम मं बेचथन, ओकर बाद घलो लोगन मन सोचथें, “गर ये ह लोकल आय, त घटियाच होही.”

सब्बो पुतरी मन ले मोला मुरुगर के मूर्ति बनाय सबले जियादा पसंद हवय – जेवर, मुकुट, धनुष – मोला ये सब बनाय भारी भाथे.

तीर के सरकारी भट्ठा खुले नइ ये, ते पायके अपन निजी भट्टा/ भाटी काम मं लाथन, जेन मं हमन ला 20-25 रूपिया किलो पाछू परथे. सरकारी भाव 17-18 रूपिया हवय. गर हमन सब्बो एक होके अफसर मन ले बात करबो, त हो सकथे हालत बदल जाय. फेर इहाँ के लोगन मन मदद नइ करेंय. तंजावुर मं हालत अलग हवय – उहाँ एकता हवय अऊ सरकारी मदद घलो.

हमर मटेरियल - सफेद बेंटोनाइट, फायर क्ले- दीगर राज ले आथे. एक टन माटी के दाम 15,000 रूपिया हवय, फेर हमर पुतरी 30 रूपिया नग बिकाथे. हमन येला कइसने चलाय सकथन? रंग के दाम घलो 100 ग्राम बर 200-300 रूपिया हवय.

हमन पाँच बछर पहिली एक ठन संगठन बनायेन, फेर कोनो खास मदद नइ मिलिस. गर सरकार कच्चा माल मं सब्सिडी देवय धन कम दाम के मसीन देवय, त ये कला का बच सकथे. ये बखत, सिरिफ बड़े फेक्टरी वाले मन कमावत हवंय, छोटे मजूर बस येला करत जावत हवंय.

अतक बछर बाद घलो लोगन मन पूछ्थें, “वोला काय मिलिस?” येकर ले दुख होथे.

जब हमन सुरु करे रहेन, त आंध्र अऊ गुजरात ले बेपारी मन हमर पुतरी बिसोय बर आवत रहिन. अब, सिरिफ आयुध पूजा अऊ नवरात्रि के कोलू तिहार बखत बेंचाथे. बाकि बखत सूक्खा परे रहिथे. सिरिफ अगल विलक्कु (माटी के दीया) बेचावत रहिथे. हमन येला एक रूपिया मं बेचथन, अऊ अधिकतर मन्दिर अऊ तिहार बर उत्तर भारत मं भेजे जाथे.

हमन अपन बनाय जिनिस मन ला गोदाम मं राखथन काबर के हमन वोला जमा करे नइ सकन. दलाल मन मुनाफा कमाथें, हमन मुस्किल ले गुजारा चलथे. गर हमर करा पूंजी होतिस, त हमन तिहार के सीजन तक ले जमा करके राख सके रइतेन अऊ सीधा बेचे सकतेन.

सौ मीटर के दायरा मं, इहाँ कम से कम 10 ठन कुम्हार साल हवय. अधिकतर अलग अलग किसम के पुतरी बनाथें. कतको कारीगर अब आगल के काम करे लगे हवंय- ये पुतरी बनाय के उलट थिर अऊ सुरच्छित हवय, जिहां एको ठन गलती के मतलब पूरा नुकसान आय.

सुमति के कहिनी

मोर नांव सुमति हवय. मंय 15 बछर ले एक ठन नानकन सिरेमिक गुड़िया (पुतरी) कंपनी चलावत हवं.कभू पुतरी बिकाथे, कभू नइ बिकाय. बरसात मं कुछु घलो सूखय, काम बंद रहिथे. मंय अक्सर सोचथों के काय मोला आगू बढ़े ला चाही.

मोर बिहाव मुंबई मं होय रहिस अऊ मंय कुछू बखत सूरत मं रहेंय. मोर घरवाला दरूहा रहिस; मंय वोला छोड़के साल 2005 मं मायका आ गेंय. मंय माटी ले काम सीखे सुरु करेंय अऊ जल्दीच नानकन एक ठन अपन साल खोल लेंय. इहीच काम ले मंय अपन बेटा ला पाले पोसें – अब वो ह कालेज मं पढ़त हवय.

हमन पुतरी 25 रूपिया मं बेचथन: लेवाल वोला 100 रूपिया मं बेचथे. भाड़ा, रंग अऊ मजूरी निकारे के बाद, मुस्किल ले कुछु हाथ आते. ओकर बाद घलो, मंय ये काम छोड़े नइ सकंव- बस मोला इहीच आथे.

हमन ला सिखेइय्या कोनो नइ ये. मंय जउन घलो सीखे हवं, वो ह दूसर मन ला देख के अऊ अपन आप करके सीखे हवं.

