हाथी मस्त, रागी पस्त, किसान त्रस्त

हमनी पहाड़ी आ खेत में भटकत, बड़ गोड़ के छाप खोजत बानी.

खाए वाला थरिया से भी बड़का-बड़का छाप देखाई देत बा. नरम-नरम माटी में ई बहुते गहिर धंसल बा. बहुते पुरान पड़ल ई सब चिन्हासी तनी-तनी मेटाइयो गइल बा. आउर तरह के दोसर निसान सब से हमनी के एह खास जानवर के चाल-चलन साफ बुझा रहल बा: मस्त टहलनाई, नीमन खनाई आ खूब हगनाई (गोबर करनाई). जगहे-जगहे तबाहियो मचवले बा: पत्थर के खंभा, तार वाला घेरा, गाछ आ दरवाजा...

हमनी तनी थम-थम के हाथी वाला अइसन सब चीज के फोटो खींच रहल बानी. हम ओकर गोड़ के छाप आपन फोटो एडिटर के भेजनी. ऊ मजाक में पूछेलन, “का एकरा संगे हाथियो लटकल बा!” हम मनावत रहीं, अइसन ना होखो.

कारण, सुनले बानी कि कृष्णागिरी जिला के गंगनहल्ली मोहल्ला में हाथी रउआ आशीर्वाद देवे आ केला खाए ना आवे. अइसन सभ्य त मंदिर के हाथी होखेला. सकेला. बाकिर ई त लागत बा जंगली बा, जे भुक्खड़ होखेला.

दिसंबर 2021 में तमिलनाडु के कृष्णागिरी जिला के रागी उगावे वाला किसान लोग से भेंट भइल, त अऩजाने में हमरा हाथी के कथा, हरि कथा अनंता के बारे में पता चलल. हम त इहे अंदाजा लगइले रहीं कि भेंट घरिया खेती से जुड़ल रुपइया-पइसा पर चरचा होई, बहस होई. हां, कुछ बात त उहे भइल. बाकिर जेतना हम सुननी ओकरा से इहे समझ में आइल कि हाथी सब के उपद्रव चलते किसान लोग भारी दिक्कत में बा. ऊ लोग खाली आपन परिवार के पेट पाले भर फसल (रागी) उगा पा रहल बा. इहो फसल के ऊ लोग 25-27 रुपइया किलो के भाव बेचे पर मजबूर बा, जबकि खरचा तब निकली जब ई 35-37 रुपइया किलो बिकाई. एह तरह से फसल के भाव कम होखे, हवा-बयार बदले आउर जादे बरखा होखे चलते किसान लोग खातिर खेती जवाल (भारी मुसीबत) हो गइल बा. आउर ओह पर हाथी सब के दांत आ सूंढ़ के तमाशा जोड़ दीहीं, त किसान के एह बोझ से कमर टूट गइल बा.

आनंदरामु रेड्डी के कहनाम बा, “हाथी बड़का होसियार होखेला. ऊ सब कांटा के बाड़ा पार करे आउर बिजली के तार से बचे के तरीका सीख लेले बा. जान गइल बा कि कवना तरह से गाछ के मदद से बिजली के तार सब से शॉर्ट सर्किट करावल जा सकेला. आ ऊ लोग हरमेसा झुंड के खोज में रहेला.” आनंद देंकनिकोट्टई तालुक में स्थित वाड्रा पलायम गांव के एगो किसान बाड़न. उ हमनी के मेलागिरी फॉरेस्ट रिजर्व ले गइलन. ई रिजर्व कावेरी उत्तर वन्य जीव अभ्यारण्य के हिस्सा बा.

केतना बरिस से हाथी सब जंगल से निकलके खेत-खलिहान में भटक रहल बा. मोट चमड़ी वाला एह जानवर सब झुंड में गांव आवेला, खेत में लागल मोटा-मोटी सब रागी चट कर जाला आ जे बचेला ओकरा चौपट कर देवेला. एहि चलते किसान लोग अब टमाटर, गेंदा आ गुलाब जइसन चीज उगावे के बारे में सोच रहल बा. अइसन फसल जेकरा हाथी ना खाए आ बजार में खूब बिकाए. ऊ हमरा तसल्ली देत बाड़न, “साल 2018-19 में, जब से बिजली के तार लागल, ई झुंड अब इहंवा नइखे आवत. बाकिर नर हाथी के केहू ना रोक सके. मोट्टई वाल, मक्काना, गिरी... भूख लगला पर ऊ सब खेत में घुस जाला आ हउअत्ती जेका फसल चट कर जाला. भूख के अलावे ई लोग कवनो दोसर चीज के बस में ना आवे.”

एस.आर. संजीव कुमार तमिलनाडु कृष्णागिरी आ धरमपुरी जिला के सम्मानित वन्यजीव वार्डन बाड़न. ऊ बतावत बाड़न, “जंगल आ जंगल के खासियत, आदमी आउर हाथी के बीच टंटा के जड़ बनल बा.” उनकर अनुमान बा कि खाली कृष्णागिरिए में कोई 330 गांव एह समस्या से त्रस्त बा.

