माटी के प्रान, विरुदाचलम के पुतरी

जब हम माटी के पुतरी के बारे में सोचेनी, त हमरा आपन लायिकाईं मन परेला. उ दिन जब हमनी नदी के आर प घूमत रहनी औरी पोखरा से मछरी धरत रहनी. पानी के अरिया से माटी गोटिया के आपन पुतरी बनाईं. हमनी बेसी कर के ऊहे बनाई जौन अपना लगे, अपना अगल-बगल के दुनिया रहे. माने खेत में देखल बैल, टेक्टर औरी पुतरी.

बाद में, जब हम एलिल अन्ना (बड़का भईया) के साथे घूमे लगनी त इ औरी पक्का हो गईल. उ बहुत ढेर माटी के पुतरी औरी मुखौटा बनावस. जब लईकन के पढावस त तरह-तरह के रूप गढ़स. उनका के देख के हम सोचीं कि का सांचों माटी से हेतना कुछ बन सकेला?

इ अचम्भा तब औरी बढ़ गईल जब हमनी के टोली माटी के समर्पित संस्था, कलिमन विरलगल (तमिल में माटी के अंगूरी) बनवलस. हमनी जहां-जहां लईकन खातिर कार्यशाला करीं, ओही गांव के माटी के इस्तेमाल करीं. ईंहें से हमार असली खोज सुरु भइल- माटी के, ओकरा में लुकाइल कथा-कहानी के.

कुछ साल पहिले एलिल अन्ना हमारा के विरुदाचलम में एगो सिरेमिक फैक्ट्री में सुगुना अक्का से भईल भेंट के बारे में बतवलन. जहां कुछ मेहरारू लोग मिल के सिरेमिक के कारखाना चलावेला. उनकर कहानी सुन के हम पक्का कईनी कि हमरा ओ लोग से भेंट करे के चाहीं. ओ सब के पुतरी देखे के चाहीं.

पीपुल्स आर्काईव औफ़ रूरल इंडिया (पारी) से जुड़ला के बाद हमरा इ बुझाइल कि इ एगो अइसन कहानी बा जौना के सबसे कहल जरूरी बा. हम अरियालपुर के अनीता लायब्रेरी में एगो कार्यशाला करे गईनी. एकर नाम उ लईकी के नाम प धयिल बा जौन नीट (एनईईटी-1) कईला के बाद आत्महत्या क लेहलस. त आखिरकार हमार भेंट सुगुना से भइल. हमनी कई बेर औरियो भेंट कईनी. औरी आखिर में हम उनका काम के दस्तावेज बनावे उनका गांवहूं गईनी.

इ जगह चीनी मिटटी के चीज खातिर जानल जाला. पहिले लोग सरकारी मदद से कार करत रहे. बाकिर अब ऊ बेरा नईखे रह गइल. जइसहीं भीतर गईनी, पांत से घर देखनी जहां चीनी मिटटी के गुड़िया देखावल औरी बेचल जात रहे. अब इ धंधा कमजोर हो गईल बा एसे अब टटका गढ़ल औरी सूखे के धयिल माटी के दीया हर जगह लउकेला. विरुदाचलम औरी ओकरा लगे के गांव में हर ओर, गली दुआर प माटी के मूरति औरी दीया लउकेला.

पूरा गांव जागता, बुझात रहे. सामान ढोआत रहे, ट्रकन में लदात रहे औरी दूसर कस्बा में भेजल जात रहे. दूर-दूर से बैपारी थोक में गुडिया कीने आइल रहे. जब हम भीतर ढूकनी त इहे नजारा रहे

एगो छोट मडइ में सुगुना अक्का अपना दुलहा के साथे आपन पुतरी बनावत रहली. उ एगो हसलोन औरी खूब बतियावे वाली महिला हई. उनकर कहानी एक जगह से सुरु हो के दुसरा जगह खतम होला. बाकिर जब उनकरा लगे बईठम त रउआ बुझाई कि उनकर जिनगी केतना भरल-पूरल बा. उनकर कहानी केतना भरल-भरल बा.

सुगुना के कहानी

वणक्कम! हमार नाम सुगुना ह. हम 2008 से इ कार करतानी. बहुत लायिकाई में हमार माई-बाप ख़तम हो गईल.

