मुंह मं डारतेच घुल जाथे उपलागढ़ के लेवना

“बिजली के मसीन मन ये पारंपरिक तरीका ला खतम कर दिहीं.” रायली बाई के आवाज दही के गंजी मं लेवना के आवाज के संग आथे, जब वो ह नेतरा (दूनों मुड़ी मं हैंडल वाले मोठ सूती रस्सी) ले दही मथत हवय. पाछू डोंगरी के नजारा हवय, चिरई–चिरगुन मन के चहचहाय सुने मं आवत हवय.

गुजरात के सरहदी तीर, राजस्थान के सिरोही जिला के उपलागढ़ गाँव मं, बिहनिया के करीबन साढ़े पांच बजे के बखत आय. ये इलाका पहाड़ी आय अऊ गाँव जे पक्का रोड मन खंचवा-डिपरा हवंय, जेकर ले लोगन मन के आय-जाय के पसंद के साधन फटफटी चलाय मं दिक्कत हो जाथे. रोड के किनारा मं कुछेक पक्का अऊ कच्चा, कम ऊँच वाले छत/ छानी के घर हवंय. रायली बाई के पक्का घर जइसने, अधिकतर घर मन मं दू खोली, एक रसोई अऊ एक परछी हवय. वइसे, ओकर घर में गाँव मं नइ ये, वो ह एक ठन पहाड़ी धन मगरा उपर हवय, अऊ इहाँ आखिर मं सिरिफ रेंगत जाये जाय सकथे.

रायली बाई जइसने अधिकतर गाँव वाले गरासिया समाज ले हवंय, जेन ला सरकार ह अनुसूचित जनजाति के रूप मं सूचीबद्ध करे गे हवय. ये बखत चालीस के उमर पर कर चुके रायली बाई कभू स्कूल नइ गीस. ये ह बड़े बात नो हे -उपलागढ़ मं सिरिफ 10 फीसदी माइलोगन मन अऊ 27 फीसदी मरद लोगन मन साक्षर हवंय (जनगणना 2011).

रायली बाई के दिन अपन गाय मन ला दुहे के संग सुरु होथे. घर मं चार ठन देसी गाय हवंय, ये बखत दू ठन दूध देवत हवंय. दिन मं दू बेर गाय मन ला दुहथे, एक ठन गाय एक बेर मं 1 ले 1.5 लीटर दूध देथे. दूध/गोरस घर बर बउरे जाथे.

दुहे के बाद गाय मन ला वो ह वो मन ला चरे बर छोड़ देथे अऊ लेवना निकारे अऊ रांधे मं लाग जाथे. ओकर घरवाला, सवा राम कभू कभू हाथ बंटाथे. घर के बूता के छोड़, रायली बाई घर के तीन बीघा (करीबन 1.4 एकड़) खेत मं घलो बूता करते, जेन मं वो मन अपन खाय बर सीढ़ीनुमा खेती करथें.

सुते के पहिली ओकर जेन आखिरी बूता रहिथे वो आय लेवना बर दही जमाय.

“बिजली ले मशीन ले बने लेवना धन घीव के सुवाद येकर ले बढ़िया नइ होवय,” वो ह कहिथे, अऊ रस्सी ला चलावत मथे लगथे. रेली बाई लेवना बनाय बर दू-तीन दिन मं दही जमाथे. वो ह कहिथे, “येकर ले मोर बखत अऊ मिहनत दूनों बचथे.”

काम सुरु करे के पहिली वो ह जगा ला झाड़ बुहार लेथे जिहां लेवना बनाही, ओकर बाद सूती कपड़ा दसाथे अऊ ओकर उपर एक ठन देगचा (बड़े गंजी) राख देथे. उहाँ भूंइय्या मं लोहा के एक ठन खंबा गड़े हवय. दूसर अऊजार जइसने, ये खंबा नइ टलमलाय, थिर रहिथे.

रायली बाई तीन दिन तक ले जमाय दही ला एक ठन बड़े बरतन मं राखथे. ओकर बाद वो ह रावी लाथे -बांस के बड़े अकन डंडा जेकर मूल मं मथनी टिके रहिथे, अऊ मथनी मं तीन ठन काँटा होथे. दू ठन रस्सी ला डंडा ले जोड़े जाथे. रावी के डंडा के आधार बरतन मं जाथे, फेर दूसर डंडा ला घुमाके दही मथे जाथे.