एह इलाका में यात्रा के तनिके समय बाद हमरा संजीव कुमार से जूम पर बात भइल. ऊ केनेथ एंडरसन नेचर सोसायटी (कांस) के संस्थापक सदस्य आ पूर्व अध्यक्ष रह चुकल बानी. कांस, वन्यजीव संरक्षण के क्षेत्र में काम करे वाला एगो संस्था बा. स्क्रीन पर देखाई दे रहल चित्र पर हाथी जइसन कुछ चिन्हासी सब बनल बा. ऊ बतइलन, “एक-एक फोटो बता रहल बा, गांव में कइसन संघर्ष के स्थिति बनल बा. किसान लोग फसल के नुकसान के जे दावा कइले बा, ई जानकारी उहंई से आइल बा.”

उत्तर-पूर्वी मानसून खतम भइला के बाद जब फसल काटे के समय आवेला, तब हाथियन के झुंड खेत पर हमला करेला. “एकरा अलावे कइएक लोग मरियो गइल. कृष्णागिरी जिला में एक बरिस में 12 से 13 लोग के आपन जान गंवावे के पड़ल. काहेकि दिसंबर आ जनवरी के बीच, यानी रागी के फसल के समय बहुते लोग जुट जाला.”
हाथी सब के भी जान गइल. “साफ बा कि एकर बदला लेवल गइल बा. इहे ना, रेल के पटरी, रोड चाहे खुलल इनार में गिरके भी जान-माल के नुकसान भइल. हाथी सब जगंली सूअर खातिर बिछावल तार से भी बिजली के चपेट में आ जाला”

हाथी पौधा के सौ से जादे प्रजाति खा सकेला. संजीव बतावत बाड़न, “ऊ लोग पौधा के कइएक हिस्सा खा सकेला. पकड़ल गइल हाथी सब के देख के हमनी बता सकिला कि ई लोग 200 किलो घास खाला आउर 200 लीटर पानी पिएला.” ऊ इहो बात जोर देके बतावत बाड़न, “बाकिर जंगली हाथी सब खातिर अलग-अलग मौसम में खाए के चीज के मात्रा अलग-अलग हो सकत बा. एहि से ओह लोग के शारीरिक अवस्था भी बदल सकत बा.”

एकरा अलावे अब लैंटाना कमारा, होसुर इलाका के 85 से 90 फीसदी जंगल घेर लेले बा. ई बहुते तेजी से फइले आउर एगो परदेसी फूल वाला पौधा बा. ई बरियार पौधा हवे जेकरा बकरी आ गाय छूबो ना करे, आ ई जल्दी पसर जाला. “बांदीपुर आ नागरहोल में भी अइसने हाल बा. सफारी के रस्ता से लैंटाना हटा देवल गइल बा, जेसे जब हाथी घास खाए आवे, त लोग के पता चले.”

संजीव के कहनाम बा कि लैंटाना चलते हाथी आपन इलाका से बहरा आ जाला. एकरा अलावे, हाथी के रागी बहुते रसीला आ सवदगर लागेला. संजीव कहले, “हम हाथी रहतीं, त हमहूं रागी खाए अइतीं. खास करके नर हाथी सब पर त लागेला, खेत उजाड़े के भूत सवार रहेला. कारण, 25 से 35 बरिस के बीच, ओह लोग तेजी से बढ़ेला. एहि उमिर के हाथी सब सबले जादे जोखिम उठावेला.”

बाकिर मोट्टई वाल अइसन नइखे. ऊ बूढ़ा गइल बा आ ओकरा आपन हद पता बा. संजीव के हिसाब से ऊ 45 पार, 50 के करीब होखे वाला बा. संजीव ओकरा ‘दुलरुआ’ हाथी कहेलन. “ऊ मुस्त में रहे, हम तब के ओकर वीडियो देखले बानी.” (मुस्त नर हाथी सब में जैविक आ हारमोन से जुड़ल एगो स्थिति बा, जेकरा सामान्य आ सेहतमंद मानल जाला. बाकिर एकर माने इहो बा कि ऊ 2 से 4 महीना ले आउर जादे आक्रामक हो सकेला.) जादे करके अइसन हाथी गोस्सा में रहेला. बाकिर मोट्टई वाल बहुते शांत रहे. ऊ अलग अलग उमिर के हाथियन के झुंड में रहे. बाकिर आराम से एक कोना में ठाड़ बा. ऊ दुनिया देख चुकल बा.

संजीव के हिसाब से ऊ कोई 9.5 फीट लंबा, आ सायद 5 टन के होई. ओकर एगो संगतियो बा, मक्काना. ऊ लोग दोसर जवान नर हाथियन संगे भी घूमेला. “का ओकर संतानो होई?” हम पूछनी, त संजीव हंस के कहले, “बहुते होई.”

बाकिर जदि ओकर बढ़े के समय निकल गइल, त ऊ खेत काहे उजाड़ेला? संजीव कुमार कहले कि मोट्टई वाल आपन सेहत बनाके रखे खातिर अइसन करेला. “बाहिर ओकरा बढ़िया खाना मिलेला- रागी, कटहल, आम. ई सब खाए के बाद ऊ जंगल लउट जाला.” कुछ आउर नर हाथी बंदगोभी, सेम, फूलगोभी खाएला. संजीव कहले कि ई सब बाहरी खाना बा, जे उगावे में कीटनासको इस्तेमाल होखेला.