जब बस के भाड़ा दू रूपिया घलो नइ रहिस, वो बखत मंय बूता करे बर कोस भर रेंगत जावत रहंय. पहिली मंय दिन भर मं एक ठन पुतरी बना पावत रहेंय.अब मंय वोला घंटा भर मं बना लेथों. मंय बनेच लंबा रद्दा तय करे हवं – जुच्छा हाथ काम करे बर जाय तक ले अपन गोड़ मं ठाढ़ होय तक ले.

जिनगी अब पहिली ले बढ़िया हवय, वइसे धंधा मंदा हवय. दाम बढ़गे हवंय, फेर लोगन मन अब घलो तोलमोल करथें. गर धंधा कोनो दिन बने रहेय, त हमन बढ़िया खाथन-पिथन. गर नइ, त मंय रतिहा भर अवेइय्या दिन के माटी धन बिलजी बिल के चिंता मं गुजार देथों. मंय लइका सेती जींयत हवं.

कभू-कभू मंय अपन आप ला पूछ्थों – मंय बिहाव काबर करेंय, लइका काबर जनेंय? जब वो ह पूछथे के मंय वोला बढ़िया स्कूल मं काबर नइ पढ़ायेंव, त मोला भारी पीरा होथे. ओकर बाद घलो हमर जिनगी चलत हवय – इहीच काम के सेती.

मंय इहाँ 17 बछर ले हवं. मंय काम के हरेक हिस्सा ला जनत हवं – माटी ला संकेले ले लेके वोला ढाले तक ले. मोला गरब होथे जब लोगन मन कहिथें, “माइलोगन होके घलो, तंय बढ़िया काम करे हस.” मंय इहाँ तक हबरे बर कतको लंबा रद्दा तय करे हवं, वइसे बेवसाय ह थिर नइ ये, ओकर बाद घलो ये काम मं मान-इज्जत हवय.

के. गुणशेखरन के कहिनी

मंय ये काम ला 25 बछर ले करत आवत हवं. कोविड आय तक तो कारोबार बने चलत रहिस – ओकर बाद सबू कुछु ठप्प होगे. मोर कंपनी मं आठ झिन बूता करत रहिन: अब मंय अकेल्ला करथों.

मटेरियल के खरचा जियादा हवय, मुनाफा कम. 15 कोरी (300 नग) पुतरी बनाय मं करीबन 9,000 रूपिया खरचा आथे अऊ गर सब्बो ठीक-ठाक रहे त मुस्किल ले 1,000-1,500 रूपिया के कमई होथे. गर माटी धन रंग काम नइ आइस, त पूरा नुकसान हो जाथे.

बजार घलो बदलगे हवय - अब कोनो सजावटी पुतरी नइ बिसोवय. एलईडी टीवी अऊ शोकेस होय के सेती लोगन मन वोला गुजरे जमाना के कहिथें.

हालेच मं मोर सुवारी फेफड़ा मं रोग (इनफेक्सन) सेती गुजर गे – कहिथें के ये काम ले उड़त धूर्रा सेती होय रहिस. मोर दू झिन बेटा हवंय. मंय अब निजी स्कूल के खरचा नइ उठाय सकंव. मोला कारोबार अऊ घर ला चलाय मं भारी दिक्कत होवत हवय.

धूर्रा ले एलर्जी अऊ फेफड़ा के दिक्कत हमर मन मं आम बात आय. गर सरकार ह चीनी मिट्टी के पुतरी ला वइसने बढ़ावा देवय जइसने पहिली अगल दीया ला बढ़ावा दे जावत रहिस – लोगन मन ला “विरुधाचलम मं बने माटी के पुतरी बिसोय” ला कहय, त हो सकथे हालत सुधर जाय.

हमन सरकारी योजना अऊ बैंक लोन बर अरजी देय हवन, फेर बगेर संपत्ति धन जमानत के कोनो हमर मदद नइ करय. हमन बस अपन हाथ ले बूता करत रहिथन – माटी कला के जेन थोर-बहुत हुनर बांचे हवय, वोला आगू बढ़ावत.

ये माइलोगन अऊ मरद लोगन मन बर, माटी सिरिफ कला भर नो हे: ये ह जिनगी, सुरता अऊ चुनोती आय. ये काम मं न तो थिर आमदनी हवय अऊ न वो मन के नांव जेकर वो मन हकदार हवंय, ओकर बाद घलो ये मन बनावत हवंय. जइसने- जइसने ये उदीम मं मसीन आवत हवय अऊ बजार आगू जावत हवय, ये हाथ वो जिनिस ला बनावत हवंय जेन ह टिकाऊ आय: काम के मान अऊ माटी ले जन्मे कला के अटल सुग्घरता.