बाप के मरला के बाद, हमार माई लगे के एगो पुतरी बनावे वाला फैक्ट्री में कार करे जास. उ गुडिया घरहूं ले आवस. औरी तब्बे हमरा ओमे पहिला बेर मन लागल. चार बरीस के उमीर में हमरा स्कूल से बेसी पुतरी में मन लागे. हम ईहे सोचीं कि कईसे बनेला? कौन चीज से बनेला?

जब हमार माई के मिरतु भईल त हमार ईया (दादी) कहली, “अब तू औरी स्कूल ना सकबू. हम तहरा के औरी नईखी देखभाल कर सकत.” उ हमरा के हमरा बहीन के साथे ओही फैक्ट्री में कार करे के भेजली. ओ बेरा हमार उमीर 10 साल रहे.

पहीले त हमरा खाली माटी मिलावे औरी छाने के ही अगेया रहे- गुडिया के छूए के ना. बाकिर दू साल बाद हम माटी के सांचा में ढाले के सुरु कईनी. धीरे-धीरे हम ढलाइयो सीख लहनी. बाकिर बाद में हमरा औरी नीमन सीखे के मन हयिल, तब हम इ कला के सीखे के फैसला कईनी.

हमरा सीखे में चार साल लाग गयील. हम 14 साल के उमीर में सुरुआत कईले रहनी औरी ओ बेरा 75 रोपया रोज कमाई. कलाकार लोग 100 रोपया पावे. औरी जब हमहू ऊहे मंगनी त ऊ लोग कहल “तू अभी जवान बाडू.” एहीसे हम नौकरी छोड़ दहनी.

बाद में, हम ठीका प कार कईल सुरु कयीनी. लमसम 10 गो कंपनी हमरा के इ कला के ऑर्डर दहलस. तब बुझाइल कि जे हमनी आपन गुन के निखारत रहीं, तब हमनी के कारे हमनी के आगू बढ़ाई.

धीरे-धीरे लोग हमारा के माने लागल. ओ घरी खाली कलाकारे लोग मेज प बईठ सकत रहे, बाक़ी लोग भुईयां बईठे. बाकिर अब ऊहे लोग जे कब्बो हमारा के ना माने, बोलावे लागल. हमार नाक, आंख, ओठ के मेही कार दूसर लोग से हमरा के फरके करत रहे.

बाकिर कुछ लोग एकदम ना सहाए. जे तरे ऊ लोग एगो मेहरारू के ताके, जे तरे ऊ लोग एगो मेहरारू प हंसे, हम मना क दहनी ओहीजा जायेके. भले ऊ लोग केतनो मजूरी देत होखे.

अइसने एगो फैक्ट्री में हमार भेंट हमरा दुलहा से भईल. ऊ बिदेस जाए के चाहत रहलन. बाकिर हम उनका से कहनी कि “जे हमनी के बियाह करतानी, त रउआ एहीजा रह के इ कंपनी के साथे-साथे चलावे के होई.” बस ईहे हमार सर्त रहे.

हम ई कार के काहे पसंद करेनी? सायद एसे कि ई माटी के ह- हम एकरा के अकार देनी, एहमे जान फून्केनी. औरी जब लोग एकर बड़ाई करेला तब इहे खुसी हमारा के औरी आगे करे के ताकत देला.

इ इलाका में बस दुईये-तीन गो मेहरारू लोग माटी के कार करेला. हम अकेले बानी जे पूरा तरह से कलाकृति बनावेनी. इंहा के पहिला महिला माटी के कलाकार. हमार सपना बा कि हम आपन एगो ब्रांड बनाई, आपन अलगे ढंग के पुतरी.

एक बेर एगो खूब नामी पुरुष कलाकार हमरा से कहलन, “इ लड़की लोग के कार ना ह. जे तहार गाड़ी खराब हो गईल त का होई? के ओकरा के ठेली?” तब हम आपन गाड़ी कीननी. अकेलाही जात्रा कयीनी. ऑर्डर लहनी औरी अपनहीं आपन कार पूरा कयीनी. ओ बेरा हमार उमीर 16 चाहे 17 साल रहल होई.