“तीन साल पहिले हालत बहुते पातर (खराब) रहे. जे किसान लोग टमाटर आ सेम में खूब पइसा लगवले रहे, ओह लोग के नुकसान भइल. आ जब हाथी एकर एक हिस्सा खा लेवेला, त ऊ ओकरा से पांच गुना जादे जियानो (बरबाद) करेला.” अब जादे से जादे किसान लोग अइसन फसल उगावत बा, जे हाथी के ललचावे वाला ना होखो. मोट्टई वाल आ ओकर संगतिया हाथी लोग असल में इलाका के खेती के तरीका बदल रहल बा.

गोपी शंकरसुब्रमणि वइसन गिनल-चुनल लोग में से बा, जे मोट्टई वाल के एकदम लगे से देखले बा. गोल्लापल्ली से आधा घंटा के दूरी पर उनकर एगो गैरसरकारी संगठन, नवदर्शनम बा. इहंवा हम आपन मेजबान गोपाकुमार मेनन संगे ठहरल बानी.

गोपी के जवना दोस्त के आवे के उम्मीद रहे, ओकरा जगह एगो दोसर लंबा-चौड़ा आ तनी संकोच वाला हाथी मिलल. बाकिर तबे मोट्टई चल अइलन, लगभग तुरंते. पहाड़ी पर बनल एगो सुंदर घर के बरंडा में बइठल गोपी हमनी के कहानी सुनावत बाड़. कुछ रागी के बारे में बा, कुछ हाथी के बारे में बा.

एयरोस्पेस इंजीनियरिंग के पढ़ाई करे वाला गोपी टेक्नोलॉजी छोड़के खेती-बाड़ी करे लगलन. गुमलापुरम गांव के गंगनहल्ली बस्ती में ऊ कइएक बरिस से नवदर्शनम ट्रस्ट के 100 एकड़ जमीन पर रहत आ काम करत बाड़न. ट्रस्ट के काम इलाका के लोग, आगंतुक आउर कार्यशाला से मिलल योगदान से चलेला. “हमनी जादे बड़-बड़ योजना ना बनाईं, हमनी लगे कवनो खास बजटो ना होखे. हमनी आपन काम के आसान आउर छोटा रखे के कोसिस करेनी.” खाद्य सहयोगी समूह ओह लोग के सबले जरूरी काम में से बा, जेमें लगे के गांववाला लोग भी जुड़ल बा. छोट जोत के किसान लोग के जिंदा रहे खातिर जंगल पर निर्भर रहे पड़त रहे. काहेकि साल के खाली कुछे महीना में खेती होखत रहे.

गोपी बतावेलन, “हमनी 30 ठो परिवार के मदद कइनी. एह में से जादेतर लोग गगनहल्ली से रहे. एह परिवार के हमनी जगह आ जानकारी मुहैया करइनी ताकि ऊ लोग बेहतर गुणवत्ता वाला खाद्य सामग्री तइयार कर सको, आ जंगल पर निर्भर रहे के आदत छोड़ सको.” अब रागी खास करके घरे में खाए खातिर उगावल जाला, आ बाकी जे बाच जाला, बेच देवल जाला.

नवदर्शनम में बितावल आपन 12 साल में गोपी जे सबले बड़ बदलाव देखलन, ऊ रागी के किसिम में रहे. जहंवा पहिले देसी किसिम के रागी उगावल जात रहे, ओकर जगह कम समय में तइयार हो जाए वाला हाइब्रिड ले लेलक. ई 4-5 महीना के जगह तीने महीना में तइयार हो जाला. उनकर कहनाम बा कि जब सूखल जमीन के फसल जादे समय ले जमीन पर रहेला, त ई नीमन होखेला, “ई जादे पोषण वाला होखेला.” साफ बा कि जल्दी तइयार हो जाए वाला रागी में पोषण कम होखेला. एहि से लोग अब एक के बदला रागी के दू गो मुड्डी (गेंद) खाए लागल बा.

बाकिर किसान लोग तबो हाइब्रिड फसल उगावे के मजबूर बा. काहेकि जल्दी तइयार होखे वाला फसल के कम दिन देखभाल करे के जरूरत पड़ेला. एकरा अलावे बाजार फसल के भाव में अंतर ना करे. गोपी बतावेलन कि एकरा अलावे किसान लोग के खेती के समय भी मिलावे पड़ेला. “जदि जादे लोग एक संगे निगरानी कर रहल बा, त आवाज देके बात एक कोना से दोसर कोना ले पहुंचावल जा सकेला. आ एह तरीका से हाथियन से खेत को बचावल जा सकेला. बाकिर जदि सभे लोग एके संगे जल्दी तइयार होखे वाला फसल लगावत बा, त हाथी त जरूर राउर फसल खातिर आई...”

हमनी के बतकही के बीच-बीच में चिरई-चुरुंग के मीठ बोली गूंजत रहे. चिरई सब सीटी बजावत, हंसत आ गावत रहे, अइसे कि लागे कि उहो लोग जंगल के कुछ कहानी सुनावे के चाहत बा.

