منہ میں گھل جانے والا اُپلا گڑھ کا مکھن

’’بجلی کی مشینیں ان روایتی تکنیکوں کو ختم کر دیں گی،‘‘ رائلی بائی کی آواز دہی کو متھتے ہوئے ہانڈی میں اٹھتی چھپک چھپک کی آوازوں کے درمیان ابھرتی ہے۔ وہ نیترا – ایک موٹی سوتی رسی، جس کے دونوں سروں پر پکڑنے کے لیے ہتھّے بنے ہیں – کو کھینچتے ہوئے دہی متھ رہی ہیں۔ پیچھے پہاڑی پر پرندوں کی چہچہاہٹ سنائی دے رہی ہے۔

راجستھان کے سروہی ضلع کے اُپلا گڑھ گاؤں میں اس وقت صبح کے تقریباً ساڑھے پانچ بجے ہیں۔ یہ گاؤں گجرات کی سرحد کے پاس واقع ہے۔ یہ علاقہ پہاڑی ہے اور گاؤں کی کنکریٹ کی بنی گلیاں اوپر نیچے جاتی ہیں، جس سے موٹر سائیکل، جو یہاں آمد و رفت کا سب سے عام ذریعہ ہے – چلانا تھوڑا مشکل ہو جاتا ہے۔ نیچے چھت والے کچھ پکّے اور کچھ کچّے گھر گلیوں کے دونوں جانب ایک قطار میں دکھائی دے رہے ہیں۔ رائلی بائی کا دو کمرے، ایک باورچی خانہ اور ایک برآمدے والا پکّا گھر بھی ایسا ہی ہے۔ لیکن ان کا گھر بستی کے اندر نہیں ہے، بلکہ ایک چھوٹی پہاڑی یا مگرا پر ہے، اور یہاں تک صرف پیدل ہی پہنچا جا سکتا ہے۔

رائلی بائی کی طرح ہی گاؤں کے زیادہ تر لوگوں کا تعلق گراسیا برادری سے ہے، جسے ریاست میں درج فہرست قبیلہ کا درجہ ملا ہوا ہے۔ چالیس سال سے زیادہ کی عمر کی رائلی بائی کبھی اسکول نہیں گئیں۔ یہاں کے لیے یہ غیر معمولی بات نہیں ہے۔ سال ۲۰۱۱ کی مردم شماری کے مطابق، اُپلا گڑھ میں صرف ۱۰ فیصد خواتین اور ۲۷ فیصد مرد خواندہ ہیں۔

رائلی بائی کا دن گایوں کے دودھ نکالنے کے ساتھ شروع ہوتا ہے۔ فیملی کی چار دیسی (مقامی نسل کی) گایوں میں سے اس وقت صرف دو ہی دودھ دیتی ہیں۔ دن میں دو بار دودھ نکالا جاتا ہے، اور ہر گائے ایک بار میں ایک سے ڈیڑھ لیٹر دودھ دیتی ہے۔ یہ دودھ پوری فیملی اپنے استعمال کے لیے رکھتی ہے۔

گایوں کو دوہنے کے بعد، رائلی بائی انہیں چرنے کے لیے بھیج دیتی ہیں اور مکھن بنانے، اور فیملی کے لیے کھانا پکانے کے کاموں میں مصروف ہو جاتی ہیں۔ کبھی کبھی ان کے شوہر، ساوا رام بھی ان کی مدد کرتے ہیں۔ گھریلو کاموں کے علاوہ، رائلی بائی فیملی کی تقریباً تین بیگھہ (تقریباً ۴ء۱ ایکڑ) زمین پر کھیتی کرتی ہیں، جہاں وہ اپنے استعمال کے لیے سیڑھی دار کھیتوں میں فصل اُگاتے ہیں۔

سونے سے پہلے وہ جو آخری کام کرتی ہیں – وہ ہے اگلے دن مکھن نکالنے کے لیے دہی جمانا۔

’’بجلی کی مشین سے بنا مکھن یا گھی اُتنا ذائقہ دار نہیں ہوتا،‘‘ دائیں اور پھر بائیں ہاتھ سے رسی کو باری باری کھینچتے ہوئے رائلی بائی کہتی ہیں۔ وہ دو تین دن کا جما ہوا دہی اکٹھا کر کے مکھن بناتی ہیں۔ ’’اس سے وقت اور محنت دونوں کی بچت ہوتی ہے،‘‘ وہ بتاتی ہیں۔

کام شروع کرنے سے پہلے وہ اس جگہ کو صاف کرتی ہیں، جہاں مکھن بنایا جائے گا۔ پھر، سوتی بوری بچھاتی ہیں اور اُس پر ’دیگچا‘ رکھتی ہیں۔ زمین میں ایک دھات کا کھمبا گڑا ہوتا ہے، جو باقی چیزوں کے برعکس، پائیدار ہوتا ہے۔

وہ تین دن کا جما ہوا دہی بڑے برتن میں انڈیلتی ہیں۔ پھر ’راوی‘، جو ایک لمبا بانس کا ڈنڈا ہوتا ہے، جس کے سرے پر تین کانٹوں والی متھنی کی بنیاد ہوتا ہے، لے کر آتی ہیں۔ دو رسیوں سے راوی اور کھمبے کو جوڑتی ہیں۔ راوی کا نچلا سرا برتن میں جاتا ہے اور دوسرا سرا گھمایا جاتا ہے، جس سے دہی متھا جاتا ہے۔