लोग हमरा के हंसे, “तूऊ लईकी बाडू, इ कार हमेसा क सकेलू?” एकरा से हम औरी बरियार हो गईनी. हम औरी बड़हन मूरति बनावे लगानी- जेकरा बारे में लोग कहे कि मेहरारू नईखे बना सकत.

लोग हमारा के घमंडी कहे. कहे कि हम गरब में रहेनी. बाकिर हमार ई रूप हमार रच्छा कईलस. केहू के हमरा से खराब से बोले-बतियावे के हिम्मत ना होखे.

सुरुआत कईले रहनी तब बुझाइल कि इ कला कई पुस्त ले चली. बाकिर आज ई खतरा में बा. गुजरात औरी करैकल जइसन जगह में मशीन कुल इ पुतरी बनावता. हमनी जइसन छोटहन बनावेवाला एकर मुकाबिला नईखे कर सकत.

अपना इलाको में बहुत कम साथ-सहयोग मिलेला. लोग कहेला, “इ कुम्हार, इ कुरावर के बनावल पुतरी के कीनी?” धीरे-धीरे, अपनही कार से पलट गईल बा लोग.

अब, मामूली माटी के कार चलेला- जल्दी से सांचा में ढालल, सुखवाल औरी सस्ता में रंगल कार. बाकिर असली सिरामिक के कार अलगे होला- एकरा खातिर समय, देखभाल, औरी गुन के जरूरत होला. इतना मेहनत के बादो, कीने वाला भेंटायिल मस्किल बा.

कुछ लोग बाउर कार क के इ कला के नाम खराब क देले बा. कब्बो-कब्बो त हम सोचेनी कि का अब इ कला पूरा तरे से बिला जाई.

नीमन माटी, पनरुति माटी, अब हमनी लगे मस्किले से पहुंचेला. सबसे नीमन माटी बिदेस भेज देवल जाला. हमनी के बांचल माटी मिलेला. एक टन माटी के दाम 3,000-4,000 रोपया होला. जौना माटी के जरूरत हमनी के फेंटे ला होला ओकर दाम 10,000 रोपया ले होला. 200 गुडिया प मिले वाला 5,000 रोपया से, लागत के बाद हमनी असली आय मस्किल से 1,000 रोपया रह जाला.

हमनी माटी किनेनी, ओकरा में बेन्टोनाईट, सोडा, सिलिका के साथे फेंटेनी. एसे मजबूती औरी चमक बढ़ जाला. खाली अकेले माटी एतना ना टिकी.

हमार माई-बाप बहुत जल्दी चल गयील लोग. इया हमरा के पोसली. इ कार हमरा के आसरा दहलस, छांव दहलस- भले कड़ा घाम में बहुत मेहनत परल, उ कहली.

हम लगहीं बियाह कईनी कि हम आपन कंपनी सुरु क सकीं. अब तीन साल हो गयील. हम तीन बरीस के रहनी त हमार बाप चल गईलन. छव बरीस में माई चल गईली. हमार बहिन दूर चल गईलीं कुल. बाकिर हम उहें रहनी काहे से कि हमरा चीनी मिटटी के बर्तन बहुत पसंद बा. इहे हमरा के ऊ बनवलस जौन आज हम बानी.

बाकिर समय बदल गईल बा. कच्चा माल महंग बा. खाली धनिके लोग नीमन माटी थोक में कीन सकेला. ईंहां औरतन से अब्बो घरहीं रहे के उम्मीद कईल जाला. उ कहेली, जे हमार डिजाईन नीमन चल गईल, त सब ओ लोग के भाग में बा. जे ना चलल त ऊ लोग एकरा के हमरा बदकिस्मती पर थोप दी. एहीसे अब हम आपन मॉडल अपना लगे राखेनी.

हमार बनावल सब 40 गो मॉडल हमरा लगे बा. बहरा एकर दाम 5,000 रोपया होला. इंहां हम कम दाम में बेचेनी त लोग सोचेला, “जे इ एहीजा के ह त, घटीये होई.”

सब पुतरियन में मुरुगर के मूरति गढ़ल सबसे नीमन लागेला- गहना, मुकुट, मेहराब- इ सब बनावल हमरा बहुत नीमन लागेला.