दुपहरिया के खाना में उसिनल रागी आ पालक के झोर वाला तरकारी के बाद हमनी टटका मूंगफली गजक आ महकदार रागी के लड्डू खइनी. एकरा बनावे वाला विनोदम्मा आ बी. मंजुला, मेहरारू लोग कन्नड़ में बतियावत रहे (गोपी आ उनकर संगतिया हमरा खातिर अनुवाद करत रहस). बरखा आ हाथियन के समस्या के बीच उनकर रागी के जादे करके फसल सब जियान हो गइल रहे.

ऊ लोग बतइलक कि उनका इहंवा रोज रागी खाए जाला आ बच्चा लोग के भी खियावल जाला जबले ऊ लोग बड़ होके भात न खाए लागे. ई तनी “तनी गाढ़” खिचड़ी जेका होखेला. ऊ लोग बाजरा के साल भर के फसल बोरा में भरके घर में जमा कर लेवेला. जरूरत पड़ला पर एकरा पीस के काम में लावल जाला. बाकिर अबकी बरिस फसल खराब होखे चलते एकरा साल भर चलावल पहाड़ हो गइल बा.

दुनो मेहरारू लोग नवदर्शनम के लगे के गंगनहल्ली बस्ती के रहे वाला बा. ऊ लोग तुरंते खाना खाके लौटल बा. विनोदम्मा लगे चार एकड़ आ मंजुला लगे 1.5 एकड़ जमीन बा. ऊ लोग आपन खेत में रागी, धान, सेम आ सरसों उगावेला. मंजुला बतावत बाड़ी, “बेमौसम बरखा होखेला, त रागी के बीया अंकुरित हो जाला, पउधा फूट आवेला.” आउर तब फसल जियान हो जाला.

एकरा से बचे खातिर, विनोदम्मा के परिवार मसीन काम में लावे के सोचले बा. एह मसीन से जल्दी से फसल काटे आ रागी आ डंठल के जल्दी से अलग कइल संभव होई. ओह लोग के हाव-भाव अइसन रहे कि भाषा के अड़चन के बावजूद सब बात साफ समझ में आवत रहे. ऊ लोग बहुते बात इसारो से समझा देत रहे.

आदमी-जानवर के बीच के लड़ाई जाहिर करे खातिर भाषा के जरूरत ना रहे. “पहिले हमनी के कुछ मुआवजा मिल जात रहे. अब, ऊ (बाबू) लोग खाली फोटो लेवे आवेला. बाकिर हमनी के फूटलो कउड़ी नइखे मिलल.”

एगो हाथी आखिर केतना खात होई? अफरात, गोपी कहलन. एक बेर के बात बा, ऊ इयाद करत बाड़न कि दू ठो हाथी सब दू रात में रागी के दस बोरा चट कर गइल रहे. एतना रागी कोई 20 हजार के होई. “एगो हाथी त एक बेर में 21 ठो कटहल भकोस गइल. आउर गोभियो...”

किसान लोग के फसल के बचावे के चक्कर में रतजग्गा करे पड़ेला. गोपी बतावत बाड़न कि ऊ कइसे रागी के सीजन में दू बरिस से रात-रात भर मचान पर बइठल, आ हाथी सब पर नजर रखत गुजारत बाड़न. उनकर कहनाम बा कि अइसन जिनगी आसान नइखे, भोर होखत-होखत आदमी पस्त हो जाला. नवदर्शनम लगे के संकरा आ घुमावदार रोड पर हमनी मचान खोजे लगनी. कुछ मचान त कच्चा रहे, त कुछ पक्का आ तइयार रहे. जादेतर मचान में एक तरह के घंटी लगावल रहे. एगो टीन के डिब्बा आ छड़ी, रसड़ी में लगा के टांगल रहे. हाथी देखाई पड़ला पर किसान लोग एहि घंटी बजा के एक-दोसरा के चेतावे के काम करेला.

बेसी आफत त ई बा कि चाहे रउआ कुच्छो जतन कर लीहीं, हाथी केहू ना केहू तरहा फसल जियान करिए देवेला. गोपी बतावत बाड़न, “एगो हाथी आइल, त हमनी ओकरा रोके खातिर पटाखा फोड़नी, आउर दोसर जतन सब कइनी. बाकिर ऊ उहे कइलक, जे ओकरा करे के रहे.”

गंगनहल्ली इलाका में एगो अजीब समस्या देखे में आ रहल बा. बन बिभाग हाथी सब के रोखे खातिर जवन बाड़ा लगवले बा, ऊ नवदर्शनम के एकदम लगे आके खतम हो जाला. एह चलते जइसे कि हाथियन के उनकर जमीन पर आवे के न्यौता मिल जाला. पहिले एक बरिस में ऊ लोग 20 बेरा धावा बोलत रहे. आउर अब त जब फसल कटे खातिर तइयार होखेला, रात में अइसन होखे लागल बा.

गोपी आपन मुंडी हिलावत कहेलन, “जवना ओरी देखीं, लोग के चोट लाग रहल बा. हथियन के घेरे के काम सुरु हो जाला, त ओकरा रोकल आसान ना होखे.”