जउन दिन बिहनिया पारी जाय रहिस, रायली बाई ला अपन सामान मन ला लगाय मं पांच मिनट लाग जाथे. ओकर बाद वो ह रस्सी ले खंभा के चरों डहर गुरमेटथे अऊ ठाढ़ होके एक सुर मं तीरे लागथे. करीबन आधा घंटा मं लेवना उफलके छाछ (मही) ले अलग हो जाथे.

वो ह बताथे के दही जमे मं लगेइय्या बखत ह कतक दही हवय येकर उपर रहिथे, “ तीन दिन के दही, जेन ह करीबन 5-6 किलो होथे, जमे मं आधा घंटा लागथे.” लेवना निकरे के बाद, रायली बाई अपन हाथ धोथे अऊ वोला हेरथे. एक कनी लेवना अपन साग अऊ रोटी मं डारथे, अऊ कुछु ला घीव बनाय बर अलग राख देथे.

न तो रायली बाई अऊ न गाँव के आने लोगन मन अपन खेती धन गोरस के जिनिस बेचथें. ये इलाका मं गोरस बजार मं 35 रूपिया लीटर अऊ देसी घीव 1,000 रूपिया किलो बिकथे –जेन ह 10 बछर पहिली 300 रूपिया किलो के बनिस्बत तीन गुना जियादा हवय. लोगन मन घर के बने घीव बर जियादा पइसा देय बर तियार हवंय. वइसे, अइसने कोनो बेवस्था नइ ये जेकर जरिया ले गाँव के लोगन मन बेचे सकंय, ते पायके वो मन तभेच बेचथे जब कोनो आके मांगथे.

अधिकतर गाँव के लोगन मन करा दू-तीन बीघा जमीन हवय, अऊ वो मं गाय, छेरी अऊ कुकरी पालथें –उत्तर प्रदेश के बाद राजस्थान मं सबले जियादा पशुधन हवंय, जेकर संख्या 5.68 करोड़ हवय. कुछेक गाँव वाले 4 कोस दूरिहा आबू रोड कस्बा मं रोजी मजूरी घलो करथें.

रायली बाई के घरवाला, सावा राम, नौवीं क्लास तक पढ़े हवय अऊ बीते 25 बछर ले जनचेतना नांव के एक ठन गैर-सरकारी संगठन मं क्षेत्रीय कार्यकर्ता हवय; ओकर महीना के कमई 12,000 रूपिया हवय. वो ह बिहनिया करीबन 10 बजे घर ले निकरथे अऊ संझा 6 धन 7 बजे लहुट के आथे.

ये जोड़ा के सबले बड़े बेटा सुनीललाल किसान आय. ओकर बिहाव होगे हवय अऊ लकठा के एक ठन गाँव मं रहिथे. सावा राम के साध हवय के ओकर दूनों छोटे बेटा कमला अऊ रोशनलाल, कॉलेज जाएँ अऊ आगू चलके सरकारी नौकरी करेंय. सावा राम कहिथे, “डिग्री मिले के बाद वो मन का कॉलेज अऊ बढ़िया सरकारी पद मं देख के मोला सबले जियादा खुसी होही.”

उपलागढ़ के स्कूल माध्यमिक स्तर तक के आय, ते पायके 17 बछर के कमला अऊ 16 बछर के रोशनलाल ह सिरोही जिला के तीर के एक ठन गाँव, ओर के सरकारी सीनियर सेकेंडरी स्कूल मं दाखिला लेय हवंय. वो मन हॉस्टल मं रहिथें. मई (बइसाख) के महीना हवय अऊ दूनों घाम के छुट्टी मं घर आय हवंय, अऊ वो मन के महतारी ह ओकर मन के भारी ख्याल राखत हवय. वो ह वो मन ला घर के बने घीव मं बनाय मीठा हलवा खवाय ला सोचत हवय.

रायली बाई ह अपन दाई अऊ नानी ला देख के लेवना निकारे सीखे रहिस अऊ ओकर लइका मं घलो वोला देख के सीखे हवंय. खंबा-रावी-बदना-नेतरा घर मं गरब के जिनिस आय काबर के ये ह येकर चिन्हारी आये के परिवार मं दुधारू गाय हवंय. फेर अब जब बिजली वाले मथनी सब्बो जगा आगे हवय, त सायदेच कोनो ये पारंपरिक जिनिस मन गाँव-घर मं देखे बर मिलही.

अनुवाद: निर्मल कुमार साहू