جس صبح پاری کی ٹیم وہاں تھی، رائلی بائی نے پانچ منٹ میں سارا سامان جمع کر لیا۔ پھر رسی کو کھمبے کے چاروں طرف لپیٹا اور کھڑی ہو کر سلسلہ وار طریقے سے کھینچنا شروع کیا۔ تقریباً ۳۰ منٹ میں مکھن اوپر آ کر چھاچھ سے الگ ہو گیا۔

وہ بتاتی ہیں، ’’کتنا وقت لگے گا یہ دہی کی مقدار پر منحصر ہے۔ تین دن کا تقریباً ۵-۶ کلو دہی ہو، تو آدھے گھنٹہ میں مکھن تیار ہو جاتا ہے۔‘‘ جب مکھن الگ ہو جاتا ہے، تب وہ ہاتھ دھو کر اسے نکالتی ہیں۔ یہ مکھن سبزیوں اور روٹیوں میں ڈالا جائے گا، اور کچھ حصہ گھی بنانے کے لیے رکھ دیا جائے گا۔

نہ تو رائلی بائی اور نہ ہی گاؤں کے دوسرے لوگ اپنی دودھ کی پیداوار یا کھیتی کی کوئی پیداوار بیچتے ہیں۔ اس علاقہ میں دودھ ۳۵ روپے لیٹر فروخت ہوتا ہے، اور دیسی گھی ۱۰۰۰ روپے کلو – جو دس سال پہلے کی قیمت ۳۰۰ روپے فی کلو سے تین گنا سے بھی زیادہ ہے۔ لوگ گھر کے بنے گھی کے لیے زیادہ قیمت دینے کو تیار ہیں، لیکن گاؤں میں بیچنے جیسا کوئی انتظام نہیں ہے، اس لیے صرف ذاتی فرمائش پر ہی کوئی بیچتا ہے۔

گاؤں کے زیادہ تر لوگوں کے پاس دو تین بیگھہ زمین ہوتی ہے، اور کچھ لوگ گائیں، بکریاں، مرغیاں پالتے ہیں۔ اتر پردیش کے بعد، ۶۸ء۵ کروڑ مویشیوں کے ساتھ راجستھان مویشیوں کی تعداد کے لحاظ سے دوسری سب سے بڑی ریاست ہے۔ کچھ لوگ پاس کے آبو روڈ قصبہ میں مزدوری بھی کرتے ہیں، جو تقریباً ۱۳ کلومیٹر دور ہے۔

رائلی بائی کے شوہر، ساوا رام نے نویں کلاس تک پڑھائی کی ہے اور گزشتہ ۲۵ سال سے غیر سرکاری تنظیم ’جن چیتنا‘ کے لیے بطور فیلڈ ورکر کام کرتے ہیں۔ ان کی ماہانہ آمدنی ۱۲ ہزار روپے ہے۔ وہ صبح ۱۰ بجے گھر سے نکلتے ہیں اور شام کو ۶-۷ بجے تک لوٹتے ہیں۔

ان کا سب سے بڑا بیٹا، سنی لال کسان ہے۔ وہ شادی شدہ ہے اور پاس کے گاؤں میں رہتا ہے۔ ساوا رام چاہتے ہیں کہ ان کے دو چھوٹے بچے – کملا اور روشن لال کالج جائیں اور سرکاری نوکری کریں۔ ’’میں تب سب سے زیادہ خوش ہوؤں گا، جب وہ کالج سے ڈگری پوری کر کے اچھے سرکاری عہدوں پر پہنچیں،‘‘ ساوا رام کہتے ہیں۔

اُپلا گڑھ میں اسکول صرف مڈل تک ہی ہے، اس لیے ۱۷ سالہ کملا اور ۱۶ سالہ روشن لال نے سروہی ضلع کے ہی ایک گاؤں کے سرکاری سینئر سیکنڈری اسکول میں داخلہ لیا ہوا ہے۔ وہ ہاسٹل میں رہتے ہیں۔ لیکن یہ مئی کا مہینہ ہے، اس لیے دونوں گرمیوں کی چھٹیوں میں گھر آئے ہوئے ہیں، اور ان کی ماں انہیں لے کر کافی مصروف ہیں۔ جن کھانوں سے وہ انہیں خوش کرنے والی ہیں، ان میں سے ایک گھر کے بنے گھی میں پکایا ہوا میٹھا حلوہ ہے۔

رائلی بائی نے مکھن بنانا اپنی ماں اور دادی کو دیکھ کر سیکھا تھا، اور اب ان کے بچے انہیں دیکھ کر سیکھ رہے ہیں۔ کھمبا-راوی-بدنا-نیترا ان کے گھر میں فخر کی علامت ہیں، کیوں کہ یہ اس بات کی نشانی ہیں کہ فیملی کے پاس دودھ دینے والی گائیں ہیں۔ لیکن اب، جب بجلی سے چلنے والی متھنی سبھی جگہ دستیاب ہے تو شاید بہت جلد یہ روایتی اوزار صرف دیہی میوزیم میں ہی دکھائی دیں۔

ترجمہ نگار: قمر صدیقی