आदमी आ हाथी के बीच लड़ाई के संवेदनशील आ टिकाऊ हल निकालल जरूरी बा, काहे कि एह से कई तरह के दिक्कत जुड़ल बा. पहिल बात कि ई समस्या अपने में हाथी जेतना बिसाल बा. दुनिया भर में निकले वाला फ्रंटियर्स इन इकोलॉजी एंड एवोल्यूशन में छपल एगो पेपर के हिसाब से, “रोज के 1.25 डॉलर से भी कम पर गुजारा करे वाला 1.2 अरब लोग एशिया आ अफ्रीका के वइसन देस में रहेला, जहंवा हाथी के घनघोर आबादी बा.” आउर अइसन वंचित समुदाय के “अब मजबूरी में जगह आ संसाधन खातिर हाथी जइसन दोसर जीव सभ से जादे मुकाबला करे के पड़त बा.”

सम्मानित वन्यजीव प्रहरी संजीव कुमार बतावत बाड़न कि भारत में 22 राज्य के हाथी के समस्या से जूझे पड़ रहल बा. एह में सबले जादे घटना तमिलनाडु, कर्नाटक, केरल, ओडिशा, पस्चिम बंगाल, छत्तीसगढ़ आ असम में देखे के मिलेला.

पर्यावरण, बन आ जलवायु परिर्वतन मंत्रालय ओरी से राज्य सभा में प्रस्तुत आधिकारिक आंकड़ा बतावत बा कि तीनो बरिस से कम समय में (अप्रिल 2018 से दिसंबर 2020 ले) एह संघर्ष चलते 1,401 आदमी आ 301 हाथी सब मारल गइल.

कागज पर त किसान लोग के नुकसान भरे के बात कहल जाला. बाकिर बन, पर्यावरण आ जलवायु मंत्रालय के प्रोजेक्ट एलीफेंट डिवीजन ओरी से जारी 2017 भारत सरकार के एक दस्तावेज में मुआवजा में, अनुमानित फसल नुकसान के 60 प्रतिशत देवे के सिफारिश कइल गइल बा. एकरा में इहो कहल गइल बा, “जदि मुआवजा फसल मूल्य के सौ प्रतिशत बा, त किसान के आपन फसल बचावे खातिर कवनो प्रोत्साहन ना मिली.”

भारतीय वन सेवा अधिकारी आ होसुर के वाइल्डलाइफ वार्डन के सहायक वन संरक्षक के. कार्तिकेयन के कहनाम बा कि होसुर फॉरेस्ट डिवीजन में हर साल 200 हेक्टेयर से जादे के फसल जियान हो जाला. ऊ कहेली, “बन बिभाग के फसल के मुआवजा के मांग से जुड़ल किसानन के 800 से 1000 के बीच अरजी मिलेला. आ मुआवजा के सलाना भुगतान 80 लाख से 1 करोड़ के बीच बा.” एह में कवनो आदमी के जान गइला पर 5 लाख रुपइया के रकम भी शामिल बा. बता दीहीं कि एह इलाका में हाथियन चलते हर साल 13 लोग मारल जाला.

कार्तिकेयनी बतावेली, “एक एकड़ जमीन के नुकसान खातिर जादे से जादे 25,000 मुआवजा तय बा. दुर्भाग्य से, फल-फूल वाला फसल खातिर ई रकम पर्याप्त नइखे, काहेकि किसानन के प्रति एकड़ 70,000 रुपइया से जादे के नुकसान होखेला.”

एकरा अलावे, मुआवजा के दावा करे खातिर किसान के कागज सब जमा करे के होई. एकरा अलावे उनका खेती, चाहे बागवानी अधिकारी से खेत के निरीक्षण करवावे के होई. इहे ना, ग्राम प्रशासनिक अधिकारी (वीएओ) के उनकर जमीन के कागज सब जांचे आउर ओकरा प्रमाणित करे के होई. आखिर में, फॉरेस्ट रेंज अधिकारी के दौरा होई, ऊ फोटो लीही. जदि दावा साबित हो गइल, तब जाके जिला बन अधिकारी (डीएफओ) मुआवजा मंजूर करिहन.

एह बीच सबले खराब बात ई बा कि किसानन के, मुआवजा के रूप में मिले वाला 3,000 से 5,000 रकम पावे खातिर, कबो-कबो त खेती के तीन मौसल ले इंतिजारी ताके पड़ेला. कार्तिकेयनी कहेली, “जदि ई घुमंतू कोष (रिवॉल्विंग फंड) के सहारे तुरंत निपटा देवल जाव, त बेसी ठीक रहित.”

संजीव जी मानेलन कि एह संघर्ष के दूर करे से ना सिरिफ आदमी के जिनगी आउर ओकर रोजी-रोटी बची, बलुक एकरा से ओह लोग के जीवन-स्तर में भी सुधार आई. संगे-संगे, राज्य के बन बिभाग के प्रति लोग के भरोसो लउट सकेला.

महीनन ले रात-रात भर हाथियन के उत्पात से फसल के बचावल आसान काम नइखे, अइसन संजीव के कहनाम बा. एकरा चलते किसान लोग जल्दी घरे ना जा पावे. एनजीटी के बैठकी में, संजीव कुमार इयाद करत बाड़न कि एगो 60 बरिस के किसान जज से कहले रहे, “हमार मेहरारू चाहेली कि हम घरे जादे समय रहीं.” किसान के घरवाली के लागेला कि उनकर कहूं आउर चक्कर चल रहल बा.