लगे के सरकारी भट्ठी खुलल नईखे. एहीसे हमनी निजी भट्ठी के इस्तेमाल करेनी जौन 20-25 रोपया किलो पर ले लेला. सरकारी दाम 17-18 रोपया किलो बा. जे हमनी सब केहू एक हो के अधिकारी लोग से बतियाईं, त स्थिति बदल सकेला. बाकिर ईहां लोग साथ ना देला. तंजावुर में बात दोसर बा. उंहा लोग में एका बा औरी सरकार के सहयोगो बा.

हमनी के सामान- बेंटोनाईट, फायर क्ले सब दूसर राज्य से आवेला. एक टन नीमन माटी के दाम 15,000 रोपया बा. हमनी के पुतरी 30 रोपया एगो बिकाला. हमनी एकरा के कैसे सहीं? रंग कुली के दाम 200-300 रोपया 100 ग्राम बा.

हमनी पांच साल पहिले एगो एसोसियेशन सुरु कईले रहनी, बाकिर कौनो खास मदद न मिलल. सरकार कच्चा माल प सब्सिडी दे, चाहे कम दाम प मशीन दे, त इ कला बांच सकेला. एबेरा त बड़का उद्द्योग मोनाफा कमाता, छोटका मजूर लोग खाली काम के पहिया बनल बा.

एतना साल के बादो लोग हमरा बारे में पूछेला, “ओकरा का मिलल?” इ बात करेजा में लागेला.

जब सुरुआत कईले रहनी, आंध्र औरी गुजरात के बैपारी हमनी के पुतरी कीने आवे. अब, बिक्री खाली आयुध पूजा औरी नवरात्री के कोलू तेवहार के बेरा होला. बाक़ी साल सूखले रहेला. खाली अगल विलक्कु (माटी के दीया) लगातार बनत रहेला. हमनी एकरा एक रोपया में बेचेनी. इ बेसी कर के मंदिर औरी तेवहार खातिर उतर भारत में जाला.

हमनी आपन माल गोदाम में रखेनी. काहे से कि हमनी ओकरा के जमा नईखी क सकत. बिचौलिया लोग मोनाफा कमाला. हमनी मस्किल से गुजारा करेनी. जे हमनी लगे पूंजी होईत त हमनी तेवहार के बेरा ले आपन माल रखती औरी सीधे बेचतीं.

सौ मीटर के भीतरी, इंहां कम से कम 10 गो कार्यशाला बा. अधिकांश लोग तरह-तरह के गुडिया बनावेला. बाक़ी लोग दीया बनावेला. कइएक कलाकार लोग अब अगल के कार करेला- इ एगो स्थिर औरी सुरक्षित कार बा, पुतरी बनवला से. जहां एगो गलती के मतलब बा कि पूरा नोकसान. हमनियो अब आगे साल ईंहा जाए के सोचतानी.

सुमति के कहानी

हमार नाम सुमति ह. हम 15 साल से एगो छोट सिरेमिक गुडिया कंपनी चलावतानी. कब्बो गुडिया बिकाला कब्बो ना. बरखा में कुछु ना सूखेला, काम रुक जाला. हम अक्सर सोचेनी कि का हमरा अब आगे बढ़ जाए के चाहीं,

हमर बियाह मुम्बई में भईल रहे. कुछ दिन हम सूरत में रहनी. हमार मरद सराब के सौकीन रहलन. हम उनका के छोड़ के 2005 में घरे चल अयिनी. हम सिरेमिक बनावे के सिखल सुरु कईनी औरी जल्दिये एगो छोट कार्यशाला खोल लहनी. एही कार से हम अपना बेटा के पोसनी- उ अब कॉलेज में बा.

हमनी पुतरी 25 रोपया में बेचेनी, किननिहार एकरा के 100 रोपया में बेचेला. किराया, रंग, औरी मजूरी चुकवला के बाद मस्किल से कुच्छो बांचेला. तब्बो, इ कार हम नईखी छोड़ सकत- बस इहे हमरा आवेला.

हमनी के सिखावे वाला केहू नईखे. हम जौन सिखनी, दुसरा के देख के सीखनी औरी अकेले में प्रयोग क के सीखनी.

जब बस के किराया दू रोपया ना होखे, तब हम काम प तीन किलोमीटर पैदल चल के जाईं. पहिले हम रोज एगो पुतरी बनाईं. अब ओकरा के एक घंटा में बना लेनी. हम बहुत लमहर चल आइल बानी. काम पर खाली हाथ जाए से लेके अपना गोड प खड़ियाये ले.

जिनगी अब पहिले से नीमन बा. हालाकि धंधा मंदा बा. कीमत बढ़ गईल बा, बाकिर किननिहार अब्बो मोलभाव करेला. जे कौनो दिन धंधा नीमन रहल त हमनी नीमन खाए-पियेनी. जे ना, त हम रात भर अगिला दिन के माटी, बिजली बिल के फिकिर में रहेनी. हमार लईका हमरा के जिन्दा रखले बा.

कब्बो-कब्बो हम अपने से पूछेनी- हम बियाह काहे कईनी? हम लईका काहे कईनी? जब ऊ पूछेला कि हम ओकरा के नीमन स्कूल में काहे ना भेजनी, त हमरा बहुत तकलीफ होला. तब्बो हमनी जिन्दा बानी, एही काम चलते.

हम इंहां 17 साल से बानी. हम हर फान जानतानी. माटी बटोरे से ले के ओकरा के ढाले ले. हमरा मान होला जब लोग कहेला, “एगो मेहरारू भईला के बादो तू बहुत नीमन कार कईले बाडू.” हम इंहां ले आवे खातिर बहुत लमहर रास्ता चलल बानी. अइसे त बैपार अनिस्चित्त बा, तब्बो इ कार में परतिष्ठा बा.

के. गुणशेखरन के कहानी

हम इ जगह में 25 साल से बानी. कोविड आवे से पहिले त सब ठीक चलत रहे, ओकरा बाद सब ठप्प हो गईल. हम कब्बो आठ गो कर्मचारी वाला कंपनी चलावत रहनी. अब अकेले कार करेनी.

सामान के लागत बेसी बा, मोनाफा कम. 300 गुड़िया प हम 9,000 रोपया खर्चा करेनी. जे सब ठीक रहल त मस्किल से 1,000-1,500 रोपया के मोनाफा होला. जे माटी आ रंग कार ना कईलस त पूरा के पूरा नोकसान हो जाला.

बजारो अब बदल गईल बा. अब केहू सजावे खातिर पुतरी ना कीनेला. एलइडी टीवी आवे औरी शोकेस घटे चलते लोग एकरा पुरान फैशन बतावेला.

फेफड़ा में छूत चलते कुछ दिन पहिले हमरा जनानी के मिरतु हो गईल. लोग कहेला कि इहे कार में उड़त धूरा के चलते इ भईल. हमार दू गो बेटा बा. हम प्राइवेट स्कूल के खर्चा नइखी उठा सकत. हमारा बैपार औरी परिवार चलावे में मस्किल होता.

धूरा से एलर्जी औरी फेफड़ा के समस्या हमनी के बीच में एकदम सामान्य बात बा. जे सरकार चीनी माटी के पुतरी के ओही तरे बढ़ावा दे, जे तरे अगल दीया के दहलस- लोग से “विरुदाचलम के बनल माटी के पुतरी कीने” के कहे त सायद बात बने.

हमनी सरकारी योजना औरी बैंक से कर्जा खातिर आवेदन कईनी. बाकिर बिना संपत्ति, चाहे जमानत के, केहू मदद ना करे. इ कला के जौन तनी-मनी टुक्का-टाकी बांचल बा, हमनी ओही के संभारत अपना हाथ से कार करत रहेनी.

इ महिला औरी मरद लोग खातिर माटी खाली एगो कला नईखे – इ बीतल बखत के इयाद ह, जिनगी ह, चुनौती ह. इ कार ना त स्थिर आय ले आवेला, ना उ जस देला जौना के संचहूं हकदार बा. तब्बो एकरा के करे वाला लोग बनल रहता. जईसे-जईसे उद्योग मशीन के ओर घूम रहल बा, बजार आगे बढ़ रहल बा. इ हाथ ऊ चीज के अकार दे रहल बा जौन टिकाऊ बा, कार के परतिष्ठा औरी माटी से जनमल कला के स्थिर सुंदरता.