किसान के चिंता आखिर में बन बिभाग खातिर मुसीबत बन जाला. “ऊ लोग बन बिभाग पर आपन भड़ास निकालेला. दफ्तर में तोड़-फोड़ करेला, सड़क जाम, अफसर लोग से गाली-गलौज आ हाथापाई तक करेला. एहि से बन बिभाग दबाव में आ जाला आउर उनकर सुरक्षा के काम में बाधा पहुंचावेला.”

आउर एह सबके अलावे हाथी सब के जान के भी खतरा बा. ई एगो गंभार मसला बा. काहेकि सन् 2017 में भइल जनगणना के मुताबिक तमिलनाडु में हाथी सब के तादाद 2,761 रहे. ई भारत के हाथी सब के आबादी 29,964 यानी, के मात्र 10 प्रतिशत बा.

प्रतिशोध, बिजली के झटका, सड़क आ रेल हादसा एह छोट आबादी खातिर बड़ खतरा बा. कबो-कबो त लागेला एह समस्या के कवनो समाधानो बा कि ना? अइसे संजीव आ दोसर लोग मूरति के मदद से एगो उपाय खोज लेले बा.

संजीव कुमार बतावत बाड़न, कृष्णागिरी जिला में मेलागिरी हाथी बाड़ के आइडिया दक्षिण अफ्रीका के एडो हाथी राष्ट्रीय उद्यान से आइल बा. “रमन सुकुमार (एलिफैंट मैन ऑफ इंडिया) हमरा एह बारे में बतइले रहस. उहंवा ऊ पुरान रेल पटरी आ लिफ्ट के तार पर एकर प्रयोग करके देखले रहस. आ अब ऊ बाड़ा लगा देले बाड़न. तब जाके ई टकराव समाप्त भइल.” संजीव एडो पार्क के विचार अपनइलन.

होसुर बन बिभाग एकरा पहिले ले, हाथियन के जंगल के भीतर आ खेत के बाहर रखे के कइएक प्रयास कइले रहे. बाकिर एक्को नतीजा ना निकलल. ऊ हाथियन के रोके खातिर जंगल के चारों ओरी गड्ढा खोदवइलन, सौर ऊर्जा से चले वाला बिजली के तार लगवइलन, कांटा वाला बाड़ा लगवइलन, इहंवा ले कि अफ्रीका से कांटा वाला गाछ सब भी मंगावइलन. बाकिर एह में से एक्को काम ना आइल.

आईएफएस दीपक बिलगी के जब होसुर डिवीजन में उप बनसंरक्षक तैनात कइल गइल रहे, तब एगो सफलता मिलल रहे. संजीव बतावेलन कि ऊ एह बात में दिलचस्पी लेलन, एकरा खातिर धन के जोगाड़ कइलन, कलेक्टर से बात कइलन आ “हमनी एक ठो नया तरीका आजमावे खातिर बाड़ लगावे के सोचनी,” संजीव समझावत कहेलन.

मजेदार बात त ई बा कि हाथी के असल ताकत के बारे में केहू के जादे अंदाजा नइखे. चाहे इहो नइखे पता कि ओह में से एगो, चाहे कई गो हाथी मिलके केतना भार उठा सकत बा, चाहे धकेल सकत बा. एहि से ऊ मुधुमलाई में नमूना खातिर एगो बाड़ लगवलन आ ओकर कुमकी (बंधल आ प्रशिक्षित) हाथियन से परखलन. ओह में एगो त मूरति रहे, एगो बिना दांत वाला हाथी रहे जे कोई 5 टन के रहे. मूरति त लोग के मार गिराए खातिर बदनाम रहे. रोचक बात त ई बा कि हाथी आ आदमी के बीच टकराव रोकल जा सके, एकरा खातिर तार के मजबूती के बारे में जरूरी जानकारी जुटावल ओह लोग के काम रहे.

संजीव कहेलन, “रउआ ओकरा देखके ओकर अतीत के थाह ना लगा सकीं. काहेकि ओकरा बहुत अच्छा तरीका से ट्रेंड कइल गइल रहे. बाद में ऊ बहुते सीधा आ शांत हो गइल.” मूरति अब सेवा मुक्त हो गइल बाड़न. जइसन कि हमरा पता चलल, हाथी सब के 55 साल में सेवा मुक्त कर देवल जाला. अच्छा जगह रहे, नीमन-नीमन खाना खाए, चाहे मादा हाथी से संभोग करे बात होखे, ई सब मामला में अब ऊ बहुते नीमन जिनगी जियत बाड़न. जंगल में अब ओकर कवनो सेवा के जरूरत ना होई, चाहे एकर इजाजत ना देवल जाई, काहेकि एकरा खातिर ओकरा जवान नर हाथी सबसे मुकाबला करे पड़ी.

मूरति के चक्कर में उनका पता चलल कि हाथी कुछ स्थिति में 1,800 किलो के बराबर बल लगा सकेला. ऊ लोग पहिले जे दू किमी के बाड़ बनइलक (मूरति से मिलल अनुभव के आधार पर खंभा डिजाइन कइल गइल), ऊ आनंद के घर से जादे दूर ना रहे.

“हमनी के एह प्रयास से बहुत कुछ सीखे के मिलल. मात्र एक हफ्ता में मोट्टई वाल संगे घूमे वाला मक्काना ओकरा तुड़ देलक. हमनी के ओकरा फेरू डिजाइन करे पड़ल. आउर अब ई मूल डिजाइन से 3.5 गुना जादे बरियार बा. स्टील के रसड़ी पहिलहीं से बहुते बरियार होला आ 12 टन भार सह सकेला. मतलब रउआ ओह रसड़ी से दू ठो हाथी के उठा सकिला.”

संजीव के कहनाम बा कि दोसर मॉडल के बनिस्पत, उनकर बाड़ के टूटे के संभावना मोटा-मोटी ना के बराबर बा. ई पहिले से बनल, स्टील से मजबूत कइल कंक्रीट के खंभा आ स्टील वायर रोप से बनल बा. हाथी सब एह बाड़, चाहे तार के तुड़ ना सके. बाकिर ऊ लोग एकरा पर चढ़े, चाहे एकरा पार करे के कोसिस कर सकेला. “एकरा से हमनी के समस्या के हल खोजे के मौका भेंटात रहे. टीम फसल के जियान करे आवे आ तबाही करके लउट रहल हाथी सब के भी आपन कैमरा में कैद कर लेलक.” एह में ऊ लोग जे देखलक, ओकरा आधार पर सुधार कइलक. संजीव हंसत कहेलन, “कबो-कबो हाथी खुदे आके देखावेला कि बाड़ा में अभी आउर सुधार करे के जरूरत बा.”

बिना बिजली वाला ई स्टील के बाड़ा बनावे में प्रति किमी 40 से 45 लाख रुपइया के खरचा पड़ेला. जिला कलेक्टर प्राइवेट सेक्टर के मदद से आउर संगे राज्य सरकार के तमिलनाडु इनोवेटिव इनिशिएटिव्स योजना के जरिए, पहिले दू किमी आ फेरू बाद में 10 किमी बाड़ बनावे खातिर धन जुटइलन.

हाथी सब के रोके खातिर 25 किमी के जे बाड़ लगावल गइल बा, ओह में से जादे बिना बिजली वाला बा. आ 10 ठो बाड़ा बिजली वाला (सौर ऊर्जा) बा. एकरा में वोल्टेज भी बहुते जादे, 10,000 वोल्ट बराबर, बा. ई बाड़ से गुजरे वाला करंट के बहुते छोट मात्रा बा जे हर घड़ी एह में से गुजरेला. संजीव के कहनाम बा, “साधारण तरीका से देखल जाव, त एकरा छूए से हाथी ना मरे. बिजली के झटका से जे मौत होखेला ऊ 230वी एसी करंट लागे से होखला. एतना करंट वाला तार हमनी के घर, चाहे खेत में लगावल रहेला. बाकिर हाथी के एकरा से कवनो खतरा नइखे. काहेकि इहंवा घर में उपयोग होखे वाला कंरट के ई कोई हजारवां हिस्सा ही होई. ना त एकरा से ऊ लोग मर जाई.”

डीसी वोल्टेज जब 6,000 वोल्ट ले गिर जाला, जइसे कि जदि कवनो गाछ बाड़ा पर गिर गइल, त हाथी सब एकरा आराम से पार कर जाला. कवनो-कवनो हाथी एतना चटोर होखेला कि ऊ बस सब कुछ उखाड़त चल जाला. संजीव कहेलन, “ओह लोग के दिमाग में का चल रहल बा, ई समझल आसान नइखे.”

“ठीक से देखल जाव, त बिजली पर कबो निर्भर रहे के ना चाहीं. सौर-ऊर्जा पर भरोसा ना कइल जा सके.” ओन्ने, हाथियन सब के बिजली के सब खेला मालूम चल गइल बा. इंसुलिन (बिजली से बचावे के परत) आ कंडक्टिविटी (बिजली पार करे के गुण) का बा, ऊ लोग समझ चुकल बा. ऊ लोग गाछ, चाहे गाछ के एगो टहनी लेवेला आ बाड़ा के छोटा करे लागेला. चाहे नर हाथी एकरा आपन दांत से तुड़ देवेला. ऊ लोग बूझ गइल बा कि दांत लगवला से बिजली के झटका ना लागी. संजीव हंसेलन, “हमरा लगे एगो फोटो बा. एकरा में एगो हाथी, बाड़ में करंट चालू बा कि ना देखे खातिर, गाछ के एगो छोट टहनी से बाड़ चेक करत रहे.”

आदमी आ हाथी के टक्कर के आर्थिक, पर्यावरणीय आउर मनोवैज्ञानिक नुकसान उठावे के पड़ रहल बा. सोच के देखीं कि रउआ अइसन बिजनेस कर रहल बानी, जेकरा में पता बा कि बिना राउर कवनो गलती के बरबाद हो सकत बा. कृष्णागिरी जिला में पुश्तन से रहत आ खेती करत आइल किसान लोग के इहे कथा बा, इहे कहानी बा.

संजीव कुमार बतावेलन कि इलाका के फसल चट करे, फसल पर धावा बोले के अलावे हाथी सब जादे दूर चले के भी सीख लेले बा. आउर ई सब पछिला 15 बरिस में भइल बा. “आरक्षित जंगल के लगे के एक, चाहे दू किमी भटके के जगह अब ई लोग आंध्र आ कर्नाटक में कोई 70 से 80 किमी के दूरी तय करे लागल बा. उहंवा ऊ लोग कुछ महीना बितावेला आ फेरु लउट आवेला.” होसुर इलाका में, जहंवा फसल पर सबले जादे आक्रमण होखेला, हाथी सब भारी आउर बड़ होखेला. ऊ लोग हट्टा-कट्टा होखेला आउर ओह लोग के कइएक ठो बच्चा रहेला.

नयका उमिर के हाथी सब जादे जोखिम उठावेला. संजीव आरक्षित जंगल के बाहर हाथी सब के मौत पर जानकारी जुटइले आउर एकर पड़ताल कइले बाड़न. उनका पता चलल बा कि मोटा-मोटी 60 से 70 प्रतिशत मौत जवान नर हाथी सब के होखेला.

आनंदा बतइलन कि उनका आजकल हाथी सब के टोली कमे लउकेला. हां, नर हाथी जरूर देखाई दे जाला: मोट्टई वाल, मक्काना आ गिरी. ऊ अबहियो व्हाट्सऐप पर हमरा हाथी सब के तबाही के फोटो सब भेजत रहेलन. उनकर आम के गिरल टहनी, केला के कचरल (मसलल) गाछ, चउपट कइल फल आ हाथी सब के ढेरे गोबर देखाई पड़ेला. बाकिर ऊ जबो बात करेलन, शांत रहेलन. उनका कबो गोस्साएल ना देखल गइल.

संजीव बतावेलन, “अइसन एह से कि जदि गोस्सा अइबो करेला, त सरकार चाहे बन बिभाग पर आवेला.” उनका पता बा कि मुआवजा बहुते देर से मिली, चाहे त नहियो मिली. एहि से ऊ एकरा खातिर दावा कइल छोड़ देले बाड़न. ई ठीक नइखे, काहेकि तब अइसन लड़ाई के असली गंभीरता पता ना चल पावे.

एह संघर्ष के कम करे के एके गो तरीका बा, हाथियन के जंगल से निकले ना देवल जाव. दिक्कत तबे दूर होई, जब ओकर कुदरती ठिकाना आबाद रही. “अइसन करे से 80 प्रतिशत समस्या के हल निकल आई. लैंटाना से निजात पावलो जरूरी बा.”

फिलहाल, जे 25 किमी के बाड़ लगावल गइल बा, ओहिजा झगड़ा 95 प्रतिशत ले कम हो गइल बा. एतना लमहर बाड़ हाथी-आदमी के टकराव वाला कुल इलाका के 25 फीसदी बा. कार्तिकेयनी कहेली, “मेलागिरी बाड़ चलते, हाथ सब दक्खिन दिशा ओरी जाए लागल बा. ई नीमन भइल, काहेकि ओह ओरी खूब दूर ले जंगल बा जे सत्यमंगलम ले जाला आ पूरा नीलगिरी तक फइलल बा. हाथी सब खातिर ई अच्छा भइल.”

जादेतर हिस्सा में मेलागिरी बाड़ एगो ठोस रुकावट बा. “जहंवा ई सौर्य ऊर्जा से चलेला, उहंवा एकरा से दिमागी डर पैदा होखेला. तनी सा झटका देके हाथी सब के दूर रखल जाला. बाकिर हाथी सब होसियार होखेलन. छत्ता वाला बाड़, चाहे बाघ के दहाड़, चाहे अलार्म कॉल से ना डेराए.” मिला-जुलाके, संजीव कुमार के कहे के मतलब बा कि सभे हाथियन के हरमेसा मूरख ना बनावल जा सकेला.

हाथी लोग आदमी से एक कदम आगे रहेला. जइसे कि ओह लोग के बुझा गइल होखे कि उनकरा के बंद करे के तरीका सिखावल जा रहल बा. एहि से ऊ लोग कैमरा ट्रैप तुड़े लागेला. संजीव बतावत जात बाड़न, आउर हमार नजर स्क्रीन पर लागल एगो फोटो पर बा: दू ठो हाथी बाड़ के सोझे संगे ठाड़, राय-बिचार कर रहल बा कि बाड़ा टपल (पार) कइसे जाव, आ रागी ले पहुंचल कइसे जाव...

लेखक, एह स्टोरी के रिपोर्टिंग करे घरिया मदद करे, आतिथ्य सत्कार करे आउर मूल्यवान इनपुट देवे खातिर गोपाकुमार मेनन के धन्यबाद कहे के चाहत बाड़ी.

शोध अध्ययन के बेंगलुरु के अजीम प्रेमजी बिस्वविद्यालय के अनुसंधान अनुदान कार्यक्रम 2020 के तहत अनुदान मिलल बा.

कवर फोटो (मोट्टई वाल): निशांत श्रीनिवासैय्या.

अनुवाद: स्वर्ण कांता